Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Apokalisi 14 - Dɔnɔn kə̂ Siki: Tar kə̂ aw arə təbbə


Pa kə̂ njê kə̂ Ngonn batə uka dɔde ɔsuje

1 Maa lo bbay a, moo Ngonn batə le ar dɔ ddingiri tə̂ kə̂ Sinyɔ. Dəwje doro kɔr kâra kə dɔsɔ gire sɔ (144 000) eeje mbɔrɛ̂ tə̂. Ri Ngonn batə le kə ri bɔɛ̂je toje əngo-nɔnde tə̂.

2 Moo marə ndu bbar mə dara tə̂ tokə kɔru tɔkə ba kə̂ aw ula ddəm tokə ndi kə̂ aw ndangə kə singa ddəm. Ndu kə̂ moo le bbar tokə kɔru konde kə̂ dəwje aw əmje.

3 Dəwje le aw ɔsuje pa kə̂ siki nɔn ngende-mbay tə̂ le, nɔn nɛ̂nje tə̂ kə̂ toje kəm baa kə̂ sɔ le kə nɔn tɔkəje tə̂ le. Dəw kâra kə̂ a kasə ndo pa le goto. Bbayɛ̂ njaa to dede kə̂ doro kɔr kâra kə dɔsɔ gire sɔ (144 000) kə̂ Ngonn batə uka dɔde dɔ nangə tə̂ le.

4 Dede le dulaje rɔde nɛ̂n-yərəw tə̂ ddəw tə̂ lə dɛnɛ̂nje ang, mba n̂-gərəje dɛnɛ̂n ang. Daw dunnje go Ngonn batə le loje tə̂ tɔyn kə̂ naw naw tə̂. Lubba uka dɔde horo dəwje tə̂ karə n̂-ddeeje to dɔngɔr dəwje laa ddəm lə Ngonn batə le ddəm.

5 Dərəje ngəm ndɔ kâra ang. Tar kâra to dɔde tə̂ ang.


Anjəje mota ilaje mbər sariya lə Lubba

6 Goe ta a, moo marə anjə dang aw ila mə dara tə̂ taar nu. Tar kə̂ Maji kə̂ to kə ndɔ kə ndɔ to ta karə n̂-pa narə dəwje kə̂ dɔ nangə tə̂: Dəwje kə̂ gəlde dang dang tɔyn, dəwje kə̂ gəl-kujude dang dang, dəwje kə̂ ndɔn-tarje ləde dang dang kə dəwje kə̂ bbeje tə̂ dang dang tɔyn.

7 Anjə le pa tar kə singa nan: «Ə-bbəəlje Lubba, ɔsuje gajɛ̂! Mba kar kə̂ nâ gangə nɛ̂n sariya dɔ dəwje tə̂ asə ngaa. Ə-poloje nje-dda dara kə nangə kə ba-katə kə ddutu dɔ maannje.»

8 Marə anjə kə̂ to joo laa ddee go ne tə̂ kə̂ dɔngɔr le ngaâ pa nan: «Babilɔnn kə̂ to bbe-bo le oso mban, oso mban. Ne a narə dəwje kə̂ gəlde dang dang tɔyn ayje bɛn kaya laa kə̂ ɔn to puru le.»

9 Marə anjə kə̂ dang kə̂ to mota laa ddee go njê kə̂ joo tə̂ le ngaâ pa kə singa nan: «Bbo dəw ɔsu məkəjə-gɔlɛ̂ nangə̂ nɔn da tə̂ le kə nɔn ətaar tə̂ kə̂ unn da-rɔ da le ngaâ dɔsu əndaji da le əngo-nɔɛ̂n tə̂ wase mə jia tə̂ a,

10 ne kara nâ kay bɛn tɔkə wungu lə Lubba, bɛn kə̂ n̂-pole kə maann ang a dungu mə əngo wungu tə̂ laa. Ngaâ nâ koo ndoo kəm puru tə̂ kə kəm supərə tə̂, kəm anjəje tə̂ kə̂ majije tɔyn ddəm kəm Ngonn batə tə̂ ddəm.

11 Puru kə̂ aw ula kəmde ndoo le sɛɛ̂ a kubba bbal kə bbal. Ngaâ dəwje kə̂ aw poloje da le kə ətaar kə̂ ndaji da kə̂ unn da-rɔ da le kə dede kə̂ dɔsu əndaji ri da le rɔde tə̂, til kə kar, dâ kuwaje rɔde ang.»

12 Lo tə̂ nəənn to ta karə dəwje lə Lubba kə̂ aw ngəmje nduje laa ngaâ naynje ddəw məde tə̂ kə̂ dunnje darə Jeju le duwaje darə ngəng.

13 Moo marə ndu kə̂ in darâ pa arəm nan: «Uja tar nəənn makəturu tə̂: ‹Maji arəde, de dəwje kə̂ n̂-naynje ddəw tə̂ lə Əbbə-dəwje ndərəng doyje nɛ̂n bbasinɛn nəənn.› Ndil-mə-nda pa nan: ‹Tɔkɔrɔ njaa, maji karə duwaje rɔde go kula tə̂ kə̂ ngəng kə̂ n̂-ddaje, mba kulaje kə̂ n̂-ddaje a kunn gode.› »


Tar kuja ko-ndɔɔ kə̂ dɔ nangə tə̂

14 Maa lo bbay a, moo marə mum kə̂ nda to nda. Marə nɛ̂n kə̂ unn da-rɔ dəw isi dɔ mum tə̂ le. Nunda əjɔkudɔ kə̂ n̂-dda kə andə dɔɛ̂ tə̂ ngaâ nuwa kiya kə̂ atə jia tə̂.

15 Marə anjə dang in kəy-polo Lubba tə̂ tee ngaâ uru əkii kə singa arə dəw kə̂ isi dɔ mum tə̂ le nan: «Ula kiya ləi bbo uja ko le, mba kar kuja ko le asə ngaa. Kandə-ko kə̂ dɔ nangə tə̂ sangə ngaa.»

16 Yeenn ngaâ dəw kə̂ isi dɔ mum tə̂ le ula kiya laa le dɔ nangə tə̂ ngaâ uja ko kə̂ dɔ nangə tə̂ tɔyn.

17 Goe tə̂ a, marə anjə dang in kəy-polo Lubba tə̂ darâ tee. Ne njaa kara nuwa kiya kə̂ atə jia tə̂ tɔ.

18 Marə anjə dang bbay in ər bann tə̂ tee. Nee kə singa kunn ndu karə puru dda nɛ̂n nɛ̂n. Nuru əkii kə singa narə anjə kə̂ uwa kiya kə̂ atə le nan: «Ula kiya ləi kə̂ atə le bbo uja nɛ̂n kandə binyə kə̂ dɔ nangə tə̂, mba kandə binyə le oy mban.»

19 Anjə le ula kiya laa le dɔ nangə tə̂ ngaâ gangə jinga binyə kə̂ dɔ nangə tə̂ le ungu mə nɛ̂n-kore-maann binyə tə̂ kə̂ tɔju tɔkə wungu lə Lubba.

20 Dore binyə mə nɛ̂n-kore-maann binyə tə̂ le giri bbe tə̂ ddaka. Məsə in mə nɛ̂n-kore-maann binyə tə̂ le tee ngaâ siri kə taar ndərəng taa lo asə kilometere kɔr mota (300). Bbo sunda uru mə məsə tə̂ le a, məsə le a kuwɛ̂ tɛɛ̂ tə̂, lo kilɛ̂ jam tə̂.

ကြှနျုပျတို့နောကျလိုကျပါ:



ကြော်ငြာတွေ