Matiyu 10 - Jɔ Biibili ki

Yesu wɔ kalindaŋ bwununfuuli ki bi ki

¹ Yesu awɔ kalindaŋ bwununfuuli ki dɔri-i, ntiŋ i so wɔri kí tɛ, nwɔma kí i so ɲinijɛ kiri kwɔ-i, kí i konaŋ kiri wɔ kira kwuru ki bataa fa kɔ́ɔ́ bɔlɔmabi kwuru kiri bataa kene.

² Ntiŋ wɔ cindaŋ bwununfuuli ki tɔ kiri i kari i. Ǹʼjɔnɔ ki : Simɔŋ, kí i nwɔ̀ dɔri-ra tu Pyɛɛri, niŋ fa a tindaŋ Andire, Yakuba niŋ fa a tindaŋ Yuhana, nini wɔ̀ri i Nsebede danshuru ri i,

³ Filipu fa Baritelemi, Toma fa ɲinisarakɔlɔtɔnŋ Matiyu, Alife danshuru Yakuba ni fa Tade,

⁴ Simɔŋ, nwɔ̀ wuru dɔri-ra tu Nselɔti, niŋ fa Yudasi Isikariyɔti, ninwɔ̀ a na Yesu janfa.

Yesu wɔ cindaŋ bwununfuuli ki cin bi ki

⁵ Yesu awɔ cindaŋ bwununfuuli kari cin-i, ntiŋ i kí bosaara ka racinwulu ka wu : « Á fa ta shiya tɔri ri tɛ kì, á fa ta Samari sɔɔta ki ru kili ki tɔri ra kì.

⁶ Isirayɛlidaŋ wɔ̀ri i miŋ tu saa fɔnimaan ni, á tiri niŋ kiri tɛ.

⁷ Á tirira ki, á ǹʼsunjo ta-ri konaŋ ki tɛ, tu kirinpɔlila Masabi ki myɛ kɔ.

⁸ Á i kiratɔnŋ kiri kene, á i konkwuu kiri ŋmɛni, á i tuutiŋ kiri wɔ tuu kiri kene, á i ɲinijɛtiŋ kiri wɔ ɲinijɛ kiri kwɔ po san kí ru. Ábɛɛ ǹʼkila-i ǹʼgbansanŋ i, á ǹʼwɔri ǹʼgbansanŋ i.

⁹ Á fa jalinŋ shi bo á gbɛ, miŋ tu sɛniŋ walima wari walima daɲa kì.

¹⁰ Á fa wɔru ta tɔtɔɔlinŋ shi kì, á fa jɛrɛbi fuluntɔnŋ shi kì, á fa kari shi kì, á dumiŋ fa tiribali shi kì, sabu cinŋ matɔnŋ ki kakan-i ntiŋ i awɔ nuŋ ki kila awɔ cinŋ ki ru.

¹¹ A ábɛɛ so kili wɔ̀ ra, kili pyaanŋ walima kili sinaŋ i, á koŋ shɔɔrinŋ ceeli, nwɔ̀ ra a tu ábɛɛ i jɛri a gbɛ. Á tu nintiŋ gbɛ, fɔ ŋì i ta so á po san jibi ki sun, niŋ kili ki ra.

¹² Á ji-a de niŋ kaniŋ ki sun, á coolinŋ tan tu : ‹ Kirinŋ ɲaanfɛfili wɔri á tɛ. ›

¹³ A niŋ kaniŋ sun tɔnŋ kiri arì tu ábɛɛ jɛri ki sun arì gbɛ, kí a ábɔɔ juba sanmaan ki kila, nka a kí arì kaan ábɛɛ jɛri ki sun arì gbɛ, ábɔɔ juba sanmaan ki ra a pwulu ábɛɛ sun.

¹⁴ A kaniŋ walima kili wɔ̀ a kaan ábɛɛ jɛri sun arì gbɛ, niŋ fa tu a ra a tɔɔnye ábɔɔ wulu ki tɛ kì, á ji-a po san niŋ kaniŋ ki walima niŋ kili ki ra, á á kanŋ kiri na fwuu ki tuntu bo niŋ mani nmaŋ, á i tiri.

