Ɔrɔmutɔnŋ kiri 5 - Jɔ Biibili ki

Ɲaanfɛfili ki de bi ki Kirinŋ fa konanmini faninmwuŋ

¹ Kirinŋ i yibɛɛ shɛɛli-la koŋ telimaan ni i a ɲaanfɛ niŋ ɲaan ki tɛ, bilinabi ki baraka ra. Ninki i ncin ɲaanfɛfili i de yi fa Kirinŋ faninmwuŋ yi Ŋuntiŋ Yesu Kirisa bira.

² Yibɛɛ i shɔɔrinŋ wɔ̀ ru dɔɔ, yibɛɛ de-i niŋ nu mìntiŋ ki baraka ra, yi i yi ciirudi-ri Kirinŋ wɔ nɔɔri ki tɛ, sabu yibɛɛ bili-i ǹʼna tu yibɛɛ ra niŋ bishi kila.

³ Niŋ bantenŋ i kì, yi i yi ciirudi-a yi cɔɔri bi kiri bira sɛbɛ, sabu yibɛɛ ǹʼtɔ-i, tu cɔɔri ki cɛrukɔlibi wɔri-ra konanmini tɛ.

⁴ A yibɛɛ yi cɛrukɔli, ninki i ncin-a yibɛɛ i ji dariwulutiŋ ni i cɔɔri waari ki ru. A yibɛɛ ji dariwulutiŋ ni i yi cɔɔri waari ki ru, ninki i gbɛbilimaŋ wɔri-ra yibɛɛ tɛ.

⁵ Niŋ gbɛbilimaŋ ki koŋ janfa-a kì, sabu Kirinŋ awɔ bidintɛbi ki bo-i yibɛɛ ciiru fɔ ŋì i ǹʼmwɔ Ɲiniwɔlinŋ ki baraka ra, ŋì ninwɔ̀ wɔri-i yibɛɛ tɛ.

⁶ Sɛli ki ra, waarinŋ wɔ̀ ru yibɛɛ wuru baraka bali li i, Kirinŋ wɔ waaci gbɛbilimaan ki so-i, Kirisa i beeni Kirinŋ jɛŋ kɛnibali kiri bira.

⁷ Konwɔtiŋ a a tu, ntiŋ i beeni koŋ telimaan ta ru, niŋ kilamaŋ di kì. Ŋì i a so ji-i koŋ i kila, nwɔ̀ a a ŋununfuru, ntiŋ i a tu, ntiŋ i beeni bi shɔɔrinŋ matɔnŋ ki bɛɛ bira.

⁸ Nka, yibɛɛ bidi-i Kirinŋ tɛ ɲaan wɔ̀ tɛ, ŋì ninki ji-i yibɛɛ wu ka ɲaan ka tɛ : yibɛɛ wuru faa bijɛmatiiri i, Kirisa beeni-i yibɛɛ bira.

⁹ Dɔnsaŋ, yibɛɛ jimaan ki koŋ telimaan ni i Kirisa cunŋ ki baraka ra, sii ǹʼna ǹʼnu kì, yibɛɛ ra yi mwu Kirinŋ wɔ tɔnkwulu ki wu ntiŋ baraka ra.

¹⁰ Yibɛɛ wuru Kirinŋ ɲa ni i sun, nka Kirinŋ yibɛɛ fa a faninmwuŋ ki ramɔni-i a Danshuru ki beŋ ki baraka ra. Yibɛɛ fa Kirinŋ faninmwuŋ ki ramɔnimaan ki kɔɔtɛ, sii ǹʼna ǹʼnu kì, yibɛɛ ra yi mwu ǹʼDanshuru ki wɔ ɲaninkulutɔnbi ki baraka ra.

¹¹ Ŋì i bo niŋ bataa sun, yibɛɛ i yi ciirudi-a kusɛbɛ, yi i yi ragbɛ-ri Kirinŋ wu, yi ŋuntiŋ Yesu Kirisa bira, ninwɔ̀ yibɛɛ fa Kirinŋ faninmwuŋ ki ramɔni-i dɔnsaŋ.

Adama fa Kirisa bi ki

¹² Bijɛ ki de-i juniɲa nu koŋ tenŋ bira, ninwɔ̀ i Adama, bijɛ ki i na beŋ ki wu. Niŋ ɲaan ki tɛ, beŋ ki i so konaŋ ki bataa sun, sabu koŋ bataa bijɛ ma-i.

¹³ Kirinŋ so-i sariya ki wɔri sun Musa tɛ, bijɛ ki wuru juniɲa ki ru kɔ, nka a sariya ji nmaŋ kì, bijɛ ki fani wulu bi-a niŋ mani nu kì.

¹⁴ Niŋ fa a fɔn na, ŋì i shi Adama sun, ŋì i na so Musa wɔ sunŋ ki sun, beŋ ki so kila-i konaŋ ki bataa sun. Hali nwɔ̀ri fɔn bijɛ ma-ni, kí i Kirinŋ wɔ cinŋ bimaan kiri li miŋ tu Adama yìrì li wuru ɲaan wɔ̀ tɛ kì, beŋ ki i so nini bataa sun. Nwɔ̀ kakan wuru-i, ntiŋ i na, Adama ji-i niŋ bishi i.

¹⁵ Nka, Adama wɔ bijɛ ki fa Kirinŋ wɔ shɔɔrinŋ ki a so pyii-i arìmaŋ wu kì. Sabu a koŋ mwɔɔnna ji beeni koŋ tenŋ ki wɔ bijɛ mamaan ki ŋuŋ fɛ, Kirinŋ wɔ shɔɔrinŋ wɔ̀ wɔri-i ǹʼgbansanŋ i, koŋ tenŋ bira, ninwɔ̀ i Yesu Kirisa, niŋ nafan ki a so koŋ mwɔɔnna mwɔɔnna sun.

¹⁶ Kirinŋ kafinŋ wɔ̀ wɔri-i ǹʼgbansanŋ i, niŋ tukulu ki fa koŋ tenŋ wɔ bijɛ ki tukulu kiri ra so pyi-i arìmaŋ wu kì. Sabu koŋ tenŋ wɔ bijɛ ki ncin-i Kirinŋ i kiti ki fɛɛn konaŋ bataa sun, nka Kirinŋ wɔ kafinŋ gbansanŋ ki i ɲaan wɔri-ra konaŋ tɛ, kɔ́ɔ́ bijɛ mwɔɔnna mamaan kiri kɔɔtɛ, kí i so shɛɛli-i koŋ telimaan ni i.

¹⁷ Sɛli yɛ, koŋ tenŋ wɔ bijɛ ki ncin-i beŋ ki i so kila konaŋ bataa sun, nka Yesu Kirisa tenŋ pe bira, yibɛɛ i finŋ wɔ̀ kila-a niŋ nafan ki gbɛ-i haali, sabu nwɔ̀ri Kirinŋ wɔ shɔɔrinŋ ki kila-i ǹʼmwɔɔnna, Kirinŋ i ji kí shɛɛli koŋ telimaan ni i, nini a ɲaninkulutɔnbi kɔbali ki kila, koŋ tenŋ bira, ninwɔ̀ i Yesu Kirisa.

¹⁸ Bijɛ tenŋ mamaan ncin-i kiti ki i fɛɛn konaŋ bataa sun, mìŋ ɲaan tenŋ ki tɛ, koŋ tenŋ wɔ telibi bi mamaan i ncusun-ni konaŋ ki bataa i so shɛɛli-i koŋ telimaan ni i, Kirinŋ ɲaanfɛ, niŋ fa kí i ɲaninkulutɔnbi kɔbali ki kila-ri.

¹⁹ Koŋ tenŋ wɔ Kirinŋ wulu pabalibi ki ncin-i Kirinŋ i koŋ mwɔɔnna shɛɛli bijɛmatiiri i ɲaan wɔ̀ tɛ, mìŋ ɲaan tenŋ ki tɛ, koŋ tenŋ wɔ Kirinŋ wulu pa bi ki baraka ra, Kirinŋ i koŋ mwɔɔnna shɛɛli-la koŋ telimaan ni i.

²⁰ Sariya ki na-i, nwɔma konaŋ kiri i arɔɔ bijɛ ki mwɔka ki ja. Bijɛ ki mwɔ-i mani wɔ̀ ru, Kirinŋ wɔ shɔɔrinŋ ki ba bo-i mìŋ mani ki ru,

²¹ nwɔma bijɛ ki ŋununtinbi kila-i beŋ ki baraka ra ɲaan wɔ̀ tɛ, Kirinŋ wɔ shɔɔrinŋ ki i ŋununtinbi kila telibi ki baraka ra, ŋì i ɲaninkulutɔnbi kɔbali ki wɔri yi Ŋuntiŋ Yesu Kirisa baraka ra.