Tite 2 - Jɔ Biibili ki

Kalinŋ shɔɔrinŋ ki bi ki

¹ Nwɔ̀ i miŋ, konaŋ ki kali ŋì i kɛɲɛ kalinŋ shɔɔrinŋ ki wu.

² Ǹʼbi cɛɛnni kiri tɛ, tu kí arì yɛri paka ɲaantɔ, kí i ji koŋ sɔbɛ ɲakilitiŋ ni i. Kí ɲakili ki sɔɔmaan i ji-i bilinabi ki ru, bidintɛbi ki ru, niŋ fa kí i ji koŋ tɔnsunfilimaan ni i.

³ Ŋi i ǹʼbi mari cɛɛnni kiri tɛ mìŋ ɲaan tenŋ ki tɛ, tu kí tiri kɛɲɛ fɔɔbi ki wu. Kí fa ji koŋ tɔ litiiri i kì, walima lɔrutɛfɛ ri i kì. Tu kí ji racinwulu shɔɔrinŋ bitɔnŋ ni i,

⁴ nwɔma kí i mari daanwulu kiri kini arì shinŋ kiri bidi ki ra arì tɛ, niŋ fa kí i arì daŋ kiri bidi arì tɛ.

⁵ Tu kí ji mari sɔbɛ ri i, kí i so-ri arì yɛri rasɔɔ. Kí cɛrukɔlimaan i ji-i arɔɔ kaniŋ sun baara kiri ra, kí i ji koŋ sunmakwulupatɔnŋ ni i, kí i arì sunjɛri-ri arì shinŋ kiri tɛ. A niŋ ma, Kirinŋ wɔ wulu ki tɔ a li kì.

⁶ Ɲɔrɔkɔ kiri racin, tu kí ji ɲakilitiŋ ni i, bi bataa ru sɛbɛ.

⁷ Miŋ yɛrima ki ji ɲaanjitɔnŋ sɔbɛ ɛ, bi shɔɔrinŋ ma ki ra bi bataa ru. A miŋ ji kí kali-la, nʼciiru fɔɔ kí tɛ, niŋ fa ŋi i ǹʼji kí wu, tu miŋ sɔbɛ ra bi i.

⁸ Nʼwɔ wulu kiri ji wulu telimaan ni i, koŋ a so nwɔ̀ sɔsɔ-i kì, nwɔma ɲa kiri ɲaankwunmaan i tu, kí fa jɛ maŋ kila yibɛɛ ra kì.

⁹ Ǹʼbi joŋ kiri tɛ, tu kí arì kulu arì ŋununtiŋ kiri tɛ bi bataa ra, kí i kí dintɛ bi ri ma-ni, kí fa kí sɔsɔ-ri kì.

¹⁰ Kí fa arì ŋununtiŋ kiri wɔ finŋ kiri kwun-ni kì. Kí ǹʼji kí wu tu arìbɛɛ koŋ sɔbɛ ri i, waaci bataa ru. A niŋ ma, kí a yibɛɛ Mwutɔnŋ Kirinŋ wulu ki gbɛ.

Kirinŋ wɔ shɔɔrinŋ ki

¹¹ Kirinŋ wɔ shɔɔrinŋ ki a yɛri ji-i, nwɔma koŋ bataa i a mwu niŋ sababu ra.

¹² Ǹʼyɔ yibɛɛ kali-la tu yi Kirinŋ jɛŋ kɛnibali bi kiri tɔnbo, yi i yi kɔɔye ka juniɲa ka dintɛ bi jɛ kiri ra, nwɔma yibɛɛ i so tirika shɔ-i ka jiŋ sunŋ ka ru, ɲakilitinbi fa fɔɔbi fa Kirinŋ jɛŋ kɛmi wu,

¹³ ŋì i yi tu niŋ ŋununadibi jibi ki sunsuu-ra, ninwɔ̀ i Sotiŋ Kirinŋ, yibɛɛ Mwutɔnŋ Yesu Kirisa wɔ nɔɔri ki i.

¹⁴ Mìnki a yɛri wɔri-i yibɛɛ bira, ŋì i yi ŋunsan po san bijɛ kwuru ki bataa ru, niŋ fa ŋì i yi ji shiya fɔɔmaan ni i, awɔ bo ru, nwɔma yi i so yi cɛrukɔli-i, yi i baara shɔɔrinŋ ma waarinŋ bataa ru.

¹⁵ Miŋ kakan-i ŋi i konaŋ ki kali-li ka ɲaan ka tɛ, ŋi i kí racin, ŋi i kí siratu, ŋi i kí fɔnimaŋ kiri bi kí tɛ, ŋununtinbi wu, koŋ tɔri tenŋ fa miŋ nufyɛ kì.