Timote (1) 6 - Jɔ Biibili ki

Joŋ kiri fa arì ŋununtiŋ kiri bi ki

¹ Tindaŋ wɔ̀ri i jonbi ru, tu kí arì ŋununtiŋ kiri paka shɔ, kí i kí gbɛ-ri, nwɔma koŋ fa na sababu kila, ntiŋ i Kirinŋ tɔ ki li kì, niŋ fa ntiŋ i yɔɔ kalinŋ ki sunjuu-u kì.

² A kí ŋununtiŋ kiri ji bilinatiiri i, kí fa ǹʼbi tu arìbɛɛ fa kí ji tindaŋ tenŋ ni i, kí i arì kaan kí gbɛ kì. Nka kí baara ki ma kí tɛ, ŋì i fwuu a jɔnɔ ki sun. Sabu tindaŋ kiri bɛɛ ri i tɔnɔ kila-a kɔ́ɔ́ baara ki ru. Miŋ kakan-i ŋi i konaŋ kiri kali-li ka bi kari ra, ŋi i ǹʼfɔɔ.

Purutiŋ kiri fa arɔɔ nafulu sɔli ki

³ A konwɔtiŋ konaŋ kiri kali bi tɔri ra, nwɔ̀ fu-a yibɛɛ Ŋuntiŋ Yesu Kirisa wɔ wulu sɛlitiŋ ki walima Kirinŋ jɛŋ kɛmi ki wu kì,

⁴ yɛriragbɛbi i nintiŋ nu, ntiŋ i bi tɔri tɔ-a kì, bi ɲaan ceeli bi kiri niŋ fa sɔsɔɔlinŋ na wulu kiri ntiŋ ɲakili ki li-i. Niŋ bi kiri i na-a ɲaannajuubi ki fa kari kiri fa ɲakilila jɛ kiri,

⁵ niŋ fa sɔsɔɔlinŋ kɔbali kiri wu ɲakili bali kiri faninmwuŋ. Niŋ koŋ kiri sɛli ki tɔ-a kili kì. Kí i Kirinŋ saa tirimaanna ki ji-a jalinŋ ceeli saa a.

⁶ Aawe sɛli yɛ, ŋi i bili Kirinŋ na, fintinbi sinaŋ yɛ, a miŋ ji jɔɔ-ra nʼwɔ kila wɔ ki ru kì.

⁷ Sabu yibɛɛ fa finŋ tɔri na ka juniɲa ka ru kì, yibɛɛ ra po finŋ tɔri wu ǹʼnu kì.

⁸ Niŋ ki ra, a yibɛɛ ji yi nufinŋ ki fa yi bo ǹʼsunjuulinŋ ki kila-a kɔ, niŋ a yibɛɛ po.

⁹ Nka nwɔ̀ri i ǹʼtɛ, arì i ji fintiŋ ni i, a kɔrɔbɔ bi na kí tɛ, ŋì i so kila-a kí sun, sabu kí dintɛ bi kiri i ji-a pee cumaan ni i, yìrì i kí pa, yìrì i kí li, yìrì kí haliki pewu.

¹⁰ Sabu wari sɔli ki i bijɛ kwuru ki bataa kanaŋ i. Ǹʼbɛɛ ri arì bo-i ǹʼcɛfan, fɔ kí i arì yɛri fɔni, kí i po san bilinabi saa ki sun pewu, kí i bɔni mwɔɔnna so arì yɛri kiri sun.

Pooli wɔ racin wulu kiri Timote tɛ

¹¹ Dɔnsaŋ, Timote, minwɔ̀ i Kirinŋ wɔ koŋ i, nʼkɔɔye ka bi kari ra, ŋi i telibi ki fa Kirinŋ jɛŋ kɛnibi ki fa bilinabi ki fa bidintɛbi ki fa cunadibi ki niŋ fa nduujiibi ki ceeli-li.

