Ɔrɔmutɔnŋ kiri 10 - Jɔ Biibili ki

¹ Ńʼtindaŋ ni, nwɔ̀ i míŋ tɔnnabi ki i, niŋ fa míŋ i nwɔ̀ rafɛ-a Kirinŋ gbɛ, niŋ i kaa tu, Isirayɛli a a mwu.

² Sɛli ki ra, míŋ a so ǹʼbi-i ńʼtu kí cɛrukɔlimaan i Kirinŋ bi ki ra, nka Kirinŋ bi ki ɲaantɔka sɔbɛ kí gbɛ kì.

³ Kirinŋ konanmini shɛɛli-la koŋ telimaan a ɲaan wɔ̀ tɛ, kí niŋ ɲaantɔ kì. Kí i ǹʼtɛ arì i ji koŋ telimaan ni i arì yɛrima kiri wɔ ɲaan tɛ. Niŋ ɲaan ki tɛ, Kirinŋ i koŋ shɛɛli-la koŋ telimaan a saa wɔ̀ fan, kí i arì kaan niŋ saa ki tɛ.

⁴ Sariya ki i rakɔ-a Kirisa wu, nwɔma konwɔtiŋ bili ntiŋ na, Kirinŋ i nintiŋ shɛɛli koŋ telimaan a.

Konwɔtiŋ bili Ŋuntiŋ ki ra, nintiŋ a a mwu

⁵ Musa nwɔ̀ sɛbɛ-i sariya ki wɔ telibi ki kilaka ɲaan ki sun, niŋ i kaa tu : « Konwɔtiŋ i sariya ki wɔ saa ki bataa tiri-ra, nintiŋ a ɲaninkulutɔnbi kila niŋ sababu ra. »

⁶ Telibi wɔ̀ i kila-a bilinabi ki baraka ra, nwɔ̀ i bi-a niŋ bi sun, niŋ i kaa tu : « Minki ki fa ǹʼbi nʼciiru tu : ‹ Nkɛnŋ a tunpa kirinpɔli ki ra › kì. (Niŋ kɔri ki i ji tu, ntiŋ i Kirisa shi jɛri.)

⁷ Walima tu : ‹ Nkɛnŋ a na jɛri pwɔkulinŋ ki fɛ? › (Niŋ kɔri i tu, ntiŋ i Kirisa ŋmɛni po san konkwuu kiri ru.) »

⁸ Niŋ wulu ki i nwɔ̀ bi-a, niŋ i kaa : « Kirinŋ wɔ wulu ki i miŋ kankantɛ, ŋì i miŋ tɔnŋ na, ŋì i ji miŋ ciiru. » Niŋ wulu ki i bilinabi wulu ki i, yibɛɛ i ninwɔ̀ sunjo-a.

⁹ A miŋ ǹʼbi nʼtɔnŋ ki ra tu, Yesu Ŋuntiŋ ki i, ŋi i bili ǹʼna nʼciiru ki ru tu Kirinŋ ntiŋ ŋmɛni po san konkwuu kiri kanfɛ, miŋ a nʼmwu.

¹⁰ Sabu, a konwɔtiŋ bilinabi ki ma a ciiru ki bataa wu, ŋi i ji-a koŋ telimaan a Kirinŋ ɲaanfɛ, ŋi i ǹʼpo nʼtɔnŋ ki ra, ninki i miŋ mwu-a.

¹¹ Sabu Kirinŋ wɔ wulu sɛbɛ kiri i ǹʼbi-a tu : « Koŋ finŋ woo finŋ bili Ŋuntiŋ ki ra, nintiŋ a ɲaankwun kì. »

¹² Yawutu bo shiya tɔri sun, koŋ san koŋ nu kì, Ŋuntiŋ tenŋ pe i kí bataa ŋununu, ninwɔ̀ i shɔɔrinŋ mwɔɔnna ma-a a tɔ dɔritɔnŋ kiri bataa tɛ.

¹³ Sabu ǹʼsɛbɛ-i tu : « Koŋ finŋ woo finŋ Ŋuntiŋ ki tɔ ki dɔri, nintiŋ a mwu. »

¹⁴ Kí a so ǹʼtɔ ki dɔri-i dɔɔkunŋ, a kí ji bili ǹʼna kì? Kí a so bili-i ǹʼna dɔɔkunŋ, a kí ǹʼwulu lama kì? Kí a ǹʼwulu lama dɔɔkunŋ, a koŋ ǹʼsunjo kí tɛ kì?

¹⁵ Koŋ a so ǹʼsunjo-i dɔɔkunŋ, a ntiŋ cin kì. Miŋ tu ǹʼsɛbɛ-i Kirinŋ wɔ wulu ki ru tu : « Nwɔ̀ri i na-a Kirinŋ wɔ Wulujii ki wu, nini naka ki shɔ-i. »

¹⁶ Niŋ fa a fɔn na, koŋ bataa a ji Kirinŋ wɔ Wulujii ki tɛ kì. Niŋ ki ra, cintɔnŋ Esayi i ǹʼbi tu : « Ŋuntiŋ ki, nkɛnŋ bili yibɔɔ wulu bimaan kiri ra a tɛ? »

¹⁷ Niŋ ɲaan ki tɛ, wulu lamamaan ki i na-a bilinabi ki wu, nwɔ̀ i rama-a niŋ i po-a Kirisa wulu ki ru.

¹⁸ Ŋi i ǹʼbi tu Isirayɛlitɔnŋ kiri niŋ Wulujii ki rama kì wa? Kí ǹʼnama-i dɛ! Sabu ǹʼsɛbɛ-i tu : « Niŋ Wulujii bitɔnŋ kiri wulu ki rama-i pwɔkulinŋ ki mani ki bataa ru, kí wulu ki i so juniɲa nɔnkɔnŋ pyiiraŋ ki fɔn tɛ. »

¹⁹ Niŋ na, míŋ tu Isirayɛlitɔnŋ kiri niŋ tɔ-ri kì wa? Kí ǹʼtɔ wuru dɛ! Sabu Musa ǹʼjɔnɔ ki bi wuru kí tɛ tu : « Shiya wɔ̀ finŋ tɔri i kì, míŋ a na ncusun ábɛɛ ɲaniŋ i po niŋ tɛ, míŋ a ncusun ábɛɛ tɔnŋ i kwulu shiya ɲakili bali bira. »

²⁰ Esayi i ta jɛŋ ntiŋ i a tɔɔn, ntiŋ i ǹʼbi tu Kirinŋ ǹʼbi tu : « Koŋ wɔ̀ri wuru míŋ ceeli-la kì, nini míŋ ja-i, nwɔ̀ri wuru míŋ bi ranɔri-ra kì, míŋ ńʼyɛri ji-i nini wu. »

²¹ Nka Isirayɛlitɔnŋ kiri bi sun, ntiŋ tu Kirinŋ ǹʼbi tu : « Míŋ ńʼgbɛ ki cu-i sunŋ ki bataa, shiya kulubali li fa shiya kaanmaan ni tɛ. »