2 Tesalonisinyɛje 1 - Dɔnɔn kə̂ Siki: Tar kə̂ aw arə təbbə

Tar lapiya

¹ Əman Pɔl kə Silas kə Timɔte, n-dda makəturu nəənn jarə njê-mə-kunnje kə̂ Egilisi tə̂ kə̂ Tesalonikə, kə̂ toje to dəwje lə Bɔjeje Lubba kə lə Əbbə-dəwje Jeju-Kristə.

² Maji karə Lubba kə̂ Bɔ kə Əbbə-dəwje Jeju-Kristə n̂-ddaje kə se mə-maji ngaâ darə məse wul lɔm.

Əbbə-dəwje a ddee gangə sariya

³ Ngakɔnje, to tar ləje ta karə wooyo Lubba kə kar tɔyn mbase. To nɛ̂n kə to kə dɔgɔlɛ̂ njaa. Mba mə-kunn ləse aw bo kə kete kete ngaâ aw ndikije naan kə kete kete.

⁴ Nɛ̂ɛnn le dda arə jaw junda guje mbase, mba wurse kə̂ aw tɔje kə mə-kunn ləse kə̂ aw uwaje arəje ngəng mə nɛ̂n kəm-to-ndooje tə̂ kə mə nɛ̂n-singaje tə̂ kə̂ aw ingase le.

⁵ Nɛ̂njeenn aw tɔjuje to sariya lə Lubba to gatə gatə ngaâ toje to nɛ̂nje kə̂ a ddaje karə ə-ddeeje to dəwje kə̂ asəje ta kandə mə Bbe-kɔn tə̂ lə Lubba kə̂ aw ooje ndoo mbɛɛ̂ le.

⁶ Mba to kə dɔgɔlɛ̂ karə dəwje kə̂ ulaje kəmse ndoo tə̂ le, Lubba ula kəmde ndoo tɔ.

⁷ Ngaâ karə n̂-dda narə sese kə̂ aw ooje ndoo le kara, uwaje rɔse kə je, kar tə̂ kə̂ Əbbə-dəwje Jeju a kunda lo tee ngaâ a kin darâ ddee kə anjəje laa kə̂ toje to njê-singa-mɔnguje le.

⁸ Nâ ddee dann ndɔn-puru tə̂ kə̂ aw ɔn ta kila barə dɔ dəwje tə̂ kə̂ gərəje Lubba ang ngaâ mbətəje ta dda nɛ̂n kə turu ndu Tar kə̂ Maji lə Əbbə-dəwje Jeju.

⁹ Sariya ləde a to tuju kə̂ dâ kubbaje kə ndɔ kə ndɔ. Dâ kisije ddəw əw kə Əbbə-dəwje ddəm ddəw əw kə singa-mɔngu laa kə̂ to nɛ̂n-piti ddəm.

¹⁰ Nɛ̂ɛnn le a to kar tə̂ kə̂ nâ ddee nɛ̂n karə dəwje laa walɛ̂je, karə dəwje kə̂ ooje məde tə̂ saa ɛɛ̂je kə koko. Sese kara â keeje horode tə̂ tɔ, mba ooje məse tə̂ kə tar kə̂ n-pa jarəse le.

¹¹ Mba yeenn bba, jaw duju Lubba kə ndɔ tɔyn mba tar ləse, karə narə pa-nja ləse to lə dəwje kə̂ ne njaa n̂-bbarde. Jaw duju karə ddəw singa-mɔngu tə̂ laa, narəse singa karə ə-ddaje nɛ̂nje tɔyn kə̂ maji kə̂ ə-ndikije ta dda ngaâ karə ə-ddaje kulaje ddəw mə-kunn tə̂ ləse.

¹² Yeenn bba ri Əbbəjeje Jeju a kinga piti mbase ngaâ sese kara a kingaje piti mbɛɛ̂, ddəw mə-maji tə̂ lə Lubba ləje kə lə Əbbəjeje Jeju-Kristə.