¹² Nʼcɛrukɔli bilinabi ki ra, miŋ tu surudashi shɔɔrinŋ wɔ̀ i kari tɔnŋ na, ŋi i ɲaninkulutɔnbi kɔbali ki paka shɔ, sabu Kirinŋ miŋ dɔri-i ninki bira, miŋ tu miŋ ǹʼji-i shɛɛri mwɔɔnna ɲaanna ɲaan wɔ̀ tɛ.

¹³ Kirinŋ wɔ̀ i ɲaninkulutɔnbi ki wɔri-ra finŋ bataa tɛ, niŋ fa Yesu Kirisa wɔ̀ sɛli ki bi-i Pɔnsi Pilati ɲaanna, nini ɲaniŋ i yibɛɛ ra,

¹⁴ ǹʼma nini bira, ŋi i Kirinŋ wɔ cinŋ bimaan kiri paka shɔ fɔɔbi wu niŋ fa telibi wu, fɔ ŋì i ta so yi Ŋuntiŋ Yesu Kirisa na shikaŋ ki sun.

¹⁵ A ǹʼna waari ki so, Kirinŋ yɛrima ki a na ǹʼji kirinpɔli ki ra. Mìŋ Kirinŋ tenŋ pe ki i finŋ kiri bataa ŋununu. Yibɛɛ i ninki gbɛ-a tu: masa kiri wɔ Masa, niŋ fa tu ŋuntiŋ kiri wɔ Ŋuntiŋ ki.

¹⁶ Mìŋ tenŋ pe ki i beenibali ki i. Ǹʼsɔɔ nɔɔri wɔ̀ ru, niŋ sarinŋ ki gbɛka jɛ ki, koŋ tɔri tenŋ so-a a kpari-i ǹʼtɛ kì. Koŋ dantenŋ ɲaniŋ bili ja ǹʼsun kì, koŋ dantenŋ dumiŋ a so ǹʼja-i kì. Gbɛbi fa sotinbi i ǹʼwɔ waarinŋ bataa ru! Amiina!

Wulu wɔ̀ kakan-i ŋì i bi nafulutiŋ kiri tɛ.

¹⁷ Ǹʼbi furu ka juniɲa ka ru nafulutiŋ kiri tɛ, tu kí fa arì yɛri ragbɛ kì. Tu kí fa arì gbɛ bili nafulu kɔ wɔ ki sun kì. Nka tu kí arì gbɛ bili Kirinŋ sun, ninwɔ̀ i finŋ bataa wɔri-ra yibɛɛ tɛ, ŋì i fwuu yi ɲakilila wɔ ki sun, nwɔma yi i ǹʼjiisan.

¹⁸ Ǹʼbi kí tɛ, tu kí shɔɔrinŋ ma, tu kí i ji fintiŋ ni i, mabi shɔɔrinŋ ki ra, kí i arì gbɛ rupili, kí i ji koŋ katiiri i.

¹⁹ Niŋ ɲaan ki tɛ, kí a nafulu shɔɔrinŋ kɔbali lakɔli bo arì jɛŋ siri, nwɔma kí i ɲaninkulutɔnbi sɛlɛsɛli ki kila.

Pooli wɔ wulu lakɔɔra kiri Timote tɛ

²⁰ Timote, Kirinŋ bi wɔ̀ biye-i miŋ gbɛsun, niŋ paka shɔ nʼgbɛ fuuli la, ŋi i nʼyɛri cɔye konaŋ kiri wɔ wulu ŋuŋ bali kiri ra, nwɔ̀ri fa bilinabi saa ki fu-a kì. Ŋi i nʼyɛri cɔye kɔ́ɔ́ sɔsɔɔlinŋ gbansanŋ kiri ra sɛbɛ, kí i nini wɔ̀ri ji-a bitɔbi i.

²¹ Ǹʼbɛɛ ri ǹʼpa-i niŋ bitɔbi ki cɛfan, fɔ kí i bilinabi sɛlɛsɛli ki pani pewu. Kirinŋ wɔ shɔɔrinŋ ki tu á fan.