Apokalisi 18 - Dɔnɔn kə̂ Siki: Tar kə̂ aw arə təbbə

Koso lə Babilɔnn

¹ Goe tə̂ a, moo marə anjə dang in darâ aw ddisi. Nee kə singa kə̂ ngəng ngaâ ndoko laa uru dɔ nangə tə̂.

² Nuru əkii kə singa nan: «Noso mban, noso mban, Babilɔnn bbe-bo le! N̂-ddee to lo dda bbe kə lo kiya-rɔ le ndilje kə̂ maji ang dang dang tɔyn, kə əəlje kə̂ maji ang dang dang tɔyn kə̂ dəwje ndikije ang.

³ Mba gəl-dəwje tɔyn ayje koto bɛn kaya laa kə̂ ɔn to puru le. Tɔkə mbayje kə̂ dɔ nangə tə̂ ddaje nɛ̂n-kaya dɔɛ̂ tə̂. Ngaâ njê-nɛ̂n-labbəje kə̂ dɔ nangə tə̂ ingaje nɛ̂n nya ɔju dɔ nɛ̂n-kingaje kə̂ gatɛ̂ ngəng kə̂ n̂-dda bboe nya le.»

⁴ Goe tə̂ a, moo marə ndu mə dara tə̂ nan: «See dəwje ləm, ə-teeje mə tɔkə bbe tə̂ nəənn kə ddang, mba karə ə-ddaje saa majang laa ang, bba karə nɛ̂n kəm-to-ndoo oso dɔse tə̂ saa tɔ ang.

⁵ Mba majangje laa banyaje kə dɔ naan tə̂ dɔ naan tə̂ ndərəng ɔru dara arə Lubba ole məɛ̂ dɔ nɛ̂n-ddaje tə̂ laa kə̂ toje gatə gatə ang le.

⁶ Maji karə ə-ddaje saa nɛ̂n tokə ye kə̂ n̂-dda kə njê-marɛ̂je. Nɛ̂n kə̂ n̂-dda kə dəw gɔl kâra a, ə-ddaje saa gɔl joo. Əngo kə̂ nungu koto bɛn mə tə̂ a, unguje tə̂ gɔl joo arɛ̂je.

⁷ N̂-ndiki kɔsu gaji rɔɛ̂ nya ddəm n̂-ndiki nɛ̂n-kinga nya ddəm. Yeenn bba, ulaje kəmɛ̂ ndoo, arəje nuwa ndoo tokə baann tɔ. Mba n̂-pa məɛ̂ tə̂ nan: ‹Misi to dɛnɛ̂n-mbay, m-to dɛnɛ̂n-ndubba ang ngaâ mâ kuwa-ndoo ndɔ kâra ang.›

⁸ Mba yeenn bba, nɛ̂n kəm-to-ndooje kə̂ toje ɔju dɔɛ̂ a kosoje dɔɛ̂ tə̂ ndɔ kâra baa njaa. Nɛ̂nje le toje to: Yo, ndoo, tɔkə bbo ngaâ puru a kɔɛ̂n. Mba Əbbə-dəwje Lubba kə̂ gangə sariya dɔɛ̂ tə̂ le to nje-singa-mɔngu.»

⁹ Yeenn ngaâ tɔkə mbayje tɔyn kə̂ dɔ nangə tə̂ kə̂ ddaje nɛ̂n-kaya dɔɛ̂ tə̂ ddəm ddaje saa bbo nɛ̂n-kingaje ddəm le a nɔnje ngaâ dâ ndingaje rɔde kar tə̂ kə̂ dâ kooje sa-puru kə̂ aw ɔɛ̂n le.

¹⁰ Ndoo kə̂ naw noo le a ddade bbəəl ngaâ dâ karje ddəw əw bba dâ paje nan: «Nɛ̂n kəm-to-ndoo bbo! Nɛ̂n kəm-to-ndoo kə̂ baann bba be wa! Bbe-bo, Babilɔnn, bbe-bo kə̂ ngəng! Gɔl kar tə̂ kâra baa njaa sariya ddee dɔi tə̂ tokə be nəənn!»

¹¹ Njê-nɛ̂n-labbəje kə̂ dɔ nangə tə̂ nɔnje ngaâ uwaje ndoo mbɛɛ̂, mba nje-ndoko nɛ̂nje ləde goto ngaa.

¹² Nɛ̂nje tokə andə, andə-narɛ, kɔr ərje kə̂ gatɛ̂ ngəng, mərəje, kubbuje kə̂ n̂-dda kə lɛɛn kə̂ kasɛ kə̂ ndɔnrɛn kə yeje kə̂ n̂-dda kə nɛ̂n kə̂ ria nan sowa, kamje tɔyn kə̂ ətəje maji, nɛ̂nje kə̂ n̂-dda kə ngangə kərə, nɛ̂nje tɔyn kə̂ n̂-dda kə kakə kə̂ gatɛ̂ ngəng, nɛ̂nje kə̂ n̂-dda kə tungu kə andə-narɛ wase kə ər kə̂ kura kə̂ ria nan marbərə.

