Apokalisi 15 - Dɔnɔn kə̂ Siki: Tar kə̂ aw arə təbbə

Tar lə anjəje siri kə tar dɔbɔyn nɛ̂n kəm-to-ndooje

¹ Goe tə̂ a, moo marə nɛ̂n kə̂ bo kə̂ kura laa dum dɔ dəwje mə dara tə̂: Anjəje siri uwaje nɛ̂n kəm-to-ndooje siri jide tə̂. To dɔbɔyn nɛ̂n kəm-to-ndooje, mba ddəwe tə̂ â, wungu lə Lubba a ddee nɛ̂n dɔ dəwje tə̂.

² Moo marə nɛ̂n tokə lə ba-ər kə̂ kəmɛ̂ arɛ yərərə kə̂ pole naan kə puru. Dəwje kə̂ tətəje da le ddəm ətaar laa ddəm nimɔrɔ ria ddəm kə ddɔ le arje dɔ ba-ər tə̂ kə̂ kəmɛ̂ arɛ yərərə le. Duwaje kondeje lə Lubba jide tə̂.

³ Daw dɔsuje pa lə Mɔyijə kə̂ to nje-kula lə Lubba ddəm pa lə Ngonn batə ddəm nan: «Əbbə-dəwje Lubba kə̂ Nje-singa-mɔngu, nɛ̂nje kə̂ ə-dda bo nya ddəm kura ləde dum dɔ dəwje ddəm! Tɔkə mbay lə gəl-dəwje, nɛ̂n kə̂ aw dda to gatə gatə ddəm to nɛ̂n kə̂ tɔkɔrɔ ddəm.

⁴ Əbbə-dəwje, nân bba a bbəəl rii ang ngaâ a kɔsu gaji rii ang wa? Mba əi kâra baa â ə-maji tɔyn. Gəl-dəwje tɔyn a ddee kɔsuje məkəjə-gɔlde nangə̂ nɔin tə̂, mba dede tɔyn dooje nɛ̂n-ddaje ləi kə̂ gatə gatə.»

⁵ Goe tə̂ a, moo kəy-polo Lubba mə dara tə̂, tɛɛ̂ tokə təəyn. Kəy-tande kinga-naan lə Lubba kə dəwje laa to məɛ tə̂.

⁶ Anjəje siri kə̂ uwaje nɛ̂n kəm-to-ndooje siri jide tə̂ le inje kəy-polo Lubba tə̂ le teeje. Dulaje kubbu kə̂ n̂-dda kə lɛn kə̂ maji kə̂ ndɔnrɛn. N̂-tɔje əndaar-kuwa-bbər kə̂ n̂-dda kə andə karde tə̂.

⁷ Nɛ̂nje kə̂ toje kəm baa kə̂ sɔ le, marɛ̂ kâra arə əngoje kə̂ n̂-dda kə andə-narɛ anjəje kə̂ siri le kâra kâra. Wungu lə Lubba kə̂ Nje-kisi kə ndɔ kə ndɔ ddusu əngoje le.

⁸ Sa kə̂ tɔju piti lə Lubba kə singa-mɔngu laa taa mə kəy-polo Lubba le tɔyn. Dəw kâra asə ta kandə kəy-polo Lubba tə̂ le ang ndərəng ta nɛ̂n kəm-to-ndooje kə̂ siri kə̂ ji anjəje tə̂ kə̂ siri le tunga bba.