Yakuba 2 - Jɔ Biibili ki

Fa koŋ san koŋ nu kì

¹ Ńʼtindaŋ ni, ábɛɛ wɔ̀ri bili-i yibɛɛ Ŋuntiŋ Yesu Kirisa nɔɔritiŋ ki ra, á fa koŋ san koŋ nu kì. Ábɛɛ ra so ǹʼbi-i dɔɔkunŋ tu ábɛɛ bili Ŋuntiŋ ki ra, ábɛɛ ji konaŋ kiri pari-ra arìmaŋ wu?

² Ŋì a so ji-i tu jalintiŋ sinaŋ ki bɛɛ i na de ábɛɛ fan, sɛniŋ pyɛɛranŋ i ji ntiŋ gbɛ ki ra niŋ fa jɛrɛbi sinaŋ i ji ntiŋ sun. Mìŋ waarinŋ tenŋ ki ru, gbɛwɔ juulinŋ nɔɔmaantiŋ i na de sɛbɛ.

³ A ábɛɛ juulinŋ shɔɔrinŋ tiŋ ki ŋununafuka shɔ, á i ǹʼbi niŋ tɛ tu : « Á na sɔɔ tɔtiŋ sɔɔmaŋ ka ru. » Á i ǹʼbi gbɛwɔ ki tɛ tu : « Miŋ ta tu ka keŋ », walima « Sɔɔ fwuniŋ sun. »

⁴ A ábɛɛ ji niŋ ma-a, á ǹʼtɔ tu ábɛɛ ɲakilila jɛ sɔɔ-ra, á i konaŋ kiri pari-ri arìmaŋ wu, niŋ dumiŋ shɔ kì.

⁵ Míŋ tindaŋ byii ri, á á tɔɔnye míŋ tɛ : Kirinŋ ka juniɲa ka ru gbɛwɔ kiri ɲaannashi-i, nwɔma a i kí ji fintiŋ ni i, Kirinŋ wɔ Masabi ki ru, arɔɔ bilinabi ki baraka ra kì wa? Ŋì a tɔnŋ wɔri-i niŋ masabi ki bira kpeeri tɛ, nwɔ̀ri ǹʼbidi-i arì tɛ.

⁶ Nka ábɛɛ kɔniŋ i gbɛwɔ kiri rufyɛ-a dɛ! Nwɔ̀ri i ábɛɛ ɲaanfɛkwulu-la, kí i ta-ri á wu kitikwurutɔnŋ kiri ɲaanfɛ, nafulutiŋ kiri i kì wa?

⁷ Kirinŋ tɔ shɔɔrinŋ wɔ̀ ye-i ábɛɛ ra, kíbɛɛ kiri niŋ li-a kì wa?

⁸ A ábɛɛ ji Kirinŋ wɔ Masabi ki ru sariya ki rafaa-ra, miŋ tu Sɛbɛ ki i ǹʼbi-a ɲaan wɔ̀ tɛ tu : « Nʼkaashi ki bidi nʼtɛ miŋ tu nʼyɛri ki. » Sii ǹʼna ǹʼnu kì, ábɛɛ i bi shɔɔrinŋ ma-a.

⁹ Nka a ábɛɛ ji koŋ san-a koŋ nu, ábɛɛ i bijɛ ma-a niŋ i. Sariya ki i fɛɛn-na ábɛɛ sun, sabu ábɛɛ ǹʼsɔsɔ-i.

¹⁰ Koŋ woo koŋ i sariya kiri bataa rasɔɔ-ra, a ntiŋ tenŋ li jibi wɔ̀, niŋ i miŋ tu ntiŋ yìrì bataa li.

¹¹ Sabu, mìnwɔ̀ ki ǹʼbi-i tu : « Fa nankulunbi ma ki », mìŋ tenŋ ki ǹʼbi-i sɛbɛ tu : « Fa koŋ kilɛn kì. » Niŋ ki ra, a miŋ ji nankulunbi ma-a kì, nka ŋi i koŋ kilɛn-ni, miŋ sariya ki li-i mìnki i.

¹² Miŋ tu kiti ki a na kwuru ábɛɛ sun, ŋì i kɛɲɛ sariya wu, nwɔ̀ i koŋ po san-a jonbi ru, á á wulubika ɲaan ki fa á tirika ki fu niŋ wu.

¹³ Sabu, konwɔtiŋ koŋ pyɛ kiri sunmakwulupa kì, Kirinŋ a na nintiŋ sunmakwulupa kiti ki kwuru shikaŋ ki ru kì, nka konwɔtiŋ i sunmakwulupa tan-a, nintiŋ kɛni-na kiti ki jɛŋ kili kì.

