Ɔrɔmutɔnŋ kiri 6 - Jɔ Biibili ki

Bilinatɔnŋ ki po san bi ki bijɛ ki wɔ jonbi ki ru

¹ Yi a ǹʼdanwɔ bi sa? Yi a tu bijɛ ki ma-a, nwɔma Kirinŋ wɔ shɔɔrinŋ ki i mwɔ wa?

² Aayi dɛ! Yibɛɛ wɔ̀ri beeni-i bijɛ ki kɛlintɛ, yibɛɛ ra so tu-i bijɛ ma-a dɔɔkunŋ sɛbɛ?

³ Yibɛɛ wɔ̀ri bataa wu-i, nwɔma yi fa Yesu Kirisa i ji tenŋ i, ábɛɛ ǹʼtɔ tu yibɛɛ wumaan ki, niŋ miŋ tu yibɛɛ fa ntiŋ beeni yimaŋ fan kì wa?

⁴ Yibɛɛ wumaan ki i miŋ tu yibɛɛ fa Kirisa beeni yimaŋ fan, yi fa ntiŋ kwuu ki i ji ye yimaŋ fan, nwɔma ntiŋ ŋmɛni po san-i konkwuu kiri kanfɛ a Tiŋ ki wɔ sotinbi ki nɔɔri ki baraka ra ɲaan wɔ̀ tɛ, yibɛɛ yɛrima kiri i ɲaninkulutɔnbi ŋunaŋ kila, yi i tiri kɛɲɛ niŋ wu.

⁵ A yibɛɛ fa ntiŋ ji ji tenŋ i a beŋ ki ra, yibɛɛ ra ŋmɛni miŋ tu ntiŋ yɛrima ki ŋmɛni-i ɲaan wɔ̀ tɛ.

⁶ Yibɛɛ ǹʼtɔ-i tu yibɛɛ sɔŋ bwuumaan ki fa Kirisa kpinkpi suu ki sun, nwɔma niŋ bijɛ ma firi ki faan ki i kɔ, yibɛɛ fa ji bijɛ ki wɔ joŋ ni i kili kì.

⁷ Sabu konwɔtiŋ beeni-i, nintiŋ bijɛ ki wɔ so ki fɛ kili kì.

⁸ A yibɛɛ fa Kirisa ji beeni yimaŋ fan, yibɛɛ bili-i ǹʼna, tu yibɛɛ fa ntiŋ a ɲaninkulutɔnbi ki ma yimaŋ fan sɛbɛ.

⁹ Yibɛɛ ǹʼtɔ-i tu Kirisa ŋmɛni po sanmaan ki konkwuu kiri kanfɛ, tu ntiŋ a beeni kili kì. Beŋ ki a so kila ntiŋ sun kili kì.

¹⁰ Ntiŋ beŋ wɔ̀ tan-i, ntiŋ niŋ tan-i bijɛ ki kɛlintɛ kaan tenŋ pe, dɔnsaŋ, ntiŋ ɲaninkulutɔnŋ yɛ, ntiŋ i niŋ ɲaninkulutɔnbi ki ma-a Kirinŋ tɛ.

¹¹ Mìŋ ɲaan tenŋ ki tɛ, ábɛɛ yɛrima kiri á yɛri shɛɛli miŋ tu ábɛɛ beeni bijɛ ki kɛlintɛ, á ɲaninkulutɔnŋ ni i ji-i Kirinŋ tɛ Yesu Kirisa baraka ra.

¹² Niŋ na, á fa á firi beeni wɔ ki tu bijɛ ki wɔ jonbi ki ru kili kì. Á fa á tu niŋ firi ki dintɛ bi kiri ra kili kì.

