Ɔrɔmutɔnŋ kiri 7 - Jɔ Biibili ki

Bilinatɔnŋ ki sariya ki wɔ jonbi ki fɛ kili kì

¹ Ńʼtindaŋ ni, míŋ ǹʼtɔ-i ńʼtu ábɛɛ sariya ki tɔ-a, niŋ ki ra, míŋ i ka bi-ri ábɛɛ tɛ. Ábɛɛ ǹʼtɔ-a tu sariya ki faan ki konanmini ɲaninkulutɔnŋ ki bantenŋ sun kì wa?

² Mìŋ ɲaan ki tɛ, mari shinŋ ki ji a ɲaanna, nmari i ji-a a fwuru ki wɔ sariya ki fɛ, nka a shuru ki beeni, shuru ki wɔ fwuru ki sariya ki i jɔrɔkɔ san-a mari ki sun.

³ Niŋ ki ra, a mari ta sɔɔ shuru tɔri ŋununu, ŋì i a shinŋ ki tu a ɲaanna, nmari i dɔri-ra tu nankulunmari. Nka, a mari ki shinŋ ki beeni, mari ki ji-a fwuru ki sariya ki fɛ kili kì, a ǹʼta sɔɔ shuru tɔri gbɛ, niŋ i ji-a nankulunbi i kili kì.

⁴ Míŋ tindaŋ ni, ábɛɛ yɛrima kiri i ninkunŋ. Ǹʼyɔ miŋ tu ábɛɛ beeni-i sariya ki kɛlintɛ, Kirisa beŋ ki na. Dɔnsaŋ, ábɛɛ ji-i koŋ tɔri wɔ, ninwɔ̀ ŋmɛni po san-i konkwuu kiri kanfɛ, nwɔma yi i baara shɔɔrinŋ ma Kirinŋ tɛ.

⁵ Sɛli ki ra, yibɛɛ wuru tiri kɛɲɛ-a yi yɛri dintɛ bi ki wu waaci wɔ̀ ru, sariya ki firi ki dintɛ bi jɛ wɔ̀ri bo-i yibɛɛ ciiru, nini wuru baara ma-a yibɛɛ firi ki mani kiri wu, yìrì i yibɛɛ bo bi ri ma sun, nwɔ̀ri i beŋ ki so-a yibɛɛ sun.

⁶ Dɔnsaŋ, Kirinŋ yibɛɛ mwu-i jonbi ki wu, sabu sariya wɔ̀ wuru yibɛɛ kɔli-la, yibɛɛ beeni-i niŋ kɛlintɛ. Niŋ ɲaan ki tɛ, yibɛɛ baara ki ma-a Kirinŋ tɛ, ŋì i kɛɲɛ Sariya sɛbɛmaan kiri wɔ ɲaan bwuumaan ki tɛ kili kì, nka yibɛɛ i Kirinŋ gbɛ-a ɲaan ŋunaŋ tɛ, Ɲiniwɔlinŋ ki baraka ra.

Sariya ki fa bijɛ ki bi ki

⁷ Yi nfɛnŋ bi sa! Sariya ki i bijɛ wa? Fyewu! A sariya ki ji wuru-i kì, míŋ wuru-ra ńʼwɔ bijɛ ki tɔ kì. A sariya ki ji wuru ǹʼbi-ri kì tu : « Fa nʼɲaninpo koŋ wɔ finŋ tɛ kì », míŋ wuru-ra ǹʼtɔ tu, ŋi i nʼɲaninpo koŋ wɔ finŋ tɛ, ńʼtu niŋ bijɛ ɛ kì.

⁸ Niŋ ɲaan ki tɛ, sariya ki i ɲaan wɔri bijɛ ki tɛ, firi ki dintɛ bi kwuru jɛ kiri bataa i jɛri míŋ ciiru. Sabu a sariya ki ji nmaŋ kì, bijɛ ki beeni-i.

⁹ Waarinŋ wɔ̀ ru míŋ wuru sariya ki tɔ-a kì, míŋ ɲaninkulutɔnŋ wuru-i, nka cinŋ bimaan kiri na-i waarinŋ wɔ̀ ru, bijɛ ki i ŋmɛni míŋ ciiru,

¹⁰ niŋ ɲaan ki tɛ, míŋ i beeni. Kirinŋ sariya wɔ̀ wɔri wuru-i, nwɔma míŋ ɲaninkulutɔnŋ i tu, niŋ ji-i míŋ kilɛn wɔ.

