Apokalisi 22 - Dɔnɔn kə̂ Siki: Tar kə̂ aw arə təbbə

¹ Goe tə̂ a, anjə le tɔjum ba kə̂ maannɛ̂ aw arə təbbə dəw, kəmɛ̂ arɛ yərərə. Maann le ubba ngende-mbay tə̂ lə Lubba de kə Ngonn batə le aw tee

² ngaâ aw ula dann natə tɔkə bbe tə̂ le. Mbɔr maann tə̂ le ər joo kəm, kakə kə̂ aw arə dəw təbbə to tə̂. Mə bbal tə̂ kâra a, kakə le andə gɔl dɔku gire joo. Nɛyn kâra a, nandə gɔl kâra kâra. Kamɛ̂ to kuman kaji gəl-dəwje.

³ Marə nɛ̂n kə̂ ndu-ndɔɔl lə Lubba a to dɔɛ̂ tə̂ a to ang ngaa. Ngende-mbay lə Lubba kə lə Ngonn batə a toje mə bbe tə̂ le. Njê-kulaje lə Lubba a poleje.

⁴ Dâ koo kəmɛ̂ ngaâ ria a to əngo-nɔnde tə̂.

⁵ Til a goto ngaâ. Dəw a duju puru lambe wase a nginan karə kar ɔsu bba ta koo nɛ̂n lo ang. Mba ndoko lə Əbbə-dəwje Lubba njaa a kuru dɔde tə̂ ngaâ dâ kɔnje mbay bbal kə bbal.

Jeju pa tar ddee laa

⁶ Goe tə̂ a, anjə le pa arəm nan: «Tarje nəənn to tarje kə̂ tɔkɔrɔ ngaâ asə karə dəw unda məɛ̂ dɔɛ tə̂. Əbbə-dəwje Lubba kə̂ arə Ndil laa ddee dɔ njê-kilaje mbər tar tə̂ laa ula anjə laa karə tɔju njê-kulaje laa nɛ̂n kə̂ nayn ngɔsi baa ta ddee.»

⁷ Jeju pa nan: «Oo, maw ddee ngɔsi baa ngaa. Rɔ-nəəl to lə dəwje kə̂ aw ngəmje tarje kə̂ dila mbəre makəturu tə̂ nəənn!»

⁸ Əman Jan njaa moo nɛ̂nje nəənn kə mbim ddəm kə kəm ddəm. Ngaâ go nɛ̂nje tə̂ kə̂ moo kə mbim ddəm kə kəm ddəm le, m-tee moso nɔn gɔl anjə tə̂ kə̂ aw tɔjum nɛ̂nje le ta pole.

⁹ A n̂-pa narəm nan: «Ə-dda nɛ̂ɛnn ang! M-to nje-kula mari kə nje-kula mar ngakɔinje kə̂ toje to njê-kilaje mbər tar lə Lubba kə nje-kula mar dəwje kə̂ ngəmje tarje kə̂ makəturu tə̂ nəənn. Lubba â maji karə ə-pole.»

¹⁰ Goe tə̂ a, n̂-pa narəm nan: «Ə-kusu tarje lə Lubba kə̂ dila mbəre makəturu tə̂ nəənn ang. Mba kar nayn ngɔsi baa ngaa.

¹¹ Maji karə dəw kə̂ to gatə gatə ang, to gatə gatə ang kə kete kete bbay. Ngaâ nje-nɛ̂n-yərəw ddee to nje-nɛ̂n-yərəw kə kete kete bbay. A maji karə dəw kə̂ to gatə gatə dda nɛ̂n kə̂ gatə gatə kə kete kete bbay. Ngaâ maji karə dəw kə̂ sangə rɔɛ̂ mba Lubba, sangə rɔɛ̂ kə kete kete bbay.»

¹² Jeju pa nan: «Oo, maw ddee ngɔsi baa. Maw ddee kə kuka lə dəw kâra kâra asə kula-ddɛɛ̂.

¹³ M-to Alpa kə Omega. M-to dɔngɔr dəw ddəm dɔbɔyn dəw ddəm. M-to kunn-kutu nɛ̂n ddəm kɔsu kɔyn nɛ̂n ddəm.»

¹⁴ Maji arəde, de dəwje kə̂ daw tokoje kubbuje ləde, ta kinga ddəw kusa kandə kakə kə̂ aw arə dəw təbbə ddəm ta kandə kə ta-ndoko mə bbe tə̂ le ddəm.

¹⁵ See dəwje kə̂ ə-toje tokə lə bisije, njê-maalje kə njê-ddaje lo-to-majang, njê-tɔlje dəwje, njê-poloje kɔr, njê kə̂ ndikije ngəm ddəm aw ərəje ngəm ddəm ə-naynje ddaka nunn.

¹⁶ «Əman Jeju, mula anjə ləm karə pa tar-najije nəənn tɔyn arəse mə Egilisije tə̂. M-to dəw kə̂ gəl nuju tə̂ lə Dabbiti. M-to əndɛtɛrɛndɛn kə̂ ta lo-karɛ tə̂ kə̂ ndoko nya.»

¹⁷ Ndil de kə dɛnɛ̂n kə̂ nje-ngaw le n̂-paje nan: «Ə-ddee!» Maji karə dəw kə̂ oo tar nəənn pa tɔ nan: «Ə-ddee!» Maji karə dəw kə̂ kunda ɔɛ̂n ddee. Dəw kə̂ ndiki a, taa maann kə̂ aw arə təbbə dəw le baa njaa ay!

Dɔbɔyn tar

¹⁸ Əman Jan, m-pa marə dəwje tɔyn kə̂ oo tarje lə Lubba kə̂ dila mbəre makəturu tə̂ nəənn: Bbo dəw ila marə tar dɔɛ tə̂ a, Lubba a karə nɛ̂n kəm-to-ndooje kə̂ n̂-pa tarɛ̂ makəturu tə̂ nəənn oso dɔɛ̂ tə̂.

¹⁹ Â bbo dəw ɔru marə tarje kə̂ dila nɛ̂n mbər makəturu tə̂ nəənn kə ddang a, kandə kakə kə̂ aw arə dəw təbbə kə tɔkə bbe kə̂ maji tɔyn kə̂ n̂-gɔl mbɛɛ̂ kə̂ n̂-dda tarɛ̂ makəturu tə̂ nəənn, Lubba a kɔru jia tə̂ kə ddang.

²⁰ Dəw kə̂ pa tar-naji nɛ̂nje nəənn le, pa nan: «Tɔkɔrɔ, maw ddee ngɔsi baa.» Amɛnn! Ə-ddee, Əbbə-dəwje Jeju!

²¹ Maji karə mə-maji lə Əbbə-dəwje Jeju nayn kə se tɔyn.