Matiyu 11 - Jɔ Biibili ki

Wutɔnŋ Yuhana wɔ kalindaŋ kiri cin bi ki Yesu tɛ

¹ Yesu kɔ-i niŋ nacinwulu kiri ra awɔ kalindaŋ bwununfuuli ki tɛ waarinŋ wɔ̀ ru, ntiŋ i po, ntiŋ i ta niŋ sɔɔta ki ru kili kiri ra, ntiŋ i ta konaŋ kiri kali-li, ntiŋ i Wulujii ki sunjo-ri kí tɛ.

² Niŋ waari ru, Wutɔnŋ Yuhana i tu nkasu ki ru, ntiŋ i Kirisa mabi kiri rakali wulu kiri rama-ni. Ntiŋ i awɔ kalindaŋ kiri bɛɛ ri cin Yesu ranɔri tu :

³ « Ǹʼbi-i tu koŋ wɔ̀ a na, miŋ i niŋ i daa, walima yi kakan yi i koŋ tɔri suu? »

⁴ Yesu tu kí tɛ : « Á á pwulu ta Yuhana tɛ, ábɛɛ i nwɔ̀ rama-a, á i nwɔ̀ ja-ri, á ta niŋ nakali, tu

⁵ ɲaanfwuu kiri maannaja-a, mwurunku kiri i tiri-ri, tuutiŋ kiri i kene-ni, tɔɔnkpilinŋ kiri i wulu lama-ni, konkwuu kiri i ŋmɛni-ni, niŋ fa tu Wulujii ki i sunjo-ri gbɛwɔ kiri tɛ,

⁶ tu konwɔtiŋ sii-ra míŋ na kì, nintiŋ i wɔ shɔ-i. »

⁷ Wutɔnŋ Yuhana wɔ kalindaŋ kiri arì pwulu-i waarinŋ wɔ̀ ru, Yesu i ntiŋ ɲaanbi-ri konaŋ ki tɛ, ntiŋ tu kí tɛ : « Ábɛɛ ta-ri nfɛnŋ shɛɛli jaŋ ki faninmwuŋ? Faa wɔ ɲɔɔnni nutimaanna wuru-i wa?

⁸ A niŋ ji-i kì, ábɛɛ ta-ri nfɛnŋ shɛɛli? Juulinŋ tɔtiŋ botɔnŋ wuru-i wa? Á ǹʼtɔ tu juulinŋ tɔtiŋ botɔnŋ kiri masafu ri ru dɛ!

⁹ Ábɛɛ ta-ri nfɛnŋ shɛɛli? Cintɔnŋ wuru-i wa? Aawe, sɛli ki ra, míŋ a ǹʼbi ábɛɛ tɛ, ńʼtu ntiŋ gbɛ cintɔnŋ wu.

¹⁰ Sabu ǹʼsɛbɛ-i Kirinŋ wɔ wulu ki ru mani wɔ̀ ru, tu Kirinŋ tu : ‹ Míŋ a na ńʼwɔ cintɔnŋ ki cin ta miŋ jɛŋ, ŋì i nʼwɔ saa ki ramɔni nʼjɛŋ ›, niŋ i Yuhana wulu bi-a.

¹¹ Sɛli ki ra, míŋ i ǹʼbi-a ábɛɛ tɛ, ńʼtu mari tɔri dantenŋ daŋ ji konanmini kiri kanfɛ, tu Wutɔnŋ Yuhana gbɛ nwɔ̀ wu kì. Nka niŋ fa a fɔn na, kirinpɔlila Masabi ki ru koŋ pyaanŋ ki gbɛ-i ntiŋ wu.

¹² Ŋì i shi Wutɔnŋ Yuhana wɔ baara ki tɔnpa ki waaci ki sun, ŋì i na so dɔnsaŋ sun, kirinpɔlila Masabi ki i ceeli-la faan sun, koŋ wɔ̀ri sunfuru-i, niŋ kiri i ǹʼkila-a.

¹³ Kirinŋ wɔ cintɔnŋ kiri bataa fa Musa wɔ sariya sɛbɛ kiri bataa wulubi-i Kirinŋ wɔ Masabi ki bi sun, fɔ ŋì i na so Wutɔnŋ Yuhana wɔ waaci ki sun.

¹⁴ A ábɛɛ ji bili niŋ wulu kiri ra, á ǹʼtɔ tu Eli wɔ̀ wulu wuru bi-a, tu ntiŋ a na, tu Yuhana niŋ koŋ ki i.

¹⁵ A wulu lama tɔɔn ji nwɔ̀tiŋ gbɛ, ntiŋ wulu lama.

