Matiyu 25 - Jɔ Biibili ki

Yesu wulusuntalinŋ wɔ̀ bi-i maannaannaanŋ byinŋ bi ki sun

¹ Yesu i ka wulusuntalinŋ ka bi awɔ kalindaŋ kiri tɛ tu : « Kirinpɔlila Masabi ki bi ki a na ji miŋ tu maannaannaanŋ byinŋ bɛɛ ri bi, nwɔ̀ri arɔɔ sifilɛn ni cu-i tu arì ta-a marishinŋ bɛɛ ŋununafu.

² Niŋ maannaannaanŋ kiri ru, koŋ taanŋ wuru ɲakili bali li i, koŋ taanŋ ki i ji koŋ ɲakilitiŋ ni i.

³ Maannaanŋ taanŋ ɲakili bali kiri arɔɔ sifilɛn cumaan kiri shi-i, nka kí ŋuŋ shi bo arì gbɛ kì.

⁴ Nka ɲakilitiŋ kiri i arɔɔ sifilɛn cumaan kiri shi, kí i saaki, kí i ŋuŋ shi bo arì gbɛ finŋ tɔri ri ru.

⁵ Marishinŋ ki na-i cin ntiŋ i na-a kì, ɲini i kwulu maannaanŋ kiri ra, kí bataa i ɲinintan.

⁶ Wɔkila ki ru, fali wulu i po tu : ‹ Marishinŋ ki i kaa, á ta ǹʼŋununafu! ›

⁷ Maannaannaanŋ kiri bataa i ŋmɛni, kí i arì bo arɔɔ sifilɛn kiri ramɔni sun.

⁸ Niŋ mani nu, maannaanŋ ɲakili bali kiri i ǹʼɲakilitiŋ kiri rafɛ-ri tu : ‹ Á áwɔ ŋuŋ kiri pyaanŋ wɔri yi tɛ, sabu yibɔɔ sifilɛn kiri i ǹʼtɛ arì byi dɛ! ›

⁹ Nka ɲakilitiŋ kiri tu kí tɛ tu : ‹ Aayi! Yibɔɔ kiri ra yi fa ábɛɛ po kì, á bili ta ǹʼbɛɛ sa ŋuŋ jutɔnŋ kiri gbɛ. ›

¹⁰ Kíbɛɛ tirimaan ki tu-i ŋuŋ samaŋ ki ru, marishinŋ ki i na. Maannaanŋ wɔ̀ri ramɔnimaan wuru-i, marishinŋ ki fa nini i de cɛn fu ki ru, kí i fu ki tɔnŋ ki sɔɔn.

¹¹ Niŋ kɔɔtɛ, maannaanŋ taanŋ kari arì pwulu yiri-i, kí tu marishinŋ ki tɛ : ‹ Yi ŋuntiŋ, yi ŋuntiŋ, á fu ki tɔnŋ nawwulu yi tɛ! ›

¹² Nka ŋuntiŋ ki i kí rupwulu tu : ‹ Sɛli ki ra, míŋ i ǹʼbi-a ábɛɛ tɛ, míŋ ábɛɛ tɔ-a kì. › »

¹³ Niŋ ki ra, Yesu tu awɔ kalindaŋ kiri tɛ tu : « Á tu á ɲaanna, sabu ábɛɛ Kirinŋ Danshuru ki na jibi ki tɔ-a kì, á fani ǹʼwaaci ki tɔ-a kì. »

Yesu wulusuntalinŋ wɔ̀ bi-i joŋ koŋ byaŋ bi ki sun

¹⁴ Yesu tu sɛbɛ tu : « Kirinpɔlila Masabi ki i miŋ tu shuru bɛɛ po tirira wɔru, ntiŋ i awɔ joŋ kiri dɔri, ntiŋ i awɔ nafulu ki biye kí gbɛsun.

