Yakuba 1 - Jɔ Biibili ki

Yakuba wɔ coolinŋ ki

¹ Yakuba, Kirinŋ fa Ŋuntiŋ Yesu Kirisa wɔ baara matɔnŋ ki wɔ coolinŋ i Kirinŋ wɔ konanbi jeɲemaan ki bataa tɛ juniɲa ki bataa fan.

Bilinabi ki fa ɲakilitinbi ki

² Ńʼtindaŋ ni, a cɔɔri finŋ woo finŋ á kila Yesu bira, á niŋ ji á ciirudi ŋuŋ i.

³ Á ǹʼtɔ tu ábɔɔ bilinabi ki Kirinŋ na, a niŋ so ncusun-i á i cɔɔri kwuru ki bataa ŋununafuka shɔ, tu niŋ i ábɛɛ sunfuru-ra, á i so bi pa-i á ra.

⁴ Á ncusun áwɔ tɔnsunfili ki i nafaa, nwɔma á i nafaa, á i kɔɔ, finŋ tɔri tenŋ fa waa á wu kì.

⁵ A ɲakilitinbi ki waa ǹʼbɛɛ wu ábɛɛ ru, ntiŋ ǹʼnafɛ Kirinŋ gbɛ, ŋì a ǹʼwɔri ntiŋ tɛ, sabu Kirinŋ i konaŋ bataa ka-a ǹʼmaan a, gbɛrupilibi wu, niŋ fa ŋì koŋ ŋununubili-la kì.

⁶ Nka, ntiŋ Kirinŋ nafɛ bilinabi wu, ntiŋ fa sii sii ǹʼna kì. Konwɔtiŋ i sii sii-ra, nintiŋ i miŋ tu jukwululuŋ, faa ki i ninwɔ̀ shi kee de-a mani bataa ru. Niŋ kɔri ki i tu ntiŋ bili-la Kirinŋ na kì.

⁷ Niŋ koŋ bishi ki kɔniŋ fa ǹʼmiiri tu afinŋ a finŋ bɛɛ kila Ŋuntiŋ ki gbɛ kì dɛ!

⁸ Sabu, niŋ koŋ bishi ki i koŋ ciiru fuulitiŋ i, ntiŋ i da-a awɔ saa ki tɔri tenŋ na kì.

Gbɛwɔbi niŋ fa fintinbi

⁹ Bilinatɔnŋ wɔ̀ i gbɛwɔ ɔ, ntiŋ a ciirudi a fɛshi bi ki tɛ Kirinŋ gbɛ.

¹⁰ Nwɔ̀ fani i fintiŋ i, niŋ a ciirudi awɔ finŋ balibi ki ra, sabu nafulutiŋ ki a fwuude miŋ tu ɲiŋ foo.

¹¹ A sunŋ ki po, mani ki i kwulu-la papa, ɲiŋ ki i furu, ǹʼfoo ki i fɛɛn, ǹʼshɔka ki i li-a. Nafulutiŋ ki a na nakɔ mìŋ ɲaan ki tɛ, ŋì i ntiŋ tu a mabi kiri faninmwuŋ.

Finŋ wɔ̀ri i konanmini sunnɛɛn bo-a bijɛ ki sun

¹² Koŋ woo koŋ i ɲaanfɛkwulu ki pa-a a ra, nintiŋ fɛri-i, sabu ɲaanfɛkwulu ki kɔɔtɛ, ntiŋ a sali kila ninwɔ̀ i ɲaninkulutɔnbi ki i, Kirinŋ a tɔnŋ wɔri-i ninwɔ̀ bira kpeeri tɛ, nwɔ̀ri ǹʼbidi-i arì yɛri tɛ.

¹³ Nka, a bijɛ ma tɔ ji nwɔ̀tiŋ nu, ntiŋ fa ǹʼbi tu Kirinŋ afinŋ sunnɛɛn-na kì dɛ! Sabu finŋ tɔri tenŋ so-a Kirinŋ sunnɛɛn bo-i bijɛ ma sun kì, Kirinŋ fani dumiŋ koŋ tɔri tenŋ sunnɛɛn bo-a bijɛ ma sun kì.

