1 Kɔrɛntinyɛje 8 - Dɔnɔn kə̂ Siki: Tar kə̂ aw arə təbbə

Daje kə̂ darə kɔrje to nɛ̂n-polo

¹ Bbasinɛn nəənn, jooje nɛ̂n kə̂ ɔju dɔ daje kə̂ darə kɔrje to nɛ̂n-polo. Tɔkɔrɔ, jeje tɔyn n-gərəje nɛ̂n. Nɛ̂n-gərə dda arə dəw oo rɔɛ̂ bo, a ndiki dda arə mbɔn-naan lə njê-mə-kunnje inga singa.

² Dəw kə̂ əjə to n̂-gərə nɛ̂n, n̂-nayn n̂-gərə nɛ̂n tɔyn ang bbay.

³ Â bbo dəw ndiki Lubba a, Lubba a gəre.

⁴ Yeenn a, ja kasəje ta kusa daje kə̂ n̂-polo nɛ̂n kɔrje wa? N-gərəje kə majɛ̂ to kɔr goto dɔ nangə tə̂ ngaâ Lubba kâra baa bbo marə lubba dang to ang.

⁵ Tɔkɔrɔ njaa, marə dəwje aw paje nan lubbaje toje mə dara tə̂ ddəm dɔ nangə tə̂ ddəm. Yeenn to nɛ̂n kə̂ tɔkɔrɔ njaa. Kə̂ kəmde tə̂, lubbaje kə əbbə-dəwjeje banyaje.

⁶ A əngaje, Lubba to kâra baa, Lubba kə̂ bɔ kə̂ dda nɛ̂nje tɔyn arə jisije kə təbbə mba tar laa. Ngaâ Əbbə-dəwje kâra baa. To Jeju-Kristə kə̂ dda nɛ̂nje tɔyn arə jisije kə təbbə ddəw tə̂ laa.

⁷ A dəwje tɔyn â gərəje nɛ̂n nəənn ang. Marə dəwje unnje go kɔrje kete bba inyaje gode bbasinɛn nəənn bbay, yeenn â bbo daw dusaje daje kə̂ darə to nɛ̂n-polo a, dəjəje to daje le to nɛ̂n kə̂ darə kɔrje njaa tɔkɔrɔ. Nɛ̂ɛnn le dda arə kəjə ləde kə̂ sangə ang jɔkude.

⁸ Nɛ̂n-kusa â a dda karə n-ddeeje ngɔsi kə Lubba ang. Bbo jusaje ang a, marə nɛ̂n kâra kə̂ jinyaje jarə oso kɔrɔ̂ goto ngaâ bbo jusaje a, marə nɛ̂n kâra kə̂ jilaje dɔ marɛ̂ tə̂ goto.

⁹ Aaje kə majɛ̂ nan â karəje nɛ̂n kə̂ aw ddaje kə mə-ndiki ləse njaa le dda arə dəwje kə̂ sangəje ang bbay osoje.

¹⁰ Mba bbo əi kə̂ ə-gərə tar kə̂ tɔkɔrɔ isi mə kəy-polo kɔr tə̂ aw usa nɛ̂n kəm dəw tə̂ kə̂ sangə ang bbay a, kəjə lə dəw le a kaw saa karə nusa daje kə̂ n̂-polo nɛ̂n kɔrje ang wa?

¹¹ Yeenn a, dəw kə̂ sangə ang bbay, ne kə̂ n̂-to ngokɔnje kə̂ Kristə oy mba tar laa le, nâ kunn ddəw kə̂ maji ang ɔju dɔ nɛ̂n-gərə ləi le.

¹² Bbo aw ddaje maji ang kə̂ baann kə ngakɔnseje ngaâ aw tujuje kəjə ləde kə̂ sangə ang bbay le a, to Kristə njaa aw ddaje majang ta mbəte nɛ̂n.

¹³ Mba yeenn bba, bbo nɛ̂n-kusa asə ta dda karə ngokɔnʼm oso mə nɛ̂n tə̂ kə̂ maji ang a, mâ kɔn taal-da ndɔ kâra ang nan karə ngokɔnʼm in oso mə majang tə̂.