Matiyu 14 - Jɔ Biibili ki

Wutɔnŋ Yuhana beŋ ki bi ki

¹ Niŋ waaci ki ru, Ɛrɔdi Antipasi, ninwɔ̀ wuru Galile ŋununu, niŋ i na Yesu wulu ki rama.

² Ntiŋ tu a tɛ baara matɔnŋ kiri tɛ : « Wutɔnŋ Yuhana pwulu namaan yɛ, ntiŋ ŋmɛni po-i konkwuu kiri ru, ninki i ncin-a, ntiŋ i botɔnsunbi kiri ma-ni ka ɲaan ka tɛ. »

³ Sɛli yɛ, Ɛrɔdi Wutɔnŋ Yuhana pa kɔli bo wuru nkasu ru. Ntiŋ niŋ ma wuru a pwaŋ Filipu wɔ mari Ɛrɔdiyadi bira.

⁴ Sabu Wutɔnŋ Yuhana wuru tu-a ntiŋ i ǹʼbi-ri Ɛrɔdi tɛ tu : « Ǹʼfu miŋ i ka mari ka cɛn kì. »

⁵ Niŋ na, Ɛrɔdi wuru ǹʼtɛ á i wutɔnŋ Yuhana kilɛn, nka ntiŋ wuru kɛni-na konaŋ kiri jɛŋ. Sabu konaŋ ki gbɛ, Yuhana wuru Kirinŋ wɔ cintɔnŋ i.

⁶ Nka, Ɛrɔdi ji jibi ki jirirakwunu ki na-i so, Ɛrɔdiyadi danmari ki i wɔshɛ masa ki wɔ jɛ namaan kiri ɲaanfɛ. Niŋ i di ntiŋ tɛ kusɛbɛ,

⁷ fɔ ntiŋ i a kɔni maannaanŋ ki tɛ tu, níŋ finŋ woo finŋ nafɛ afinŋ gbɛ, a ra niŋ bataa wɔri níŋ tɛ.

⁸ Maannaanŋ ki ɲiŋ ki i niŋ nuye, tu níŋ ǹʼbi masa ki tɛ tu : « Wutɔnŋ Yuhana ŋuniŋ ki wɔri ńʼtɛ kulu ciiru kwumaŋ. »

⁹ Niŋ wulu ki i furu masa ki sun kusɛbɛ. Nka miŋ tu ntiŋ a kɔni wuru awɔ koŋ dɔrimaan kiri ɲaanna, ntiŋ tu Yuhana ŋuniŋ ki wɔri níŋ tɛ.

¹⁰ Niŋ ɲaan ki tɛ, ntiŋ i koŋ bo ta Wutɔnŋ Yuhana ŋuniŋ ki kwuru nkasufu ki ru.

¹¹ Kí i Yuhana ŋuniŋ ki bo na kulu lu, kí i na ǹʼwɔri maannaanŋ ki tɛ, nínfinŋ i ta ǹʼwɔri a ɲiŋ ki tɛ.

¹² Wutɔnŋ Yuhana wɔ kalindaŋ kiri i na ntiŋ kwuu ki shi, kí i ta ǹʼye. Niŋ kɔɔtɛ, kí i ta niŋ ɲaanbi Yesu tɛ.

Yesu wɔ nufinŋ wɔri bi ki konaŋ ki tɛ

¹³ Yesu niŋ wulu ki rama-i waarinŋ wɔ̀ ru, ntiŋ i po san niŋ mani ki ru, ntiŋ i de buŋ bɛɛ ru, nwɔma a i ta jaŋ faninmwuŋ, a i amaŋ nari konaŋ ki ra. Konaŋ ki niŋ nama-i waarinŋ wɔ̀ ru, kí i po arɔɔ kili kiri ra arì kanŋ na, kí i ta ntiŋ cɛfan.

¹⁴ Yesu po san-i buŋ ki ru waarinŋ wɔ̀ ru, ntiŋ i konaŋ ki ja. Kí makwulu i ntiŋ pa, ntiŋ i kí ru kiratɔnŋ kiri kene.

¹⁵ Bilana ki na-i so, kalindaŋ kiri i arì kpari Yesu tɛ, kí i ǹʼbi ntiŋ tɛ : « Sunŋ ki kɔ-i kɔ, á saa wɔri konaŋ ki tɛ, kí i tiri tonfan kili kiri ra, kí i ta nufinŋ ceeli sa, sabu yibɛɛ i jaŋ faninmwuŋ kwumaŋ. »

¹⁶ Yesu i kí rupwulu tu : « Ǹʼso kí i ta mani tɔri ru kì, ábɛɛ yɛrima kiri nufinŋ wɔri kí tɛ. »

¹⁷ Kí tu ntiŋ tɛ : « Nufinŋ yibɛɛ gbɛ kwumaŋ, bwuru ŋuŋ taanŋ fa yɛrinŋ daŋ fuuli ciniŋ kì. »

¹⁸ Yesu tu : « Á nini wɔri ńʼtɛ kwumaŋ. »

¹⁹ Ntiŋ tu konaŋ ki sɔɔ sɔɔ ta ɲiŋ cɔ ki sun. Ntiŋ i bwuru ŋuŋ taanŋ ki fa yɛrinŋ daŋ fuuli ki shi, ntiŋ i a ŋuniŋ fɛshi kirinpɔlila, ntiŋ i baraka bi Kirinŋ tɛ, ntiŋ i bwuru ki rucɛn cɛn, ntiŋ i ǹʼwɔri kalindaŋ kiri tɛ, tu kí ǹʼlu konaŋ ki tɛ.

