Yakuba 4 - Jɔ Biibili ki

Bilinatɔnŋ ki fa juniɲa nu bi kiri

¹ Kari wɔ̀ fa sɔsɔɔlinŋ wɔ̀ri i ábɛɛ faninmwuŋ, nini po-a da? Sɔŋ jɛ wɔ̀ri i kari-ra ábɛɛ cii kiri ru, niŋ kiri i ábɛɛ bo-a ámaŋ na.

² Finŋ mwɔɔnna tɔ i ábɛɛ ru, nka yìrì tɔri tenŋ ábɛɛ gbɛ kì, niŋ i koŋ kilɛn tɔ jɛri-ra ábɛɛ ciiru. Ábɛɛ ɲaniŋ i po-a finŋ mwɔɔnna tɛ, á yìrì kila-a kì, niŋ i ncin ábɛɛ sɔsɔɔlinŋ fa kari tan-ni. Ábɛɛ finŋ wɔ̀ tɛ, ábɛɛ niŋ kila-a kì, sabu ábɛɛ ǹʼnafɛ-a Kirinŋ gbɛ kì!

³ Hali ábɛɛ ǹʼnafɛ, ábɛɛ finŋ tɔri tenŋ kila-a kì, sabu ábɛɛ ciiru kiri shɔ kì, ábɛɛ i ǹʼtɛ, á i ǹʼbataa ruli kɔ, á sɔŋ jɛ kiri dintɛ bi jɛ kiri bantenŋ nu.

⁴ Ábɛɛ dariwulu bali kari! Ábɛɛ ji ǹʼtɔ-a, tu ŋi i juniɲa ki bidi nʼtɛ, tu niŋ i ǹʼbi-a tu miŋ Kirinŋ bikwɔ-a nʼsun wa? Konwɔtiŋ i ǹʼtɛ, a i a yɛri ji juniɲa ki wɔ wɔshuru u, ntiŋ i ji-a Kirinŋ ɲa a.

⁵ Ábɛɛ cirasun, tu Kirinŋ wɔ wulu ki nwɔ̀ bi-a, tu niŋ ǹʼgbansanŋ i wa? Ǹʼtu : « Kirinŋ ɲini wɔ̀ de yibɛɛ ru, niŋ bi ki furu-i ǹʼgbɛ hali. »

⁶ Niŋ fa a fɔn na, Kirinŋ i shɔɔrinŋ bo-a shɔɔrinŋ sun yibɛɛ gbɛ, miŋ tu ǹʼyɔ Kirinŋ wɔ wulu sɛbɛ ki ru ɲaan wɔ̀ tɛ tu : « Kirinŋ i yɛri ragbɛtɔnŋ kiri kari-ra, nka ŋì i shɔɔrinŋ ma-ni yɛri sunjɛritɔnŋ kiri tɛ. »

⁷ Niŋ ki ra, á á kulu Kirinŋ tɛ, á i shitaanni kari. A ábɛɛ niŋ ma, shitaanni ki a bili, ŋì i a ranari ábɛɛ ra.

⁸ Á á kpari Kirinŋ tɛ, ǹʼyɛrima ki ra a kpari ábɛɛ tɛ. Ábɛɛ bi kulinŋ matɔnŋ kiri, á á gbɛ kiri rawu, ábɛɛ wulufuulibitɔnŋ kiri, ábɛɛ i á ciiru kiri fɔɔ.

⁹ Á á tu ǹʼna, tu ábɛɛ koŋ baraka bali li i, á i yaalinpo fɔ á i ɲaannaju po. Á áwɔ yɛtan ki rapwulu ji ŋuntanmaanna a, á i áwɔ ciirudibi ki ji ɲaannuŋunu u.

¹⁰ Á á yɛri sunjɛri Kirinŋ ɲaanfɛ, a niŋ ma, Kirinŋ a ábɛɛ fɛshi.

Koŋ tɔ jɛ bi bi ki

¹¹ Míŋ tindaŋ ni, á fa wulu jɛ bi-ri ámaŋ sun kì. Konwɔtiŋ i wulu jɛ bi-a a kaashi ki sun, ŋi i ntiŋ tɔ jɛ bi-ri, nintiŋ i sariya ki tɔ jɛ bi-a. Niŋ ɲaan ki tɛ, a miŋ ji sariya ki tɔ jɛ bi-a, miŋ ji-a ǹʼmatɔnŋ i kili kì, fɔ ǹʼsun tɔjɛbitɔnŋ i.

¹² Kirinŋ tenŋ pe bantenŋ i sariya kiri sɔɔtɔnŋ ki i, mìŋ tenŋ pe ki i ji kitikwurutɔnŋ ki i konaŋ ki sun. Mìŋ tenŋ pe ki i so-a koŋ mwu-i, mìŋ tenŋ pe ki i so-ri kiti ki fɛɛn-ɛ koŋ sun, ŋì i ntiŋ haliki sɛbɛ. Nka minwɔ̀ i nʼkaashi ki tɔ jɛ bi-a, miŋ nkɛnŋ, ŋi i kiti ki fɛɛn-ni nʼkaashi ki sun.

Konanmini wɔ ragbɛbi ki

¹³ Á á tɔɔnye míŋ tɛ dɔɔ, ábɛɛ wɔ̀ri i ǹʼbi-a tu : « Jiŋ walima siri, yibɛɛ ra ta ka kili ka ra, yi i ta sɔɔ niŋ mani nu jiri tenŋ, yi i jɔɔ tan, yi i wari kila. »

¹⁴ Ábɛɛ dumiŋ siri bi tɔ-a kì sa ji? Ábɛɛ shi ki mwɔ kì. Ábɛɛ i miŋ tu dondoŋ, nwɔ̀ i ja-a waaci pyaanŋ nu, ŋì i fwuude.

¹⁵ Ábɛɛ kakan-i á i ji nwɔ̀ bi-a, niŋ i kaa : « A Ŋuntiŋ ki a tu, yibɛɛ ɲaninkulutɔnŋ ni i tu, yibɛɛ ra ka fa ka ma. »

¹⁶ Nka ábɛɛ niŋ bi-a kì dɛ! Ábɛɛ i á yɛri ragbɛ-a á ciiru bi kiri wu. Ŋi i nʼyɛri ragbɛ ninkunŋ, niŋ shɔ kì dɛ!

¹⁷ Niŋ ɲaan ki tɛ, konwɔtiŋ bi shɔɔrinŋ ki maka ɲaan ki tɔ-a, ntiŋ dumiŋ ǹʼma-a kì, nintiŋ i bijɛ ma-a niŋ i.