Matiyu 24 - Jɔ Biibili ki

Yerusalɛmu gwu bi ki

¹ Yesu po san-i Kirinfusinaŋ ki ru. Ntiŋ tirira ki, ntiŋ wɔ kalindaŋ kiri i arì kpari ntiŋ tɛ, kí i ǹʼbi-ri ntiŋ tɛ tu : « Ábɛɛ Kirinfusinaŋ ki tanka ɲaan ki fa ǹʼshɔka ki shɛɛli. »

² Yesu i kí rupwulu tu : « Ábɛɛ ɲaniŋ i ka bataa ra kɛ, sɛli ki ra, míŋ a ǹʼbi ábɛɛ tɛ, ńʼtu kwɔ a na tu kwɔ sun ka kwɔ kari ru kì, ǹʼbataa ra na warinka san amaŋ sun. »

Cɔɔri bi wɔ̀ri ra ma juniɲa kɔ ki jɛŋ

³ Yesu ta-i sɔɔ Olinfyetɔnŋ ki sun, ntiŋ wɔ kalindaŋ kiri i arì kpari ntiŋ tɛ arì cinancinŋ, kí i ntiŋ nanɔri tu : « Á niŋ bi kiri ma waaci ki bi yi tɛ. Taanmashɛ wɔ̀ri a na ábɛɛ na waari ki fa juniɲa nakɔ waari ki ji, á nini bi yi tɛ. »

⁴ Yesu i kí rupwulu tu : « Á á ɲakili tu á yɛri ra, nwɔma koŋ fa na á sunnɛɛn, ntiŋ i á bo fɔni saa sun kì.

⁵ Sabu, koŋ mwɔɔnna a na na, kí i míŋ tɔ ye arì yɛri ra, tu arìbɛɛ Kirinŋ Ɲaannakonshimaan ki i. Kí a na koŋ mwɔɔnna sunnɛɛn fɔni.

⁶ Ábɛɛ ra na kari tan shinwulu kiri fa kari wulu kiri rama-ni. Á fa na á ɲakili ki ɲaanmi kì, sabu niŋ bi kiri kakan-i yìrì i ma, nka niŋ a na ji juniɲa ki kɔ ki i sun kì.

⁷ Shiya ki bɛɛ ra na jɔrɔkɔ ǹʼtɔri cɛfan, kí i arìmaŋ kari-ri, kɛniŋ fa kɛniŋ i bo arìmaŋ na, bɛɛ ki fa fwuniŋ sɛrɛsɛri ki i ji pwɔkulinŋ ki mani mwɔɔnna nu.

⁸ Niŋ bi kiri bataa ra na ji cɔɔri bi kiri tɔnpa ki i, miŋ tu mari wɔ daŋ ji ciiyaa tɔnpamaanna.

⁹ Kí a na ábɛɛ wɔri á ɲa kiri tɛ, kí i á ɲaanfɛkwulu, kí i á kilɛn. Shiya kiri bataa ra na ábɛɛ bikwɔ arì sun, míŋ tɔ ki bira.

¹⁰ Niŋ waaci ki ru, koŋ mwɔɔnna a na bilinabi ki tonbo, kí i arì san arìmaŋ cɛfan, kí i arì yɛri bikwɔ arìmaŋ sun.

¹¹ Cintɔnŋ purubitɔnŋ mwɔɔnna na po, kí i konaŋ mwɔɔnna fɔni.

¹² Bijɛ ki mwɔka jɛ ki a na, koŋ mwɔɔnna wɔ bidintɛbi ki rakuru.

¹³ Nka, konwɔtiŋ a na tu bilinabi ki ru ka bi kari bataa ciiru, fɔ ŋì i ta so ǹʼnakɔɔra ki sun, Kirinŋ a nintiŋ mwu.

¹⁴ Ka Wulujii ka a na sunjo kirinpɔlila Masabi ki bi sun juniɲa mani ki bataa ru, nwɔma konaŋ ki bataa i ǹʼnama. Niŋ kɔɔtɛ, juniɲa ki a kila ŋì i kɔ. »

Ɲaanfɛkwulu bi sinaŋ wɔ̀ a na ma

¹⁵ Yesu tu : « Finŋ nɔɔmaan li tantɔnŋ wɔ̀ bikwɔ-i Kirinŋ sun, cintɔnŋ Daɲɛli ninwɔ̀ wulu bi-i, a ábɛɛ na niŋ ja Kirinfusinaŋ ki Maniwɔlinŋ ki ru. » (Mani ka kalitɔnŋ ki a banba, ntiŋ i ǹʼɲaantɔ.)

¹⁶ « Niŋ waari ru, a konwɔtiŋ na ji Yude sɔɔta ki ru, tu niŋ bili tiri tɔnŋ maŋ kiri ru.

¹⁷ Konwɔtiŋ na ji tanka sun, nintiŋ fa na jɛri kili, tu a i na-a finŋ tɔri shi fu ki ciiru kili kì.

