Ɔrɔmutɔnŋ kiri 9 - Jɔ Biibili ki

Kirinŋ fa awɔ konanbi ɲaannashimaan ki bi ki

¹ Míŋ fa Kirisa wɔ tenbi ki ciiru, míŋ i wɔ̀ bi-a niŋ i sɛli i, míŋ puru bi-a kì, sabu Ɲiniwɔlinŋ ki fa míŋ ciiru ɲakili ki i niŋ bi-a míŋ tɛ.

² Míŋ tɔnfɔɔmaan fa ńʼcɔɔrimaan yɛ waarinŋ bataa ru ńʼtindaŋ Isirayɛlitɔnŋ kiri bira.

³ Sabu, hali míŋ ji-a danka kila, ŋí i po san Kirisa wɔ tindaŋ bi ki ru, ńʼtindaŋ Yawutu kiri bira, míŋ a ńʼtu niŋ na.

⁴ Kíbɛɛ kiri i Isirayɛlidaŋ kiri i. Kirinŋ kí ji-i a daŋ ni i. Ŋì i a yɛri ji kí wu nɔɔri sinaŋ nu, ŋì i tɔnwɔri mwɔɔnna de a fa kí faninmwuŋ. Ŋì i sariya ri wɔri kí tɛ, ŋì i a gbɛka ɲaan ki ji kí wu, ŋì i a tɔnŋ wɔri kí tɛ.

⁵ Yibɛɛ tiŋ cɛɛnni kiri po-i kíbɛɛ kiri ru, Kirisa i ji po kí ru ŋì i kɛɲɛ konanminibi saa ki wu. Niŋ Kirisa wɔ̀ i Kirinŋ i, ŋì i ji finŋ bataa ŋununu, niŋ gbɛ waarinŋ bataa ru. Amiina!

⁶ Niŋ i ǹʼbi-a tu Kirinŋ awɔ tɔnwɔri ki rafaaka shɔ kì wa? Niŋ i kì dɛ! Sabu Isirayɛlitɔnŋ kiri bataa Isirayɛlidaŋ sɛlɛsɛli li i kì.

⁷ Aburahamu nupo ki bataa Aburahamu daŋ sɛlɛsɛli li i kì. Sabu Kirinŋ ǹʼbi-i Aburahamu tɛ tu : « Míŋ ńʼtɔnŋ wɔri-i miŋ tɛ nupo wɔ̀ri bira, nini a po Ishaka ru. »

⁸ Niŋ i ǹʼbi-a tu daŋ wɔ̀ri ji-i, ŋì i kɛɲɛ konanminibi saa ki wu, tu nini Kirinŋ daŋ ni kì, nka nwɔ̀ri ji kɛɲɛ-i Kirinŋ wɔ tɔnwɔri ki wu, tu nini bantenŋ shɛɛli-la Aburahamu nupo sɛlɛsɛli kiri i.

⁹ Sabu Kirinŋ a tɔnŋ wɔri-i ɲaan wɔ̀ tɛ, niŋ i kaa tu : « Ka bishi waari ru jirira, míŋ a ńʼpwulu na, danshuru ra na ji Sara gbɛ. »

¹⁰ Niŋ bantenŋ i kì, Erebeka yɛrima ki ji? Nmari awɔ fili kiri kila-i shuru tenŋ gbɛ, ninwɔ̀ i yibɛɛ tiŋ cɛɛnni Ishaka.

^11-12 Daŋ kiri ji-ri waarinŋ wɔ̀ ru sun kì, kí bi shɔɔrinŋ walima bi kulinŋ ma-ni kì, nka ǹʼbi-i Erebeka tɛ tu : « Wɔrinŋ ki a na ji pwaŋ ki tɛ baara matɔnŋ i. » Niŋ ma-i, nwɔma Kirinŋ wɔ bi gbɛbilimaan ki i nafaa. Kirinŋ koŋ ɲaannashi-a, ŋì i kɛɲɛ ntiŋ mabi ri wu kì, nka ŋì i konaŋ kiri dɔri-ra, ŋì i ǹʼkɛɲɛ a yɛrima ki dintɛ bi ki wu.

¹³ Miŋ tu ǹʼsɛbɛ-i ɲaan wɔ̀ tɛ tu : « Míŋ Yakuba bidi-i ńʼtɛ, ŋí i ńʼkaan Insawu tɛ. »

Kirinŋ wɔ koŋ ɲaannashika ɲaan ki

¹⁴ Niŋ ɲaan ki tɛ, yi a ǹʼdanwɔ bi, Kirinŋ telimaan i kì wa? Aayi dɛ!

¹⁵ Sabu Kirinŋ ǹʼbi-i Musa tɛ tu : « Míŋ i ǹʼtɛ ŋí i shɔɔrinŋ ma konwɔtiŋ tɛ, míŋ i shɔɔrinŋ ma-a nintiŋ tɛ. Míŋ i ǹʼtɛ ŋí i konwɔtiŋ sunmakwulupa, míŋ i nintiŋ sunmakwulupa-a. »

¹⁶ Niŋ ɲaan ki tɛ, koŋ tɔri tenŋ dintɛ bi walima ntiŋ mabi ncusun-a Kirinŋ i ntiŋ sunmakwulupa kì, nka niŋ i ma kɛɲɛ-a sunmakwulupatɔnŋ Kirinŋ dintɛ bi ki wu.

