Matiyu 3 - Jɔ Biibili ki

Wutɔnŋ Yuhana wɔ wulu kiri

¹ Niŋ waaci kiri ru, Wutɔnŋ Yuhana i a yɛri ji konaŋ kiri wu jaŋ ki faninmwuŋ Yude sɔɔta ki ru, ntiŋ i wulu ki sunjo-ri konaŋ ki tɛ.

² Ntiŋ wuru ǹʼbi-a kí tɛ tu : « Á ntɔri bi áwɔ bijɛ kiri ra, sabu kirinpɔlila Masabi ki waari ki myɛ-i. »

³ Kirinŋ wɔ cintɔnŋ Esayi wuru koŋ wɔ̀ wulu bi-a, Yuhana wuru-i. Esayi ǹʼbi-i tu : « Koŋ bɛɛ fali wulu i po-a jaŋ ki faninmwuŋ, tu : Á saa ki ramɔni Ŋuntiŋ ki tɛ, á i ǹʼwɔ saa pyaanŋ kiri teli. »

⁴ Yuhana yɛɛrajɛrɛbi ki ramɔni wuru ɲɔɔnmi kaan wu, ntiŋ wɔ nukɔlɔfinŋ ki i ji pɔli i. Ntiŋ wɔ nufinŋ ki wuru pyii ri fa jaŋ fan jii ri.

⁵ Konaŋ ki wuru po yiri-ra Yerusalɛmu, fa Yude sɔɔta ki mani ki bataa ru, niŋ fa Yurudɛn baa ki tonfan mani kiri bataa ru, kí i na-ni Yuhana tɛ.

⁶ Kí wuru na-a arì tu-ri arɔɔ bijɛ kiri ra Yuhana tɛ, ntiŋ i kí wu-ri Yurudɛn baa ki ru.

Wutɔnŋ Yuhana wɔ konaŋ kiri dɔri wulu ki

⁷ Farinsiyɛnŋ kiri mwɔɔnna fa Sadusiyɛnŋ kiri mwɔɔnna wuru na-a arì wu-ri ntiŋ gbɛ. Ntiŋ wuru ǹʼbi-a kí tɛ tu : « Ábɛɛ fɔnfɔniŋ daŋ kari! Nkɛnŋ ábɛɛ racin tu á bili po san Kirinŋ wɔ tɔnkwulu naanna ki jɛŋ sa?

^8-9 Á bi shɔɔrinŋ ni ma, nwɔ̀ri ra ǹʼji tu ábɛɛ ntɔri bi áwɔ bijɛ kiri ra. Á fa ǹʼsunu tu ábɛɛ Aburahamu daŋ ni i, tu niŋ a ábɛɛ mwu kì dɛ! Míŋ a ǹʼbi ábɛɛ tɛ, ńʼtu nupobi ki ji i, ńʼtu Kirinŋ a so kwɔ kari ji-i Aburahamu daŋ ni i.

¹⁰ Á á yɛri paka tɔ dɛ! Pulu ki fɛshi-i jirinŋ ki fa a kanaŋ ki kwurumaanna ki tɛ kɔ. Jirinŋ finŋ woo finŋ daŋ shɔɔrinŋ pa-a kì, niŋ bataa ra kwuru bo tuu ru. »

¹¹ Yuhana tu sɛbɛ : « Míŋ i ábɛɛ wu-a ju ra, nwɔ̀ i ǹʼji-a tu ábɛɛ ntɔri bi áwɔ bijɛ kiri ra, nka koŋ bɛɛ yirira i nmaŋ míŋ kɔɔtɛ, nwɔ̀ wɔ so ki gbɛ-i mɔ́ɔ́n ki wu, míŋ ŋuniŋ kuru-i niŋ wɔ kari yaa pilitɔnŋ i. Niŋ a na ábɛɛ wu Ɲiniwɔlinŋ ki fa tuu ra.

¹² Ntiŋ wɔ finŋ numyɛɛn kɛrinŋ ki i ntiŋ gbɛɛra, ntiŋ a na bilanaŋ ki fa ǹʼkɛnŋ ki po san arìmaŋ nu awɔ kiniŋ ki ra. Ntiŋ a na bilanaŋ ki bo awɔ cinŋ ki ru, ntiŋ i ǹʼkɛnŋ ki bo tuu ru, tuu wɔ̀ byi-a kì. »

Yesu wu bi ki Wutɔnŋ Yuhana gbɛ

¹³ Niŋ waari ki ru, Yesu i po Galile sɔɔta ki ru, ntiŋ i na Yuhana tɛ Yurudɛn baa ki tɔnŋ na, tu ntiŋ a wu.

¹⁴ Nka Yuhana wuru ǹʼtɛ a i a tu kì, ntiŋ tu Yesu tɛ tu : « Míŋ kakan wuru-i ŋí i ta ńʼwu minwɔ̀tiŋ gbɛ, miŋ i na-ni míŋ tɛ tu ŋí nʼwu wa? »

¹⁵ Nka Yesu tu Yuhana tɛ tu : « Ncusun ŋì i ji ninkunŋ dɔɔ, sabu yibɛɛ ra Kirinŋ dintɛ bi ki rafaa niŋ ɲaan ki tɛ. » Yesu ninwɔ̀ bi-i, Yuhana i ntiŋ wu.

¹⁶ Yesu wu-i, ntiŋ i po san ju ki ru. Mìŋ manaanŋ tenŋ ki ru, kirinpɔli ki i nawwulu, Yuhana i Kirinŋ Ɲini ki ja jɛri-ra miŋ tu kilaaŋ, ŋì i na sɔɔ ntiŋ sun.

¹⁷ Mìŋ manaanŋ tenŋ ki ru, wulu bɛɛ i po kirinpɔli ki ra, ŋì i ǹʼbi tu : « Ka i míŋ dintɛ Danshuru ki i, ǹʼbi ki gbɛ-i míŋ gbɛ haali. »