2 Timɔte 2 - Dɔnɔn kə̂ Siki: Tar kə̂ aw arə təbbə

Nje-ddɔ lə Jeju-Kristə kə̂ tɔkɔrɔ

¹ Əi ngonnəm, maji karə inga singa ddəw mə-maji tə̂ kə̂ Lubba dda kə je ddəw mə-kâra tə̂ kə̂ n-dda kə Jeju-Kristə le.

² Tar kə̂ tee tam tə̂ kəm njê-tar-najije tə̂ kə̂ banya le, ə-pa arə njê-mə-kunnje kə̂ unda məi dɔde tə̂, karə dede njaa kara dasəje ta pa karə marə dəwje kə kete tɔ.

³ Maji karə oo səm ndoo tokə nje-ddɔ lə Jeju-Kristə kə̂ tɔkɔrɔ njaa.

⁴ Dəw kə̂ unn rɔɛ̂ to mbamba ngaâ ndiki ta dda karə rɔ dəw kə̂ ɔn dɔɛ̂ nəəle, aa lo kə nɛ̂nje tə̂ lə siwilje ang ngaa.

⁵ Ddəw kâra baa, dəwje kə̂ aw taje naan ddəw marə nɛ̂nje tə̂ tokə lə kayn ngɔru, dəw kə̂ ayn ngɔru le kə ddəwe bba a kinga kuka laa.

⁶ Nje-ndɔɔ kə̂ dda kula oo nɛ̂n ndoo njaa, a kinga ko-ndɔɔ laa le dɔngɔr bba kəsə dəwje a kingaje.

⁷ Maji karə əjə tar kə̂ maw pa nəənn oo, mba Əbbə-dəwje a dda karə ə-gərə kandə tarje le tɔyn.

⁸ Ole məi dɔ Jeju-Kristə tə̂ kə̂ oy a, ndol. N̂-to ngonn-ka Dabbiti tokə Tar kə̂ Maji kə̂ maw mila mbəre le pa.

⁹ Tar kə̂ Maji le â moo ndoo mbɛɛ̂ ndərəng n̂-tɔm dilam kəy-kula tə̂ tokə lə nje-nɛ̂n-dda kə̂ maji ang. A tar lə Lubba â n̂-tɔ ang.

¹⁰ Mba yeenn bba maw tɔ wurum nɛ̂nje tə̂ tɔyn mba dəwje kə̂ Lubba mbərəde, mba karə dede njaa kara dingaje kaji kə̂ Jeju-Kristə aw arə dəwje. Baann bba dâ kingaje piti kə̂ a to kə ndɔ kə ndɔ.

¹¹ Tar nəənn to tar kə̂ tɔkɔrɔ: Bbo joyje saa kâra baa a, ja kisije kəm baa saa kâra baa tɔ.

¹² Bbo juwaje jarə ngəng a, ja kɔnje mbay saa tɔ. Bbo n-mbəteje a, ne njaa kara nâ mbətəje tɔ.

¹³ Bbo julaje pa-nja ləje naan tə̂ a, ne nula pa-nja laa naan tə̂ ang, mba nâ kasə ta təl turu tar kə̂ tee tɛɛ̂ tə̂ njaa ang.

Tar tɔju tar lə Lubba kə̂ dɔgɔlɛ̂

¹⁴ Maji karə ole mə dəwje dɔ nɛ̂nje tə̂ənn tɔyn. Ə-dujude kəm Lubba tə̂ karə n̂-mbətəje ta kɔl naan dɔ marə kandə tarje tə̂. Kɔl dda marə nɛ̂n kâra arə dəw ang, kɔl aw tuju dəwje kə̂ aw tukaje mbide aw ooje.

¹⁵ Ə-dda gan njaa karə Lubba ooi to dəw kə̂ asə kəmɛ̂ tə̂, dəw kə̂ dda kula laa kə majɛ̂ arə rɔ-kul a ddɛɛ̂ ang, maji karə ə-to dəw kə̂ aw tɔju tar kə̂ tɔkɔrɔ kə ddəwe.

¹⁶ Ayn kunda bulaje kə̂ baa kə̂ aw tila kəm tar mə-kunn, mba dəwje kə̂ aw undaje bula baa baa le aw awje ddəw əw kə Lubba jann jann.

¹⁷ Tar-pa ləde to tokə ngɔ-bayn kə̂ usa dəw ngaâ aw kə kete kete. Imene de kə Pilɛtə n̂-toje tokə baann.

¹⁸ Dinyaje tar kə̂ tɔkɔrɔ. N̂-paje nan dəwje kə̂ oyje ndolje mban ngaâ n̂-turuje mə-kunn lə marə dəwje ddəw tar tə̂ nəənn le.

¹⁹ A gɔl kəy kə̂ mɔngu kə̂ Lubba unda nangə̂ le nayn kə singɛ̂. Tar kə̂ n̂-dda gɔl kəy tə̂ le nan: «Əbbə-dəwje gərə njê kə̂ toje to dəwje laa» ngaâ «Maji karə dəw kə̂ bbar ri Əbbə-dəwje mban, mbətə majang.»

²⁰ Sambe kə̂ n̂-dda kə andə, wase narɛ dɔrɔ â to mə tɔkə kəy tə̂ ang. Sambe kakə kə nangə to mə tɔkə kəy tə̂ le tɔ. Marə sambeje to mba ndɔ kusu, a kəseje to mba dda nɛ̂n kulaje kə̂ baa.

²¹ D əw kə̂ inya nɛ̂n-ddaje kə̂ maji ang kə̂ m-pa tarɛ̂ nəənn a, nâ to sambe kə̂ daw ngəm mba ndɔ kusu, dâ kundɛ̂ dang mba kula lə Lubba. Əbbə-dəwje a kunnɛ̂ mba dda nɛ̂n kula, nâ to ngɔsi mba dda kulaje tɔyn kə̂ maji.

Mayn-tarje kə̂ baa baa

²² Ayn nɛ̂nje kə̂ maji ang kə̂ bboe aw dda basanje. Ə-sangə ddəw ta to gatə gatə, uwa mə-kunn ləi arə ngəng, ə-ndiki dəwje, arə mə-wul-lɔm to hori tə̂ kə dəwje kə̂ aw dujuje Əbbə-dəwje kə mə-nda.

²³ A ə-mbətə mayn-tar kə̂ baa kə mayn-tar mbə. Ə-gərə to mayn-tar kə̂ baann aw uju kɔl.

²⁴ Maji karə nje-kula lə Əbbə-dəwje to nje-kɔl kə dəw ang. A maji karə n̂-to dəw kə̂ dəwje ndiki tar laa, maji karə nasə ta tɔju nɛ̂n ngaâ daw pa saa a, n̂-tɔ wure.

²⁵ Maji karə n̂-tɔju ddəw dəwje kə̂ aw maynje saa tar kə gɔsu kə̂ wul pee. A du ang, Lubba a dda karə n̂-turuje məde mba gərə tar kə̂ tɔkɔrɔ.

²⁶ Dâ təlje kingaje kəjə kə̂ maji guku ngaâ dâ teeje mə bandə tə̂ lə Əsu kə̂ uwade arə daw ddaje nɛ̂n kə̂ məɛ̂ ndiki le.