¹⁷ Kirinŋ ǹʼbi-i Firawuna tɛ awɔ wulu sɛbɛ kiri ru tu : « Míŋ miŋ ji-i masa a ŋuŋ wɔ̀ ra tikitiki, niŋ i, nwɔma ŋí i miŋ sɔɔ, ŋí i ńʼwɔ sotinbi ki ji, niŋ fa míŋ tɔ ki i bi pwɔkulinŋ ki mani ki bataa ru. »

¹⁸ Niŋ ki ra, Kirinŋ i ǹʼtɛ a i konwɔtiŋ sunmakwulupa, ŋì i nintiŋ sunmakwulupa-a, ŋì i ǹʼtɛ a i konwɔtiŋ ɲakilila furu, ŋì i nintiŋ ɲakilila furu-ra.

Kirinŋ wɔ tɔnkwulu ki fa ǹʼwɔ sunmakwulupabi ki

¹⁹ Ǹʼbɛɛ ra so ǹʼbi-i tu : « Nfɛnŋ na, Kirinŋ i ji faa jɛbi-a konaŋ gbɛ? Nkɛnŋ a so a kaan-a ǹʼdintɛ bi ki sun? »

²⁰ Miŋ konanmini, miŋ nkɛnŋ, fɔ miŋ i Kirinŋ sɔsɔ-ri? Duŋ a so ǹʼbi-i a ramɔnɔtɔnŋ ki tɛ tu : « Nfɛnŋ na, miŋ míŋ namɔni ka ɲaan ka tɛ wa? »

²¹ Duŋ namɔnɔtɔnŋ ki a dintɛ bi ki ma-a jɔ ki wu kì wa? Ntiŋ i so-a miŋ jɔ tenŋ ki sɔɔ-ɔ, ntiŋ i duŋ shɔɔrinŋ kpaafuru ramɔni, ntiŋ i mìŋ jɔ tenŋ ki sɔɔ, ntiŋ i duŋ kpaajii ramɔni.

²² Kirinŋ wuru ǹʼtɛ a i awɔ tɔnkwulu ki fa awɔ sotinbi ki ji konaŋ haliki wɔ kiri wu, nka ŋì a tɔnsunfili-i kí tɛ kusɛbɛ, ŋì i kɔ́ɔ́ bi kiri kwun a ru, miŋ a nfɛnŋ bi niŋ na?

²³ Kirinŋ niŋ ma-i, ŋì i awɔ nɔɔri sinaŋ ki ji kpeeri wu, ŋì nini wɔ̀ri sunmakwulupa-i, ŋì i ji kí ramɔni bo-ri a nɔɔri ki tɛ kabi juniɲa cɛtu ki jɛŋ.

²⁴ Yibɛɛ kiri i niŋ finŋ sunmakwulupa wɔ kiri, Kirinŋ yibɛɛ wɔ̀ri dɔri-i, ŋì i po Yawutu kiri fa shiya tɔri kiri ru.

²⁵ Ŋì ninki bi-i Ose wɔ sɛbɛ ki ru tu : « Koŋ wɔ̀ri wuru mɔ́ɔ́n konanbi i kì, míŋ a nini dɔri tu ńʼwɔ konanbi. Koŋ wɔ̀ri wuru míŋ dintɛtɔnŋ ni i kì, míŋ a nini dɔri tu ńʼdintɛtiiri.

²⁶ Ǹʼbi wuru kí tɛ mani wɔ̀ ru tu : ‹ Ábɛɛ mɔ́ɔ́n konanbi i kì ›, ŋì a bi kí tɛ mìŋ mani tenŋ ki ru tu, ‹ ábɛɛ i Kirinŋ ɲaninkulutɔnŋ ki daŋ ni i. › »

²⁷ Cintɔnŋ Esayi yɛri ki fali-i, ntiŋ i ǹʼbi Isirayɛlitɔnŋ kiri bi sun tu : « Hali Isirayɛlitɔnŋ kiri mwɔ miŋ tu baa tɔnŋ na ɲɛniŋ, kí pyɛ tumaan ki bantenŋ a a mwu.

²⁸ Sabu Ŋuntiŋ ki nwɔ̀ bi-i, ŋì a niŋ ma, ŋì i ǹʼnafaa pwɔkulinŋ sun jona jona, fɔ ŋì i so a daŋ ki ra. »

²⁹ Cintɔnŋ Esayi ǹʼbi wuru sɛbɛ tu : « A kari jɛntɔnŋ kiri Ŋuntiŋ ki ji wuru yibɛɛ tu pyɛ tu-ri kì, yibɛɛ wuru-ra ji miŋ tu Sodɔmu, yibɛɛ wuru-ra ji Gomɔri sali. »

Telibi ki kila-a sariya ki sababu ra kì

³⁰ Ka bataa nfɛnŋ bi-a dɔnsaŋ? Ǹʼyɔ ǹʼbi-a tu shiya tɔri wɔ̀ri wuru telibi ki ceeli-la kì, Kirinŋ nini shɛɛli-i koŋ telimaan ni i a yɛri ɲaanfɛ bilinabi ki baraka ra.

³¹ Nka Isirayɛlitɔnŋ kiri, kíbɛɛ wɔ̀ri wuru telibi ki ceeli-la sariya ki baraka ra, kíbɛɛ ǹʼpɔli-i.

³² Nfɛnŋ na? Sabu kíbɛɛ wuru telibi ki ceeli-la bilinabi ki baraka ra kì, nka kí wuru ǹʼceeli-la arì mabi kiri wu. Niŋ ki ra, kí i arì kanŋ nakwuru arì fɛɛn kwɔ ra,

³³ miŋ tu ǹʼsɛbɛ-i Kirinŋ wɔ wulu ki ru ɲaan wɔ̀ tɛ tu : « Míŋ a kanŋ nakwuru kwɔ sɔɔ-ɔ Siyɔn, faa yɛ, nwɔ̀ i koŋ fɛɛn-na. A konwɔtiŋ bili niŋ kwɔ ki ra, nintiŋ a ɲaankwun fyewu kì. »