Matiyu 12 - Jɔ Biibili ki

Nufaan jibi ki bi ki

¹ Niŋ waaci ki ru, Yesu fa awɔ kalindaŋ kiri wuru fwuude-a bilaŋ ji bɛɛ ru Nufaan jibi bɛɛ sun. Miŋ tu bɛɛ ki wuru kalindaŋ kiri wu, kí i arì bo bilaŋ kaarinŋ kiri bɛɛ ri yali sun, kí i yìrì daŋ ki taa-ri.

² Farinsiyɛnŋ kiri niŋ ja-i, kí i ǹʼbi Yesu tɛ tu : « Ǹʼshɛɛli, bi wɔ̀ fu Nufaan jibi ki sun kì, mɔɔn kalindaŋ kiri i niŋ ma-a! »

³ Yesu i kí rupwulu : « Waaci wɔ̀ ru, bɛɛ ki bo wuru Dawuda fa a cɛfantɔnŋ kiri sun, ntiŋ nwɔ̀ ma-i, ábɛɛ niŋ kali kì wa?

⁴ Dawuda de-i Kirinŋ wɔ fu ki ru, bwuru wɔ̀ri wɔri wuru saraka Kirinŋ tɛ, ntiŋ i ta nini bɛɛ shi nu, ntiŋ i ǹʼbɛɛ wɔri a cɛfantɔnŋ kiri tɛ sɛbɛ, niŋ i faa ǹʼdumiŋ fu-ri ntiŋ fa a cɛfantɔnŋ kiri i niŋ bwuru ki nu kì. Sabu koŋ tɔri tenŋ wuru niŋ bwuru ki nu-a Kirinŋ tɛ sarakawɔrɔtɔnŋ kiri kɔɔtɛ kì.

⁵ Walima ábɛɛ ǹʼkali sariya sɛbɛ ki ru tu, Kirinŋ tɛ sarakawɔrɔtɔnŋ kiri Nufaan jibi ki rufyɛ-a arɔɔ baara ki wu, Kirinfusinaŋ ki ru Nufaan jibi kiri bataa sun, tu kí i tu pɔlibali li kì wa?

⁶ Nka, míŋ a ǹʼbi ábɛɛ tɛ, ńʼtu nwɔ̀ i kwumaŋ, ńʼtu niŋ gbɛ Kirinfusinaŋ ki wu dɛ!

⁷ Kirinŋ tu : ‹ Á á kaashi ki sunmakwulupa, míŋ i ninki tɛ, ŋì i fwuu saraka sun. › A ábɛɛ ji wuru niŋ kɔri ki tɔ-ri, ábɛɛ wuru-ra kiti ki fɛɛn koŋ pɔlibali li sun kì.

⁸ Sabu Koŋ Danshuru ki i Nufaan jibi ki ŋununtiŋ i. »

Koŋ gbɛ tenŋ furumaantiŋ ki kene bi ki Yesu gbɛ

⁹ Yesu po-i niŋ mani ki ru, ntiŋ i ta Yawutu kiri wɔ kalinfu ki bɛɛ ru.

¹⁰ Koŋ bɛɛ wuru nmaŋ, nwɔ̀ gbɛ tenŋ furumaan wuru-i. Koŋ bɛɛ ri i Yesu ranɔri tu : « Ǹʼfu-i koŋ i kiratɔnŋ kene Nufaan jibi sun wa? » Kí wuru ntiŋ nanɔri-ra, nwɔma arì i pɔlimaŋ kila ntiŋ na.

¹¹ Nka Yesu i kí rupwulu tu : « Nkɛnŋ ábɛɛ ru, saa ɲiŋ tenŋ pe i ji ntiŋ gbɛ, a niŋ saa ki fɛɛn ta cuumaan nu Nufaan jibi ki sun, tu nintiŋ a ǹʼpo san ta ki ru kì?

¹² Konaŋ dumiŋ ji pari saa wu ji! Niŋ ki ra, bi shɔɔrinŋ ma ki fu-i Nufaan jibi ki sun kusɛbɛ. »

¹³ Niŋ na, ntiŋ i ǹʼbi weŋ ki tɛ tu : « Nʼgbɛ ki rusɛni! » Wú i ǹʼnusɛni, gbɛ ki i kene ji a kaashi ki sali.

