Matiyu 21 - Jɔ Biibili ki

Yesu de bi ki Yerusalɛmu kili ki ru

¹ Yesu fa a cɛfantɔnŋ kiri i ta myɛ Yerusalɛmu tɛ, kí i ta so Olinfyetɔnŋ ki sun, Bɛtifagɛ kili ki tɔntɛ. Yesu i awɔ kalindaŋ koŋ fuuli cin ta arì jɛŋ.

² Ntiŋ tu kí tɛ : « Á tiri á jɛŋ kili ka ra. Ábɛɛ ra ta sufaniŋ ɲiŋ bɛɛ kɔli ja, ǹʼdaŋ bulinŋ ki i ji ǹʼkankantɛ. Á i yìrì pili, á i na yìrì wu kwumaŋ.

³ A koŋ ta ábɛɛ ranɔri, á i ǹʼbi ntiŋ tɛ tu Ŋuntiŋ ki maku yìrì ra. A niŋ ma, ntiŋ a yìrì tu ábɛɛ gbɛ shuu. »

⁴ Niŋ ma-i, nwɔma Kirinŋ wɔ cintɔnŋ ki wɔ wulu ki i ǹʼnafaa tu :

⁵ « Á ǹʼbi Siyɔntɔnŋ kiri tɛ tu : Á ǹʼshɛɛli, ábɔɔ masa ki yirira i á tɛ, ǹʼfaa sunjɛribi ki ra, ǹʼtunpamaan yɛ sufaniŋ kpirinŋ sun, sufaniŋ daŋ i, sufaniŋ daŋ bulinŋ i. »

⁶ Kalindaŋ kiri i tiri niŋ ɲaan ki tɛ, Yesu ǹʼbi wuru kí tɛ ɲaan wɔ̀ tɛ, kí i ta ǹʼma mìŋ ɲaan ki tɛ.

⁷ Kí i na sufaniŋ ɲiŋ ki fa a daŋ ki wu Yesu tɛ. Kí i arɔɔ juulinŋ kiri san bili yìrì bwɔ sun, Yesu i tunpa sɔɔ nini sun.

⁸ Konaŋ kiri ru, koŋ mwɔɔnna i arɔɔ juulinŋ kiri bili saa ki sun Yesu jɛŋ, ǹʼtɔri ri i jirinŋ da ri yali bo-ri saa ki sun.

⁹ Konaŋ kiri bɛɛ ri wuru Yesu jɛŋ, ǹʼtɔri ri i ji ntiŋ kɔɔtɛ. Kí bataa i fali-li, kí i ǹʼbi-ri tu : « Yi baraka bi Kirinŋ tɛ, Dawuda Danshuru ki bira! Nwɔ̀ i na-a Ŋuntiŋ ki tɔ ra, Kirinŋ baraka de niŋ nu! Sobataatiŋ Kirinŋ gbɛ kirinpɔlila mani narimaŋ kiri ru. »

¹⁰ Yesu de-i Yerusalɛmu kili ki ru waarinŋ wɔ̀ ru, konaŋ ki bataa i jɔrɔkɔ tu arì kanŋ sun. Kí tu : « Ka a ji nkɛnŋ sa? »

¹¹ Konaŋ wɔ̀ri wuru Yesu cɛfan, nini i ǹʼbi-ri tu : « Yesu yɛ, cintɔnŋ wɔ̀ i po-a Nansarɛti kili ki ra, Galile sɔɔta ki ru. »

Jɔɔtantɔnŋ kiri kalikali po san bi ki Kirinfusinaŋ ki ru Yesu gbɛ

¹² Kí so-i Yerusalɛmu, ntiŋ i ta de Kirinfusinaŋ ki kaniŋ ki ru. Ntiŋ i jɔɔ tantɔnŋ kiri fa arɔɔ kusatɔnŋ kiri kalikali po san nmaŋ. Ntiŋ i wari rucinitɔnŋ kiri wɔ tabali kiri curu fɛɛn, ntiŋ i kilaaŋ jutɔnŋ kiri wɔ sɔɔfinŋ kiri curu fɛɛn.

