Timote (2) 3 - Jɔ Biibili ki

Waaci rakɔɔra kiri bi ki

¹ Ǹʼtɔ tu waaci rakɔɔra kiri ru, tu jibi furumaan ni a na ji nmaŋ.

² Konaŋ ki a na ji amaŋ ɲaannajuutɔnŋ i, kɔ́ɔ́ jalinŋ bi ki i juuka jitan, kí i ji yɛrijitɔnŋ ni fa yɛriragbɛtɔnŋ ni i. Kí a na ji Kirinŋ tɔ litiiri fa jifinŋ wulu lamabali daŋ ni i, niŋ fa shɔɔrinŋ tɔbali li fa Kirinŋ jɛŋ kɛnibali li i.

³ Kí a na ji koŋ ɲakili furumaan ni fa koŋ sunmakwulupabali li i, koŋ tɔ litiiri fa koŋ juumaan yɛri rasɔɔbali shurubitiŋ ni i, shɔɔrinŋ bidi nwɔ̀ri tɛ kì.

⁴ Kí i ji janfatiŋ ni fa yɛri dintɛ bi matiiri fa yɛriragbɛtɔnŋ sinaŋ ni i, nwɔ̀ri ɲaannabyɛ bi kiri di-i arì tɛ, kí i niŋ pari Kirinŋ wu.

⁵ Kí a na arì yɛri ji miŋ tu Kirinŋ jɛŋ kɛnitiiri i, konaŋ kiri ɲaanna, niŋ i faa Kirinŋ jɛŋ kɛni ki baraka ki i nwɔ̀, kí i arì kaan niŋ tɛ. Nʼyɛri paka tɔ niŋ koŋ kwuru kiri kɛlina dɛ!

⁶ Niŋ koŋ kiri bɛɛ ri i de-a kaniŋ kiri sun, kí i mari ciiru ɲakili lakurumaan kiri bɛɛ ri sunnɛɛn-ni, arɔɔ kalinŋ kiri wu, fɔ kí i ǹʼbɛɛ ri kila-ri. Niŋ mari bishi kiri i bijɛ ki wɔ joŋ ni i, nwɔ̀ri i cɛɛn-na arì firi ki dintɛ bi kwuru ki bataa cɛfan.

⁷ Niŋ mari kiri i cɛɛn-na kalinŋ kwuru ki bataa cɛfan, nka kí so-a sɛli ki tɔ-i kì.

⁸ Miŋ tu Janɛsi fa Janbɛrɛsi cintɔnŋ Musa sɔsɔ-i ɲaan wɔ̀ tɛ, niŋ koŋ kiri i sɛli ki sɔsɔ-a mìŋ ɲaan tenŋ ki tɛ. Koŋ ciiru juumaan ni yɛ, kí ciiru kiri shɔ kì. Kɔ́ɔ́ bilinabi ki ra bi tɔri shɔ kí sun kì.

⁹ Nka niŋ koŋ kiri a so ta-i jɛŋ kì, sabu konaŋ ki bataa i faa-ra kɔ́ɔ́ ɲakili balibi ki tɔ, miŋ tu Janɛsi fa Janbɛrɛsi wɔ ki tɔ-i ɲaan wɔ̀ tɛ.

Pooli wɔ racinwulu lakɔɔra kiri Timote tɛ

¹⁰ Nka, miŋ Timote, miŋ ǹʼpa-i míŋ cɛfan, ŋi i ńʼwɔ kalinŋ wɔrika ɲaan ki ja, ŋi i ńʼtirika ɲaan ki fa ńʼwɔ bi gbɛbilimaan kiri ja. Míŋ ńʼwɔ bilinabi ki ma-i ɲaan wɔ̀ tɛ, ŋí i ńʼtɔnsunfili ɲaan wɔ̀ tɛ, ŋí i ńʼwɔ bidintɛbi ki ma ɲaan wɔ̀ tɛ, niŋ fa ŋí i ńʼcunadi ɲaan wɔ̀ tɛ, ŋi i niŋ bataa ja.

¹¹ Cɔɔri bi wɔ̀ri fa yɛlibi wɔ̀ri míŋ kila-i Antiyɔsi, fa Ikoniyɔmu niŋ fa Lisitiri kili kiri ru, miŋ nini bataa tɔ-i. Niŋ cɔɔri bi kiri fa niŋ yɛlibi sinaŋ kiri míŋ kila-i, míŋ i yìrì pa ńʼna, nka Ŋuntiŋ ki na-i míŋ mwu yìrì bataa wu.

¹² Sɛli ki ra, koŋ finŋ woo finŋ i ǹʼtɛ, a i Yesu Kirisa wɔ saa ki tiri Kirinŋ jɛŋ kɛmi wu, niŋ bataa ra cɔɔri.

¹³ Nka, koŋ juumaan kiri fa daalintiŋ kiri ra na ǹʼbɛɛ bo-ri arɔɔ bijɛ kiri sun, kí i konaŋ ki fɔni-ni, miŋ tu kí yɛrima kiri fɔni-i ɲaan wɔ̀ tɛ.

¹⁴ Miŋ kɔniŋ kalinŋ wɔ̀ kila-i, ŋi i ji ǹʼpa nʼgbɛ fuuli la, nʼgbɛ furu niŋ sun, sabu miŋ ǹʼtɔ-i tu miŋ niŋ kalinŋ ki kila koŋ kwuru wɔ̀ gbɛ.

¹⁵ Miŋ Kirinŋ wɔ sɛbɛ kiri ru wulu kiri tɔ-i, ŋì i nʼtu tiranbi ru, nini a so ɲakilitinbi wɔri-i miŋ tɛ, ŋi i bili Ŋuntiŋ Yesu ra, ŋi i nʼmwu.

¹⁶ Kirinŋ wɔ sɛbɛ ki ru wulu kiri bataa po-i Kirinŋ yɛrima ki ru Ɲiniwɔlinŋ ki baraka ra. Niŋ ki ra, tukulu i yìrì bataa ra, nwɔma sɛli ki kalinŋ ki i wɔri konaŋ ki tɛ, kalinŋ purubitɔnŋ kiri i kari, kulu i tan ǹʼwu niŋ fa ŋì i telibi saa de-ri konaŋ ki fɛ,

¹⁷ nwɔma Kirinŋ wɔ konanbi ki i nafaa, kí i baara shɔɔrinŋ kwuru ki bataa maka ɲaantɔ.