¹⁸ Konwɔtiŋ na ji juunŋ, ntiŋ fa na a pwulu, tu a ra na awɔ jɛrɛbi sinaŋ shi kulu kì.

¹⁹ Niŋ waari ki ru, mari ciitiŋ kiri fa mari wɔ̀ri i ɲɛŋ wɔri-ra daŋ ni tɛ, nini a na cɔɔri kusɛbɛ.

²⁰ Á Kirinŋ nafɛ-ri, nwɔma ábɛɛ bili jibi ki fa na fu shii sinaŋ waari ki wu kì, walima Nufaan jibi sun kì.

²¹ Niŋ a na ji cɔɔri sinaŋ i, nwɔ̀ bishi ma ja-i sun kì, ŋì i shi juniɲa tɔnpa ki sun, ŋì i na bo niŋ shikaŋ sun, niŋ fa ǹʼbishi tɔri dumiŋ a na ja kili kì.

²² A niŋ cɔɔri kiri waaci kiri ji wuru rabwunu-ni kì, koŋ wuru-ra a mwu kì. Nka Kirinŋ nwɔ̀ri ɲaannashi-i, ŋì niŋ cɔɔri kiri waaci kiri rabwunu-i nini bira.

²³ A koŋ na ǹʼbi ábɛɛ tɛ tu : ‹ Á ǹʼshɛɛli, Kirinŋ Ɲaannakonshimaan ki i kwumaŋ › walima ‹ ǹʼyɔ kaa keŋ ›, á fa na bili ntiŋ na kì.

²⁴ Sabu purubitɔnŋ ni a na jɔrɔkɔ, kí i ǹʼbi-ri tu arìbɛɛ Kirinŋ Ɲaannakonshimaan ki i, cintɔnŋ purubitiiri i na jɔrɔkɔ sɛbɛ, nini i taanmashɛ ri fa kabakobi ri ma-ni, nwɔma arì i konaŋ ki bataa fɔni, fɔ ŋì i ta bo Kirinŋ wɔ konanbi ki sun, a kí ji wuru-ra so niŋ na kɔniŋ.

²⁵ Dɔnsaŋ, bi wɔ̀ri ra na ma, míŋ i nini jɛnbi-i ábɛɛ tɛ kɔ.

²⁶ Niŋ na, a kí na ǹʼbi ábɛɛ tɛ tu Kirinŋ Ɲaannakonshimaan ki jaŋ faninmwuŋ, á fa ta nmaŋ kì. A kí ǹʼbi tu : ‹ Ǹʼshɛɛli, ŋì a radu-i kwumaŋ ›, á fa bili ǹʼna kì.

²⁷ Sabu kirinŋ ki i ŋani-na sunfalimwuŋ, ŋì i ta po sunfyirimwuŋ ɲaan wɔ̀ tɛ, Koŋ Danshuru ki ra ji ninkunŋ, a na shikaŋ ki ru.

²⁸ Finŋ kwuu ki i mani wɔ̀ ru, juba kiri i arì rakɔli-la niŋ mani ki ru. »

Koŋ Danshuru ki na bi ki

²⁹ « Niŋ waaci ki ru cɔɔri ki fwuudemaan ki kɔɔtɛ shuu, sunŋ ki a na ji mancinŋ i, sarinŋ fani na po ɲɛ ki ru kì, sɔriniŋ kiri i saa yiri-ri kirina, yìrì i na fɛɛn fɛɛn-ni, kirinpɔlila sotinbi kiri i sɛrɛsɛri.

³⁰ Niŋ waaci ki ru, Koŋ Danshuru ki taanmashɛ ki a na ja kirinpɔli ki ra. Niŋ waari ru, konaŋ ki a na ŋuntan-ni kusɛbɛ. Kí i Koŋ Danshuru ki yirira ja kirinpɔli ki ra, sotinbi fa nɔɔri sinaŋ wu.

³¹ Koŋ Danshuru ki a na awɔ mɛlɛkɛn kiri cin bwuru fyɛ wulu sinaŋ wu, yìrì i ǹʼwɔ koŋ ɲaannashimaan kiri rakɔli bo arìmaŋ sun, ŋì i po juniɲa nɔnkɔnŋ pyiiraŋ ki ra. »

Kalinŋ wɔ̀ wɔri-i ŋì i kɛɲɛ shɔ jirinŋ ki ɲaan ki wu

³² « Á bi kiri shɛɛli shɔ jirinŋ ki bi sun, a ǹʼji cɔ-a waarinŋ wɔ̀ ru, ŋì i da ŋunaŋ ni po-ri a ra, ábɛɛ i ǹʼtɔ-a niŋ na tu yili ki myɛ-ɛ.