¹¹ Bijɛ ki saa kila-i sariya ki baraka ra, ŋì i míŋ fɔni, ŋì i míŋ beeni.

¹² Sɛli ki ra, sariya ki fɔɔ-ɔ, Kirinŋ wɔ cinŋ bimaan kiri i ji fɔɔ-ɔ, yìrì i teli, yìrì i ji shɔ.

¹³ Niŋ ki ra, finŋ shɔɔrinŋ ki i beŋ ki so-a míŋ sun wa? Aayi dɛ! Nka bijɛ ki yɛ. Finŋ wɔ̀ ki shɔ-i, bijɛ ki niŋ shi-i, ŋì i de niŋ fan, ŋì i míŋ kilɛn. Ŋì niŋ ma-i, nwɔma a i so a yɛri jika shɔ-i, tu afinŋ juu sariya ki baraka ra.

Konaŋ kiri i bijɛ ki wɔ jonbi ki fɛ

¹⁴ Yibɛɛ ǹʼtɔ-i tu sariya ki po Kirinŋ nu, nka míŋ, míŋ i konanmini i, nwɔ̀ ju-i joŋ i bijɛ ki sun.

¹⁵ Sabu, míŋ i bi wɔ̀ ma-a, míŋ niŋ ɲaantɔ-a kì, míŋ i ǹʼtɛ ŋí i nwɔ̀ ma, míŋ dumiŋ niŋ ma-a kì. Bi wɔ̀ bikwɔ-i míŋ sun, míŋ i ninki ma-a.

¹⁶ Bi wɔ̀ bikwɔ-i míŋ sun, a míŋ ji ninki ma-a, niŋ i ǹʼji-a tu míŋ ńʼtu ǹʼna tu sariya ki shɔ.

¹⁷ Niŋ ɲaan ki tɛ, míŋ i nwɔ̀ ma-a, niŋ i míŋ dintɛ bi kili kì, bijɛ wɔ̀ ki i míŋ tɔnŋ ki ra, ninki i míŋ po bo-a ǹʼsun.

¹⁸ Míŋ ǹʼtɔ-i ńʼtu finŋ shɔɔrinŋ míŋ ciiru kì. Niŋ kɔri ki i tu, ŋì i míŋ tu konanmini gbansanŋ i, finŋ shɔɔrinŋ míŋ ciiru kì. Sabu bi shɔɔrinŋ ma tɔ ki i míŋ nu, nka míŋ so-a kì.

¹⁹ Míŋ i ǹʼtɛ ŋí i bi shɔɔrinŋ wɔ̀ ma, míŋ niŋ ma-a kì, nka míŋ ǹʼtɛ ŋí i bi kulinŋ wɔ̀ ma kì, míŋ i ninki ma-a.

²⁰ Bi wɔ̀ di míŋ tɛ kì, a míŋ ji ninki ma-a, niŋ i ǹʼbi-a tu míŋ mabi niŋ bi ki i kili kì, nka niŋ i bijɛ ki mabi i, ninwɔ̀ i míŋ ciiru tɔnŋ ki ra.

²¹ Míŋ sariya wɔ̀ ja-a ńʼciiru niŋ i kaa : Míŋ i ǹʼtɛ ŋí i bi shɔɔrinŋ ma, nka bi kulinŋ ki ma ki so ki bantenŋ i míŋ gbɛ.

²² Kirinŋ wɔ sariya ki i míŋ tɔnnabi i, ǹʼdi-i míŋ tɛ haali.

²³ Nka, míŋ i faan tɔri ja-a ńʼciiru, niŋ i míŋ ciiru ɲakilila wɔ ki kari-ri, fɔ ŋì i míŋ ji-ri bijɛ ki wɔ joŋ i.

²⁴ E! Míŋ makwulu ki shɛɛli sa! Nkɛnŋ a míŋ mwu san ka firi ka wu, ninwɔ̀ i míŋ curu bo-a beŋ ki ru?

²⁵ Yi baraka bi Kirinŋ tɛ, ninwɔ̀ i yibɛɛ mwu-a yi Ŋuntiŋ Yesu Kirisa baraka ra. Niŋ ɲaan ki tɛ, míŋ ciiru ɲakili ki ra, míŋ i Kirinŋ wɔ sariya ki wɔ joŋ i, nka míŋ konanminibi firi ki i míŋ ji-a bijɛ ki wɔ joŋ i.