¹³ Á fa á firi ki mani dantenŋ tu bijɛ ki gbɛ, ŋì i niŋ ji telibalibi baara mafinŋ i kì. Nka, á á yɛri wɔri Kirinŋ tɛ, sabu ábɛɛ beeni wuru-i, nka dɔnsaŋ, ábɛɛ ɲaninkulutɔnbi ŋunaŋ kila-i. Niŋ na, á á firi ki bataa ji telibi ki wɔ baara mafinŋ i Kirinŋ tɛ.

¹⁴ Bijɛ ki ra so kila ábɛɛ sun kili kì, sabu sariya ki ábɛɛ ŋununtiŋ i kili kì, nka ábɛɛ i Kirinŋ wɔ shɔɔrinŋ ki ru.

Bilinatɔnŋ kiri kulubi ki telibi ki tɛ

¹⁵ Niŋ na, yi a ǹʼbi tu yibɛɛ Kirinŋ wɔ shɔɔrinŋ ki ru, yi bijɛ ma-ni, ǹʼkɔri ki i ji tu yibɛɛ sariya ki wɔ ŋununtinbi ki fɛ kili kì wa? Fyewu!

¹⁶ Ábɛɛ ǹʼtɔ tu a ábɛɛ á yɛri wɔri koŋ tɛ, á i á kulu ntiŋ tɛ, tu ábɛɛ ji-a nintiŋ wɔ joŋ i kì wa? A miŋ ji bijɛ ki wɔ joŋ i, niŋ nakɔɔra ki i beŋ i, nka a miŋ ji Kirinŋ wɔ joŋ i, ŋi i nʼkulu ǹʼtɛ, niŋ nakɔɔra ki i telibi i.

¹⁷ Nka, yi Kirinŋ co, sabu ábɛɛ wɔ̀ri wuru bijɛ ki wɔ jonbi ki ru sun, ábɛɛ kali-i sɛli wɔ̀ ra, ábɛɛ á kulu-i niŋ sɛli ki tɛ, á ciiru ki bataa wu.

¹⁸ Dɔnsaŋ, ábɛɛ po san-i bijɛ ki wɔ jonbi ki ru, á i de telibi wɔ jonbi ki ru.

¹⁹ Míŋ i ka wulu ka bi-a kwumaŋ miŋ tu koŋ pyɛ kiri, ŋí i ǹʼkɛɲɛ ábɔɔ konanminibi bi ɲaantɔka ɲaan ki wu. Miŋ tu ábɛɛ á firi ki mani kiri bo wuru nɔɔkɔnɔbi fa juubi ki wɔ jonbi ki ru ɲaan wɔ̀ tɛ, á i bijɛ ki ma-ni, mìŋ ɲaan tenŋ ki tɛ, dɔnsaŋ, á á firi ki mani kiri bo telibi ki wɔ jonbi ki ru, á i á yɛri bo Kirinŋ wɔ bo ru.

²⁰ Ábɛɛ wuru bijɛ ki wɔ jonbi ki ru waarinŋ wɔ̀ ru, finŋ tɔri tenŋ wuru ábɛɛ karaba bo-a telibi saa ki tiri ki sun kì.

²¹ Ábɛɛ nafan danwɔ kila niŋ mabi kulinŋ kiri ru? Niŋ bi wɔ̀ri i ábɛɛ ɲaankwun-a jiŋ, sabu yìrì i na-a beŋ ki wu.

²² Nka dɔnsaŋ, ábɛɛ po san-i bijɛ ki wɔ jonbi ki ru, á i ji Kirinŋ wɔ joŋ ni i. Nafan wɔ̀ i kila-a niŋ nu, niŋ i wɔlɔnbi i, ninwɔ̀ i rakɔ-a ɲaninkulutɔnbi kɔbali ki wu.

²³ Sabu, bijɛ ki sali ki i beŋ i, nka Kirinŋ shɔɔrinŋ wɔ̀ wɔri-ra ǹʼgbansanŋ i, niŋ i ɲaninkulutɔnbi kɔbali ki i, ninwɔ̀ i wɔri-ra yi Ŋuntiŋ Yesu Kirisa baraka ra.