Timote (2) 2 - Jɔ Biibili ki

Yesu Kirisa wɔ surudashi shɔɔrinŋ ki bi ki

¹ Nwɔ̀ i miŋ, míŋ danshuru, shɔɔrinŋ wɔ̀ i kila-a Yesu Kirisa baraka ra, tɔnnafurubi kila niŋ nu.

² Miŋ wulu wɔ̀ri sunjorama rama-i míŋ tɔnŋ na shɛɛri mwɔɔnna ɲaanna, nini biye bilinakpeeri gbɛsun, nwɔ̀ri ra so koŋ tɔri ri kini-i yìrì ra sɛbɛ.

³ Nʼwɔ lu shi cɔɔri ki ru, miŋ tu Yesu Kirisa wɔ surudashi shɔɔrinŋ.

⁴ Surudashi shɔɔrinŋ finŋ woo finŋ i ǹʼtɛ, a ŋununtiŋ ki ciiru i di a wu, ǹʼtɔri tenŋ a yɛri fɔɔn-na ka juniɲa ka ru bi ri wu kì.

⁵ Mìŋ ɲaan tenŋ ki tɛ, manjan bili tanmaŋ ki ru, koŋ tɔri tenŋ sotinbi jali ki kila-a manjan ki sariya kiri rasɔɔbali kì.

⁶ Ji kaantɔnŋ wɔ̀ cɛrukɔli-i baara ki ra, ninki i awɔ bilaŋ ki tɛri-ra ǹʼjɔnɔ.

⁷ Míŋ i nwɔ̀ bi-a miŋ tɛ, niŋ tu nʼɲakilila, ŋi i nʼmiiri-ri ǹʼsun, sabu Ŋuntiŋ ki a na ɲakilitinbi wɔri miŋ tɛ, ŋi i bi bataa ɲaantɔ.

⁸ Nʼɲakili tu Yesu Kirisa ra, Dawuda nupo ki, nwɔ̀ ŋmɛni po san-i konkwuu kiri kanfɛ, miŋ tu míŋ i ǹʼsunjo-a ɲaan wɔ̀ tɛ, ŋì i kɛɲɛ Kirinŋ wɔ Wulujii ki wu.

⁹ Niŋ Wulujii ki bira, míŋ i cɔɔri-ra, niŋ fa jɔlɔkɔ i ji ye míŋ na, miŋ tu bi kulinŋ matɔnŋ. Nka, Kirinŋ wɔ wulu ki kɔlimaan i kì.

¹⁰ Niŋ ki ra, míŋ i bi bataa pa-ri ńʼna Kirinŋ wɔ koŋ ɲaannashimaan kiri bira, nwɔma nini yɛrima kiri i so arì mwu-i Yesu Kirisa baraka ra, niŋ fa kí i gbɛbi kɔbali ki kila.

¹¹ Ka wulu kari i sɛli i, yìrì tu : « A yibɛɛ fa Kirisa ji beeni yimaŋ fan, yibɛɛ fa ntiŋ a ŋmɛni yimaŋ fan sɛbɛ.

¹² A yibɛɛ yi banba tu bilinabi ki ru, yibɛɛ fa ntiŋ a ta awɔ masabi ki ma. A yibɛɛ yi kaan ntiŋ tɛ, ntiŋ yɛrima ki ra a kaan yibɛɛ tɛ.

¹³ A yibɛɛ ji dariwulutiŋ ni i kì, mìntiŋ kɔniŋ i dariwulutiŋ i waarinŋ bataa ru, sabu ntiŋ a yɛri sɔsɔ-a kì.  »

Cinŋ matɔnŋ shɔɔrinŋ ki bi ki

¹⁴ Tu, ŋi i konaŋ ki bataa ɲakilila bo-ri ka tɛ waarinŋ bataa ru Kirinŋ ɲaanfɛ, tu kí fa sɔsɔɔlinŋ tan-ni wulu kiri sun kì. Niŋ finŋ tɔri shɔ-a kì, nka ŋì a ramatɔnŋ kiri maku li-a.

