Ɔrɔmutɔnŋ kiri 16 - Jɔ Biibili ki

Pooli wɔ coolinŋ ki

¹ Yibɛɛ tindanmari Febe i Kenkere bilinatɔnŋ kwuru kiri ru Kirinŋ tɛ baara matɔnŋ ki bɛɛ ɛ. Míŋ a wulubi nmari bi sun ábɛɛ tɛ,

² nwɔma ábɛɛ i nmari paka shɔ Ŋuntiŋ ki tɔ ki bira, miŋ tu Kirinŋ wɔ konanbi ki i pa-a ɲaan wɔ̀ tɛ. A finŋ woo finŋ bi tu nmari ra, á ye nmari tɛ, nmari i so niŋ kila-i, sabu nmari yɛri ki ye-i tindaŋ mwɔɔnna tɛ, hali nmari ye-i míŋ yɛrima ki tɛ.

³ Á ńʼwɔ coolinŋ wɔri Pirisili fa Akilasi tɛ, nini i míŋ baara mashi ri i, Yesu Kirisa tɛ baara ki ru.

⁴ Kíbɛɛ kiri míŋ mwu-i, fɔ kí ŋuniŋ wuru juu-ra tu ǹʼnu. Míŋ bantenŋ wɔ coolinŋ kí tɛ kì dɛ! Shiya tɔri ru bilinatɔnŋ kwuru kiri bataa wɔ coolinŋ i kí tɛ sɛbɛ.

⁵ Bilinatɔnŋ kwuru wɔ̀ri i arì rakɔli-la kɔ́ɔ́ mani kiri ru, á ńʼwɔ coolinŋ ki wɔri nini tɛ sɛbɛ. Á ńʼwɔ coolinŋ wɔri míŋ tindaŋ byii Epayinɛti tɛ, mìntiŋ ki jɔnɔ ki bilinabi ki ma-i Kirisa ra Asi sɔɔta ki ru.

⁶ Á i ńʼwɔ coolinŋ wɔri Mariyamu tɛ, ninwɔ̀ baara mwɔɔnna ma-i ábɛɛ tɛ.

⁷ Á i Andoronikusi fa Juniyasi co, nini wɔ̀ri i míŋ tindaŋ Yawutu ri i, yi i ji wuru nkasu ki ru yimaŋ fan. Kíbɛɛ tɔ shɔɔrinŋ i cindaŋ kiri kanfɛ. Kíbɛɛ bilinabi ki ma-i Kirisa ra míŋ jɛŋ.

⁸ Á ńʼwɔ coolinŋ wɔri Anpiliyasi tɛ, mìntiŋ i míŋ tindaŋ byii i, Ŋuntiŋ ki wɔ tenbi ki ru.

⁹ Á ńʼwɔ coolinŋ wɔri Urubanusi tɛ, ninwɔ̀ i yibɛɛ baara mashi i, Kirisa tɛ. Á i ńʼwɔ coolinŋ wɔri míŋ tindaŋ byii Sitakisi tɛ sɛbɛ.

¹⁰ Á i Apɛlɛ co, ninwɔ̀ tɔ shɔɔrinŋ kila-i Kirisa bi ki ru. Á i Arisitobuli wɔ mani nu tɔnŋ kiri co sɛbɛ.

¹¹ Á miŋ tindaŋ Erijɔna co, niŋ fa Narisisi wɔ konanbi wɔ̀ ǹʼpa-i Ŋuntiŋ ki cɛfan, á i nini co sɛbɛ.

¹² Ńʼwɔ coolinŋ i Tirifɛni fa Tirifosi tɛ, niŋ mari fuuli ki wɔ̀ri i Ŋuntiŋ ki tɛ baara ki ma-a arì sɔbɛ ra. Á i ńʼwɔ coolinŋ wɔri míŋ narinŋ byii Perisidi tɛ, ninwɔ̀ i Ŋuntiŋ ki tɛ baara ki ma-a a sɔbɛ ra sɛbɛ.

¹³ Á coolinŋ wɔri Urufusi tɛ, Ŋuntiŋ ki ninwɔ̀ ɲaannashi-i awɔ baara ki ra, á i ntiŋ ɲiŋ ki co sɛbɛ, míŋ i ninwɔ̀ shɛɛli-la ńʼyɛri ki ɲiŋ i sɛbɛ.

