2 Kɔrɛntinyɛje 13 - Dɔnɔn kə̂ Siki: Tar kə̂ aw arə təbbə

Dɔbɔyn ndəjeje lə Pɔl

¹ Gɔl mota laa ngaa â maw maw kə bbe ləse nəənn. A Makəturu lə Lubba pa nan: «Maji ta koo tar-najije lə dəwje joo wase mota bba ta gangə sariya»

² Gɔl joo laa kə̂ maw rɔse tə̂ le, m-pa mban. A bbokənɛn kə̂ mee horose tə̂ ang nəənn kara m-təl m-pa marə njê kə̂ osoje mə majang tə̂ kete ddəm kəsə dəwje tɔyn ddəm: Bbo m-təl maw bbeê ləse bbay a, mâ kɔru kəm dəw kâra ang,

³ mba aw sangəje nɛ̂n kə̂ tɔju to Kristə njaa unda tar tam tə̂ arə maw pa. Bbo Kristə aw dda nɛ̂n mba tar ləse a, singɛ̂ to kə ndɔ tɔyn. Naw tɔju singa-mɔngu laa horose tə̂.

⁴ Tɔkɔrɔ njaa, n̂-tɔlɛ̂ kakə-dəsə tə̂ mba singɛ̂ kə̂ goto. A bbasinɛn, nisi kəm baa ddəw singa-mɔngu tə̂ lə Lubba. Jeje kara, singaje goto ddəw tə̂ laa tɔ. A ja kisi kəm baa saa ddəw singa-mɔngu tə̂ lə Lubba mbase.

⁵ Maji karə sese njaa ə-tənnje rɔse ooje se ə-naynje ddəw mə-kunn tə̂ ləse wa? Ə-gərəje kə majɛ̂ to Jeju-Kristə to məse tə̂ ang wa? Baann ang a, yeenn tɔju to rɔse kə̂ ə-tənnje le tɔjuse to ə-naynje ddəw mə-kunn tə̂ ləse ang.

⁶ A munda məm to, â gərəje to jeje jasə ta tɔju to n-nayn ddəw mə-kunn tə̂ ləje.

⁷ Jaw duju Lubba karə ə-ddaje marə nɛ̂n kə̂ maji ang kâra ang. Le dəwje oojeje to n-nayn ddəw mə-kunn tə̂ ləje ang njaa kara, n-ndiki karə ə-ddaje maji kə dəwje bbo to mə-kunn ləje kə̂ n-nayn ddəwe tə̂ le â n-ndiki ta tɔju ang.

⁸ Mba jee kə singa ta kutu ddəw karə tar kə̂ tɔkɔrɔ ang. Singa kuman nɛ̂n tar kə̂ tɔkɔrɔ karə aw kə kete kete â jee nɛ̂n.

⁹ Kar tɔyn kə̂ jeje jee kə singa ang, â bbo sese eeje nɛ̂n a, rɔje nəəlje. Nɛ̂n kə̂ jaw duju Lubba to, karə ə-ddeeje to dəwje kə̂ maji tɔyn.

¹⁰ Mba yeenn bba, kar kə̂ m-goto horose tə̂ le, m-dda makəturu nəənn marəse, bba karə bbo m-tee horose tə̂ a, m-pa tar kə singa singa kə se ang ngaa. Mba Əbbə-dəwje arəm singa ta dda karə ubbaje singa bbo ta tujuse ang.

¹¹ Ta kutu nɛ̂n dɔɛ̂ a, ngakɔnʼmje, maji karə isije kə rɔ-nəəl. Ə-sangəje ddəw ta ddee maji tɔyn. Ə-ndəjəje naan bba karə rɔse oy njururu ang, ooje ta naan, isije kə mə-wul-lɔm. A Lubba kə̂ nje-ndiki dəwje ddəm nje-karə mə-wul-lɔm ddəm a nayn kə se.

¹² Maji karə ə-ddaje naan lapiya, ə-toje nɛ̂n mbi naan to lapiya kə̂ maji tɔyn. Dəwje lə Lubba tɔyn ddase lapiya.

¹³ Maji karə mə-maji lə Əbbə-dəwje Jeju-Kristə kə ndiki lə Lubba nayn kə se tɔyn ngaâ karə Ndil-mə-nda dda arə sese tɔyn ə-ddaje mə-kâra kə naan.