¹³ Niŋ kɔɔtɛ, ntiŋ i ǹʼbi kí tɛ : « Ǹʼsɛbɛ-i Kirinŋ wɔ wulu sɛbɛ ki ru tu : ‹ Mɔ́ɔ́n fu ki a na dɔri tu Kirinŋ nafɛmaŋ i. › Nka ábɛɛ kɔniŋ ǹʼji-i kwunŋ ni nadumaŋ i. »

¹⁴ Ŋì i Yesu tu Kirinfusinaŋ ki ra, ɲaanfwuu bɛɛ ri fa bɔlɔma bɛɛ ri i na ntiŋ tɛ, ntiŋ i nini kene.

¹⁵ Kirinŋ tɛ sarakawɔrɔtɔnŋ kiri ŋununtiŋ kiri fa Sariya kalimɔɔ kiri Yesu wɔ botɔnsunbi mamaan kiri ja-i waarinŋ wɔ̀ ru, kí i ǹʼja tu tiraŋ kiri bataa fali-la Kirinfusinaŋ ki ru, kí i ǹʼbi-ri tu : « Nɔɔri bili Kirinŋ sun Dawuda danshuru ki bira! » Niŋ i kí tɔnfɔɔ.

¹⁶ Kí tu Yesu tɛ tu : « Tiraŋ kiri i nwɔ̀ bi-a, miŋ i niŋ nama-a kɛ! » Yesu i kí rupwulu tu : « Míŋ i ǹʼnama-a cɔ! Ábɛɛ tu dɔɔkunŋ? Ábɛɛ ka mani ka kali ja Kirinŋ wɔ wulu ki ru sun kì wa? Ǹʼbi-i tu Kirinŋ ǹʼbi tu afinŋ a a gbɛ wulu ki de tiraŋ kiri fa danjeelinŋ kiri fɔn daru.  »

¹⁷ Niŋ kɔɔtɛ, ntiŋ i kí tu nmaŋ, ntiŋ i po san kili ki ru, ntiŋ i tiri Bɛtani kili ki ra, ntiŋ i ta san niŋ mani nu.

Yesu wɔ shɔ jirinŋ danka bi ki

¹⁸ Niŋ sisarifuluntɔnŋ ki siira, kí pwulula ki Yerusalɛmu, bɛɛ i Yesu pa.

¹⁹ Ntiŋ i shɔ jirinŋ bɛɛ ja saa ki tɔnŋ na. Ntiŋ i ta ǹʼnashɛɛli, ntiŋ ta daŋ tenŋ kila ǹʼna kì, duu da cɔmaan gbansanŋ i. Ntiŋ i ǹʼbi shɔ jirinŋ ki tɛ : « Miŋ a daŋ pa fɛsɛfɛsɛ kili kì. » Mìŋ manaanŋ tenŋ ki ru, shɔ jirinŋ ki i furu.

²⁰ Ntiŋ wɔ kalindaŋ kiri i niŋ ja-i waarinŋ wɔ̀ ru, niŋ i bo kí tɔnŋ sun kusɛbɛ, kí i ǹʼbi-ri tu : « Ǹʼji dɔɔkunŋ, ka shɔ jirinŋ ka i furu manaanŋ tenŋ nu kɔɔn? »

²¹ Yesu tu kí tɛ tu : « Sɛli ki ra, míŋ a ǹʼbi ábɛɛ tɛ, ńʼtu, a ábɛɛ bilinabi ki ma, á sii sii fyewu kì, ńʼtu nwɔ̀ ma-i shɔ jirinŋ ki wu kaa, ńʼtu ábɛɛ ra niŋ bishi ri ma, niŋ bantenŋ i kì, ńʼtu hali ábɛɛ ǹʼbi tu ka tɔnŋ ka a cɛn san a ta ru, tu ŋì i ta a kee wɛɛlufinju ki ru, ńʼtu ŋì a ma ninkunŋ.

²² A ábɛɛ áwɔ Kirinŋ nafɛ ki tan bilinabi wu, ábɛɛ finŋ woo finŋ nafɛ, ábɛɛ ra ǹʼkila. »

Yesu wɔ sotinbi ki pomaŋ ki bi ki

²³ Yesu ta-i Kirinfusinaŋ ki ra, ntiŋ i konaŋ ki kali-li niŋ mani nu. Kirinŋ tɛ sarakawɔrɔtɔnŋ kiri ŋununtiŋ kiri fa Yawutu cɛɛnni kiri i arì kpari ntiŋ tɛ, kí i ntiŋ nanɔri tu : « Miŋ i bi wɔ̀ri ma-a, miŋ yìrì ma-a sotinbi danwɔ wu? Nkɛnŋ niŋ ma ki so ki wɔri miŋ tɛ? »