²⁰ Konaŋ ki bataa i nuŋ nu, kí i pyii. Kí i ǹʼpyɛ tumaan ki sɔɔ, kí i shɛɛrinŋ bwununfuuli faa.

²¹ Koŋ wɔ̀ri ka nufinŋ ka nu wuru-i, kí ru shuru kiri so wuru koŋ waa taanŋ (5.000) sun, mari kiri fa tiraŋ kiri nini nu kì.

Yesu tiri bi ki ju ki sun

²² Niŋ bi kiri mamaan ki kɔɔtɛ shuu, Yesu i ǹʼbi awɔ kalindaŋ kiri tɛ tu kí de buŋ ki ru, kí i tiri a jɛŋ baa ki kuŋ nu, tu afinŋ a saa ki wɔri-ri konaŋ ki tɛ.

²³ Konaŋ ki bataa pyɛ-i waarinŋ wɔ̀ ru, Yesu i tunpa tɔnŋ ki sun, ntiŋ i ta Kirinŋ nafɛ a cinancinŋ, fɔ cii ki i na so, ŋì i ntiŋ tenŋ tu nmaŋ.

²⁴ Niŋ waari ru, kalindaŋ kiri wuru buŋ wɔ̀ ru, niŋ maŋ nari wuru tankpiŋ ki ra kɔ. Niŋ mani nu, buŋ ki i waa-ri tiri-i jɛŋ, sabu faa ki wuru ǹʼŋununafu-a, jukwululuŋ kiri i ǹʼbwɔ-ri.

²⁵ Sisarimantɔnŋ ki sun, Yesu i tiri ta-ri ju ki sun awɔ kalindaŋ kiri maŋ ki ru.

²⁶ Kí ntiŋ ja-i tiri na-a ju ki sun arì tɛ, kí tɔnŋ i cɛn, kí ǹʼbi tu konminiŋ i. Kɛmi i de kí ru, kí i kɛmi na yaalinpo-ri.

²⁷ Mìŋ manaanŋ tenŋ ki ru, Yesu i wulubi kí tɛ tu : « Á fa kɛni kì, MÍŊ YƐ, á á ɲakili ki sɔɔ tenŋ sun. »

²⁸ Pyɛɛri i ǹʼbi Yesu tɛ tu : « Ŋuntiŋ ki, a ábɛɛ ji-i ncinŋ, á ǹʼbi tu míŋ yɛrima ki tiri ta ábɛɛ tɛ ju ki sun. »

²⁹ Yesu i ǹʼbi ntiŋ tɛ tu : « Na. » Pyɛɛri i po san buŋ ki ru, ntiŋ i a bo tiri sun baa ju ki sun, ntiŋ i tiri-ri Yesu tɛ.

³⁰ Nka Pyɛɛri na-i ǹʼja tu faa ki gbɛka jitan, ntiŋ i kɛni. Ntiŋ i jɛri ki tɔnpa ju ki ru, niŋ na, ntiŋ i yaalinpo, ntiŋ i ǹʼbi tu : « Ŋuntiŋ ki, á ńʼmwu! »

³¹ Mìŋ manaanŋ tenŋ ki ru, Yesu i a gbɛ ki wɔri Pyɛɛri tɛ, ntiŋ i ntiŋ pa, ntiŋ tu : « Mɔɔn bilinabi ki kuru-i dɛ, nfɛnŋ na miŋ i sii? »

³² Kí de-i buŋ ki ru waarinŋ wɔ̀ ru, faa ki i tu.

³³ Koŋ wɔ̀ri wuru buŋ ki ru, nini i arì kwushiri, kí i Yesu gbɛ, kí i ǹʼbi tu : « Sɛli ki ra, ábɛɛ i Kirinŋ Danshuru ki yɛrima ki i. »

Konaŋ kiri kene bi ki Yesu gbɛ Genesarɛti kili ki ra

³⁴ Yesu fa awɔ kalindaŋ kiri baa ki fwuu-u, kí i de Genesarɛti sɔɔta ki ru.

³⁵ Niŋ mani nu tɔnŋ kiri i ntiŋ tɔ, kí i ǹʼsunjo arì tonfan kili kiri bataa ra. Kí i arɔɔ kiratɔnŋ kiri bataa po na ntiŋ tɛ.

³⁶ Kí i ntiŋ nafɛ, tu ntiŋ ncusun arì arì gbɛ pa bantenŋ tan a sunjuulinŋ ki tɔnŋ ki ra. Koŋ woo koŋ myɛ-ɛ niŋ na, niŋ bataa i kene.