¹⁵ Nʼcɛrukɔli, ŋi i ji cinŋ matɔnŋ sɔbɛ ɛ, Kirinŋ ɲaanfɛ, nwɔ̀ ɲaankwun-a awɔ cinŋ ki bi wu kì, nka ntiŋ i sɛli ki wulu ki sunjo-ri telibi wu.

¹⁶ Nʼyɛri maŋ nari wulu ŋuŋ bali bimaanna ki ra, ninwɔ̀ fa bilinabi ki fu-a kì, sabu nwɔ̀ri i niŋ bishi kiri ma-a, niŋ i ǹʼbɛɛ bo ta-a nini wɔ bilinabalibi ki sun.

¹⁷ Kɔ́ɔ́ wulu kiri i miŋ tu firi ra ta juumaan wɔ̀ i koŋ firi ki shɛn ki taa-ra. Imene fa Filɛti i niŋ koŋ kwuru kiri bɛɛ ri i.

¹⁸ Kí arì kɔɔye-i sɛli ki ra, kí i ǹʼbi-ri tu konkwuu kiri ŋmɛni kɔ. Niŋ wulu kiri i ji ǹʼbɛɛ ri wɔ bilinabi ki li sababu.

¹⁹ Niŋ fa a fɔn na, Kirinŋ bi wɔ̀ cɛ sɔɔ-ɔ, niŋ i tu-a a ta ru. Ka wulu kari sɛbɛ-i niŋ bi sun, tu : « Ŋuntiŋ ki i awɔ kiri tɔ-a. » Niŋ fa tu : « Koŋ finŋ woo finŋ ǹʼbi-a tu afinŋ Ŋuntiŋ ki wɔ, nintiŋ i a kanŋ po san-a bi kɛrimaan kiri ru. »

²⁰ Masafu ki ciiru finŋ kiri sɛniŋ fa warifɔ bantenŋ na finŋ namɔnimaan ni i kì, ǹʼbɛɛ ri ramɔni-i suu ra, ǹʼtɔri ri i ramɔni jɔ ra. Niŋ finŋ kiri bɛɛ ri i ji jibi sinaŋ sun baara mafinŋ ni i, ǹʼtɔri ri i ji jibi gbansanŋ sun wɔ ri.

²¹ Mìŋ ɲaan tenŋ ki tɛ, a konwɔtiŋ a yɛri paka tɔ ka bi kari kankantɛ, nintiŋ a ji miŋ tu jibi sinaŋ tɛ finŋ nawu fɔɔmaan shɔɔrinŋ i. Ntiŋ a a ŋununtiŋ ki maku shɔ, ntiŋ namɔnimaan i ji-i baara shɔɔrinŋ kwuru ki bataa tɛ.

²² Timote, ɲɔrɔkɔbi ki fwuu ki i na-a yɛri dintɛ bi wɔ̀ri wu, deka shɔ nini kɛlina dɛ! Nwɔ̀ri arì gbɛ bili-i Ŋuntiŋ ki sun, kí i ǹʼgbɛ-ri ciirufɔɔbi wu, nʼfa nini telibi ki fa bidintɛbi ki fa ɲaanfɛfili ki ceeli.

²³ Nka, nʼkɔɔye sɔsɔɔlinŋ gbansanŋ kiri ra, sabu ǹʼtɔ tu nini nakɔɔra na-a kari ri wu.

²⁴ Ŋuntiŋ ki tɛ baara matɔnŋ ki kakan ntiŋ i ji kari kwurutɔnŋ i kì, nka ntiŋ kakan-i ntiŋ i a tɔnsunfili koŋ bataa tɛ, ntiŋ i so koŋ tɔri ri kali-i, ntiŋ i ji bikwunnutɔnŋ i.

²⁵ Nwɔ̀ri i ntiŋ wɔ wulu ki sɔsɔ-a, ntiŋ i nini nacin-ni tɔnsunfili wu, sabu ŋì a so ji-i Kirinŋ i kí ɲakili ki rapwulu, kí i sɛli ki tɔ,

²⁶ kí i ɲakili shɔɔrinŋ kila, kí i arì yɛri san shitaanni wɔ pee cumaan ki ra, ninwɔ̀ kí pa wuru-i, nwɔma kí i a dintɛ bi ki ma-ni.