Timote (1) 1 - Jɔ Biibili kiPooli wɔ coolinŋ ki 1 Míŋ Pooli wɔ̀ i Yesu Kirisa wɔ cindaŋ i, ŋì i kɛɲɛ yibɛɛ Mwutɔnŋ Kirinŋ wɔ wulu ki wu, niŋ fa Yesu Kirisa, ninwɔ̀ i yibɛɛ gbɛbilimaŋ ki i, 2 míŋ i ka sɛbɛ ka wɔri tiri-ra miŋ Timote tɛ, minwɔ̀ i míŋ daŋ sɛlɛsɛli i bilinabi ki ru. Yibɛɛ Tiŋ Kirinŋ fa yi Ŋuntiŋ Yesu Kirisa shɔɔrinŋ ma nʼtɛ, ŋì i nʼsunmakwulupa, ŋì i ɲaanfɛfili wɔri nʼtɛ. Kalimɔɔ purubitɔnŋ kiri bi ki ( Timote (1) 6.3–5 ; Yuhana (1) 4.1–3 ; Kɔlɔsitɔnŋ kiri 2.16–23 ; Tite 1.10–16 ; Pyɛɛri (2) 2.1–22 ) 3 Sɔɔ tu Efɛsi kili ki ru, miŋ tu míŋ ǹʼbi furu wuru miŋ tɛ ɲaan wɔ̀ tɛ, ŋì i míŋ tirira ki tu Maseduwanɛ kɛniŋ ki ru, nwɔma koŋ wɔ̀ri i kalinŋ ŋunaŋ ki wɔri-ra, ŋi i ǹʼbi furu niŋ kalinŋ ŋunaŋ wɔrɔtɔnŋ kiri tɛ, tu kí ǹʼtɔnbo. 4 Kí fa arì cincin fɔlɔfɔlɔ bi bwuumaan kiri fa nupo kpaa tɔbali li dansanmaanna sun kì. Niŋ i na-a sɔsɔɔlinŋ gbansanŋ wu. Kirinŋ cinŋ wɔ̀ biye yibɛɛ gbɛsun, ninwɔ̀ i ma-a bilinabi wu, nini niŋ ta-a jɛŋ kì. 5 Ka cinŋ bimaan ka ŋuŋ ki i nwɔma bidintɛbi sɔbɛ i so kila-i, ninwɔ̀ i po-a ciiru fɔɔmaan fa ciiru shɔɔrinŋ nu, niŋ fa bilinabi sɔbɛ ru. 6 Ǹʼbɛɛ ri ka saa shɔɔrinŋ ka pani-i, kí i arì yɛri fɔni, kí i ji wulu ŋuŋ bali bitiiri i. 7 Kí i ǹʼtɛ, arì i arì yɛri ji sariya kalimɔɔ ri i, niŋ i faa, kí i wulu wɔ̀ri bi-a niŋ fa kí i arì kanŋ cincin-a wulu wɔ̀ri sun, kí niŋ kɔri ki tɔ-a kì. Kirinŋ wɔ sariya ki wɔ baara ki 8 Yi ǹʼtɔ tu Kirinŋ wɔ sariya ki shɔ, nka fɔ ŋì i ta fa yibɛɛ wu baara ki ma kɛɲɛ-a ǹʼwu. 9 Sariya ki sɔɔ koŋ telimaan kiri bi sun kì, duu koŋ kɛrimaan kiri, fa koŋ kaanmaan kiri, fa Kirinŋ jɛŋ kɛnibali kiri, fa bijɛmatɔnŋ kiri, fa Kirinŋ wulu pabali kiri, fa Kirinŋ tɔ litɔnŋ kiri, ŋì i bo tiŋ fa ɲiŋ kilɛntɔnŋ kiri fa koŋ kilɛntɔnŋ pyɛ kiri sun, 10 niŋ fa nankulinŋ kiri fa shuru maŋ ceelitɔnŋ kiri fa joŋ jɔɔ tantɔnŋ kiri fa purubitɔnŋ kiri, niŋ fa shɛɛri jɛ wɔ̀ri i arì kɔni-na puru ki sun, niŋ fa bi finŋ woo finŋ i kalinŋ sɔbɛ ki sɔsɔ-a. 11 Niŋ kalinŋ sɔbɛ ki i po-a Shɔɔrintiŋ Kirinŋ wɔ Wulujii nɔɔritiŋ ki ru, Kirinŋ ninwɔ̀ biye-i míŋ gbɛsun. Baraka wɔrimaanna Kirinŋ wɔ shɔɔrinŋ ki bira 12 Míŋ i coolinŋ wɔri-ra yibɛɛ Ŋuntiŋ Yesu Kirisa tɛ, ninwɔ̀ mɔ́ɔ́n cinŋ ki ma faan ki wɔri-i ńʼtɛ. Ŋí i saaki, ŋí i coolinŋ wɔri ǹʼtɛ, sabu ǹʼbili-i míŋ na, ŋì i awɔ cinŋ ki biye míŋ gbɛsun. 13 Mínwɔ̀ wuru ǹʼtɔ jɛ bitɔnŋ i fɔlɔfɔlɔ, ŋí i ji wuru bilinatɔnŋ kiri cɔɔritɔnŋ i, niŋ fa koŋ juumaan a, nka ŋì míŋ sunmakwulupa-i, sabu míŋ niŋ bi kiri ma-i, ŋì i kila ńʼwɔ bitɔbalibi fa ńʼwɔ bilinabalibi fan. 14 Yibɛɛ Ŋuntiŋ ki shɔɔrinŋ sinaŋ ma-i míŋ tɛ, ŋì i bilinabi fa bidintɛbi de míŋ nu, nini wɔ̀ri i kila-a Yesu Kirisa wɔ tenbi ki ru. 15 Ka wulu ka i sɛli i, gbɛ kakan-i ŋì i fɔɔn nwɔ̀ sun tu : Yesu Kirisa na ka juniɲa ka ciiru, ntiŋ i na bijɛmatɔnŋ kiri mwu. Míŋ wuru niŋ bijɛmatɔnŋ kiri bataa ru juumaan ki i. 16 Niŋ ki ra, míŋ i bijɛmatɔnŋ kiri bataa ru sinaŋ ki i, Kirinŋ míŋ sunmakwulupa-i, nwɔma konaŋ kiri i ǹʼtɔ, tu Yesu Kirisa tɔnsunfili kusɛbɛ, niŋ fa ŋì i míŋ ji ɲaanjifinŋ i, a ra bilinatɔnŋ kiri bataa gbɛ, tu kí a ɲaninkulutɔnbi kɔbali ki kila. 17 Waaci bataa ru Masa yɛ, masa wɔ̀ beeni-a kì, masa wɔ̀ ja-a kì, nwɔ̀ tenŋ pe i Kirinŋ i, gbɛbi fa nɔɔri bili ǹʼsun waarinŋ bataa ru. Amiina! Pooli wɔ tɔnnafurubi wulu kiri Timote tɛ 18 Timote, míŋ danshuru, míŋ i ka bi-a ŋí i ǹʼfuru miŋ tɛ, ńʼtu ŋì i kɛɲɛ cintɔnbi wulu bi fwuudemaan kiri wu miŋ bi sun, ńʼtu a kari shɔɔrinŋ ki tan, ŋi i ǹʼkɛɲɛ nini wu, 19 ŋi i nʼbanba, ŋi i tu bilinabi ki fa ciirufɔɔbi ki sun. Niŋ ciirufɔɔbi ki a mwu-i ǹʼbɛɛ ri wu, niŋ i ji sababu, kɔ́ɔ́ bilinabi ki i li. 20 Imene fa Alɛkisandiri i nini bɛɛ ri i. Niŋ ki ra, míŋ i kí tu shitaanni gbɛfɛ, nwɔma kí i kalinŋ wɔ̀ri wɔri-ra, kí i Kirinŋ wɔ sɛli ki kari-ri, kí i nini tɔnbo. |
© Wycliffe Bible Translators, Inc.
Wycliffe Bible Translators, Inc.