Matiyu 8 - Jɔ Biibili ki

Yesu tuutiŋ bɛɛ kene-i

¹ Yesu jɛri po san-i tɔnnaanŋ ki sun waarinŋ wɔ̀ ru, konaŋ mwɔɔnna i ǹʼpa ntiŋ cɛfan.

² Tuutiŋ bɛɛ i a kpari Yesu tɛ, wú i na a kwushiri ntiŋ fɛ, wú i ǹʼbi ntiŋ tɛ tu : « Ŋuntiŋ, a ábɛɛ á tu, ábɛɛ ra so nɔɔ ka san-i míŋ na. »

³ Yesu i a gbɛ bili wú sun, ntiŋ i ǹʼbi wú tɛ tu : « Aawe, míŋ ńʼtu-i, nʼwɔ nɔɔ ki san nʼna. » Mìŋ manaanŋ tenŋ ki ru, weŋ ki i kene, wúwɔ tuu ki i kɔ.

⁴ Niŋ kɔɔtɛ, Yesu i ǹʼbi weŋ ki tɛ tu : « Fa bi ka bi koŋ tɔri tenŋ tɛ kì, nka tiri nʼyɛri ji Kirinŋ tɛ sarakawɔrɔtɔnŋ kiri ŋununtiŋ ki wu. Cintɔnŋ Musa saraka wɔ̀ wulu bi-i, tuu kenemaan ki saraka ki i, ŋi i ta niŋ san, nwɔma ŋi i ǹʼji konaŋ ki bataa wu, tu miŋ kene. »

Surudashi ŋununtiŋ ki wɔ cindaŋ ki kene bi ki

⁵ Niŋ kɔɔtɛ, Yesu de-i Kafarinawumu kili ki ru waarinŋ wɔ̀ ru, surudashi ŋununtiŋ bɛɛ i a kpari ntiŋ tɛ, ntiŋ i Yesu rafɛ kusɛbɛ.

⁶ Ntiŋ tu : « Ŋuntiŋ ki, kira míŋ tɛ cinŋ matɔnŋ ki mwurunku bo-i fu ru, ǹʼcɔɔrimaan yɛ kusɛbɛ. »

⁷ Yesu tu ntiŋ tɛ tu : « Míŋ a ta wú kene. »

⁸ Surudashi ŋununtiŋ ki, ninwɔ̀ wuru Ɔrɔmutɔnŋ i, niŋ tu : « Ŋuntiŋ ki, ábɛɛ kakan á i ta míŋ bishi ka wɔ mani nu kì, hali ábɛɛ wuludaŋ tenŋ pe bi, niŋ a míŋ tɛ baara matɔnŋ ki kene.

⁹ Mìŋ ɲaan tenŋ ki tɛ, Ŋununtiŋ ni i míŋ na, míŋ yɛri ki i ji surudashi kiri bɛɛ ri ŋununtiŋ i. A míŋ ǹʼbi niŋ bɛɛ tɛ : ‹ Ta keŋ ›, niŋ i tiri-ra niŋ mani nu. A ŋí ǹʼbi ǹʼtɔri tɛ : ‹ Na ›, niŋ i na-a. A míŋ ǹʼbi ńʼwɔ joŋ ki tɛ : ‹ Ka ma ›, niŋ i niŋ ma-a. »

¹⁰ Yesu niŋ wulu ki rama-i waarinŋ wɔ̀ ru, koŋ ki wɔ bi i di ntiŋ tɛ, ntiŋ tu a cɛfantɔnŋ kiri tɛ tu : « Sɛli ki ra, míŋ i ǹʼbi-a ábɛɛ tɛ, ńʼtu míŋ ka bilinabi sinaŋ ka bishi ja Isirayɛlidaŋ ki tɔri tenŋ gbɛ kì.

¹¹ Míŋ a ǹʼbi ábɛɛ tɛ, ńʼtu koŋ mwɔɔnna na po sunfalimwuŋ niŋ fa sunfyirimwuŋ, kí i na sɔɔ nufinŋ ki tɛ kirinpɔlila Masabi ki ru, yibɛɛ tiŋ cɛɛnni Aburahamu fa Ishaka niŋ fa Yakuba fan.

¹² Niŋ waari ru, nwɔ̀ri kakan wuru-i, kí i masabi ki kani ki shi, nini i kee bo taanna, mancinŋ bilibili ki ru. Ŋuntan wulu ki fa ɲiinnaŋ nataa wulu ki a na ji niŋ mani nu. »

¹³ Niŋ kɔɔtɛ, Yesu i ǹʼbi surudashi ŋununtiŋ ki tɛ tu : « Tiri nʼwɔ mani ki ru, ŋì ma miŋ tɛ, miŋ tu miŋ bili-i ǹʼna ɲaan wɔ̀ tɛ. » Surudashi ŋununtiŋ ki tɛ cinŋ matɔnŋ ki i kene mìŋ waaci tenŋ ki ru.

Yesu wɔ kiratɔnŋ mwɔɔnna tɔri ri kene bi ki

¹⁴ Niŋ kɔɔtɛ, Yesu i tiri Pyɛɛri wɔ mani nu. Ntiŋ i ta fa Pyɛɛri famari ki bili wu firikwulu la.

¹⁵ Yesu i myɛ nmari gbɛ ki ra, nmari wɔ firikwulu ki i kɔ, nmari i jɔrɔkɔ, nmari i nufinŋ si kí tɛ.

