Timote (1) 2 - Jɔ Biibili ki

Kirinŋ nafɛka ɲaan ki

¹ Míŋ i finŋ jɔnɔ wɔ̀ ceeli-la, niŋ i tu bilinatɔnŋ kiri rafɛ tan koŋ bataa tɛ, kí i Kirinŋ nafɛ rafɛka kwuru ki bataa wu, kí i baraka bi Kirinŋ tɛ koŋ bataa bira.

² Á Kirinŋ nafɛ masa kiri fa kɛniŋ jɛntɔnŋ kiri bataa tɛ, nwɔma yi ɲaanfɛfilimaan fa yi ɲakili sɔɔmaan i tu, yi i tirika shɔ Kirinŋ jɛŋ kɛmi wu.

³ Niŋ ki shɔ-i, ŋì i ji di yibɛɛ Mwutɔnŋ Kirinŋ tɛ sɛbɛ.

⁴ Mìŋ i ǹʼtɛ tu konaŋ ki bataa i a mwu, kí i so sɛli ki tɔ-i.

⁵ Sabu Kirinŋ i tenŋ i, kaalipatɔnŋ tenŋ i ji Kirinŋ fa konaŋ ki faninmwuŋ sɛbɛ. Niŋ i Yesu Kirisa a, ninwɔ̀ i konanmini i.

⁶ Ntiŋ a yɛri ji-i saraka a, konaŋ bataa ŋunsan a. Niŋ ma-i, ŋì i kɛɲɛ Kirinŋ dintɛ waaci ki wu, ŋì i ǹʼji tu afinŋ ǹʼtɛ, a i konaŋ kiri bataa mwu.

⁷ Niŋ ki ra, míŋ i ji Wulujii ki sunjotɔnŋ i, niŋ fa cindaŋ i, nwɔma ŋí i bilinabi ki fa sɛli ki ɲaanbi shiya tɔri kiri tɛ. Míŋ puru bi-a kì, míŋ i nwɔ̀ bi-a, niŋ i sɛli i.

Shuru kiri fa mari kiri tirika ɲaan ki

⁸ Niŋ na, míŋ i ǹʼtɛ, ńʼtu shuru kiri ji Kirinŋ nafɛ-a mani woo mani nu, ńʼtu kí arì gbɛ wɔlinŋ kiri fɛshi kirina, ciirufɔɔbi wu, tɔnkwulu fa sɔsɔɔlinŋ fa ji kí ciiru kì.

⁹ Mìŋ ɲaan tenŋ ki tɛ sɛbɛ, míŋ i ǹʼbi-a mari kiri tɛ, ńʼtu kí arì sunye sunyefinŋ kpaajii ri wu, nwɔ̀ri ra kí pa. Kí fa ŋuniŋ kpaafuru tan-ni kì, kí dumiŋ fa sɛniŋ fa kuruɲɛ kpaafuru ri ye-ri kì. Kí fa juulinŋ tɔtiŋ ni bo-ri kì.

¹⁰ Nka tu kí arì sunye mabi shɔɔrinŋ ni wu. Mari wɔ̀ri i ǹʼbi-a tu arìbɛɛ kɛni-na Kirinŋ jɛŋ, nini mabi kiri i niŋ ɲaan ki tɛ.

¹¹ Mari kiri kakan-i kí i sɔɔ, kí i arì gbansan, kí i arì tɔɔnye kalinŋ ki tɛ yɛri sunjɛribi wu.

¹² Míŋ a ńʼtu mari i ji kalimɔɔ ɔ, nmari i ji shuru ŋununtiŋ i kì, nka tu nmari a gbansan.

¹³ Sabu Kirinŋ Adama ki ramɔni-i ǹʼjɔnɔ, ŋì i kila ŋì i so Awa sun.

¹⁴ Shitaanni Adama sunnɛɛn ŋì i ntiŋ fɔni kì, ŋì mari sunnɛɛn-ɛ, ŋì i nmari fɔni, nmari i Kirinŋ wɔ sariya ki li.

¹⁵ Mari wɔ daŋ ji bi nmari mwu ba-a kì, nwɔ̀ furu-i, nmari tu bilinabi ki ru, niŋ fa bidintɛbi ki sun, nmari i a yɛri pa, nmari i ji wɔlinŋ i, Kirinŋ ɲaanfɛ.