छ्या स्ये च्युताते बात 10 - जिरेलपरमेश्वर दूतकी लाःक्तु ओताते किताब बात 1 थेरूई तिरी याङराङ ङे स्वर्गनेकी छ्येज्यीक शक्ति ओताते परमेश्वर ज्येनज्यीक दूतला देमा ओङगीन ओताते थोङसुङ। थे दूत मुक्पे नाङ ओतान। थेमे थे गोःकी फेरोलाचेन जा सुक्पा ओतान। थे छ्येत ङीमा च्योक ओतान। थेमे काम्बातेबाचेन मे मुस्लो च्योक्तेन्दे ओतान। 2 थे दूतकी लाःक्तुचेन स्यिउकीते ठीलाज्यीक किताब टेक्टेज्यीक ओतान। थे किताबचेन खोले खाबा ओतान। थे दूतकी सामे काम्बा समुन्द्रे लाक थेमे देब्रे काम्बाचेन सादु चुसुङ। 3 थेरूई थे सिंह ङाराच्योक खाईन कस्स्ये खाईन छेरा खासुङ। थेकी थोक खित्जीन थे ङोरो दुईनगी गाराङताङ गुरूङ खासुङ। 4 थे ङोरो दुईनगी थोक खाईन गाराङताङ गुरूङ खानामेई ङे टिक्पाला ठीक खाबाप। तर ङे स्वर्गनेकी “थे ङोरो दुईनबोकी खाबाते बात माटिक, दि बातचेन खाराक्पा सेमगी नाङकामा स्योक,” सिरा थोसुङ। 5 थेमे थे समुन्द्रताङ सादु काम्बा रेरे जुकान्ते परमेश्वर दूतकी थे खोरोङ सामे लाक्पा स्वर्गने लाङसुङ। 6 थेमे थेकी स्वर्ग, पृथ्वी थेमे समुन्द्रताङ दिबे नाङ ओताते जति गाङे जोकान्ते सधैँभरि सोन्ला देत्कान्ते परमेश्वर मिन लाकीन दोक सिनकामा ना क्याल्सुङ। थेकी “था ईन्सीन समय छाङसुङ। 7 पालो दुईनगी बाजि परमेश्वर दूतकी थे खोरोङ बिकुल फुत्जीनचेन परमेश्वरगी थे खोरोङ काम खिन थे खोरोङ बात खित्कान्ते मिओनला साबा ओताते बात था साबा च्योकराङ ओङगो। दि बाततेबा गोमा परमेश्वरगी सुङलाङ छ्या स्ये च्युता मेतान,” सिन सिदुक। 8 थेमे स्वर्गनेकी याङराङ थे ङोरो दुईनबोकी बात खाबाते माटिक सिरकान्तेकी ङाला “लो ग्युक, गाल्ला समुन्द्रताङ साला काम्बा जुकान्ते थे परमेश्वर दूतकी लाःक्तुकी खोले खाबा ओताते थे टेक्टेते किताब लोङ,” सिरा थोसुङ। 9 थेमे ङे थे दूत ओत्सादु गाल्गीन थे किताब नाङ साबाप। थेमे थे दूतकी ङाला “लो या दि सो। दि सोनामेकी खुई सुबामा खक्ती ओङगो। तर खालाचेन स्यिराङ च्योकराङ ङार्मु ओङगो,” सिन सिदुक। 10 थेमे ङे थे दूतकी लाःक्तुकी थे किताब लाकीन सोबाप। थे किताब साजीन खालाचेन ङाला स्यिराङ च्योकराङ ङार्मु ओङसुङ। तर मीक ताङगीन सिन्नामेकी सुबामा आउदी खक्ती ओङसुङ। 11 थे सोकीन सिन्नामेकी “था खुई जात जातकीते, लुङबा लुङबेते, खुदुक खुदुक भाषे मि थेमे गेल्बोओनला था तिरी चुक चुक ओङगीते सिन परमेश्वरगी सिर च्युताते बात सिरा फाप्क्यो,” सिन ङाराङला साबाते बात थोसुङ। |
© 1992 Wycliffe Bible Translators Inc. All rights reserved.
Wycliffe Bible Translators, Inc.