Ɔrɔmutɔnŋ kiri 2 - Jɔ Biibili ki

Kirinŋ wɔ kiti ki bi ki

¹ Dɔnsaŋ, minwɔ̀ i ǹʼbi-a tu koŋ tɔri kiri pɔli, a miŋ ji koŋ kwuru woo kwuru, miŋ a jii kila kì dɛ. A miŋ ji ǹʼbi-a tu koŋ tɔri kiri pɔli, miŋ i nʼyɛri ki wɔ pɔli ki wulu bi-a, sabu miŋ i koŋ tɔri kiri pɔli wulu bi-a bi wɔ̀ri bira, miŋ yɛri ki i nini ma-a!

² Yibɛɛ ǹʼtɔ-i tu Kirinŋ kiti wɔ̀ fɛɛn-na niŋ bi kwuru ki matɔnŋ kiri sun, tu niŋ kiti ki kwuru kɛɲɛ-a sɛli ki wu.

³ Miŋ ǹʼbi-a tu ŋì a ji dɔɔkunŋ, miŋ i ǹʼbi-a tu koŋ tɔri kiri pɔli bi wɔ̀ri bira, a miŋ yɛrima ki ji niŋ bi kwuru kiri matɔnŋ i, miŋ a nʼmwu Kirinŋ wɔ kiti ki wu wa?

⁴ Walima Kirinŋ wɔ shɔɔrinŋ mwɔɔnna ki fa ǹʼwɔ bikwunnubi bi ki fa ǹʼwɔ tɔnsunfili ki miŋ ɲaanna finŋ i kì wa? Miŋ ǹʼtɔ tu Kirinŋ niŋ shɔɔrinŋ ki ma-a, nwɔma miŋ i ntɔri bi, ŋi i nʼwɔ bijɛ kiri tɔnbo kì wa?

⁵ Nka, miŋ tɔɔnnufuru-i, miŋ i nʼtu-a ŋi i ntɔri bi nʼwɔ bijɛ kiri ra kì. Niŋ ɲaan ki tɛ, miŋ i cɔɔri sinaŋ ceeli bo-a nʼyɛri jɛŋ, Kirinŋ wɔ tɔnkwulu jibi ki sun, niŋ jibi wɔ̀, Kirinŋ a na awɔ tɔnkwulu ki fa awɔ kiti telimaan ki ji.

⁶ Niŋ shikaŋ, Kirinŋ a na koŋ bataa tenŋ tenŋ sali, ŋì i kɛɲɛ kí mabi kiri wu.

⁷ Koŋ wɔ̀ri cɛrukɔli-i shɔɔrinŋ ma ki ra, kí i gbɛbi ki fa ŋununfɛshi ki fa ɲaninkulutɔnbi kɔbali ki ceeli-li, Kirinŋ a na ɲaninkulutɔnbi kɔbali ki wɔri nini tɛ.

⁸ Nka, koŋ wɔ̀ri i arì kaan-na Kirinŋ tɛ, kí i arì kaan-ni sɛli ki tɛ, kí i arì tu-ri telibalibi kiri ra, Kirinŋ wɔ tɔnkwulu ki fa ǹʼwɔ kiti ki a fɛɛn nini sun.

⁹ Sɛli ki ra, cɔɔri fa ɲaanfɛkwulu bi sinaŋ ni a na fɛɛn bijɛmatɔnŋ kiri bataa sun, ŋì i tɔnpa Yawutu kiri sun, niŋ kɔɔtɛ, ŋì i so shiya tɔri kiri sun.

¹⁰ Nɔɔri fa ŋununfɛshi fa ɲaanfɛfili a wɔri bi shɔɔrinŋ matɔnŋ kiri bataa tɛ, ŋì i tɔnpa Yawutu kiri sun, niŋ kɔɔtɛ, ŋì i so shiya tɔri kiri sun.

¹¹ Sabu Kirinŋ koŋ san-a koŋ nu kì.

¹² Koŋ wɔ̀ri Musa wɔ sariya ki tɔ kì, kí i ji bijɛ ma, kiti ki a fɛɛn nini sun, nwɔ̀ sariya ki wɔ kì. Nka nwɔ̀ri sariya ki tɔ-i, kí i ji ǹʼfɛ, a nini bijɛ ma, kíbɔɔ kiti ki i kwuru kɛɲɛ-a sariya ki wu.

¹³ Sariya ki ramatɔnŋ kiri koŋ telimaan kiri Kirinŋ ɲaanfɛ kì, duu nwɔ̀ri i ǹʼsaa ki tiri-ra.

¹⁴ Shiya tɔri wɔ̀ri Musa wɔ sariya ki tɔ kì, a nini tiri kɛɲɛ sariya ki wu arì yɛrɛtɛ, hali kí ji niŋ sariya ki tɔ-a kì, kí i ǹʼji-a tu sariya ki arìbɛɛ gbɛ.

¹⁵ Kí i ǹʼji-a tu sariya ki ǹʼtɛ bi wɔ̀ri i ma, tu nini sɛbɛmaan ki arìbɛɛ ciiru tɔnŋ kiri ra. A kí ciiru ɲakili ki ji kí sɔsɔ-a waarinŋ ki bɛɛ ru, ŋì i jii wɔri-ri kí tɛ waarinŋ tɔri ru, niŋ i ǹʼji-a tu sariya ki kí ciiru.

¹⁶ Ŋì i kɛɲɛ mɔ́ɔ́n Wulujii sunjomaan ki wu ábɛɛ tɛ, niŋ bataa ra na ja jibi bɛɛ. Niŋ shikaŋ, Kirinŋ a na kiti ki kwuru Yesu Kirisa gbɛɛra, ŋì i ǹʼkɛɲɛ konaŋ kiri ciiru bi radumaan kiri wu.

Yawutu kiri fa sariya ki bi ki

¹⁷ Aawe, Yawutu tɔ ki i minwɔ̀ ra, ŋi i nʼgbɛ bili-li cintɔnŋ Musa wɔ sariya ki sun, ŋi i nʼyɛri ragbɛ-ri niŋ wu, nʼtu miŋ Kirinŋ wɔ koŋ i,

¹⁸ miŋ i Kirinŋ dintɛ bi ki tɔ-a, ŋi i so-ri bi shɔɔrinŋ ma-i, sabu miŋ sariya ki kali-i.

¹⁹ Miŋ ɲaanna tu miŋ ɲaanfwuu kiri bali patɔnŋ ki i, nʼtu ŋi i ji manisarinŋ i mancinŋ nu tɔnŋ kiri tɛ,

²⁰ ŋi i ji ŋunumini kiri kalitɔnŋ ki i niŋ fa tiraŋ kiri wɔ kalimɔɔ ki i. Miŋ i niŋ bataa ma-a, sabu miŋ cirasun tu miŋ bitɔbi ki fa sɛli ki bataa kila, ŋì i po sariya ki ru.

²¹ Miŋ ji? Minwɔ̀ i koŋ pyɛ kiri kali-la, nfɛnŋ na miŋ nʼyɛri kali-la sɛbɛ kì? Minwɔ̀ i konaŋ kiri racin-a tu koŋ fa kwunŋ tan kì, nfɛnŋ na miŋ i kwunŋ tan-ni?

²² Miŋ i konaŋ kiri racin-a tu nankulunbi fa ma kì, nfɛnŋ na miŋ i nankulunbi ki ma-ni? Miŋ i pɛli kiri bikwɔ-a nʼsun, nfɛnŋ na miŋ pɛlifu kiri ru finŋ kiri kwun-ni?

²³ Minwɔ̀ i nʼyɛri ragbɛ-a sariya ki wu, nfɛnŋ na miŋ i Kirinŋ nufyɛ-ri sariya ki li bi kiri wu?

²⁴ Sɛli ki ra, ǹʼbi-i Kirinŋ wɔ wulu sɛbɛ kiri ru tu : « Kirinŋ tɔ ki i li-a shiya tɔri kiri kanfɛ ábɛɛ sababu ra. »

²⁵ Sɛli ki ra, a miŋ ji sariya ki rasɔɔ-ra, ŋuŋ i mɔɔn sɔɔpeefɛ ki ra. Nka a miŋ ji sariya ki rasɔɔ-ra kì, ŋuŋ ji-a mɔɔn sɔɔpeefɛ ki ra kì. Miŋ fa sɔɔpeefɛbali i ji-a tenŋ i.

²⁶ Niŋ na, a konwɔtiŋ sɔɔpeefɛ kì, a nintiŋ ji tiri kɛɲɛ-a sariya ki wu, Kirinŋ a nintiŋ shɛɛli sɔɔpeefɛmaan i kì wa?

²⁷ Niŋ koŋ ki wɔ̀ sɔɔpeefɛ a firi ki ra kì, ntiŋ dumiŋ i ji Kirinŋ wɔ sariya kiri rasɔɔ-ra, niŋ a kiti ki kwuru miŋ sun, minwɔ̀ i Kirinŋ wɔ sariya ki li-a, niŋ i faa Kirinŋ wɔ wulu ki i ji nʼgbɛ, ŋi i ji sɔɔpeefɛ.

²⁸ Konwɔtiŋ i a yɛri ji-a Yawutu u taanna bi kiri ra, nintiŋ Yawutu sɔbɛ kì. Sɔɔpeefɛ wɔ̀ i taanshɛ bo-a konanmini firi ki ra, niŋ sɔɔpeefɛ sɔbɛ ki i kì.

²⁹ Nka konwɔtiŋ i Yawutu a ciiru ki ru, nintiŋ i Yawutu sɛlɛsɛli ki i, niŋ fa sɔɔpeefɛ sɛlɛsɛli ki i ji sɔɔpeefɛmaanna a, Ɲiniwɔlinŋ ki i ninwɔ̀ ma-a konanmini ciiru tɔnŋ ki ra. Sɔɔpeefɛ wɔ̀ i sariya ki rasɔɔmaanna bantenŋ i, niŋ i kì. Yawutu sɛlɛsɛli ki wɔ gbɛbi ki po-a konaŋ ni gbɛ kì, nka ŋì i po-a Kirinŋ gbɛ.