¹⁴ Farinsiyɛnŋ kiri i po tiri arì manja, nwɔma arì i Yesu kilɛnka ɲaan ki ɲaan ceeli.

Kirinŋ wɔ baara matɔnŋ ɲaannashimaan ki bi ki

¹⁵ Yesu ǹʼtɔ-i waarinŋ wɔ̀ ru tu kí afinŋ kilɛnmaŋ ceeli-la, ntiŋ i po san niŋ mani ki ru. Koŋ mwɔɔnna i ǹʼpa ntiŋ cɛfan, ntiŋ i kiratɔnŋ kiri bataa kene.

¹⁶ Nka, ntiŋ i ǹʼbi furu kí tɛ tu : « Míŋ i koŋ wɔ̀, á fa niŋ bi koŋ tɛ kì. »

¹⁷ Ntiŋ niŋ bi-i, nwɔma Kirinŋ wɔ cintɔnŋ Esayi wulu wɔ̀ bi-i, niŋ i ǹʼnafaa tu :

¹⁸ « Mɔ́ɔ́n baara matɔnŋ ki i kaa, míŋ nwɔ̀ ɲaannashi-i. Ntiŋ bidi-i míŋ tɛ haali, ntiŋ bi ki i míŋ ciirudi-a waarinŋ bataa ru. Míŋ a na ńʼƝini ki de ntiŋ nu, ntiŋ a na Kirinŋ wɔ telibi saa ki kilaka ɲaan ki sunjo shiya tɔri kiri tɛ.

¹⁹ Ntiŋ a na sɔsɔɔlinŋ tan-ni kì, ntiŋ a na fali-li koŋ sun kì, koŋ dumiŋ a na ntiŋ wulu lama-ni kiliwulinŋ fan kì.

²⁰ Ntiŋ a na ɲɔɔnni filɛkɛmaan ki pyɛ ki yali kì. Ntiŋ a na sifilɛn pirɛmaan ki pyɛ ki byi kì. Ntiŋ a tu ninki sun, fɔ telibi ki i na so kila mani ki bataa ru.

²¹ Shiya kiri ra na ntiŋ ji arì gbɛbilimaŋ i.  »

Yesu wɔ̀ faan ki pomaŋ ki bi ki

²² Niŋ kɔɔtɛ, kí i na ɲinijɛtiŋ bɛɛ wu Yesu tɛ, niŋ ɲaanfwuu wuru-i, niŋ fa ntiŋ i ji bubu. Yesu i niŋ koŋ ki kene, ntiŋ i so wulubi-i, ntiŋ i maannaja-ri.

²³ Niŋ botɔnsun i konaŋ ki bataa pa, kí i ǹʼbi-ri tu : « Ka koŋ ka fa ji Dawuda danshuru ki i kì dɛ? »

²⁴ Farinsiyɛnŋ kiri niŋ nama-i waarinŋ wɔ̀ ru, kí tu : « Koŋ ka i ɲinijɛ kiri kwɔ po san-a konaŋ kiri ru ɲinijɛ kiri ŋununtiŋ Bɛlinsebulu wɔ so ki wu. »

²⁵ Yesu wuru kí ciiru ɲakili ki tɔ-a, niŋ na, ntiŋ tu kí tɛ : « Kɛnindaŋ wɔ̀ri i arìmaŋ kari-ra, niŋ kɛniŋ ki a gwu. Kili walima kaniŋ wɔ̀ ru tɔnŋ ni fu kì, niŋ kili ki walima niŋ kaniŋ ki i gwu-a.

²⁶ A shitaanni ji awɔ kiri kwɔ-a, ǹʼyɔ a yɛri ki kari-ra. Niŋ na, ǹʼwɔ masabi ki ra tu a ta ru dɔɔkunŋ?

²⁷ A míŋ ji ɲinijɛ kiri kalikali-la Bɛlinsebulu wɔ so wu, ábɔɔ donpatiŋ kiri i arɔɔ kiri kalikali-li nkɛnŋ wɔ so wu gbɛ? Nini a jii wɔri ábɛɛ tɛ kì dɛ!

