Matiyu 22 - Jɔ Biibili ki

Yesu wulusuntalinŋ wɔ̀ bi-i maannaanŋ pofurunku ki bi ki sun

¹ Yesu i wulusuntalinŋ tɔri bi konaŋ kiri tɛ sɛbɛ, ntiŋ tu :

² « Kirinpɔlila Masabi ki fa finŋ wɔ̀ po-i, niŋ i kaa : Masashuru bɛɛ a danshuru wɔ maannaanŋ pofurunku si-i.

³ Ntiŋ nufinŋ ki wulu ki bi wuru nwɔ̀ri tɛ, ntiŋ i a tɛ baara matɔnŋ kiri bo tiri nini dɔri, nka nini arì tu kí i na kì.

⁴ Niŋ na, ntiŋ i a tɛ baara matɔnŋ tɔri ri bo tiri, tu kí ta ǹʼbi koŋ dɔrimaan kiri tɛ tu : ‹ Míŋ ńʼwɔ nufinŋ sinaŋ ki ramɔni-i. Míŋ ǹʼbi-i ńʼtu kí ńʼwɔ naan tuula bulaaŋ kiri fa nafulufinŋ caantiŋ kiri kilɛn. Bi ki bataa ramɔni-i kɔ, á na nufinŋ ki nu. ›

⁵ Niŋ koŋ dɔrimaan kiri niŋ dɔri ki ji bi sinaŋ i kì, koŋ fɔn i tiri a ɲaanna mani ni nu. Ǹʼbɛɛ ri i tiri juu, ǹʼtɔri ri i tiri jɔɔ tanmaŋ nu.

⁶ Kí pyɛ kiri i masa ki tɛ baara matɔnŋ kiri cɔɔri kusɛbɛ, fɔ kí i kí kilɛn.

⁷ Niŋ mamaan ki i masa ki tɔnkwulu. Ntiŋ i awɔ karidaŋ kiri bo tiri ka koŋ kilɛntɔnŋ kari kilɛn, ntiŋ i tuu bo kɔ́ɔ́ kili ki ru.

⁸ Niŋ kɔɔtɛ, ntiŋ i ǹʼbi awɔ baara matɔnŋ kiri tɛ : ‹ Nufinŋ ki ramɔni kɔ-i kɔ, ka koŋ dɔrimaan kari fa ǹʼkakan-ni kì.

⁹ Á tiri saa ŋuniŋ kiri ra, á fa koŋ finŋ woo finŋ ta fu, á i nini dɔri na nufinŋ ki tɛ. ›

¹⁰ Masa ki tɛ baara matɔnŋ kiri i tiri saa kiri fan, kí fa koŋ finŋ woo finŋ fu-i, koŋ jɛ bo koŋ shɔɔrinŋ sun, kí i nini bataa rakɔli na. Niŋ ɲaan ki tɛ, fu ki i faa konaŋ ki ra.

¹¹ Masa ki i de, ntiŋ i ta fu ki ru tɔnŋ kiri shɛɛli, ntiŋ i weŋ bɛɛ ja, pofurunku nu juulinŋ wuru nwɔ̀ sun kì.

¹² Ntiŋ tu niŋ tɛ : ‹ Ńʼwɔ wɔshuru, miŋ ji dɔɔkunŋ, ŋi i de, pofurunku nu juulinŋ dumiŋ miŋ sun kì? › Wulu kila niŋ koŋ ki daru kì.

¹³ Niŋ ki ra, masa ki tu awɔ baaradaŋ kiri tɛ, tu kí weŋ ki pa, kí i wú kanŋ kiri fa wú gbɛ kiri kɔli, kí i wú kee bo taanna mancinŋ ki ru, ŋuntan ki fa ɲiinnaŋ nataa wulu ki a na ji niŋ mani nu. »

¹⁴ Niŋ kɔɔtɛ Yesu tu : « Koŋ mwɔɔnna dɔri-i, nka koŋ mwɔɔnna ɲaannashi kì. »

Yesu wɔ kalinŋ ki ɲinisa sali bi ki sun

¹⁵ Niŋ ɲaan ki tɛ, Farinsiyɛnŋ kiri i tiri arì manja, nwɔma arì i Yesu pa a yɛrima ki daru wulu wu.

