Timote (1) 4 - Jɔ Biibili ki

Kalimɔɔ purubitɔnŋ kiri bi ki

¹ Dɔnsaŋ, Ɲiniwɔlinŋ ki i ǹʼfɔɔ bi-a, tu waaci rakɔɔra kiri ra, tu konaŋ kiri bɛɛ ri a na arì kaan bilinabi ki tɛ, tu kí i ǹʼpa koŋ fɔnitɔnŋ kiri bɛɛ ri cɛfan, nwɔ̀ri wɔ kalinŋ ki i po-a ɲinijɛ ri gbɛ.

² Kí a na ncusun niŋ purubitɔnŋ wulufuulibitɔnŋ kiri i arì sunnɛɛn, bijɛ ki nini wɔ̀ri ciiru kiri mini-i bilibili, miŋ tu ciilinŋ.

³ Niŋ koŋ kiri bɛɛ ri i ǹʼbi-a tu shuru kakan, ntiŋ i mari cɛn kì, niŋ fa tu nufinŋ kwuru kiri bɛɛ ri nmaŋ, tu nini fa nu kakan kì. Nka sɛli ki ra, Kirinŋ niŋ nufinŋ kiri po-i, nwɔma tu koŋ wɔ̀ri bili-i afinŋ Kirinŋ na, kí i ji sɛli ki tɔ-a, nini i niŋ nufinŋ kiri nu, kí i baraka bi a tɛ.

⁴ Kirinŋ finŋ woo finŋ po-i, niŋ bataa shɔ-i, finŋ tɔri tenŋ kakan, ŋì i kee nini nu kì, nka tu yi ji-a yìrì nu, tu yi baraka bi Kirinŋ tɛ,

⁵ sabu, Kirinŋ wɔ wulu ki fa Kirinŋ nafɛ ki baraka ra, finŋ bataa i ji-a finŋ fɔɔmaan a.

Kirinŋ tɛ baara matɔnŋ shɔɔrinŋ ki bi ki

⁶ A miŋ ji nʼtindaŋ kiri kali-la niŋ bi kiri ra, miŋ a ji Yesu Kirisa tɛ baara matɔnŋ shɔɔrinŋ i. Miŋ a ǹʼji niŋ ki ra, tu miŋ nʼɲini ki tɔnnafɛ-a bilinabi ki wu, niŋ fa tu miŋ tiri kɛɲɛ-a kalinŋ telimaan ki wu.

⁷ Kirinŋ jɛŋ kɛnibali wulu kulinŋ kiri fa fɔlɔfɔlɔ tɛlinŋ wɔ̀ri fa Kirinŋ saa ki fu-a kì, nʼkɔɔye nini na. Nʼyɛri kini Kirinŋ jɛŋ kɛni bi kiri ra.

⁸ Koŋ i a firi ki rusi, niŋ shɔ-i, tɔnɔ i niŋ nu bi pyaanŋ ni bantenŋ na, nka tɔnɔ i Kirinŋ jɛŋ kɛni ki ru bi bataa ra, sabu ŋì i yibɛɛ gbɛrinpa-a ka juniɲa ka ru, ŋì i yɔɔ siri ki jɛnsɔɔ-ri sɛbɛ.

⁹ Niŋ wulu ki i sɛli i, konanmini bataa kakan-i yi i ji ninwɔ̀ tɛ.

¹⁰ Niŋ ki ra, yibɛɛ i yɛlinŋ ki fɔn kwuru tan-ni, yi i yi sunfuru-ri, sabu yibɛɛ yi gbɛ bili-i Kirinŋ ɲaninkulutɔnŋ ki sun, ninwɔ̀ i konanmini bataa mwutɔnŋ ki i, nwɔ̀ri bili-i Kirisa ra, ŋì i nini mwu-a.

¹¹ Ka bi kari bi, ŋi i ǹʼfuru konaŋ ki tɛ, ŋi i kí kali-li yìrì ra.

¹² Koŋ tɔri tenŋ fa miŋ nufyɛ tu ŋi tiraŋ i kì, nka ji ɲaanjitɔnŋ i bilinatɔnŋ kiri gbɛ, wulu ki, fa mabi ki fa bidintɛbi ki fa bilinabi ki fa fɔɔbi ki wu.

¹³ Sana míŋ i so miŋ tɛ, nʼcɛrukɔli ŋi i Kirinŋ wɔ wulu sɛbɛ ki kali-li konaŋ ki tɛ, ŋi i kí racin-ni, ŋi i kí kali-li.

¹⁴ Miŋ Kirinŋ wɔ kafinŋ wɔ̀ kila-i, ninwɔ̀ wɔri-i miŋ tɛ cintɔnbi wulu kiri baraka ra, niŋ fa cɛɛnni kiri wɔ gbɛbilimaan ki baraka ra, fa niŋ ji gbɛ kɔɔtɛfinŋ i kì.

¹⁵ Nʼcɛrukɔli niŋ bi kiri ra, ŋi i nʼyɛri ki bataa wɔri niŋ cinŋ ki tɛ. A niŋ ma, koŋ bataa ra mɔɔn jɛnta ki ja.

¹⁶ Nʼɲakili tu nʼyɛri ki fa nʼwɔ kalinŋ wɔri wɔ ki ra. Nʼcɛrukɔli tu niŋ na kusɛbɛ, sabu a miŋ ji niŋ ma-a, miŋ a nʼyɛri ki mwu, ŋi i nʼwɔ wulu ki ramatɔnŋ kiri mwu sɛbɛ.