¹⁶ Míŋ a jiintɔnŋ kiri fa nkɛnŋ ni pyi sa? Kí fa tiraŋ ni po-i, nwɔ̀ri sɔɔ-ɔ kili ki ru furuba sɔɔmaŋ nu, kí i arì wulu saan wɔri-ri arìmaŋ tɛ tu :

¹⁷ ‹ Yibɛɛ kpilaaŋ fyɛ-i ábɛɛ tɛ, ábɛɛ wɔshɛ kì. Yi i beŋ shupɔri á tɛ, á dumiŋ á makwuluye kì. ›

¹⁸ Sɛli ki ra, Yuhana na-i, ntiŋ wuru bilaŋ nu-a kì, ntiŋ dumiŋ wuru dunfɛnŋ mwunu-na kì, kí nfɛnŋ bi ntiŋ bi sun? Kí tu : ‹ Ɲinijɛ ri i wú ru. ›

¹⁹ Koŋ Danshuru ki na-i, niŋ i bilaŋ nu-ni, ntiŋ i mwunufinŋ mwunu-ni, ábɛɛ tu : ‹ Ka weŋ ka i lɔrutɛfɛ, wulatiŋ i, ɲinisarakɔlɔtiiri fa bijɛmatiiri wɔ wɔshuru yɛ. › Nka, ɲakilitinbi wɔ̀ po-i Kirinŋ nu, niŋ wɔ telibi ki i tɔ-a a mabi kiri ra. »

Bɔni wɔ̀ a kili kaanmaan kiri kila

²⁰ Yesu awɔ botɔnsunbi mwɔɔnna kiri ma wuru kili wɔ̀ri ra, ntiŋ i jɛbi ki tɔnpa nini gbɛ, sabu yìrì ru konaŋ kiri ntɔri bi-ri arɔɔ bijɛ kiri ra kì.

²¹ Ntiŋ tu : « Koransinitiiri, ŋì a juu ábɛɛ ra! Bɛtisayidatiiri, ŋì a juu ábɛɛ ra! Sabu kabakobi wɔ̀ri ma-i ábɛɛ tɛ, a nini ji wuru ma-ni Tiiri niŋ fa Sidɔnŋ kili kiri ra, niŋ kili kiri ru tɔnŋ kiri wuru-ra ji ntɔri bi arɔɔ bijɛ kiri ra kɔ. Kí sɔɔmaan wuru-ra ji fwuujuulinŋ ni wu arì sun pwulu lu.

²² Niŋ ki ra, míŋ a ǹʼbi ábɛɛ tɛ, ńʼtu Kirinŋ wɔ kiti kwuru ki shikaŋ ki ru, ńʼtu Tiiri fa Sidɔnŋ kili kiri ru tɔnŋ kiri wɔ kiti ki a na pari ábɔɔ ki wu.

²³ Ábɛɛ Kafarinawumutiiri, ábɛɛ ɲaanna tu ábɛɛ ra fɛshi fɔ á i so kirinpɔlila wa? Aayi dɛ! Ábɛɛ ra jɛri fɔ jaanama ki ciiru. Sabu botɔnsunbi wɔ̀ri ma-i ábɛɛ tɛ, a nini bishi ri ji wuru ma-ni Sodɔmu kili ki ra, ǹʼwuru-ra ji faa nmaŋ jiŋ.

²⁴ Niŋ ki ra, míŋ a ǹʼbi ábɛɛ tɛ, ńʼtu kiti kwuru shikaŋ ki ru, ńʼtu Sodɔmu sɔɔta ki ru tɔnŋ kiri wɔ kiti ki a na pari ábɔɔ ki wu. »

Yesu i ɲaanfɛfili ki wɔri-ra konanmini tɛ

²⁵ Niŋ waarinŋ ki ru, Yesu tu : « Míŋ Tiŋ, ábɛɛ wɔ̀ i kirinpɔli ki fa pwɔkulinŋ ki sun Ŋuntiŋ ki i, míŋ i baraka bi-a ábɛɛ tɛ, sabu ábɛɛ bi wɔ̀ri radu-i, ɲakilitiŋ kiri fa bitɔtɔnŋ kiri sun, ábɛɛ nini ji-i koŋ pyaanŋ kiri wu.

²⁶ Aawe, míŋ Tiŋ, ábɛɛ ǹʼma-i ninkunŋ, sabu ninki ji-i ábɛɛ dintɛ bi ki i. »

²⁷ Ntiŋ i ǹʼbi konaŋ ki tɛ tu : « Míŋ Tiŋ ki finŋ kiri bataa de-i míŋ gbɛfɛ. Koŋ tɔri tenŋ Danshuru ki tɔ-a kì, duu Tiŋ ki tenŋ pe. Tiŋ Kirinŋ i nwɔ̀, koŋ tɔri tenŋ niŋ tɔ-a kì, duu Danshuru ki tenŋ pe, niŋ fa Danshuru ki ji ǹʼtɛ a i kí ji konwɔtiŋ wu. »

²⁸ Yesu tu kí tɛ sɛbɛ : « Á na míŋ tɛ, ábɛɛ wɔ̀ri yɛli-i, shii ki pwun-i ábɛɛ wɔ̀ri sun, míŋ a nufaan wɔri ábɛɛ tɛ.

²⁹ Á míŋ yɛsunsuu ki tɔnŋ ki shi bili á yɛ sun, á i ncusun míŋ i á kini, sabu míŋ tɔnsunfili-i, ǹʼsunjɛrimaan i ji-i sɛbɛ. A ábɛɛ niŋ ma, ábɛɛ ra ɲaanfɛfili kila.

³⁰ Míŋ yɛsunsuu ki shimaŋ juu kì, niŋ fa mɔ́ɔ́n shii ki pwun kì. »