Jakə 4 - Dɔnɔn kə̂ Siki: Tar kə̂ aw arə təbbə

Ndəjə ɔju dɔ bbo nɛ̂nje kə̂ nangə̂ nəənn

¹ Ddɔje kə kɔlje kə̂ toje horose tə̂ inje dda wa? Dinje mə bbo nɛ̂nje tə̂ kə̂ to məse tə̂ ngaâ aw ddaje ddɔ rɔse tə̂.

² Ə-ddaje bbo nɛ̂n ngaâ ingaje nɛ̂n le ang a, ə-tɔlje dəw. Mə ddase ngaâ asəje ta kinga nɛ̂n ang a, ə-ddaje ddɔ kə naan ngaâ ə-kɔlje naan. Ingaje nɛ̂n ang, mba ə-dujuje nɛ̂n Lubba ang.

³ Ə-dujuje nɛ̂n Lubba njaa kara, ingaje ang, mba ə-dujuje nɛ̂n le kə dɔgɔlɛ̂ ang. Ə-dujuje nɛ̂n le ta tuju baa mba rɔ-nəəl ləse njaa.

⁴ See njê kə̂ aw ulaje pa-nja ləse naan tə̂! Ə-gərəje to dəwje kə̂ ndikije nɛ̂n kə̂ dɔ nangə tə̂ nəənn toje to njê-baanje lə Lubba ang wa? Yeenn a, dəw kə̂ ndiki kuwa buwa-kura kə nɛ̂n kə̂ dɔ nangə tə̂ nəənn to nje-baan lə Lubba.

⁵ Ooje to tar kə̂ Makəturu lə Lubba pa le to tar kə̂ baa wa? Makəturu le pa nan: «Lubba ndiki ndil kə̂ ne njaa nula məje tə̂ le nya.»

⁶ A Lubba dda kə je mə-maji arə uta dɔɛ̂, mba Makəturu laa pa nan: «Lubba mbətə tar lə dəwje kə̂ ooje rɔde bo, a n̂-dda mə-maji kə dəwje kə̂ ddaje rɔde tɛn baa.»

⁷ Yeenn a, maji karə ooje ta Lubba, ubbaje nangə kə Əsu a, nâ kaynse kaw ddəw əw.

⁸ Ə-ddeeje ngɔsi kə Lubba a, nâ ddee ngɔsi kə se tɔ. Ə-tokoje jise, see njê-nɛ̂n-ddaje kə̂ maji ang, arəje məse nda kayn, see dəwje kə̂ kəjə ləse to lo kâra ang.

⁹ Maji karə uwaje ndoo, ə-nɔnje ta əmje rɔse. Maji karə koko ləse təl to nɔn ngaâ rɔ-nəəl ləse təl to rɔ-katə.

¹⁰ Ə-ddaje rɔse tɛn baa nɔn gɔl Əbbə-dəwje tə̂ a, nâ kundase lo tə̂ kə̂ bo.

Ə-gangəje sariya dɔ naan tə̂ ang

¹¹ Ngakɔnʼmje, maji karə ə-paje tar kə̂ maji ang kə ri naan ang. Bbo dəw pa tar kə ri ngokɔɛ̂n maji ang wase gangə sariya dɔ ngokɔɛ̂n tə̂ a, n̂-pa tar dɔ ndu tə̂ maji ang ddəm n̂-gangə sariya dɔ ndu tə̂ ddəm. A bbo ə-gangə sariya dɔ ndu tə̂ a, ə-to nje-ngəm ndu le ang, ə-to nje-gangə sariya dɔ ndu tə̂ le.

¹² Lubba kâra baa to nje-kunn ndu ngaâ ne kâra baa tɔ â n̂-to nje-gangə sariya. Ne â nasə ta kaji dəw ngaâ ne tɔ â nasə ta karə dəw oy tɔ. A əi, ə-to nân bba aw gangə sariya dɔ nje-mari tə̂ wa?

Dəw gərə nɛ̂n kə̂ bara ang

¹³ Ooje bba, sese kə̂ aw paje nan: «Bbokənɛn wase bara a, ja kawje tɔkə bbe tə̂ kə̂ be wase kə be, ja ddaje tə̂ bbal kâra mba labbə nɛ̂n ta ja kingaje narɛ nya.»

¹⁴ A ə-gərəje kisi ləse kə̂ bara ang. Ə-toje ddəw kâra baa kə kundu dɔ maann kə̂ tee, a mbɔr ang a goto.

¹⁵ Maji karə ə-paje tar tokə be: «Bbo Əbbə-dəwje ndiki a, ja naynje kəm baa ngaâ ja ddaje nɛ̂n kə̂ tokə be, nɛ̂n kə̂ tokə be.»

¹⁶ A aw ɔsuje rɔse ngaâ aw undaje guse. Kɔsu-rɔ kə̂ baann tɔyn to nɛ̂n kə̂ maji ang.

¹⁷ Yeenn a, dəw kə̂ gərə ddəw dda nɛ̂n kə̂ maji bba dda ang, dda majang.