¹⁶ Bilana ki ru, konaŋ kiri i ta ɲinijɛtiŋ mwɔɔnna wu Yesu tɛ. Yesu i ɲinijɛ kiri kalikali po san ɲinijɛtiŋ kiri ru a tɔnŋ na wulu wu, ntiŋ i kiratɔnŋ tɔri kiri bataa kene.

¹⁷ Niŋ ma-i ninkunŋ, nwɔma cintɔnŋ Esayi cintɔnbi wulu wɔ̀ bi-i, niŋ i ǹʼnafaa tu : « Ntiŋ yibɔɔ cɔɔri kiri shi san-i yi sun, ntiŋ i yɔɔ kira kiri shi san yi sun. »

Kalindaŋ ki wɔ yɛri bataa wɔri bi ki

¹⁸ Yesu ǹʼja-i tu konaŋ ki mwɔ afinŋ tonfan, ntiŋ i ǹʼbi awɔ kalindaŋ kiri tɛ : « Yi fwuu po baa ki kuŋ nu. »

¹⁹ Niŋ waari ru, sariya kalimɔɔ bɛɛ i ǹʼbi ntiŋ tɛ tu : « Kalimɔɔ, a ábɛɛ ta mani woo mani nu, míŋ a ǹʼpa ábɛɛ cɛfan. »

²⁰ Yesu i ntiŋ nupwulu tu : « Ǹʼtɔ tu, ta juunkwuu ri gbɛ, foo i ji kirina ɲaannaanŋ ni gbɛ, nka mani Koŋ Danshuru ki gbɛ awɔ kì. »

²¹ Ntiŋ wɔ kalindaŋ tɔri i ǹʼbi ntiŋ tɛ tu : « Ŋuntiŋ ki, á ncusun ŋí ta ńʼtiŋ ki kwuu ye sun. »

²² Nka Yesu i niŋ nupwulu : « Ǹʼpa míŋ cɛfan, ncusun konkwuu kiri arɔɔ konkwuu kiri ye. »

Faa sinaŋ ki sunbili bi ki Yesu gbɛ

²³ Yesu fa awɔ kalindaŋ kiri i de buŋ ki ru.

²⁴ Faa sinaŋ i bali jɔrɔkɔ ju ki sun, fɔ jukwululuŋ kiri i buŋ ki sunlamaŋ ceeli-li. Niŋ i Yesu kila ɲini sun.

²⁵ Kalindaŋ kiri i arì kpari ntiŋ tɛ, kí i ntiŋ ŋmɛni, kí tu : « Ŋuntiŋ, á yi mwu, yibɛɛ ra beeni ju ki ru kaa! »

²⁶ Yesu i ǹʼbi kí tɛ tu : « Ábɛɛ kɛni-na kɔɔn nfɛnŋ na, ábɔɔ bilinabi ki kuru-i dɛ! » Ntiŋ i jɔrɔkɔ, ntiŋ i jɛbi faa ki fa jukwululuŋ kiri gbɛ, yìrì i arì sunbili pilɛ.

²⁷ Niŋ botɔnsun i kalindaŋ kiri bataa pa, kí i tu arìmaŋ nanɔri-ra tu : « Ka koŋ ka koŋ kwuru danwɔ? Hali faa ki fa jukwululuŋ kiri fɔn i ntiŋ wɔ wulu lama-a, yìrì i ǹʼtu-ri ntiŋ wɔ ra? »

Yesu wɔ ɲinijɛtiŋ fuuli bɛɛ kene bi ki

²⁸ Yesu so-i baa ki kuŋ nu, Gadaratɔnŋ kiri wɔ sɔɔta ki ru, ɲinijɛtiŋ fuuli bɛɛ i po saali kiri ru, kí i ntiŋ ŋununafu. Niŋ ɲinijɛtiŋ kiri juu wuru kusɛbɛ, fɔ koŋ tɔri tenŋ wuru jɛɛn-na, ntiŋ i de niŋ mani ki ru saa ki fan kì.

²⁹ Kí i arì bo fali sun tu : « Nfɛnŋ finŋ yibɛɛ fa miŋ faninmwuŋ, Kirinŋ Danshuru? Miŋ na-i yibɛɛ ɲaanfɛkwulumaŋ ki ru, yi cɔɔri waaci ki jɛŋ wa? »

³⁰ Niŋ waari ru, cɛ kwuru sinaŋ bɛɛ wuru a nu-a niŋ mani ki kankanŋ nu.

³¹ Ɲinijɛ kari i Yesu rafɛ tu : « A nʼji-a yi kalikali, ncusun yi ta de cɛ kwuru ka ru. »

³² Yesu i ǹʼbi yìrì tɛ tu : « Á tiri. » Yìrì i po san niŋ koŋ fuuli ki ru, yìrì i ta de niŋ cɛ kiri ru. Cɛ kwuru ki i giri jɛri tɔnŋ ki jɛrimaŋ jɛ ki ru, yìrì i ta arì fɛɛn baa ki ru, yìrì bataa i beeni.

³³ Cɛ faa kiri i bili de kili ki ru, kí i ta niŋ bi kiri bataa rakali, niŋ fa bi wɔ̀ ma-i ɲinijɛtiŋ fuuli kari wu, kí i niŋ bataa rakali konaŋ kiri tɛ.

³⁴ Kili ki ru tɔnŋ kiri bataa i po tiri Yesu maŋ ki ru, kí ta-i ntiŋ ja, kí i ntiŋ nafɛ tu ntiŋ a yɛkɛtu, ntiŋ i po san arɔɔ sɔɔta ki ru.