²⁴ Yesu i kí rupwulu tu : « Míŋ yɛri ki a ábɛɛ ranɔri finŋ tenŋ pe bi sun, a ábɛɛ ja ji niŋ nupwulu, sotinbi wɔ̀ i ncusun-a míŋ i ńʼwɔ bi kiri ma-ni, míŋ a kila ŋí i niŋ pomaŋ ki bi ábɛɛ tɛ. »

²⁵ Yesu tu : « Nkɛnŋ Wutɔnŋ Yuhana cin-ni tu ntiŋ konaŋ kiri wu? Kirinŋ daa konaŋ ni? » Niŋ na, kí i ǹʼbi arìmaŋ tɛ tu : « A yibɛɛ ǹʼbi tu Kirinŋ i, ntiŋ a yibɛɛ ranɔri tu nfɛnŋ na yibɛɛ bili Yuhana na kì.

²⁶ Nka, a yibɛɛ ǹʼbi tu konaŋ i, yibɛɛ ra yi mwu konaŋ ki wu kì, sabu konaŋ ki bataa gbɛ, Yuhana i Kirinŋ wɔ cintɔnŋ i. »

²⁷ Niŋ ɲaan ki tɛ, kí i ǹʼbi Yesu tɛ tu : « Yibɛɛ ǹʼtɔ kì. » Yesu i kí rupwulu sɛbɛ tu : « Niŋ na, konwɔtiŋ sotinbi ki wɔri-i, míŋ i bi kari ma-ni, míŋ yɛrima ki a niŋ ǹʼbi ábɛɛ tɛ kì. »

Yesu wulusuntalinŋ wɔ̀ bi-i danshuru fuuli bi ki sun

²⁸ Yesu tu : « Ábɛɛ nfɛnŋ bi-a ka mani ka sun? Danshuru fuuli wuru shuru bɛɛ gbɛ. Ntiŋ i ǹʼbi danshuru jɔnɔ ki tɛ tu : ‹ Míŋ danshuru, tiri baara ma ńʼwɔ ji ki ru jiŋ. ›

²⁹ Daŋ ki tu : ‹ Míŋ a ta kì. › Nka kɔɔtɛ, niŋ daŋ ki i na ntɔri bi, wú i tiri baara ki ma ji ki ru.

³⁰ Tiŋ ki i mìŋ wulu tenŋ ki bi danshuru fuluntɔnŋ ki tɛ. Niŋ tu : ‹ Míŋ ŋuntiŋ ki, míŋ a tiri. › Nka wú ta mani tɔri ru nmaŋ kì.

³¹ Ka daŋ fuuli kari ru, ǹʼdanwɔ ki arì tiŋ ki dintɛ bi ki ma sa? » Konaŋ kiri tu : « Danshuru jɔnɔ ki yɛ. » Yesu tu : « Sɛli ki ra, míŋ a ǹʼbi ábɛɛ tɛ, ńʼtu ɲinisarakɔlɔtɔnŋ kiri fa nankulunmari kiri ra ábɛɛ jɛnkwuru Kirinŋ wɔ Masabi ki ru.

³² Sabu Yuhana na-i telibi saa ki wu ábɛɛ kiri tɛ, ábɛɛ á tu á i bili ntiŋ na kì, nka ɲinisarakɔlɔtɔnŋ kiri fa nankulunmari kiri i ji bili ntiŋ na. Niŋ bataa jamaan ki kɔɔtɛ, ábɛɛ so ntɔri bi-i á i so bilinabi ma-i ntiŋ na kì. »

Baaramatɔnŋ juumaan kiri bi ki

³³ Yesu tu : « Á wulusuntalinŋ ka rama sɛbɛ : Koŋ bɛɛ ɛrɛnsɛnŋ ji bo-i, ntiŋ i ǹʼnakuuli. Ntiŋ i ta san, ntiŋ i ɛrɛnsɛnŋ ju sanmaŋ ki ramɔni, ntiŋ i nangbaalinŋ bwɔ ǹʼɲaannasuutɔnŋ kiri tɛ. Niŋ kɔɔtɛ, ntiŋ i ɛrɛnsɛnŋ ji ki wɔri bunsanŋ na baara matɔnŋ bɛɛ ri tɛ. Ntiŋ i tiri wɔru.

