Luki 4 - Jɔ Biibili ki

Yesu so kila-i shitaanni wɔ kɔrɔbɔ bi ki sun

¹ Yesu faa wuru Ɲiniwɔlinŋ ki ra, ntiŋ i a pwulu yiri Yurudɛn baa ki tɔnŋ na. Ntiŋ i tiri jaŋ fan, Ɲiniwɔlinŋ ki i ntiŋ jɛnpa-ri awɔ bi kiri ra.

² Niŋ mani nu, shitaanni i ntiŋ kɔrɔbɔ, fɔ ŋì i ta so sunŋ yaafuuli sun. Ntiŋ nufinŋ bo a daru ka sunŋ yaafuuli ka ru kì. Sunŋ yaafuuli ki fwuudemaan ki kɔɔtɛ, bɛɛ ki i ntiŋ pa.

³ Shitaanni i ǹʼbi ntiŋ tɛ : « A miŋ ji Kirinŋ Danshuru ki i, ǹʼbi ka kwɔ ka tɛ, tu ŋì a rapwulu ji bwuru u. »

⁴ Yesu i ǹʼnupwulu : « Kirinŋ wɔ wulu sɛbɛ ki i nwɔ̀ bi-a, niŋ i kaa : Konaŋ nakili-la nufinŋ bantenŋ na kì. »

⁵ Niŋ kɔɔtɛ, shitaanni i tiri ntiŋ wu fɔ cuunŋ, ŋì i ta juniɲa ciiru kɛniŋ kiri bataa ji ntiŋ wu manaanŋ tenŋ nu,

⁶ ŋì i ǹʼbi ntiŋ tɛ : « Miŋ ɲaniŋ i kɛniŋ wɔ̀ri fa arì ciiru nafulu wɔ̀ri ra, míŋ a yìrì wɔri miŋ tɛ. Sabu nini bataa wɔri-i míŋ tɛ. Míŋ i so-a yìrì wɔri-i koŋ tɛ, nwɔ̀tiŋ bi di-i míŋ tɛ.

⁷ Niŋ na, a miŋ nʼkwushiri, ŋi i míŋ gbɛ, niŋ bataa ra ji mɔɔn ni. »

⁸ Yesu i ǹʼnupwulu : « Kirinŋ wɔ wulu sɛbɛ ki i nwɔ̀ bi-a, niŋ i kaa : ‹ NʼŊuntiŋ Kirinŋ gbɛ, ŋi i baara ma ǹʼtenŋ pe tɛ. ›  »

⁹ Shitaanni i Yesu jɛnpa ta sɛbɛ Yerusalɛmu, ŋì i ta ntiŋ wu Kirinfusinaŋ ki ŋununu, ŋì i ǹʼbi ntiŋ tɛ : « A miŋ ji Kirinŋ Danshuru ki i, tu ka mani ka ru, ŋi i see fɛɛn fwuniŋ sun.

¹⁰ Sabu ǹʼsɛbɛ-i Kirinŋ wɔ wulu sɛbɛ ki ru, tu Kirinŋ a na ǹʼbi awɔ mɛlɛkɛn kiri tɛ, tu yìrì miŋ ɲaannasuu.

¹¹ Niŋ fa tu yìrì ra na arì gbɛ cu miŋ fɛ, nwɔma miŋ kanŋ ki fa nakwuru kwɔ ra kì. »

¹² Yesu i ǹʼnupwulu : « Ǹʼbi-i Kirinŋ wɔ wulu sɛbɛ ki ru sɛbɛ : Fa nʼŊuntiŋ Kirinŋ kɔrɔbɔ kì. »

¹³ Shitaanni i Yesu kɔrɔbɔ ɲaan ki fɔn tɛ, ŋì i waa ntiŋ na, ŋì i a san ntiŋ tɔntɛ sun.

Yesu wɔ baara ki tɔnpa ki Galile

¹⁴ Yesu a pwulu ta-i Galile sɔɔta ki ru, Ɲiniwɔlinŋ ki wɔ so ki wu. Ntiŋ tɔ ki i niŋ sɔɔta ki bataa rapo.

¹⁵ Ntiŋ wuru konaŋ kiri kali-la Yawutu kiri wɔ kalinfu kiri ru. Koŋ bataa wuru ntiŋ gbɛ-a.

Nansarɛtitɔnŋ kiri arì kaan-a Yesu tɛ

¹⁶ Yesu ta-i Nansarɛti sɛbɛ, a rakili kili ki ra. Nufaan jibi ki so-i, ntiŋ i ta de Yawutu kiri wɔ kalinfu ki ru, miŋ tu ntiŋ dali wuru ntiŋ i ǹʼma-ni ɲaan wɔ̀ tɛ. Ntiŋ jɔrɔkɔ tu-i, tu a ra Kirinŋ wɔ wulu ki sɛbɛ ki kali.

¹⁷ Kirinŋ wɔ cintɔnŋ Esayi sɛbɛ wɔ̀ tan wuru-i, kí i niŋ wɔri ntiŋ tɛ. Ntiŋ i ǹʼnupili, ntiŋ wuru ǹʼtɛ, a i mani wɔ̀ kali, ntiŋ i niŋ kila. Ǹʼsɛbɛ wuru niŋ mani nu tu :

¹⁸ « Ŋuntiŋ Kirinŋ Ɲini ki i míŋ sun, sabu ŋì míŋ ɲaannashi-i, tu ŋí awɔ Wulujii ki bi gbɛwɔ kiri tