Ɔrɔmutɔnŋ kiri 12 - Jɔ Biibili ki

Yɛri wɔri bi ki Kirinŋ tɛ

¹ Míŋ tindaŋ ni, a Kirinŋ ji ka shɔɔrinŋ sinaŋ ka ma yibɛɛ tɛ ka ɲaan ka tɛ, míŋ i ábɛɛ rafɛ-a, ńʼtu á á firi ki wɔri Kirinŋ tɛ miŋ tu saraka ɲaninkulutɔnŋ, nwɔ̀ bo-i Kirinŋ wɔ bo ru, ŋì i di Kirinŋ tɛ. Ninki i ábɔɔ Kirinŋ gbɛka ɲaan shɔɔrinŋ ki i.

² Á fa áwɔ bi kiri ma-ni juniɲa nu tɔnŋ kiri sali kì, nka ábɛɛ ɲakili ŋunaŋ wɔ̀ kila-i, á ncusun niŋ i á rapwulu, nwɔma Kirinŋ dintɛ bi shɔɔrinŋ nafaamaan ki i nwɔ̀, á i so niŋ tɔ-i.

Bilinatɔnŋ kiri wɔ tenbi ki bi ki

³ Kirinŋ shɔɔrinŋ wɔ̀ ma-i míŋ tɛ, ŋì i kɛɲɛ niŋ wu, míŋ i ǹʼceeli-la ábɛɛ tenŋ tenŋ ki gbɛ, ńʼtu ábɛɛ i nwɔ̀, á fa á yɛri ragbɛka jitan, ŋì i fwuu niŋ sun kì, nka á á yɛri sunjɛri. Kirinŋ bilinabi wɔ̀ wɔri-i ábɛɛ fɔn tenŋ tenŋ tɛ, á á yɛri tu niŋ kifinŋ ki ciiru.

⁴ Firi tenŋ i yibɛɛ ra, nka mani mwɔɔnna i ji ǹʼna. Firi ki mani tenŋ tenŋ ki fɔn fa a tukulu yɛ sɛbɛ. Yìrɔɔ baara kiri tenŋ i kì.

⁵ Mìŋ ɲaan tenŋ ki tɛ, yibɛɛ bilinatɔnŋ kiri mwɔ-i, nka yi bataa i firi tenŋ i, Kirisa wɔ tenbi ki baraka ra. Yibɛɛ bataa da-i yimaŋ na, miŋ tu firi ki mani kiri da-i arìmaŋ na ɲaan wɔ̀ tɛ.

⁶ Nka Kirinŋ shɔɔrinŋ ma-i yibɛɛ tɛ, ŋì i kafinŋ wɔri yibɛɛ tenŋ tenŋ ki fɔn tɛ, ǹʼtɔri fa ǹʼtɔri wɔ kwuru u kì. Niŋ ki ra, a cintɔnbi wulu kafinŋ ji wɔri minwɔ̀tiŋ tɛ, miŋ niŋ sunjo, ŋi i ǹʼkɛɲɛ bilinabi ki wu.

⁷ Minwɔ̀tiŋ kafinŋ ki ji-i cinŋ i, niŋ ma. A mɔɔn ki ji kalinŋ wɔrirama a, konaŋ kiri kali.

⁸ A minwɔ̀tiŋ wɔ kafinŋ ki ji tu ŋi konaŋ ni cunadi, niŋ ma. A minwɔ̀tiŋ wɔ ji koŋ kamaanna a, niŋ niŋ ma gbɛrupilibi wu. A minwɔ̀tiŋ ji jɛntɔnŋ i, niŋ maka shɔ. A minwɔ̀tiŋ ji koŋ sunmakwulupa-a, niŋ ma ciirudibi wu.

Bilinatɔnŋ kiri tiribi ki bidintɛbi ki ru

⁹ Áwɔ bidintɛbi ki ji ǹʼsɛlɛsɛli i. Á bi kulinŋ ki bikwɔ á sun, á i á da bi shɔɔrinŋ ki ra.

¹⁰ Á i ámaŋ bidi ámaŋ tɛ miŋ tu tindaŋ ni, á i ámaŋ jan-ni ámaŋ gbɛmaanna ki ra.

¹¹ Á ji cinŋ matiiri i, á fa ji jurubitiŋ ni i kì. Á i cinŋ ki ma Ŋuntiŋ ki tɛ, á ciiru ki bataa wu.

¹² Gbɛbilimaŋ wɔ̀ i yibɛɛ gbɛ, yi ciirudimaan i tu niŋ nu, yi i ɲaanfɛkwulu ki kwun yi ru, yi i yi cɛrukɔli Kirinŋ nafɛ ki ra.

¹³ So nwɔ̀ri gbɛ Kirinŋ wɔ konanbi ki ru kì, á ye nini tɛ á gbɛfɛfinŋ ni wu, á i á cunadi jɛ ri marimaanna ki ra.

¹⁴ Nwɔ̀ri i ábɛɛ ɲaanfɛkwulu-la, á juba san nini tɛ, aawe, á i juba shɔɔrinŋ san kí tɛ, á fa kí danka kì.

¹⁵ Á á ciirudi ciirudimaan kiri fan, á i ŋuntan ŋuntantɔnŋ kiri fan.

¹⁶ Á fu tenŋ sun. Á fa á yɛri ragbɛ-ri kì, á fa cɛɛn-ni bi sinaŋ sinaŋ ni cɛfan kì. Á fa á yɛri shɛɛli-li koŋ ɲakilitiŋ ni i kì.

¹⁷ A koŋ bi kulinŋ ma ábɛɛ wu, á fa niŋ kɔni ki sali bi kulinŋ tɔri wu kì. Á á banba, á i ji bi shɔɔrinŋ matiiri i, koŋ bataa gbɛ.

¹⁸ Nwɔ̀ i ábɛɛ, á bi bataa ma, nwɔma ɲaanfɛfili i ji á fa koŋ bataa faninmwuŋ, a ǹʼji-a so ma-i.

¹⁹ Míŋ tindaŋ byii ri, á fa áwɔ shɛsan koŋ wu kì, á niŋ tu Kirinŋ sun, sabu ǹʼsɛbɛ-i Kirinŋ wɔ wulu sɛbɛ ki ru tu : « Míŋ a shɛ ki san, mínki a kɔni ki sali. » Ŋuntiŋ ki tu ninkunŋ.

²⁰ Kirinŋ wɔ wulu ki tu sɛbɛ tu : « A bɛɛ ji miŋ ɲa ki wu, nufinŋ wɔri ntiŋ tɛ, a jumwunu ji ntiŋ wu, ju wɔri ntiŋ tɛ. A miŋ ji niŋ ma-a, niŋ i miŋ tu miŋ a ji tuuɲɛŋ kunku bo-a ntiŋ ŋununfaninmwuŋ. »

²¹ Fa ncusun bi kulinŋ ki i so kila nʼsun kì, nka ncusun ŋi i so kila bi kulinŋ ki sun, bi shɔɔrinŋ mamaanna ki wu.