¹⁵ Ntiŋ i sɛniŋ ŋuŋ taanŋ wɔri tenŋ tɛ, ntiŋ i ǹʼfuuli wɔri tenŋ tɛ, ntiŋ i ǹʼŋuŋ tenŋ wɔri kí byantɔnŋ tɛ. Ntiŋ i kí bataa wɔ wɔri, ŋì i kɛɲɛ kí fɔn tenŋ tenŋ ki wɔ so ki wu, niŋ kɔɔtɛ, ntiŋ i tiri.

¹⁶ Sɛniŋ ŋuŋ taanŋ ki wɔri-i joŋ wɔ̀ tɛ, niŋ i baara ma niŋ wu, niŋ i sɛniŋ ŋuŋ taanŋ tɔri kila bo ǹʼsun.

¹⁷ Sɛniŋ ŋuŋ fuuli ki wɔri wuru nwɔ̀ tɛ, niŋ fani i ǹʼma mìŋ ɲaan tenŋ ki tɛ, niŋ i sɛniŋ ŋuŋ fuuli tɔri kila bo awɔ ki sun.

¹⁸ Nka sɛniŋ ŋuŋ tenŋ ki wɔri wuru nwɔ̀ tɛ, niŋ i ta ta san, niŋ i a ŋuntiŋ ki wɔ nafulu ki radu niŋ nu.

¹⁹ Niŋ ɲaan ki tɛ, ŋì i na cin, jibi bɛɛ, joŋ kiri ŋuntiŋ ki i a pwulu na. Ntiŋ pwulumaan ki ra, ntiŋ awɔ nafulu ki wɔri wuru awɔ joŋ wɔ̀ri tɛ, ntiŋ i nini dɔri. Ntiŋ tu kí fɔn tenŋ tenŋ na awɔ nafulu ki rapwuluka ɲaan ki bi a tɛ.

²⁰ Sɛniŋ ŋuŋ taanŋ ki wɔri wuru joŋ wɔ̀ tɛ, niŋ i na niŋ fa sɛniŋ ŋuŋ taanŋ tɔri wu, niŋ i ǹʼbi tu : ‹ Míŋ ŋuntiŋ, ábɛɛ sɛniŋ ŋuŋ taanŋ wɔri wuru míŋ tɛ, ŋuŋ taanŋ tɔri i kaa, míŋ niŋ kila bo-i ǹʼsun. ›

²¹ Joŋ ki ŋuntiŋ ki tu : ‹ Niŋ shɔ-i, miŋ ji-i joŋ sɔbɛ ɛ, koŋ a bili nwɔ̀ ra. Finŋ pyaanŋ wɔri-i miŋ tɛ, miŋ i ǹʼji tu koŋ a so bili-i miŋ na niŋ bi ru, niŋ ki ra, míŋ a finŋ sinaŋ ni biye miŋ gbɛsun. Na, nʼfa nʼŋuntiŋ ki á yoori ámaŋ fan! ›

²² Mìŋ ɲaan tenŋ ki tɛ, sɛniŋ ŋuŋ fuuli ki wɔri wuru joŋ wɔ̀ tɛ, niŋ yɛri ki i na arì ŋuntiŋ ki tɛ, niŋ i na ǹʼbi tu : ‹ Ŋuntiŋ, ábɛɛ sɛniŋ ŋuŋ fuuli biye tu wuru míŋ gbɛsun, nka ŋuŋ fuuli tɔri i kaa, míŋ niŋ kila bo-i ǹʼsun. ›

²³ Joŋ ki ŋuntiŋ ki tu : ‹ Niŋ shɔ-i, miŋ ji-i joŋ sɔbɛ ɛ, koŋ a bili nwɔ̀ ra. Finŋ pyaanŋ wɔri-i miŋ tɛ, miŋ i ǹʼji tu koŋ a so bili-i miŋ na niŋ bi ru, niŋ ki ra, míŋ a finŋ sinaŋ ni biye miŋ gbɛsun. Na, nʼfa nʼŋuntiŋ ki á yoori ámaŋ fan! ›

²⁴ Niŋ kɔɔtɛ, sɛniŋ ŋuŋ tenŋ ki wɔri wuru nwɔ̀ tɛ, niŋ yɛri ki i na arì ŋuntiŋ ki tɛ, niŋ i na ǹʼbi : ‹ Ŋuntiŋ, míŋ ǹʼtɔ wuru ńʼtu ábɔɔ bi furu haali! Ábɛɛ bilaŋ firi ji wɔ̀ ru kì, ábɛɛ i bilaŋ nakɔli-la niŋ nu, á bilaŋ ɲɛɛn ji wɔ̀ ru kì, á i bilaŋ tɛri-ra niŋ nu.