²⁸ Nka a míŋ dumiŋ ji ɲinijɛ kiri kalikali-la Kirinŋ Ɲini ki baraka ra, niŋ i ǹʼji-a tu Kirinŋ wɔ Masabi ki so ábɛɛ tɛ fɔ kwumaŋ.

²⁹ Koŋ a so de-i shurukoŋ wɔ fu ru, ŋi i ntiŋ gbɛfɛfinŋ kiri shi dɔɔkunŋ, niŋ i faa miŋ ntiŋ kɔli-i sun kì? A miŋ ntiŋ kɔli, miŋ a so ntiŋ gbɛfɛfinŋ kiri shi-i.

³⁰ Konwɔtiŋ míŋ wu kì, nintiŋ i míŋ ɲa a, konwɔtiŋ ye-a míŋ tɛ ǹʼnakɔli kì, nintiŋ i ǹʼjeɲe-a.

³¹ Niŋ ki ra, míŋ a ǹʼbi ábɛɛ tɛ, ńʼtu bijɛ kwuru ki bataa fa Kirinŋ tɔ li bi kwuru ki bataa ra tu konanmini tɛ, nka Ɲiniwɔlinŋ ki tɔ li bi ki a tu koŋ tɛ fɛsɛfɛsɛ kì.

³² Konwɔtiŋ Koŋ Danshuru ki tɔ ki li, niŋ bijɛ ki ra tu ntiŋ tɛ, nka konwɔtiŋ Ɲiniwɔlinŋ ki tɔ ki li, nintiŋ wɔ bijɛ ki ra tu ntiŋ tɛ ka juniɲa ka ru kì, ǹʼdumiŋ a tu ntiŋ tɛ lahara sɛbɛ kì.

Jirinŋ fa a daŋ bi ki

³³ Jirinŋ shɔɔrinŋ ki i daŋ shɔɔrinŋ ki pa-a, jirinŋ jɛ ki i daŋ jɛ ki pa-ri, sabu jirinŋ ki i tɔ-a a daŋ ki ra.

³⁴ Ábɛɛ fɔnfɔniŋ kari! Ábɛɛ ra so ji-i wulu shɔɔrinŋ bitɔnŋ ni á tɔnŋ na dɔɔkunŋ, ŋì i bijɛ ki faamaan ki tu ábɛɛ ciiru. Bi wɔ̀ faa koŋ cii ki ru, nʼtɔnŋ ki i ninki bi-a.

³⁵ Koŋ shɔɔrinŋ ki i bi shɔɔrinŋ ki po-a a ciiru, ntiŋ i ǹʼma-ni, koŋ jɛ ki i bijɛ ki po-ri a ciiru, ntiŋ i ǹʼma-ni.

³⁶ Míŋ a ǹʼbi ábɛɛ tɛ, ńʼtu konanmini wulu kulinŋ finŋ woo finŋ po a tɔnŋ ki ra, ńʼtu ntiŋ a ta nanɔri niŋ bataa sun kiti ki kwuru shikaŋ ki ru.

³⁷ Kirinŋ a ta ábɛɛ kiti, ŋì i kɛɲɛ á dariwulu kiri wu. Ábɛɛ yɛrima kiri dariwulu ki a ábɛɛ ji jiitiŋ ni i, á dariwulu ki i á ji koŋ pɔlimaantiŋ ni i, kiti ki i fɛɛn á sun. »

³⁸ Sariya kalimɔɔ kiri bɛɛ ri fa Farinsiyɛnŋ kiri bɛɛ ri i ǹʼbi Yesu tɛ tu : « Kalimɔɔ, yibɛɛ i ǹʼtɛ ábɛɛ i taanmashɛ ki bɛɛ ma yibɛɛ ɲaanna. »

³⁹ Yesu i kí rupwulu tu : « Jiintɔnŋ koŋ jɛ kari, niŋ fa Kirinŋ wulu sɔsɔtɔnŋ kari, tu taanmashɛ ma arì ɲaanna, taanmashɛ tɔri tenŋ a ma kí ɲaanna cintɔnŋ Yonasi wɔ taanmashɛ ki ciniŋ kì.

