Timote (1) 5 - Jɔ Biibili ki

Bilinatɔnŋ kiri racinka ɲaan shɔɔrinŋ ki bi ki

¹ A miŋ ji bosomaan racin-a, fa wulu sunfuru bi ntiŋ tɛ kì, nka ntiŋ nacin miŋ tu nʼtiŋ. Ŋi i ɲɔrɔkɔ kiri pa miŋ tu nʼnarinshuru ri.

² Mari cɛɛnni kiri racin miŋ tu nʼɲiŋ ni, ŋi i mari bulaaŋ kiri racin miŋ tu nʼnarinmari ri, ŋi i kí paka shɔ ciirufɔɔbi wu bi bataa ra.

Kanimari kiri bi ki

³ Kanimari wɔ̀ri i nmaŋ, koŋ nwɔ̀ri ra kì, ŋi i nʼɲakili tu nini na kusɛbɛ.

⁴ Nka, a daŋ ni ji kanimari wɔ̀ gbɛ, walima, nmari daŋ ni wɔ daŋ ni ji nmaŋ, niŋ daŋ kiri kakan-i kí i kɛni Kirinŋ jɛŋ, kí i ye arì jifinŋ kiri tɛ. Kí jifinŋ kiri, walima, kí jifinŋ cɛɛnni kiri bi shɔɔrinŋ wɔ̀ ma-i kí tɛ, kí i niŋ kɔni ki sali. Ninki di-i Kirinŋ tɛ.

⁵ Kanimari wɔ̀ tu-i a cinancinŋ, niŋ i a gbɛ bili-la Kirinŋ sun, nmari i a cɛrukɔli Kirinŋ nafɛ ki ra, cii fa sunŋ.

⁶ Nka kanimari wɔ̀ ɲakili i firi ki dintɛ bi jɛ kiri bantenŋ na ka juniɲa ka ru, niŋ beeni-i kɔ, hali nmari ji faa a ɲaanna.

⁷ Miŋ kakan-i ŋi i kí ɲakilila bo niŋ bi kiri tɛ, nwɔma pɔlimaŋ fa kila kí tɔri ra kì.

⁸ Konwɔtiŋ a koŋ kiri gbɛrinpa-a kì, ntiŋ dumiŋ awɔ kanindaŋ kiri gbɛrinpa-a kì, nintiŋ bilinabi saa ki pani-i kɔ, bilinabali i ji pari ntiŋ wu.

⁹ Kanimari wɔ̀ tɔ i so-a sɛbɛ ji-i egilisi ki ru kanimari i, niŋ kakan-i niŋ i ji mari i, nwɔ̀ jiri yaabyaŋ kila-i, niŋ fa nwɔ̀ ji wuru a kulu-li a shinŋ ki tɛ, nmari shuru tɔri tɔ a shinŋ ki ciniŋ kì.

¹⁰ Nmari kakan-i, nmari tɔ shɔɔrinŋ i ji a mabi kiri ru, nmari i a daŋ kiri rakilika shɔ-ri, nmari i ji jɛshimari shɔɔrinŋ i, nmari ji bilinatɔnŋ kiri kanŋ nawutɔnŋ i, nmari i yɛlinkɔni kiri sunmakwulupa-ri, nmari i bi shɔɔrinŋ kwuru ki bataa ma-ni.

¹¹ Nwɔ̀ i kanimari bulaaŋ kiri i, fa nini tɔ ki sɛbɛ kì, sabu a cɛn tɔ na kwulu kí ra, kí a na arì kɔɔye Kirisa ra, kí i tiri niŋ shurukulu ki ru.

¹² A niŋ ma, kiti ki a fɛɛn kí sun, ǹʼsababu ki i ji tu kí arì tɔnŋ wɔri-ri, tu arìbɛɛ ra arì yɛri bataa wɔri Kirisa tɛ, nka tu kí niŋ tɔnwɔri jɔnɔ ki li, arɔɔ shuru tɔri shi bi ki wu.

¹³ A niŋ ma, kí a ji jurubitiŋ ni i, kí a baara ma kì, duu kí i de-ri arì maanni fan kaniŋ kiri sun. Kí a na ńʼtu niŋ bantenŋ sun kì, kí a na ji wulu mwɔɔnna tiŋ ni i, kí i arì tɔnŋ de-ri konaŋ kiri wɔ wulu kiri ru, nwɔ̀ri kɔ́ɔ́ saa sun kì.