²⁵ Niŋ ki ra, míŋ i kɛni, ábɛɛ sɛniŋ wɔ̀ wɔri wuru míŋ tɛ, ŋí i niŋ nadu ta ru. Ábɔɔ sɛniŋ ki i kaa, á ǹʼmwu. ›

²⁶ Nka joŋ ki ŋuntiŋ ki tu : ‹ Joŋ kulinŋ jurubitiŋ! Miŋ ǹʼtɔ wuru tu míŋ bilaŋ firi ji wɔ̀ ru kì, tu míŋ bilaŋ nakɔli-la niŋ nu, tu míŋ finŋ ɲɛɛn ji wɔ̀ ru kì, tu ŋí i bilaŋ tɛri-ri niŋ nu,

²⁷ niŋ na, nfɛnŋ na miŋ so ta-i mɔ́ɔ́n nafulu ki wɔri jalinŋ marimaŋ nu kì? A miŋ ji wuru niŋ ma-ni, míŋ namaan ki wuru-ra ji ta-a ńʼwɔ jalinŋ ki shi, ŋí i ǹʼtɔnɔ ki shi bo ǹʼsun kì wa?

²⁸ Joŋ kiri ŋuntiŋ ki tu konaŋ kiri niŋ joŋ ki wɔ sɛniŋ ŋuŋ tenŋ ki mwu san wú wu, tu kí i ǹʼwɔri sɛniŋ ŋuŋ byinŋ tiŋ ki tɛ. › »

²⁹ Yesu tu sɛbɛ : « Sabu, finŋ i nwɔ̀ gbɛ, ǹʼbɛɛ ra wɔri nintiŋ tɛ, ŋì i bo ntiŋ gbɛfɛ wɔ ki sun, ŋì i mwɔ, nka finŋ nwɔ̀tiŋ gbɛ kì, ntiŋ gbɛfɛ wɔ ki a mwu san ntiŋ wu.

³⁰ Ntiŋ tu : ‹ Á joŋ kulu bali ka pa kee taanna mancinŋ ki ru nmaŋ, yaalinŋ ki fa ɲiinnaŋ nataa ki i mani wɔ̀ ru. › »

Kiti rakɔɔra ki bi ki

³¹ Yesu tu : « Waarinŋ wɔ̀ ru, a Koŋ Danshuru ki na na awɔ nɔɔri ki ru, ntiŋ fa awɔ mɛlɛkɛn kiri bataa, ntiŋ a na sɔɔ awɔ masawaalinŋ nɔɔritiŋ ki sun.

³² Juniɲa nu konaŋ kiri bataa ra na nakɔli ntiŋ ɲaanfɛ. Ntiŋ a na konaŋ kiri rukila, miŋ tu finŋ faa i saa kiri fa baa kiri kila san-a arìmaŋ na ɲaan wɔ̀ tɛ.

³³ Ntiŋ a na koŋ telimaan kiri bo a pantɛ, ntiŋ i koŋ juumaan kiri bo a nɔrintɛ.

³⁴ Nwɔ̀ri i ntiŋ pantɛ, masa ki a na ǹʼbi nini tɛ tu : ‹ Á na, míŋ Tiŋ Kirinŋ wɔ juba ki i ábɛɛ wɔ̀ri tɛ. Kirinŋ masabi wɔ̀ ramɔni-i kabi juniɲa cɛtu waari ki ru, á na niŋ shi kani.

