Matiyu 17 - Jɔ Biibili ki

Yesu nɔɔri ki ji bi ki kalindaŋ kiri bɛɛ ri wu

¹ Sunŋ taanmani fwuudemaan kɔɔtɛ, Yesu i Pyɛɛri fa Yakuba niŋ fa a tindaŋ Yuhana dɔri, ntiŋ i ta kí wu tɔnŋ ŋmani bɛɛ sun arì cinŋ.

² Niŋ mani nu, ntiŋ ɲaanfɛ ki i rapwulu kíbɛɛ yɛri kiri ɲaanna, ntiŋ sunjuulinŋ kiri i fɔɔ pɛlipɛli, ntiŋ ɲaanfɛ ki i cucu-ri miŋ tu sunŋ sarinŋ.

³ Mìŋ manaanŋ tenŋ ki ru, kalindaŋ kiri i cintɔnŋ Musa fa cintɔnŋ Eli ja wulubi-a Yesu tɛ.

⁴ Pyɛɛri tu Yesu tɛ : « Ŋuntiŋ ki, yibɛɛ jimaan ki kwumaŋ, niŋ shɔ-i dɛ! A ábɛɛ á tu míŋ a juulinfu byaŋ tan, ábɔɔ tenŋ, Musa wɔ tenŋ, niŋ fa Eli wɔ tenŋ. »

⁵ Ŋì i Pyɛɛri tu wulu ki ra Yesu tɛ, loŋ bɛɛ i na kí sunla, niŋ wuru cucu-a. Kí i wulu bɛɛ rama, ŋì i po niŋ loŋ ki ru tu : « Ka i míŋ dintɛ Danshuru ki i, nwɔ̀ bidi-i míŋ tɛ haali, á á tɔɔnye ǹʼtɛ. »

⁶ Kalindaŋ kiri niŋ wulu ki rama-i waarinŋ wɔ̀ ru, kí kɛnika jɛ ki, kí bataa i fɛɛn, kí i arì ɲaannu kiri da fwuniŋ ki sun.

⁷ Nka Yesu i a kpari kí tɛ, ntiŋ i a gbɛ pa kí ra, ntiŋ tu : « Á fa kɛni kì, á jɔrɔkɔ. »

⁸ Kí arì ŋuniŋ kiri fɛshi-i, kí koŋ tɔri ja Yesu fan kili kì.

⁹ Kí ji-i jɛri po-a tɔnŋ ki ru, Yesu i ǹʼbi furu kí tɛ tu : « Ábɛɛ jafinŋ wɔ̀ ja-i, á fa niŋ bi koŋ tɛ sun kì, sana Koŋ Danshuru ki i na ŋmɛni po san konkwuu kiri kanfɛ. »

Kalindaŋ kiri wɔ Yesu ranɔri bi ki Eli bi sun

¹⁰ Yesu wɔ kalindaŋ kiri i ntiŋ nanɔri tu : « Nfɛnŋ na, sariya kalimɔɔ kiri i ǹʼbi-ri tu Eli kakan ntiŋ i na sun? »

¹¹ Yesu i kí rupwulu tu : « Sɛli yɛ, Eli kakan-i ntiŋ i na, ntiŋ i na finŋ bataa ramɔni sɔɔ a ɲaan tɛ sun.

¹² Nka míŋ a ǹʼbi ábɛɛ tɛ, ńʼtu Eli na kɔ, nka konaŋ kiri ntiŋ tɔ kì, kí arì dintɛ bi ki ma-i ntiŋ wu. Mìŋ ɲaan tenŋ ki tɛ, kí a na Koŋ Danshuru ki makwulujuu. »

¹³ Niŋ ɲaan ki tɛ, ntiŋ wɔ kalindaŋ kiri i ǹʼtɔ tu ntiŋ Wutɔnŋ Yuhana wulu bi-a arìbɛɛ tɛ.

Yesu wɔ daŋ ɲinijɛtiŋ kene bi ki

¹⁴ Yesu fa awɔ kalindaŋ kiri na-i so konaŋ ki kankantɛ waarinŋ wɔ̀ ru, shuru bɛɛ i na a kwushiri ntiŋ fɛ, ntiŋ i ǹʼbi tu.

¹⁵ « Ŋuntiŋ ki, á ńʼdaŋ ki sunmakwulupa, kirinkirinsaa i bo-a wú ru, ŋì i wú cɔɔri-ra kusɛbɛ. Waaci kiri bɛɛ ri ru, wú i fɛɛn-na tuu ru, walima ju ru.