¹⁴ Niŋ ki ra, míŋ a ǹʼbi tu kanimari bulaaŋ kiri shuru ri shi, kí i cɛn nini sun, kí i daŋ ni kila, kí i arɔɔ kaniŋ kiri gbɛrinpa-ri, nwɔma yi ɲa kiri fa yi rufyɛ wulu kila, kí i niŋ bi yi sun kì.

¹⁵ Míŋ i ka bi-a, sabu kanimari kiri bɛɛ ri saa telimaan ki bo-i kɔ, fɔ kí i ǹʼpa shitaanni cɛfan.

¹⁶ A kanimari ji bilinatɔnmari ki bɛɛ wɔ konbi saa ru, tu niŋ bilinatɔnmari ki a ɲakili tu niŋ kanimari ki ra, niŋ fa niŋ kanimari ki shii ki tu egilisi ki sun kì, nwɔma koŋ kanimari wɔ̀ri ra fyewu kì, egilisi ki i so yeka shɔ-i nini tɛ.

Jɛntɔnŋ kiri gbɛ bi ki

¹⁷ Egilisi ki ciiru, bosomaan wɔ̀ri i jɛnpa ki tanka shɔ-a, nini kakan-i nini i bosomaan pyɛ kiri wɔ gbɛbi ki bishi kaan fuuli kila. Nwɔ̀ri i Kirinŋ wɔ wulu ki sunjo-a konaŋ ki tɛ, niŋ fa kí i konaŋ ki kali-li, gbɛ faa i bo nini wɔ ki sun sɛbɛ.

¹⁸ Ǹʼbi-i Kirinŋ wɔ wulu sɛbɛ ki ru tu : « Naan wɔ̀ i ɲinaŋ ki bwɔ-a, fa niŋ tɔnŋ ki kɔli kì. » Ŋì i bi sɛbɛ tu : « Cinŋ matɔnŋ ki sali ki wɔri ntiŋ tɛ. »

¹⁹ A ǹʼbɛɛ na ǹʼbi miŋ tɛ tu egilisi jɛntɔnŋ ki bɛɛ pɔli, fa nʼtu niŋ na kì, duu miŋ ǹʼnama-i shɛɛri fuuli walima byaŋ tɔnŋ na.

²⁰ A ǹʼbɛɛ ja ji bi pɔlimaan ma, jɛbi nintiŋ gbɛ konaŋ pyɛ kiri ɲaanna, nwɔma kɛmi i de nini nu.

²¹ Míŋ i ǹʼceeli-la miŋ gbɛ, ŋí i ǹʼfuru, Kirinŋ fa Yesu Kirisa fa Mɛlɛkɛn wɔlinŋ kiri ɲaniŋ i yibɛɛ ra, ńʼtu a cinŋ bimaan kari bataa po arì saa tɛ telibi wu, fa koŋ san koŋ nu kì.

²² Fa nʼgbɛ bili koŋ tɔri tenŋ sun nukwululula, ŋi i ntiŋ bo egilisi ki ru baara ra kì. Fa dɛbɛ koŋ tɔri tenŋ fan awɔ bijɛ mamaanna na kì. Nʼyɛri paka tɔ bijɛ ki bataa kankantɛ.

²³ Fa ju bantenŋ mwunu-ni kì, dunfɛnŋ pyaanŋ mwunu-ni, nwɔma nʼwɔ nufinŋ numaan ki rapwulumaŋ i di. Niŋ a ǹʼbɛɛ san mɔɔn ciiyaa kiri fa nʼwɔ cɔɔri myɛɛnniŋ kiri ra.

²⁴ Konaŋ kiri bɛɛ ri wɔ bijɛ ki i tɔ-a a ta sun, niŋ i faa kiti ki kwuru-i sun kì, nka ǹʼbɛɛ wɔ ri i tɔ-ri kiti ki kɔɔtɛ.

²⁵ Mìŋ ɲaan tenŋ ki tɛ, mabi shɔɔrinŋ kiri i arì yɛri ji-a manisarinŋ ki tɛ, hali nwɔ̀ri po manisarinŋ ki tɛ jona kì, nini nadumaan na tu nmaŋ kì.