³⁵ Sabu, jibi wɔ̀ bɛɛ ki wuru míŋ wu, ábɛɛ nufinŋ wɔri-i míŋ tɛ, jumwunu ki wuru míŋ wu jibi wɔ̀, á i ju wɔri ńʼtɛ. Míŋ wuru jɛ ɛ, ábɛɛ i míŋ jɛri áwɔ mani ki ru.

³⁶ Míŋ sunwɔ wuru-i, ábɛɛ i juulinŋ bo míŋ sun. Míŋ kenemaan wuru-i kì, ábɛɛ i ta míŋ shɛɛli. Míŋ wuru nkasu ru, ábɛɛ i ta míŋ shɛɛli. ›

³⁷ Niŋ na, koŋ telimaan kiri ra na nanɔri tan tu : ‹ Ŋuntiŋ, yibɛɛ ábɛɛ bɛɛkɔni ki ja jibi danwɔ, yi i nufinŋ wɔri á tɛ? Yibɛɛ ábɛɛ jumwunukɔni ki ja jibi danwɔ, yi i ju wɔri á tɛ?

³⁸ Jibi danwɔ yibɛɛ ábɛɛ ja jɛ ɛ, yi i á jɛri yɔɔ mani nu? Walima jibi danwɔ yibɛɛ ábɛɛ sunwɔ ki ja, yi i juulinŋ bo á sun?

³⁹ Jibi danwɔ yibɛɛ ábɛɛ kiratɔnŋ ja, walima á i ji nkasu ru, yi i ta á shɛɛli? ›

⁴⁰ Masa ki a na nini nupwulu tu : ‹ Sɛli ki ra, míŋ a ǹʼbi ábɛɛ tɛ, ńʼtu a ábɛɛ ji niŋ bi shɔɔrinŋ ki bishi ma, hali míŋ tindaŋ kiri bataa ru pyaanŋ ki tɛ, ábɛɛ ǹʼma-i míŋ yɛrima ki tɛ niŋ i. ›

⁴¹ Niŋ kɔɔtɛ, nwɔ̀ri i ntiŋ nɔrintɛ, masa ki a na ǹʼbi nini tɛ tu : ‹ Á á san míŋ ɲaanfɛ, ábɛɛ koŋ dankamaan kari! Á tiri tuu byibali ki ru, ninwɔ̀ ramɔni-i shitaanni fa awɔ mɛlɛkɛn kiri tɛ!

⁴² Sabu, bɛɛ kwulu wuru míŋ na, ábɛɛ nufinŋ wɔri míŋ tɛ kì. Jumwunu wuru míŋ wu, ábɛɛ ju wɔri míŋ tɛ kì.

⁴³ Míŋ wuru jɛ ɛ, ábɛɛ á tu míŋ jɛri áwɔ mani nu kì. Míŋ sunwɔ wuru-i, ábɛɛ juulinŋ bo míŋ sun kì. Míŋ kene-ni kì, míŋ wuru nkasu ru, nka ábɛɛ ta míŋ shɛɛli kì. ›

⁴⁴ Niŋ na, nini yɛrima kiri ra na Ŋuntiŋ ki ranɔri tu : ‹ Ŋuntiŋ ki, yibɛɛ ábɛɛ bɛɛkɔni ki ja, yi i á jumwunukɔni ki ja, yi i á ja jɛ ɛ, yi i á sunwɔ ki ja, yi i á kiratɔnŋ ja, walima yi i á ja nkasu ru jibi danwɔ, yi i bi tɔri ma kì? ›

⁴⁵ Masa ki a na nini nupwulu tu : ‹ Sɛli ki ra, míŋ a ǹʼbi ábɛɛ tɛ, ńʼtu a ábɛɛ ji niŋ bi shɔɔrinŋ ki bishi ma, hali míŋ tindaŋ kiri bataa ru pyaanŋ ki bɛɛ tɛ kì, ábɛɛ ǹʼma míŋ yɛrima ki tɛ niŋ i kì. ›

⁴⁶ Niŋ konaŋ kiri ra tiri ɲaanfɛkwulu kɔbali ki ru, nka koŋ telimaan kiri i tiri ɲaninkulutɔnbi kɔbali ki ru. »