Matiyu 4 - Jɔ Biibili ki

Yesu kɔrɔbɔ bi ki shitaanni gbɛ

^1-2 Yesu wumaan ki kɔɔtɛ, Ɲiniwɔlinŋ ki i ntiŋ jɛnpa ta jaŋ ki faninmwuŋ, nwɔma shitaanni i ntiŋ kɔrɔbɔ. Niŋ mani nu, ntiŋ i sunŋ yaafuuli fa cii yaafuuli ma, ntiŋ nufinŋ bo a daru kì. Niŋ kɔɔtɛ, bɛɛ i ntiŋ pa.

³ Shitaanni koŋ kɔrɔbɔtɔnŋ ki i a kpari ntiŋ tɛ, ŋì i ǹʼbi tu : « A miŋ ji Kirinŋ Danshuru ki i, ǹʼbi tu kwɔ kari rapwulu ji nufinŋ i kɛ! »

⁴ Nka Yesu i ǹʼnupwulu tu : « Ǹʼsɛbɛ-i Kirinŋ wɔ wulu ki ru tu : ‹ Konanmini nakili-la nufinŋ bantenŋ na kì, nka wulu finŋ woo finŋ i po-a Kirinŋ daru, ninki i konanmini nakili-la. ›  »

⁵ Niŋ kɔɔtɛ, shitaanni i Yesu shi ta kili wɔlinŋ ki ra, ŋì i ta ntiŋ bo Kirinfusinaŋ ki ŋununu,

⁶ ŋì i ǹʼbi ntiŋ tɛ : « A miŋ ji Kirinŋ Danshuru ki i, see jɛri fwuniŋ sun, sabu ǹʼsɛbɛ-i Kirinŋ wɔ wulu sɛbɛ ki ru tu : ‹ Ŋì a na miŋ wulu bi awɔ mɛlɛkɛn kiri tɛ, yìrì ra na arì gbɛ kiri cu miŋ fɛ, nwɔma miŋ kanŋ ki fa nakwuru kwɔ ra kì. ›  »

⁷ Yesu tu shitaanni tɛ tu : « Ǹʼsɛbɛ-i sɛbɛ tu : ‹ Fa Ŋuntiŋ ki, nʼwɔ Kirinŋ ki kɔrɔbɔ kì. ›  »

⁸ Niŋ kɔɔtɛ, shitaanni i tiri ntiŋ wu tɔnŋ ŋmani bɛɛ ŋununu, ŋì i ta juniɲa nu masabi kiri fa arì nɔɔri kiri bataa ji ntiŋ wu,

⁹ ŋì i ǹʼbi ntiŋ tɛ tu : « A miŋ nʼtu ŋi i nʼkwushiri, ŋi i míŋ gbɛ, míŋ a finŋ kari bataa wɔri miŋ tɛ. »

¹⁰ Yesu i ǹʼnupwulu tu : « Nʼsan míŋ jɛŋ, shitaanni, sabu ǹʼsɛbɛ-i Kirinŋ wɔ wulu ki ru tu : ‹ Miŋ kakan-i ŋi i Ŋuntiŋ Kirinŋ gbɛ, ŋi i baara ki ma ǹʼtenŋ pe tɛ. ›  »

¹¹ Niŋ ma-i, shitaanni i tiri, mɛlɛkɛn bɛɛ ri i na Yesu tɛ, yìrì i na ntiŋ maku bi kiri bataa ɲaanpo-ri.

Yesu wɔ cinŋ ki tɔnpa ki

¹² Yesu ǹʼnama-i tu Wutɔnŋ Yuhana pa bo nkasu ru waarinŋ wɔ̀ ru, ntiŋ i tiri Galile sɔɔta ki ru,

¹³ nka ntiŋ ta sɔɔ tu Nansarɛti kì. Ntiŋ i po ta sɔɔ Kafarinawumu, ninwɔ̀ wuru Galile kili ki bɛɛ ɛ, nwɔ̀ wuru baa tɔnŋ na, Nsabulɔn fa Nefitali sɔɔta kiri ru.