¹⁶ Míŋ na-i wú wu ábɔɔ kalindaŋ kiri tɛ, nka kí so wú kene-i kì. »

¹⁷ Yesu tu kí tɛ : « Ábɛɛ koŋ jɛ bilinabali kari, míŋ a tu ábɛɛ fan fɔ waarinŋ danwɔ ru? Míŋ a ábɔɔ bi kiri kwun ńʼnu, fɔ ŋì i ta so waaci danwɔ sun? Á na daŋ ki wu kwumaŋ. »

¹⁸ Yesu i jɛbi ɲinijɛ ki gbɛ, ŋì i po san weŋ ki ru, wú i kene mìŋ manaanŋ tenŋ ki ru.

¹⁹ Niŋ na, kalindaŋ kiri i arì kpari ntiŋ tɛ arì cinancinŋ, kí i ntiŋ nanɔri tu : « Nfɛnŋ na, yibɛɛ so ka ɲinijɛ ka kalikali-i kì? »

²⁰ Yesu i ǹʼbi kí tɛ tu : « Sabu ábɔɔ bilinabi ki rakuru-i. Sɛli ki ra, míŋ a ǹʼbi ábɛɛ tɛ, ńʼtu a ábɔɔ bilinabi ki gbɛka ki ji wuru so-ri hali mutaridi daŋ sali, ńʼtu ábɛɛ wuru-ra so ǹʼbi-i tɔnŋ ka tɛ tu : ‹ Jɔrɔkɔ san ka mani ka ru, ŋì i ta sɔɔ kaa keŋ ›, ńʼtu ǹʼwuru-ra ǹʼma. Ábɛɛ wuru-ra waa bi tɔri ra kì.

²¹ [Nka, ka ɲinijɛ kwuru ka so-a kalikali-i Kirinŋ nafɛ fa sunŋ de ciniŋ kì.] »

Yesu wulubi bi ki a beŋ ki fa a ŋmɛni bi sun sɛbɛ

²² Jibi bɛɛ, ŋì i kalindaŋ kiri bataa rakɔlimaan ki tu arìmaŋ fan, Galile sɔɔta ki ru, Yesu i ǹʼbi kí tɛ tu : « Koŋ Danshuru ki a pa, ntiŋ i wɔri konaŋ kiri tɛ.

²³ Kí a na ntiŋ kilɛn, nka ntiŋ beŋ ki sunŋ byantɔnŋ ki, ntiŋ a ŋmɛni. » Niŋ wulu ki i kalindaŋ kiri tɔnfɔɔ kusɛbɛ.

Kirinfusinaŋ ki ra jalinŋ sali bi ki

²⁴ Yesu fa awɔ kalindaŋ kiri so-i Kafarinawumu waarinŋ wɔ̀ ru, Kirinfusinaŋ ki ra jalinŋ nakɔlɔtɔnŋ kiri i ǹʼbi Pyɛɛri tɛ tu : « Ábɔɔ kalimɔɔ ki Kirinfusinaŋ ki wari ki sali-la kì wa? »

²⁵ Pyɛɛri i ǹʼnupwulu tu : « Aawe. » Pyɛɛri de-i fu ki ru waarinŋ wɔ̀ ru, Yesu jɔnɔ ki i wulu ki shi, ntiŋ i ǹʼbi tu : « Simɔŋ, miŋ ɲakilila ki ǹʼdanwɔ? Nkɛnŋ kakan ntiŋ i ɲinisa ki walima faan wari ki sali wɔri juniɲa ka ru masa kiri tɛ? Danji kiri daa, jɛ kiri? »

²⁶ Pyɛɛri tu : « Jɛ kiri. » Yesu tu : « Niŋ na, danji kanŋ niŋ nu kì dɛ! »

²⁷ Yesu tu sɛbɛ tu : « Nka, niŋ fa a fɔn na, nwɔma yi fa koŋ kari tɔnfɔɔ kì, tiri baa ki ru, ŋi i ta myɛɛnni ki bo, a miŋ ta yɛrinŋ jɔnɔ wɔ̀ pa, ŋi i niŋ daru ki ruwaa, miŋ a jalinŋ kila ǹʼdaru, nwɔ̀ a koŋ fuuli wɔ po, ŋi i ta niŋ wɔri jalinŋ nakɔlɔtɔnŋ kiri tɛ, míŋ fa mɔɔn. »