Bilinabi ki fa mabi kiri

¹⁴ Ńʼtindaŋ ni, a koŋ ǹʼbi tu bilinabi afinŋ gbɛ, ntiŋ dumiŋ ǹʼji-a a mabi kiri ra kì, niŋ a nfɛnŋ shɔ sa? Niŋ bilinabi ki a so ntiŋ mwu-i wa?

¹⁵ A miŋ tindaŋ ki bɛɛ walima nʼnarinŋ ki bɛɛ ji gbɛwɔ ɔ, fɔ ntiŋ a a bo juulinŋ kila-ri kì, niŋ fa ntiŋ a a nufinŋ ki kila-ri jibi woo jibi kì,

¹⁶ a ábɛɛ finŋ tɔri wɔri niŋ gbɛwɔ ki tɛ kì, nka á i ǹʼbi ǹʼtɛ tu : « Tiri, yi a ji faa, Kirinŋ de nʼshɔɔrinŋ wu, ta juulinŋ pyirimaan bo nʼsun, ŋi i nufinŋ nu ŋi i nʼpyii », niŋ a nfɛnŋ shɔ sa?

¹⁷ Bilinabi ki i mìŋ ɲaan tenŋ ki tɛ, a ǹʼji ji-a mabi kiri ru kì, ǹʼbeenimaan yɛ, bi tawɔ i ji-i.

¹⁸ Ǹʼbɛɛ ra so ǹʼbi-i tu : « Bilinabi ki koŋ bɛɛ gbɛ, mabi kiri i ji ǹʼtɔri gbɛ. » Nka míŋ a nintiŋ wɔ wulu ki rupwulu tu : « Miŋ nʼwɔ bilinabi ki ji sunu míŋ wu nʼmabi ki kɔɔtɛ, míŋ a ńʼwɔ bilinabi ki ji miŋ wu ńʼmabi kiri ra. »

¹⁹ Miŋ bili-i ǹʼna, tu Kirinŋ tenŋ pe e, niŋ shɔ-i. Nka, hali ɲinijɛ kiri yɛrima kiri bili-i niŋ na, fɔ yìrì i sɛrɛsɛri-i kɛmi ki gbɛɛra.

²⁰ Ɲakilibali ki shɛɛli sa! Bilinabi ki i bi tawɔ ɔ, a ǹʼji ja-a mabi kiri ru kì, ǹʼbeenimaan yɛ. Miŋ i ǹʼtɛ, ŋi i niŋ tɔ wa?

²¹ Yibɛɛ tiŋ cɛɛnni Aburahamu ji koŋ telimaan a, Kirinŋ ɲaanfɛ dɔɔkunŋ? Niŋ ma-i ntiŋ mabi kiri sababu ra, waarinŋ wɔ̀ ru, ntiŋ a tu-i, ntiŋ i a danshuru Ishaka kɔli bili sarakawɔrɔmaŋ ki sun Kirinŋ tɛ saraka, miŋ niŋ ja-a kì wa?

²² Niŋ i ǹʼji-a tu Aburahamu wɔ bilinabi ki fa ntiŋ mabi kiri wuru tiri-ra arìmaŋ fan. Mabi kiri ntiŋ wɔ bilinabi ki rafaa-a.

²³ Niŋ ɲaan ki tɛ, Sɛbɛ ki ru wulu ki i nafaa tu : « Aburahamu bili Kirinŋ na, ninki i ji ntiŋ gbɛ telibi i. » Kirinŋ i ntiŋ dɔri tu awɔ wɔshuru.

²⁴ Niŋ ki ru, ábɛɛ ǹʼja-i tu konanmini shɛɛli-la koŋ telimaan a, Kirinŋ ɲaanfɛ a mabi kiri ra sɛbɛ, tu bilinabi ki bantenŋ i kì.

²⁵ Nankulunmari Arahabu wɔ ki ji-i mìŋ ɲaan ki tɛ. Kirinŋ nmari shɛɛli-i koŋ telimaan a, a mabi kiri ra, waarinŋ wɔ̀ ru, nmari Isirayɛlidaŋ kiri wɔ pɛrɛkɛtantɔnŋ kiri jɛri wuru a gbɛ, nmari i kí bosaara tiri saa tɔri fan.

²⁶ Sabu a ɲini ji konanmini firi ki ru kì, niŋ i finŋ kwuu u ɲaan wɔ̀ tɛ, bilinabi ki beenimaan yɛ, a ǹʼji ja-a mabi kiri ra kì.