Yakuba 3 - Jɔ Biibili ki

Nɛninɛŋ ki

¹ Ńʼtindaŋ ni, á mwɔɔnna fa á ɲaninpo koŋ kalilama ki tɛ kì, sabu á ǹʼtɔ tu yibɛɛ wɔ̀ri i konaŋ ki kali-la, tu yibɔɔ kiti ki a ta furu koŋ pyɛ kiri wɔ ki wu.

² Yibɛɛ bataa i fɔni-na mani mwɔɔnna nu, ɲaan mwɔɔnna tɛ. Konwɔtiŋ fɔni-na wulu lu kì, nintiŋ i koŋ nafaamaan a, nwɔ̀ a so a yɛri bataa pa-i a mabi kiri bataa ru.

³ Yibɛɛ i kɛrɛsɛ de-a suu ki daru, nwɔma ŋì i a kulu yi tɛ, niŋ ɲaan ki tɛ, yibɛɛ i so-a ǹʼfiri ki rapwulu ta-i yi ɲaanna maŋ ki bataa ru.

⁴ Ábɛɛ jusunbuŋ ki shɛɛli sɛbɛ, ǹʼgbɛ-i, ǹʼfa awɔ gbɛbi ki sun, niŋ fa hali faa sinaŋ kiri ji ǹʼnucuru-ra, toŋ pyaanŋ i niŋ napwulu ta-a a bilitɔnŋ ki ɲaanna maŋ ki bataa ru.

⁵ Mìŋ ɲaan tenŋ ki tɛ, nɛninɛŋ ki i firi ki mani pyaanŋ ki bɛɛ ɛ, nka ǹʼyɔ wulu sinaŋ kiri bi-a, ŋì i a yɛri gbɛ. Ábɛɛ tuu pyaanŋ ki shɛɛli, ǹʼyɔ gbirinŋ sinaŋ ki ŋɔni-na dɛ!

⁶ Nɛninɛŋ ki i miŋ tu tuu. Yibɛɛ firi ki mani ki bɛɛ yɛ, nwɔ̀ faa-a bijɛ ki ra. Ǹʼyɔ yibɛɛ firi ki bataa nɔɔ-ra. Ǹʼyɔ miŋ tu tuu wɔ̀ po-i jaanama ki yɛri ki ru, ŋì i so-a koŋ wɔ ɲaninkulutɔnbi ki bataa li-i.

⁷ Juunfinŋ kwuru ki bataa, ɲaannaanŋ kiri, cɛɛnkunsunfinŋ kiri, fa jurufinŋ kiri bataa i so-a kulu-i konanmini gbɛ.

⁸ Nka koŋ so-a konanmini nɛninɛŋ ki kulu-i kì dɛ! Finŋ jɛ yɛ, koŋ so-a nwɔ̀ pa ji-i a ɲaanna wɔ kì. Ǹʼbataa i baa a, baa wɔ̀ i koŋ kilɛn-a.

⁹ Nɛninɛŋ tenŋ wɔ̀ i yibɛɛ Ŋuntiŋ, yibɛɛ Tiŋ Kirinŋ gbɛ-a, mìŋ nɛninɛŋ tenŋ ki i a pwulu-la, ŋì i konanmini danka-ri, Kirinŋ ninwɔ̀ ramɔni-i a yɛri ki bishi i.

¹⁰ Kirinŋ gbɛ wulu ki i po-a tɔnŋ wɔ̀ ra, koŋ danka wulu ki ta-a po mìŋ tenŋ ki ra dɔɔkunŋ? Ńʼtindaŋ ni, á fa á tu niŋ na kì. Niŋ shɔ kì dɛ!

¹¹ Ju jii fa ju saamaan na so po-i jubyinta tenŋ na wa?

¹² Ńʼtindaŋ ni, shɔ jirinŋ na so olinfye daŋ pa-i a ra wa? Ɛrɛnsɛnŋ jirinŋ na so shɔ daŋ pa-i wa? Wɛɛlufinju fani a so ju jii po-i kì.

Ɲakilitinbi wɔ̀ i po-a kirinpɔlila

¹³ Dɔnsaŋ, ábɛɛ ru, a ǹʼbɛɛ ji ǹʼbi-a tu afinŋ ɲakilitiŋ i, a i bi tɔ-ri, ntiŋ ǹʼji a mabi kiri ra, a tirika shɔɔrinŋ ki ra fa awɔ sunjɛribi ki niŋ fa awɔ bi ɲaanpoka shɔɔrinŋ ki ra.

¹⁴ Nka, a tɛnbi fa fyikatinbi ɲakili ji ábɛɛ gbɛ, á fa puru bi, á i á yɛri ji ɲakilitiŋ ni i kì.

¹⁵ Niŋ ɲakilitinbi ki bishi ki po Kirinŋ gbɛ kì. Niŋ i ka juniɲa ka ru tɔnŋ kiri wɔ ɲakilitinbi ki i, niŋ i po-a shitaanni gbɛ.

¹⁶ Tɛnbi ki fa fyikatinbi ɲakilila ki i mani wɔ̀ ru, bi ɲaanmimaan kiri fa bijɛ kwuru ki bataa i kila-a niŋ mani nu sɛbɛ.

¹⁷ Nka ɲakilitinbi wɔ̀ i po-a kirinpɔlila, ǹʼjɔnɔ ki, niŋ fɔɔmaan yɛ, niŋ kɔɔtɛ, ǹʼyɔ na-a ɲaanfɛfili wu, ǹʼtɔnsunfilimaan yɛ, sunmakwulupatɔnŋ sinaŋ i. Ǹʼmabi kiri bataa shɔ-i, ŋì i koŋ san-a koŋ nu kì, ǹʼdumiŋ wulu fuuli bi-a kì.

¹⁸ Ɲaanfɛfili ki bidi-i nwɔ̀ri tɛ, nini i ɲaanfɛfili ki ɲɛɛn-na arì kankanfan ki ru, miŋ tu bilantu, kí i daŋ wɔ̀ kila-a ǹʼnu, niŋ i mabi telimaan ni i.