Timote (2) 4 - Jɔ Biibili ki

Pooli wɔ racinwulu ki Timote tɛ, Kirinŋ wɔ Wulujii ki ɲaanbi ki sun

¹ Míŋ a ǹʼbi furu miŋ tɛ Kirinŋ fa Yesu Kirisa ɲaanfɛ, ninwɔ̀ a kiti ki kwuru ɲaninkulutɔnŋ kiri fa konkwuu kiri sun, ńʼtu a ǹʼma Kirisa na ki fa ǹʼwɔ masabi ki bira,

² ŋi i nʼcunadi Kirinŋ wɔ wulu ki sunjorama ki ra, waarinŋ jii bili ǹʼjɛ sun. Kalinŋ ki wɔri konaŋ kiri tɛ tɔnsunfili wu, ŋi i nʼbanba, kí i ji nʼwɔ kalinŋ ki tɛ, jɛbi kí gbɛ, ŋi i kí cunadi waarinŋ bataa ru.

³ Sabu waarinŋ bɛɛ ra na so, konaŋ kiri ra na arì tɔɔnye-ri kalinŋ sɛlɛsɛli ki tɛ kì, nka kí a na kalimɔɔ mwɔɔnna ceeli arì yɛri tɛ, nwɔ̀ri ra kí tɔɔn na wulu jii kiri bi-ri kí tɛ, ŋì i kɛɲɛ kí firi kiri dintɛ bi kiri wu.

⁴ Kí a na arì tɔɔnta kiri raye sɛli ki jɛŋ, kí i ǹʼpa puru ki cɛfan.

⁵ Nka, miŋ kɔniŋ, nʼyɛri paka tɔ bi bataa ra. Cɔɔri kiri pa nʼna, ŋi i nʼwɔ cinŋ ki maka shɔ, ninwɔ̀ i Kirinŋ wɔ Wulujii ki sunjorama ki i.

Pooli wɔ wulu lakɔɔra kiri

⁶ Míŋ kɔniŋ ji-i miŋ tu saraka kɔnkɔlimaan Kirinŋ tɛ kɔ, míŋ po san waari ki so-i ka juniɲa ka ru.

⁷ Míŋ kari shɔɔrinŋ tan-i. Míŋ manjanbili ki tan-i, ŋí i so ńʼtumaŋ ki ru, ŋí i tu bilinabi ki ru.

⁸ Kabi dɔnsaŋ, telibi jali ki bo-i míŋ jɛŋ juniɲa nakɔɔra shikaŋ ki ru. Ŋuntiŋ ki, ninwɔ̀ i kitikwurutɔnŋ telimaan ki i, niŋ a na niŋ wɔri míŋ tɛ. Ŋì a wɔri míŋ tenŋ tɛ kì, nka finŋ woo finŋ ǹʼna shikaŋ ki sunsuu-ra bidintɛbi wu, ŋì a na niŋ jali ki wɔri míŋ fa nini bataa tɛ.

⁹ Nʼbanba ŋi i na ńʼcɛfan farɔn,

¹⁰ sabu Demasi a kila san-i míŋ na, ntiŋ i ǹʼpa juniɲa dintɛ bi jɛ kiri cɛfan, ntiŋ i tiri Tesaloniki kili ki ra. Keresansi, niŋ i tiri Galasi sɔɔta ki ru. Tite, niŋ i tiri Dalamasi sɔɔta ki ru.

¹¹ Luki tenŋ pe i míŋ fan kwumaŋ dɔɔ. A miŋ ji na-a, ŋi i na Maraka wu nʼfan, sabu ntiŋ a so ye-i míŋ tɛ ńʼwɔ cinŋ ki ra.

¹² Míŋ Tisike cin tiri-i Efɛsi kili ki ra.

¹³ Mɔ́ɔ́n shiisuujɛrɛbi wɔ̀ tu-i Torohasi kili ki ru Karipusi gbɛ, ŋi i na niŋ wu nʼgbɛ, niŋ fa Kirinŋ wɔ wulu sɛbɛ kiri. Fa nʼɲakililafɔni ǹʼpɔlilamaŋ kiri tɛ kì.

¹⁴ Alɛkisandiri, fɔniŋ weŋ ki bijɛ mwɔɔnna shi tu-i míŋ na. Ŋuntiŋ ki yɛrima ki a na wú sali, ŋì i kɛɲɛ wúwɔ bi mamaan kiri wu.

¹⁵ Miŋ yɛrima ki nʼyɛri cɔye wú ra dɛ, sabu wú yibɔɔ wulu kiri sɔsɔ-i faanna.

¹⁶ Míŋ jɔnɔ ki ta-i kitikwurutɔnŋ kiri ɲaanfɛ waarinŋ wɔ̀ ru, koŋ tɔri tenŋ tu míŋ cɛru kì, kí bataa arì san-i míŋ cɛfan. Míŋ i Kirinŋ nafɛ-a, ńʼtu Ŋì fa kí pa niŋ wu kì.

¹⁷ Ŋuntiŋ ki yɛrima ki ye-i míŋ tɛ. Niŋ ki ra, míŋ i so Kirinŋ wɔ Wulujii ki sunjo-i, ŋí i ǹʼnafaa, nwɔma shiya tɔri kiri bataa i ǹʼnama. Kirinŋ i ji míŋ mwu san jari ki tɔnŋ na.

¹⁸ Mìŋ ɲaan tenŋ ki tɛ, Ŋuntiŋ ki a na míŋ mwu ńʼwɔ bijɛ kiri bataa wu, ŋì i míŋ de awɔ kirinpɔlila Masabi ki ru. Nɔɔri bili ǹʼsun waarinŋ bataa ru. Amiina!

Pooli wɔ coolinŋ ki

¹⁹ Pirisili fa Akilasi co ńʼwɔ co ru, niŋ fa ŋi i ńʼwɔ coolinŋ ki wɔri Onensifɔri wɔ kanindaŋ kiri tɛ.

²⁰ Erasitusi tu-i Korɛnti kili ki ru. Míŋ i ji Torofime tu Milɛti kili ki ru, sabu niŋ kiratɔnŋ wuru-i.

²¹ Nʼbanba, ŋi i na shii waari ki jɛnkwuru kwumaŋ. Ebulusi fa Pudɛnsi fa Linusi niŋ fa Kolodiya ri bataa i miŋ co-a nmaŋ. Tindaŋ pyɛ kiri bataa i miŋ co-ri sɛbɛ.

²² Ŋuntiŋ ki tu nʼfan, Kirinŋ wɔ shɔɔrinŋ ki tu á bataa fan nmaŋ.