¹⁶ Kí i arɔɔ kalindaŋ kiri bɛɛ ri fa Ɛrɔdi wɔ konanbi kiri bɛɛ ri cin tiri ntiŋ tɛ. Nini i ta ǹʼbi ntiŋ tɛ tu : « Yɔɔ kalimɔɔ, yibɛɛ ǹʼtɔ-i tu ábɛɛ sɛli ki bi-a. Koŋ tɔri tenŋ jɛŋ kɛmi ncusun-a ábɛɛ i á san áwɔ sɛli ki sun kì, sabu ábɛɛ koŋ san-a koŋ nu kì. Ábɛɛ i konaŋ ki kali-la Kirinŋ saa wɔ̀ ra, niŋ fɔɔmaan yɛ.

¹⁷ Yibɛɛ i ábɛɛ ranɔri-ra : ‹ ǹʼfu-i koŋ i ɲinisa sali wɔri-ri Ɔrɔmu masa Sensaari tɛ daa, walima ǹʼfu kì? › »

¹⁸ Yesu wuru kí ciiru daalinŋ ki tɔ-a, niŋ ki ra, ntiŋ tu kí tɛ : « Ábɛɛ wulufuulibitɔnŋ kari, nfɛnŋ na ábɛɛ i míŋ tɔnsunpa-ri?

¹⁹ Ábɛɛ i ɲinisa ki sali-la jalinŋ wɔ̀ wu, á niŋ bɛɛ ji míŋ wu. » Kí i wari peeraŋ tenŋ ji ntiŋ wu.

²⁰ Ntiŋ i kí ranɔri tu : « Nkɛnŋ miniŋ fa ntiŋ tɔ ka wari ka sun? »

²¹ Kí tu : « Masa Sensaari. » Yesu tu : « A niŋ ji-i, á masa ki wɔ ki wɔri masa ki tɛ, á i Kirinŋ wɔ ki wɔri Kirinŋ tɛ. »

²² Kí niŋ wulu ki rama-i waarinŋ wɔ̀ ru, niŋ i bo kí tɔnŋ sun, kí i Yesu tu nmaŋ, kí i tiri.

Konkwuu kiri ŋmɛnibi ki

²³ Sadusiyɛnŋ kiri wuru kpeeri i, nwɔ̀ri bili-li konkwuu kiri ŋmɛnibi ki ra kì. Nini bɛɛ ri i arì kpari Yesu tɛ, kí i ntiŋ nanɔri :

²⁴ « Kalimɔɔ, Kirinŋ wɔ cintɔnŋ Musa ǹʼsɛbɛ tu-i sariya sɛbɛ ki ru yibɛɛ tɛ tu : ‹ A shuru mari cɛn, ntiŋ i beeni daŋ kilabali awɔ mari ki ra, tu ntiŋ pwaŋ ki kakan niŋ i mari ki shi, nwɔma ciniŋ i kila a wɔrinŋ ki ra.  ›

²⁵ Nka, yibɛɛ gbɛ, tindaŋ jɔnpɔni wuru yibɛɛ kanfɛ, kí ru cɛɛnni ki i na mari bɛɛ cɛn, niŋ i na beeni, niŋ i daŋ kila mari ki ra kì, ntiŋ pwaŋ ki i mari ki kila.

²⁶ Tindaŋ fuluntɔnŋ ki wɔ ki i ji mìŋ ɲaan tenŋ ki tɛ, ŋì i bo ǹʼbyantɔnŋ ki sun, fɔ ŋì i ta so tindaŋ jɔnpɔnɔtɔnŋ ki sun.

²⁷ Kíbɛɛ bataa beenimaan ki kɔɔtɛ, mari ki yɛrima ki i na beeni.

²⁸ Niŋ ɲaan ki tɛ, a konkwuu kiri na ŋmɛni, mari ki a na ji nkɛnŋ wɔ ka koŋ jɔnpɔni ka ru? Sabu kí fɔn bataa ǹʼkila de-i arɔɔ mari i. »

²⁹ Yesu i kí rupwulu tu : « Ábɛɛ fɔni-i, sabu ábɛɛ Kirinŋ wɔ sɛbɛ ki ru wulu ki tɔ-a kì, á dumiŋ ǹʼwɔ sotinbi ki tɔ-a kì.