¹³ Nɛ̂nje kə̂ maji dang dang kə̂ daw njiri nɛ̂n nɛ̂n, dukann, nɛ̂n kə̂ ria nan mir, nɔn-kakə kə̂ ətə maji, bɛn, ubbu, nduju, ble, mangəje, batəje, sundaje kə sarɛtəje, bbərəje kə dəwje kə̂ duwade ta ddɔ tə̂ to bbərəje.

¹⁴ Njê-nɛ̂n-labbəje le paje nan: «Nɛ̂nje kə̂ aw dda bboe nya ləw le aynje awje ddəw əw səi ngaa. Nɛ̂n-kingaje ləi kə̂ maji wase ndɔnrɛn le gotoje tɔyn jii tə̂ ngaa. Dâ təl kinga ture tə̂ ang ngaa.»

¹⁵ Njê-nɛ̂n-labbəje kə̂ ingaje nɛ̂n mbɛɛ̂ le a kooje ndoo kə̂ naw noo le a, bbəəl a kuta dɔde ngaâ dâ karje ddəw əw bba dâ nɔnje ddəm dâ kuwaje ndoo ddəm.

¹⁶ Dâ paje nan: «Nɛ̂n kəm-to-ndoo bbo! Nɛ̂n kəm-to-ndoo bbo! Dɔngɔr, bbe-bo nəənn aw ula kubbuje kə̂ kura kə̂ kasɛ kə̂ ndɔnrɛn. Naw nula nɛ̂n-mbije kə nɛ̂n-jije kə̂ n̂-dda kə andə kə kɔr ərje kə̂ gatɛ̂ ngəng kə mərəje!

¹⁷ A mə gɔl kar tə̂ kâra baa njaa nɛ̂n-kingaje laa kə̂ banya le tɔyn tujuje bbo!» Ngaâ njê-kuwaje tɔkə toje tɔyn kə dəwje kə̂ aw ddaje kula dɔ ba-katə tə̂ kə njê kə̂ aw njaje dɔ ba-katə tə̂ kə tɔkə to kə dəwje kə̂ aw ingaje nɛ̂n-kusa tade ddəw kula tə̂ kə̂ dɔ ba-katə tə̂, darje ddəw əw

¹⁸ ngaâ dooje sa-puru kə̂ aw ɔɛ̂n le a, duruje əkii nan: «Tɔkə bbe kə̂ dda bba asə naan kə bbe-bo wa?»

¹⁹ Daw jinje əbaburu nangə dunguje dɔde tə̂, n̂-nɔnje, n̂-ndingaje ndoo n̂-paje nan: «Nɛ̂n kəm-to-ndoo bbo! Nɛ̂n kəm-to-ndoo bbo! Bbe-bo, bbe kə̂ ddəw nɛ̂n-kinga tə̂ laa kə̂ banya, njê tɔkə toje tɔyn ingaje nɛ̂n nɛ̂n le, mə gɔl kar tə̂ kâra baa njaa n̂-təl to dɔ-ndubba bbo!»

²⁰ Dəwje kə̂ darâ, ə-ddaje rɔ-nəəl mba koso lə Babilɔnn le. See dəwje lə Lubba, see njê-kaw-kulaje kə njê-kilaje mbər tar lə Lubba, ə-ddaje rɔ-nəəl tɔ, mba Lubba gangə sariya dɔɛ̂ tə̂ mba nɛ̂n kə̂ n̂-dda kə se le.

²¹ Marə anjə kə̂ nje-singa-mɔngu unn marə tɔkə biri-ər kə̂ ɔɔy ila mə ba-katə tə̂ ngaâ pa nan: «Dâ kila Babilɔnn bbe-bo kə singa tokə be tɔ: Dâ təl kingɛ̂ ang ngaa.

²² Dəw a koo kɔru nɛ̂n-kəm lə njê-kondeje bbe ləi ang ngaa ddəm ndu njê-nɔn-paje ang ngaa ddəm kɔru njê-kɔlje mbula, kə njê-toje təbbə ang ddəm. Dəw a kinga nje-gusu kə̂ aw dda marə kula kâra bbe ləi ang ngaa ddəm dəw a koo kɔru nɛ̂n kə̂ daw duru birî bbeê ləi ang ngaa ddəm.

²³ Puru lambe a ndoko mə bbe tə̂ ləi ang ngaa ddəm dəw a koo ndu basan de kə ngonn mandə kə̂ n̂-taaje naan tokə siki bbeê ləi ang ngaa ddəm mba njê-nɛ̂n-labbəje kə̂ bbeê ləi toje to dəwje kə̂ ngəng kə̂ dɔ nangə tə̂ ngaâ ərə gəl-dəwje tɔyn kə nɛ̂n-kumanje ləi kə̂ aw dda arə n̂-ndəəmje ddəw.

²⁴ Mba mə bbe tə̂ ləi â n̂-kayn məsə dəwje tɔyn kə̂ n̂-tɔlde dɔ nangə tə̂ ddəm məsə njê-kilaje mbər tar lə Lubba ddəm dəwje lə Lubba ddəm.»