हिब्रू 5 - जिरेल1 जो ईन्सीनोङ गाङे भन्दा छ्येते पूजारीचेन मि नाङदुईराङ छाने खिओ। थेमे थेकीचेन मिओनगी खाबाते पाप माफ नाङ सिन भोग तेरच्येतेताङ मिओनगी परमेश्वरला चढे खिताला खुलाबातेबा चढे खिता फाप्क्यो। 2 थे खोरोङोङ दाक पाप खिता थुप्कान्ते ईन्देकी दोक खाबातेनी पाप खाबाते ईन्दासीन सिन छ्या मेस्येकानला थेमे मेलेबा काम खित्कानला थेकी खा छ्येत लेमु खाला लोपा कोता थुप्क्यो। 3 थोगीराङ ज्येनगी लाईदुकामा मेन्देकी थे खोरोङगी खाबाते पाप माफ नाङ सिराला थेकीङ परमेश्वरला भोग तेरा फाप्क्यो। 4 सुइँदेकी ङा गाङे भन्दा छ्येते पूजारी ओङगो सिरजीनमेईराङ थे मान ङेत्च्येते मेन। गाङे भन्दा छ्येते पूजारी ओङालाचेन थाङबो हारूनला च्योकराङ परमेश्वर थे खोरोङगीराङ छाने खिता फाप्क्यो। 5 थोगी ख्रीष्टकीङ ङा गाङे भन्दा छ्येते पूजारी ओङगो सिन थे खोरोङगीराङ थे मान माचाल्सुङ। थेलाङ परमेश्वरगीराङ छाने खाईन गाङे भन्दा छ्येते पूजारी जोबाते ईन सिन परमेश्वर बातला दोक सिन टिला दुक। चुक सासीन परमेश्वरगी “खो ङे फुज्युङ ईन, थरिङमेई ङा खुई आबा ईन,” सिन साला दुक। 6 परमेश्वर बातलाराङ ज्येन ठाउँज्यीक्तु परमेश्वरगी “खो मल्कीसेदेक च्योक्ते पूजारी ईन। खोचेन सधैँभरि पूजारी ओङला देत्क्यो,” सिनोङ साला दुक। 7 दुरू ओत ओतसाक येशूकी कालगी लाःक्तुकी थे खोरोङला जोए खिता थुप्कान्ते परमेश्वरला ङुइन थेमे ङोरोराङ तेन्गीन प्रार्थना खासुङ। थेकी थे खोरोङ लाईदु परमेश्वरला बिन्तीङ खासुङ। थे परमेश्वरगी जस्तो खिता चाल्ला दुक थोकराङ ओङस्यीत सिरकान्ते ईन्देकी परमेश्वरगी थे प्रार्थना ङेन्सुङ। 8 परमेश्वर फुज्युङ ईन्सीनोङ थेकी भोगे खितासम्म दुक्पा भोगे खाईन परमेश्वरगी खि साबाते ङेन्सुङ। 9 दोक खाईन परमेश्वरगी खि साबाते जति पूरो खाबा ओतेकी थे खोरोङ बात ङेन्कान्तेबाला थेकी पूरो खाला पापदुकी टाल्ला सधैँ स्वर्गने देत ज्युत्क्यो। 10 मिओनला दोक खित्कान्ते ईन्देकीराङ परमेश्वरगी थेला मल्कीसेदेक च्योकराङ गाङे भन्दा छ्येते पूजारी जोसुङ। पाकोते मि सिराते चुक्ते ईन्दे 11 ङुरूङते गाङे भन्दा छ्येते पूजारी विषयला ख्योकोनला सिरा फाप्च्येते दोक्ते बात थोरूमोङ काल्बेई ओत। ईन्सीनोङ ख्योकोन खोले खोलेकामा खोकान ईन्देकी दोक्ते बात पालोईला सिराराङ मुथुबो। 12 ईन्दानी दि बेलासाकला ख्योकोन ज्येनला परमेश्वर बात लोपा थुप्कान ड्वा फाप्च्येते ईन। थोरूमसाकोङ ख्योकोनलानी परमेश्वर बातला च्यि साबा ओते, थोक साबाते च्यि ईन्दे सिन शुरू शुरूला लोपा फाप्च्येते बातओनका लोपा फाप्कीदुक। ख्योकोनगी परमेश्वर बात खजो खोकीका सिन विचार खासीन ख्योकोननी थोरूमोङ नुमा लुता फाप्च्येते बालकते फिजा च्योकराङ दुक। नामचेन ख्योकोन दाक्पोनगी मुरला साच्येते साप पच्चे खित्कान डुइते? 13 शुरू शुरूला लोप्च्येते बातकामा ङेन्गीन देत्कान्ते मिचेन नुमा थुङकान्ते फिजा च्योकराङ ईन। परमेश्वरगी खि साबाते काम च्यि ईन्दे सिन थेकी लेमु खाला डेला मुथुबो। 14 दोक मेन्देकी पाको गाल्गीन ज्येनलाङ लोपा थुप्कान्ते मिओनगीचेन परमेश्वर बात लेमु खाला खोबा थुप्क्यो। थेबाचेन छारगीन दाक्पोनगी मुरला साच्येते साप साकान्ते मि च्योक्ते ईन। होदोक्ते मिओनगीचेन च्यि खिता लेमु ईन्दे, च्यि मेलेबा ईन्दे सिन खोपरोङगीराङ छ्या स्येला दोक्ते बात जहिलेङ डेला थुप्क्यो। |
© 1992 Wycliffe Bible Translators Inc. All rights reserved.
Wycliffe Bible Translators, Inc.