³³ Mìŋ ɲaan tenŋ ki tɛ, a ábɛɛ na niŋ bi kiri ja juu ma-a waarinŋ wɔ̀ ru, á ǹʼtɔ tu Koŋ Danshuru ki na ki myɛ kɔ, tu ntiŋ demantɔnŋ ki ra.

³⁴ Sɛli ki ra, míŋ a ǹʼbi ábɛɛ tɛ ńʼtu jiintɔnŋ ki bataa ra beeni kɔ ka bi kari mabali, yìrì i ǹʼnafaa kì.

³⁵ Kirinpɔli ki fa pwɔkulinŋ kiri a fwuude, nka mɔ́ɔ́n wulu ki a fwuude kì. »

Kirinŋ tenŋ i juniɲa nakɔ waaci ki tɔ-a

³⁶ Yesu tu : « Nwɔ̀ i niŋ jibi ki fa niŋ ma waari ki bi ki i, hali kirinpɔlila mɛlɛkɛn kiri fa Koŋ Danshuru ki niŋ tɔ-a kì, duu Tiŋ Kirinŋ tenŋ pe.

³⁷ Bi wɔ̀ri ma-i Nawu wɔ sunŋ ki ra, nini bishi kiri ra na ma Koŋ Danshuru ki na jibi kiri ra.

³⁸ Ju sinaŋ ki na ki jɛŋ, konaŋ ki wuru nufinŋ sinaŋ kiri nu-a, kí i mwunufinŋ ki mwunu-ni, niŋ fa kí i cɛn ni tan-ni, fɔ ŋì i ta so Nawu de jibi ki sun kwurinŋ sinaŋ ki ru.

³⁹ Kí wuru arì miiri-ra bi tɔri ra kì, fɔ ju ki i na kí haliki. Koŋ Danshuru ki na shikaŋ ki a na ji mìŋ ɲaan tenŋ ki tɛ.

⁴⁰ Mìŋ ɲaan ki tɛ, shuru fuuli a na ji arìmaŋ fan ji tenŋ nu, tenŋ ki a na shi san tenŋ ki ra.

⁴¹ Mari fuuli a na tu finŋ ɲɛ-a arìmaŋ fan mani tenŋ nu, tenŋ ki a na shi san tenŋ ki ra.

⁴² Niŋ ki ra, á tu á ɲaanna waarinŋ bataa ru, sabu ábɛɛ Ŋuntiŋ ki na jibi ki tɔ-a kì.

⁴³ Á ǹʼtɔ tu futiŋ ki ji wuru kwunŋ ki na waari ki tɔ-a cii ki ru, ntiŋ wuru-ra tu a ɲaanna, nwɔma a i kwunŋ ki suu awɔ fu ki buŋ ki yali ki sun.

⁴⁴ Niŋ ki ra, ábɛɛ yɛrima kiri ramɔnimaan i ji waarinŋ bataa ru, sabu ábɛɛ ɲakili waaci wɔ̀ ra kì, Koŋ Danshuru ki a na niŋ waaci ki ru. »

Joŋ jɛ ki fa nʼshɔɔrinŋ ki bi ki

⁴⁵ Yesu tu : « Ŋununtiŋ ki i joŋ telimaan ɲakilitiŋ wɔ̀ shi sɔɔ-ra awɔ joŋ pyɛ kiri ŋununu, tu ntiŋ nufinŋ ki wɔri kí tɛ a wɔri waaci ru, niŋ joŋ danwɔ?

⁴⁶ Ŋununtiŋ ki i na-a fa joŋ wɔ̀ wu baara ki ma-a, miŋ tu ǹʼbiye wuru ntiŋ gbɛsun ɲaan wɔ̀ tɛ, niŋ i koŋ fɛrɛmaan.

⁴⁷ Sɛli ki ra, míŋ i ǹʼbi-a ábɛɛ tɛ, ńʼtu ŋununtiŋ ki a na niŋ sɔɔ a gbɛfɛfinŋ kiri bataa ŋununu.

⁴⁸ Nka, a niŋ joŋ ki ji koŋ sɔŋ jɛ ɛ, ntiŋ i ǹʼbo a ciiru tu, afinŋ ŋununtiŋ ki ra na dɔnsaŋ sun kì,

⁴⁹ ntiŋ a kaashi kiri bwɔ-ri, ntiŋ i tu nufinŋ sinaŋ nu ki ra, niŋ fa lɔ mwunu ki ra lɔrutɛfɛ kiri fan.

⁵⁰ Niŋ joŋ ki ɲakili jibi wɔ̀ fa waarinŋ wɔ̀ ra kì, ntiŋ ŋununtiŋ ki ra na niŋ i.

⁵¹ A niŋ ma, ŋununtiŋ ki ra niŋ joŋ ki bwɔ, ntiŋ i bo wulufuulibitɔnŋ kiri fan. Ntiŋ a ŋuntan-ni, niŋ fa ntiŋ i a ɲiinnaŋ nataa-ri niŋ mani nu. »