¹⁴ Niŋ ma-i, nwɔma Kirinŋ wɔ cintɔnŋ Esayi wɔ wulu ki i ǹʼnafaa tu :

¹⁵ « Nsabulɔn kɛniŋ ki niŋ fa Nefitali kɛniŋ ki, á á tɔɔnye, ábɛɛ wɔ̀ri i Galile baa ki kɛlina Yurudɛn baa ki kuŋ nu, ábɛɛ wɔ̀ri i shiya tɔri kiri wɔ Galile ki i.

¹⁶ Koŋ wɔ̀ri sɔɔ wuru mancinŋ ki ru, manisarinŋ sinaŋ po-i nini tɛ, kíbɛɛ wɔ̀ri wuru beŋ kɛniŋ kiri ru mancinŋ ki ru, manisarinŋ po-i kí tɛ. »

¹⁷ Ŋì i shi niŋ shikaŋ ki sun, Yesu i ǹʼsunjo de-ri tu : « Á ntɔri bi áwɔ bijɛ kiri ra, sabu kirinpɔlila Masabi ki waari ki myɛ-i. »

Yesu wɔ kalindaŋ jɔnɔ kiri bi ki

¹⁸ Jibi bɛɛ, ŋì i Yesu tu a maanni-a Galile baa ki tonfan, ntiŋ i tindaŋ fuuli bɛɛ ja. Simɔŋ wɔ̀ i dɔri-ra sɛbɛ tu Pyɛɛri, niŋ fa a tindaŋ Andire wuru-i. Kí wuru jɔ bo-a baa ki ru, sabu yɛrinpatiiri wuru-i.

¹⁹ Yesu tu kí tɛ : « Á ǹʼpa míŋ cɛfan, míŋ a ábɛɛ ji koŋ ceelitiiri i. »

²⁰ Mìŋ manaanŋ tenŋ ki ru, kí i arɔɔ jɔ kiri tu nmaŋ, kí i ǹʼpa ntiŋ cɛfan.

²¹ Yesu i ta jɛŋ awɔ saa ki fan, ntiŋ i ta tindaŋ fuuli tɔri ja. Nini wuru Nsebede danshuru ri, Yakuba fa Yuhana. Kí wuru arɔɔ jɔ kiri myɛ-na buŋ bɛɛ ru arì tiŋ ki fan. Yesu i kí dɔri.

²² Mìŋ manaanŋ tenŋ ki ru, kí i po san buŋ ki ru, kí i arì tiŋ ki tu nmaŋ, kí i ǹʼpa Yesu cɛfan.

Yesu wɔ cinŋ ki Galile sɔɔta ki ru

²³ Yesu i ta Galile sɔɔta ki mani ki bataa ru, ntiŋ i konaŋ ki kali-li Yawutu kiri wɔ kalinfu kiri ru, ntiŋ i kirinpɔlila Masabi ki Wulujii ki sunjo-ri, niŋ fa ntiŋ i konaŋ kiri wɔ kira kwuru ki bataa fa kɔ́ɔ́ bɔlɔmabi kwuru ki bataa kene-ni.

²⁴ Ǹʼcin kì, ntiŋ wulu ki i rama-ni Siri sɔɔta ki bataa ru. Niŋ na, kí i na-ni arɔɔ kiratɔnŋ kwuru kiri bataa wu ntiŋ tɛ. Niŋ kiratɔnŋ kiri wuru ɲinijɛtiŋ ni i fa kirinkirinsaatiŋ ni i, niŋ fa mwurunku ri i. Yesu i kí bataa kene.

²⁵ Konaŋ mwɔɔnna wuru ntiŋ cɛfan. Nini nu, ǹʼbɛɛ ri wuru po-a Galile sɔɔta ki ru, ǹʼtɔri ri po-ri Dekapɔli fa Yerusalɛmu, niŋ fa Yude fa Yurudɛn baa ki kɔɔtɛ kɛniŋ kiri ru.