¹⁵ Sɛli ki ra, míŋ a ǹʼbi ábɛɛ tɛ, ńʼtu kiti kwuru shikaŋ ki ru, ńʼtu Sodɔmu fa Gomɔri kili kiri ru tɔnŋ kiri wɔ kiti ki a na juu so niŋ kili ki wɔ ki tɛ kì. »

Cɔɔri na wɔ̀ kiri

¹⁶ Yesu tu : « Á ǹʼshɛɛli, míŋ i ábɛɛ cin ta-a miŋ tu saa ri ta-a kpalinŋ ni kanfɛ, á kɛrɛbi miŋ tu myɛɛn, á i ji miŋ tu kilaaŋ ni, áwɔ bi fa so koŋ sun kì.

¹⁷ Á á ɲakili tu á yɛri ra, sabu konaŋ kiri ra na ábɛɛ de kitikwurutɔnŋ kiri gbɛfɛ, kí i á bwɔ shɛnŋ na arɔɔ kalinfu kiri ru.

¹⁸ Kí a na ábɛɛ pa tiri faantiŋ ni fa masa ri tɛ, míŋ tɔ ki bira. Niŋ ki a na ji sababu, ábɛɛ i míŋ wulu bi nini fa shiya tɔri kiri tɛ.

¹⁹ A kí na ábɛɛ pa tiri faantiŋ kiri tɛ, á fa á ciirufɔni tu ábɛɛ ra ta nfɛnŋ wulu bi, niŋ fa tu á ra na ta ǹʼbi dɔɔkunŋ kì. Sabu, ábɛɛ ra na ta wulu wɔ̀ri bi, niŋ wulu kiri ra ta wɔri ábɛɛ tɛ, arì bi waaci ki yɛrima ki ru.

²⁰ Sabu ábɛɛ kiri ra na ta wulu ki bi kì, nka ábɛɛ Tiŋ ki ɲini ki ra na ta wulu ki bi-ri ábɛɛ tɔnŋ na.

²¹ Tindaŋ a na a tindanshi ki wɔri, tu kí ntiŋ kilɛn, tiŋ i a daŋ wɔri, tu ŋì kilɛn, daŋ ni i jɔrɔkɔ arì jifinŋ ni cɛfan, kí i kilɛn.

²² Konaŋ kiri ra na ábɛɛ bikwɔ arì sun, míŋ tɔ ki bira. Nka a konwɔtiŋ na a sunfuru, ntiŋ i so ǹʼdaŋ ki ra, Kirinŋ a nintiŋ mwu.

²³ A kí na ji ábɛɛ cɔɔri-ra kili ki bɛɛ ra, á bili tiri kili tɔri ra. Sɛli ki ra, míŋ a ǹʼbi ábɛɛ tɛ, tu ábɛɛ ra na Isirayɛli kili kiri bataa ramaanni kɔ, Koŋ Danshuru ki na ki jɛŋ kì.

²⁴ Kalindaŋ ki gbɛ awɔ kalimɔɔ wu kì, joŋ dumiŋ gbɛ-a a ŋuntiŋ wu kì.

²⁵ A kalindaŋ ki awɔ kalimɔɔ ki tumaŋ ki kila, niŋ i ntiŋ po-a. A joŋ ki a ŋuntiŋ ki tumaŋ ki kila, niŋ i ntiŋ po-a. A kí ji kanintiŋ ki dɔri tu Bɛlinsebulu, ninwɔ̀ i ɲinijɛ kiri ŋununtiŋ ki i, tɔ wɔ̀ a dɔri kanindaŋ kiri ra, niŋ a juu niŋ wu dɛ! »

Konaŋ kakan-i ŋì i kɛni nwɔ̀ jɛŋ

²⁶ Yesu tu : « Niŋ ki ra, á fa kɛni konaŋ kiri jɛŋ kì. Finŋ nadumaan ki tɔri ra na tu jibali kì, gonto tɔri tenŋ a tu tɔbali kì.

²⁷ A míŋ nwɔ̀ bi ábɛɛ tɛ mancinŋ nu, á niŋ sunjo konaŋ ki tɛ sunŋ sarinŋ tɛ, nwɔ̀ bi-i ábɛɛ tɛ wulu tɔtɔɔlaaŋ nu, á tunpa tanka sun, á i niŋ sunjo.

²⁸ Nwɔ̀ ri i firi ki bantenŋ kilɛn-a, kí dumiŋ so-a ɲini ki kilɛn-i kì, á fa kɛni nini jɛŋ kì. Nka, nwɔ̀ a so ábɛɛ firi ki fa á ɲini ki fɔn haliki-i jaanama ki ru, á kɛni niŋ jɛŋ.