³⁴ Ɛrɛnsɛnŋ kilɛn waari ki na-i so, ntiŋ i awɔ joŋ kiri bo na ɛrɛnsɛnŋ ji ki baara matɔnŋ kari tɛ, tu kí awɔ ɛrɛnsɛnŋ kilɛn lu ki mwu na a tɛ.

³⁵ Ɛrɛnsɛnŋ ji baara matɔnŋ kiri i giri bo jitiŋ ki wɔ joŋ kiri sun, kí i joŋ tenŋ bwɔ, kí i tenŋ kilɛn, kí i ǹʼbyantɔnŋ ki jɛri kwɔ ra.

³⁶ Ɛrɛnsɛnŋ jitiŋ ki i joŋ tɔri ri bo na kí tɛ, nwɔ̀ri mwɔ wuru ǹʼjɔnɔ kiri wu. Ji ki baara matɔnŋ kiri i nini ji ǹʼjɔnɔ kiri sali.

³⁷ Jitiŋ ki rakɔɔra i a danshuru ki bo ta kí tɛ. Ntiŋ tu : ‹ Kí a ta niŋ gbɛ wo! ›

³⁸ Nka ɛrɛnsɛnŋ ji ki baara matɔnŋ kiri jitiŋ ki danshuru ki naanna ja-i waarinŋ wɔ̀ ru, kí i ǹʼbi arìmaŋ tɛ tu : ‹ Mìŋ ka i kanishitɔnŋ ki i, á na, yi wú kilɛn, nwɔma kani ki i ji yi wɔ. ›

³⁹ Niŋ na, kí i danshuru ki pa, kí i tiri ntiŋ wu ji ki kɔɔtɛ, kí i ntiŋ kilɛn. »

⁴⁰ Yesu tu : « Ábɛɛ cirasun, a ɛrɛnsɛnŋ jitiŋ ki ja na, ntiŋ a na nfɛnŋ ma ji ki baara matɔnŋ kari wu sa? »

⁴¹ Konaŋ ki tu : « Ntiŋ a na niŋ koŋ juumaan kiri kilɛn kilɛnka jɛ ra, ntiŋ i baara matɔnŋ tɔri ri ceeli bo ɛrɛnsɛnŋ ji ki ru, nwɔ̀ri ra so ntiŋ wɔ lu ki wɔri-i ntiŋ tɛ a wɔri waari ru. »

⁴² Yesu tu sɛbɛ : « Ábɛɛ ka mani ka kali Kirinŋ wɔ wulu sɛbɛ ki ru kì wa? Ǹʼbi-i tu : ‹ Fu tantɔnŋ kiri arì kaan-a kwɔ wɔ̀ tɛ, ninki ji-i fu ki nɔnkɔnŋ sun kwɔ shɔɔrinŋ ki i. Niŋ bi kiri bataa po-i Ŋuntiŋ ki ru, yìrì i ji botɔnsunbi ri yibɛɛ ɲaanna. › »

⁴³ Yesu tu : « Niŋ ki ra, míŋ a ǹʼbi ábɛɛ tɛ, ńʼtu Kirinŋ a awɔ Masabi ki po san ábɛɛ gbɛfɛ, ŋì i ǹʼwɔri shiya tɔri ri tɛ, nwɔ̀ri ra ǹʼdintɛ bi ki ma.

⁴⁴ [Niŋ ɲaan ki tɛ, a nwɔ̀tiŋ fɛɛn niŋ kwɔ ki sun, ntiŋ wɔ kiri ra yali yali. A niŋ kwɔ ki fɛɛn nwɔ̀tiŋ sun, ŋì a ntiŋ bɔrɔkɔ.] »

⁴⁵ Kirinŋ tɛ sarakawɔrɔtɔnŋ kiri ŋununtiŋ kiri fa Farinsiyɛnŋ kiri niŋ wulusuntalinŋ kiri rama-i waarinŋ wɔ̀ ru, kí i ǹʼtɔ tu Yesu yìrì bi-a arìbɛɛ bi sun.

⁴⁶ Kí i ji ǹʼtɛ arì i ntiŋ pa, nka kí i kɛni konaŋ ki jɛŋ, sabu konaŋ ki gbɛ, Yesu wuru Kirinŋ wɔ cintɔnŋ i.