⁴⁰ Miŋ tu cintɔnŋ Yonasi sunŋ byaŋ fa cii byaŋ ma-i yɛrinŋ sinaŋ ki ciiru ɲaan wɔ̀ tɛ, mìŋ ɲaan tenŋ ki tɛ, Koŋ Danshuru ki a na sunŋ byaŋ fa cii byaŋ ma pwɔkulinŋ ki ciiru.

⁴¹ Kiti kwuru shikaŋ ki ru, Nininfɛtɔnŋ kiri ra na jɔrɔkɔ tu, kí i kiti ki fɛɛn jiintɔnŋ ki sun, sabu kíbɛɛ ntɔri bi-i arɔɔ bijɛ kiri ra, cintɔnŋ Yonasi wɔ Kirinŋ wɔ wulu sunjomaan ki bira, kí i arì pwulu Kirinŋ tɛ. Nka nwɔ̀ i kwumaŋ jiŋ, niŋ fwuu-u Yonasi sun.

⁴² Kiti kwuru shikaŋ ki ru, Saba masamari ki a na jɔrɔkɔ, nmari i kiti ki fɛɛn jiintɔnŋ ki sun, sabu mìŋ mari po-i juniɲa ki cɛtɛ, nmari i na Masa Solomani wɔ ɲakilitinbi wulu kiri ra ma, nka nwɔ̀ i kwumaŋ jiŋ, niŋ fwuu-u masa Solomani sun. »

Ɲinijɛ ki pwulu bi ki

⁴³ Yesu tu sɛbɛ tu : « A ɲinijɛ ki kalikali po san koŋ nu, ǹʼyɔ ta-a a maanni maanni jaŋ ki faninmwuŋ, ŋì i nufaanmaŋ ceeli-li, ŋì a rufaanmaŋ kila-a kì.

⁴⁴ A niŋ ma, ǹʼyɔ ǹʼbi-a a ciiru tu : ‹ Míŋ po-i ńʼwɔ mani wɔ̀ ru, míŋ a ńʼpwulu ta de niŋ mani nu. › Ŋì i a pwulu-la nintiŋ nu. A ǹʼna so niŋ mani nu, ŋì i na-a fa niŋ koŋ ki wu, miŋ tu fu shɔɔrinŋ nuwɔ ciiru sumaan.

⁴⁵ A niŋ ma, ŋì i ta-a ɲinijɛ jɔnpɔni tɔri ri dɔri bo a sun, nwɔ̀ri juu ǹʼyɛri ki wu. Yìrì i na-a de nintiŋ nu, yìrì i sɔɔ nmaŋ. Niŋ ɲaan ki tɛ, nintiŋ wɔ bi ɲaan kiri i kɛɛ-ra, ŋì i fwuu arì jɔnɔ ki sun. Jiintɔnŋ juumaan kiri wɔ ki a na ji mìŋ ɲaan tenŋ ki tɛ. »

Yesu tindaŋ sɛlɛsɛli kiri bi ki

⁴⁶ Ŋì i Yesu tu wulu ki bi-a konaŋ ki tɛ, ntiŋ ɲiŋ ki fa ntiŋ pwaŋ kiri i na tu tanŋ ki ra, kí i ji ǹʼtɛ arì i wulubi ntiŋ tɛ.

⁴⁷ Ǹʼbɛɛ i ǹʼbi Yesu tɛ tu : « Miŋ ɲiŋ ki fa miŋ pwaŋ kiri i tanŋ ki ra, kí i ǹʼtɛ arì i wulubi miŋ tɛ. »

⁴⁸ Nka Yesu i ntiŋ nupwulu tu : « Míŋ ɲiŋ ki fa míŋ pwaŋ kiri nkɛnŋ ni? »

⁴⁹ Ntiŋ i a gbɛ ki ji awɔ kalindaŋ kiri wu, ntiŋ i ǹʼbi tu : « Míŋ ɲiŋ ki fa míŋ pwaŋ kiri i kari i.

⁵⁰ Míŋ Tiŋ wɔ̀ i kirinpɔli ki ra, koŋ finŋ woo finŋ i niŋ dintɛ bi ki ma-a, nintiŋ i míŋ ɲiŋ ki fa ńʼpwanmari ki fa ǹʼshuru ki i. »