³⁰ Niŋ ji-i kì, a konaŋ kiri na ŋmɛni, shuru ri fa mari ri arìmaŋ cɛn-a kili kì, kɔ́ɔ́ ɲaninkulutɔnbi ki i ji-a miŋ tu kirinpɔlila mɛlɛkɛn ni.

³¹ Nwɔ̀ i konkwuu kiri ŋmɛnibi ki i, ábɛɛ ka mani ka kali ja Kirinŋ wɔ wulu sɛbɛ ki ru sun kì wa? Kirinŋ tu ábɛɛ tɛ tu :

³² ‹ Míŋ i Aburahamu wɔ Kirinŋ ki i, ŋí i ji Ishaka wɔ Kirinŋ ki i, niŋ fa Yakuba wɔ Kirinŋ ki i.  › Niŋ i ǹʼji-a tu Kirinŋ konkwuu kiri wɔ Kirinŋ i kì, duu ɲaninkulutɔnŋ ni wɔ. »

³³ Koŋ finŋ woo finŋ niŋ wulu kiri rama-i, Yesu wɔ kalintanka ɲaan ki i bo kí bataa tɔnŋ sun.

Sariya kiri bataa ru sinaŋ ki bi ki

³⁴ Farinsiyɛnŋ kiri na-i ǹʼtɔ tu Yesu wulu kɔ Sadusiyɛnŋ kiri daru waarinŋ wɔ̀ ru, nini i arì rakɔli na.

³⁵ Sariya kalimɔɔ sinaŋ bɛɛ wuru kí ru, niŋ i ji ǹʼtɛ á i Yesu kɔrɔbɔ, niŋ i ntiŋ nanɔri tu :

³⁶ « Kalimɔɔ, sariya kiri bataa ru sinaŋ ki ǹʼdanwɔ? »

³⁷ Yesu i ntiŋ nupwulu tu : « NʼŊuntiŋ Kirinŋ ki bidi nʼtɛ, nʼciiru ki bataa wu, nʼɲini ki bataa wu, niŋ fa nʼɲakili ki bataa wu.

³⁸ Sariya kiri ru jɔnɔ ki fa yìrì ru sinaŋ ki i niŋ i.

³⁹ Sariya fuluntɔnŋ i nmaŋ, nwɔ̀ fa ǹʼjɔnɔ ki po-i, niŋ tu : ‹ Nʼkaashi ki bidi nʼtɛ miŋ tu nʼyɛrima ki. ›

⁴⁰ Sariya ki pyɛ ki bataa fa cintɔnŋ kiri wɔ kalinŋ ki bataa i kila-a ka sariya fuuli ka ru. »

Kirisa fa Dawuda bi ki

⁴¹ Ŋì i Farinsiyɛnŋ kiri rakɔlimaan ki tu, Yesu i kí ranɔri tu :

⁴² « Ábɛɛ nfɛnŋ bi-a Kirinŋ Ɲaannakonshimaan ki bi sun? Ábɛɛ ɲaanna tu nkɛnŋ nupo i? » Kí tu : «  Masa Dawuda nupo yɛ. »

⁴³ Yesu tu kí tɛ : « A niŋ ji-i, nfɛnŋ na, Ɲiniwɔlinŋ ki baraka ra, Dawuda i Kirinŋ Ɲaannakonshimaan ki dɔri tu a Ŋuntiŋ? Sabu Dawuda tu :

⁴⁴ ‹ Ŋuntiŋ Kirinŋ ǹʼbi-i míŋ Ŋuntiŋ ki tɛ tu : “Na sɔɔ ńʼpantɛ, fɔ míŋ na miŋ ɲa kiri pa de nʼkanŋ fɛ waarinŋ wɔ̀ ru.” ›

⁴⁵ A Masa Dawuda ji Kirinŋ Ɲaannakonshimaan ki dɔri a Ŋuntiŋ, ntiŋ a so ji-i ntiŋ nupo o dɔɔkunŋ? »

⁴⁶ Koŋ tɔri tenŋ so ntiŋ wɔ wulu ki rupwuluka kila-i kì, niŋ na, ŋì i shi niŋ shikaŋ sun, koŋ tɔri jɛɛn ntiŋ i Yesu ranɔri kili kì.