¹⁴ Koŋ woo koŋ cɛɛn a yɛri ki ɲaannabi kiri cɛfan, fɔ ntiŋ i ji yìrɔɔ joŋ i, ninki i ntiŋ sunnɛɛn bo-a bijɛ ki sun.

¹⁵ A miŋ nʼkɔli nʼyɛri ɲaannabi ki ra, ninki i miŋ po-a bijɛ ma ki sun, a bijɛ ki kɔɔ, niŋ i na-a beŋ ki wu.

¹⁶ Ńʼtindaŋ byii ri, á fa á yɛri sunnɛɛn kì.

¹⁷ Finŋ shɔɔrinŋ ki fa kafinŋ sɔbɛ ki bataa i yiri-ra cuunŋ, yibɛɛ tiŋ Kirinŋ gbɛ. Tiŋ Kirinŋ ki i manisarinŋ ki potɔnŋ ki i. Ŋì rapwulu san-a a ɲaan tɛ kì, mancinŋ maŋ ǹʼna kì.

¹⁸ Ǹʼdi-i ǹʼtɛ, ŋì i ɲaninkulutɔnbi ki wɔri yibɛɛ tɛ awɔ wulu ki baraka ra, ninwɔ̀ i sɛli ki i, nwɔma yibɛɛ i ji ǹʼwɔ juniɲa nu finŋ pomaan kiri bataa jɛŋ.

Wulu lama ki niŋ fa bi mamaanna ki

¹⁹ Ńʼtindaŋ byii ri, á á ɲakili tu ka mani ka ra kusɛbɛ, tu : koŋ bataa bili, ntiŋ i a tɔɔnyeka shɔ, nka koŋ fa a ciirukwulu wulubirama fa tɔnkwulu fan kì.

²⁰ Sabu, koŋ tɔnkwulumaan so-a bi ma-i telibi wu Kirinŋ ɲaanfɛ kì.

²¹ Niŋ ki ciiru, á bi nɔɔmaan kiri bataa tɔnbo, niŋ fa ciiru juubi kwuru ki bataa. Wulu wɔ̀ firi-i ábɛɛ tɔnŋ ki ra, á niŋ pa sunjɛribi wu, sabu so i ǹʼgbɛ, ŋì i ábɛɛ mwu.

²² Á fa á yɛri sunnɛɛn, á i Kirinŋ wɔ wulu ki rama bantenŋ tan-ni kì, á ji ǹʼmatɔnŋ sɛlɛsɛli li i.

²³ Á ǹʼtɔ tu konwɔtiŋ Kirinŋ wɔ wulu ki rama-a, ntiŋ dumiŋ ǹʼma-a kì, tu nintiŋ fa koŋ po, nwɔ̀tiŋ a yɛri shɛɛli-i yɛrɛfɛri ru, ntiŋ i a yɛri jaka shɔ.

²⁴ Ntiŋ yɛri shɛɛli kɔmaan ki kɔɔtɛ, ntiŋ i tiri, ntiŋ ɲakili i fɔni a yɛri ki ɲaan tɛ shuu.

²⁵ Nka Kirinŋ wɔ sariya rafaamaan wɔ̀ i yibɛɛ ji-a yi yɛri wɔ, konwɔtiŋ i niŋ nufɔɔka shɔ-a, ntiŋ i a mari tu niŋ na, ntiŋ a ɲakili fɔni awɔ wulu lamamaan ki tɛ kì, ntiŋ i tiri-ri ŋì i kɛɲɛ niŋ wu, nintiŋ a baraka kila a mabi kiri bataa ru.

²⁶ A konwɔtiŋ ǹʼbi tu afɔɔn dinɛbi ki gbɛ, ntiŋ dumiŋ so-a a nɛninɛŋ ki ra kì, nintiŋ i a yɛri sunnɛɛn-na, ntiŋ wɔ dinɛbi ki i fwuu u.

²⁷ Dinɛbi wɔ̀ fɔɔ Kirinŋ ɲaanfɛ, tu nɔɔ ǹʼnu kì, niŋ i kaa : ŋi i ta ye gbɛwɔ kiri fa kanimari kiri tɛ arì ɲaanfɛkwulu waari kiri ru, ŋi i nʼyɛri paka shɔ juniɲa nu bi nɔɔmaan kiri bataa kɛlina.