¹⁴ Á i coolinŋ wɔri Asɛnkiriti fa Filegɔn fa Ɛrimɛsi fa Patorobasi fa Hɛrimasi tɛ, ŋì i bo kí fan tindaŋ kiri bataa sun.

¹⁵ Á Filolɔji co, ǹʼfa Nsuli, á i Nere fa a tindanmari ki co, á i Olɛnpi co, niŋ fa Kirinŋ wɔ konanbi wɔ̀ i kí fan.

¹⁶ Á i ámaŋ co bidintɛbi coolinŋ wu. Kirisa wɔ bilinatɔnŋ kwuru kiri bataa i ábɛɛ co-a.

¹⁷ Nwɔ̀ri i bilinatɔnŋ kiri kɔɔye-a arìmaŋ na, kí i kí fɔni-ni, á á yɛri cɔye niŋ koŋ bishi kiri ra, ábɛɛ kalinŋ wɔ̀ kila-i, niŋ fa niŋ fu-a kì. Á ámaŋ nanari kí ra.

¹⁸ Sabu niŋ koŋ kwuru kiri baara ma-a yibɛɛ Ŋuntiŋ Kirisa tɛ kì, duu arì cii kiri. Nwɔ̀ri finŋ mwɔɔnna tɔ-a bilinabi ki ru kì, kí i nini sunnɛɛn-na wulu jii kiri wu, niŋ fa wulu sunnɔni kiri wu.

¹⁹ Ábɛɛ Ŋuntiŋ ki wulu pa-i ɲaan wɔ̀ tɛ, konaŋ ki bataa i niŋ tɔ-a, ninki míŋ yɛrima ki ciirudi-i. Nka míŋ i ǹʼtɛ ábɛɛ i ji ɲakilitiŋ ni fa shɔɔrinŋ matiiri i, á i ji koŋ fɔɔmaan ni i, pɔlimaŋ nwɔ̀ri ra kì.

²⁰ Ŋì a cin kì, Kirinŋ wɔ̀ i ɲaanfɛfili ki wɔri-ra, niŋ a shitaanni ki bɔrɔkɔ ábɛɛ kanŋ fɛ. Yi Ŋuntiŋ Yesu wɔ shɔɔrinŋ ki tu á bataa fan.

²¹ Míŋ baara mashi Timote i á co-a niŋ fa Lusiyusi fa Jaasɔnŋ, ŋì i bo Sosipatɛri sun, ninwɔ̀ fa míŋ i kanindaŋ tenŋ i.

²² Míŋ Tɛritusi wɔ̀ i ka sɛbɛ ka tan-a, míŋ i ábɛɛ co-a Ŋuntiŋ ki tɔ ra.

²³ Míŋ jɛshi Gayusi i á co-a. Bilinatɔnŋ kwuru kiri bataa jɛshi ki yɛ. Kili ki wɔ wari maritɔnŋ, Erasitusi fa yi tindaŋ Karitusi i á co-ri.

²⁴ [Yi Ŋuntiŋ Yesu Kirisa wɔ ɲaanfɛfili ki tu á bataa fan. Amiina!]

Kirinŋ gbɛ bi rakɔɔra ki

²⁵ Yi Kirinŋ gbɛ, so i ninwɔ̀ gbɛ, ŋì i faan wɔri ábɛɛ tɛ áwɔ bilinabi ki ru, ŋì i kɛɲɛ Kirinŋ wɔ Wulujii ki wu, míŋ i ninwɔ̀ sunjo-a Yesu Kirisa bi ki sun, ŋì i kɛɲɛ Kirinŋ wɔ gonto jimaan ki wu yibɛɛ wu. Niŋ gonto ki radumaan wuru nmaŋ, kabi juniɲa cɛtu ki jɛŋ.

²⁶ Nka, dɔnsaŋ cintɔnŋ kiri wɔ sɛbɛ kiri ǹʼpo-i taanna, ŋì i kɛɲɛ waarinŋ bataa ru Kirinŋ wɔ cinŋ bimaan ki wu, wulu i bi shiya kiri bataa tɛ niŋ gonto ki bi sun, nwɔma kí bataa i bili ǹʼna, kí i ǹʼwulu pa.

²⁷ Kirinŋ, ninwɔ̀ tenŋ pe ki i ɲakilitiŋ i, nɔɔri bili ǹʼtɔ ki sun Yesu Kirisa baraka ra, waarinŋ bataa ru! Amiina!