²⁹ Ábɛɛ ɲaannaanŋ pyaanŋ fuuli ju-a tama tenŋ na kì wa? Nka, niŋ ɲaannaanŋ ki bɛɛ tenŋ fɛɛn-na fwuniŋ sun, ábɛɛ Tiŋ Kirinŋ nutɔbali kì.

³⁰ Nwɔ̀ i ábɛɛ ɛ, hali ábɛɛ ŋununshinŋ ki bataa tɔnŋ tɔmaan yɛ Kirinŋ gbɛ.

³¹ Niŋ ki ra, á fa kɛni kì, sabu ábɛɛ bi ki gbɛ-i Kirinŋ gbɛ, ŋì i fwuu ɲaannaanŋ mwɔɔnna kari bi sun. »

Ŋi i nʼkaan walima ŋi i ji Yesu tɛ

³² Yesu tu : « A konwɔtiŋ a tu ǹʼna konaŋ kiri ɲaanna, tu afinŋ mɔ́ɔ́n kalindaŋ i, míŋ yɛrima ki a na ńʼtu ǹʼna ńʼTiŋ Kirinŋ ɲaanfɛ, ninwɔ̀ i kirinpɔli ki ra, ńʼtu nintiŋ mɔ́ɔ́n.

³³ Nka, konwɔtiŋ ǹʼbi konaŋ kiri ɲaanna tu afinŋ míŋ tɔ-a kì, míŋ yɛrima ki a na ǹʼbi ńʼTiŋ ki ɲaanfɛ, ninwɔ̀ i kirinpɔli ki ra, ńʼtu míŋ nintiŋ tɔ-a kì. »

Konaŋ kiri kɔɔye bi ki arìmaŋ na Yesu bi ki sun

³⁴ Yesu tu : « Á fa npwulu-li tu míŋ na ɲaanfɛfili wu pwɔkulinŋ ki sun kì dɛ! Míŋ na ɲaanfɛfili wu kì, nka míŋ na-i baamwuru wu.

³⁵ Míŋ na-i tiŋ fa daŋ kɔɔye arìmaŋ na, ŋí i na danmari fa a ɲiŋ kɔɔye arìmaŋ na, ŋí i na mari fa a shinŋ ɲiŋ kɔɔye arìmaŋ na.

³⁶ Niŋ ɲaan ki tɛ, konaŋ kiri wɔ kanindaŋ kiri yɛrima kiri ra na ji kí ɲa kiri.

³⁷ Konwɔtiŋ a tiŋ walima a ɲiŋ bidi a tɛ ŋì i fwuu míŋ sun, nintiŋ a mɔ́ɔ́n kalindanbi shɔ kì. Konwɔtiŋ a danshuru walima a danmari bidi-i a tɛ ŋì i fwuu míŋ sun, nintiŋ a mɔ́ɔ́n kalindanbi shɔ sɛbɛ kì.

³⁸ Konwɔtiŋ a kpinkpisuu ki shi, ntiŋ i ǹʼpa míŋ cɛfan kì, nintiŋ a so ji-i mɔ́ɔ́n kalindaŋ i kì.

³⁹ Konwɔtiŋ i ǹʼtɛ a i a ɲini ki mwu, nintiŋ a bɔni ǹʼnu, nka konwɔtiŋ bɔni a ɲini ki ru míŋ bira, nintiŋ a ǹʼkila. »

Sali bi ki

⁴⁰ Yesu tu sɛbɛ : « Konwɔtiŋ i ábɛɛ paka shɔ-a, nintiŋ i míŋ paka shɔ-a mìnki i. Konwɔtiŋ i míŋ paka shɔ-a, Kirinŋ wɔ̀ míŋ cin-i, nintiŋ i niŋ paka shɔ-a.

⁴¹ Konwɔtiŋ i Kirinŋ wɔ cintɔnŋ ki bɛɛ paka shɔ-a, awɔ cintɔnbi ki bira, nintiŋ a cintɔnŋ ki wɔ sali ki bishi kila. Konwɔtiŋ i koŋ telimaan paka shɔ-a awɔ telibi ki bira, nintiŋ a koŋ telimaan ki wɔ sali ki bishi kila.

⁴² Sɛli ki ra, konwɔtiŋ i jaakilaŋ kaan tenŋ ju wɔri-ra mɔ́ɔ́n kalindaŋ pyaanŋ ka bɛɛ tɛ, ǹʼsababu ki i ji tu mɔ́ɔ́n kalindaŋ i, nintiŋ a tu niŋ sali ki kilabali kì. »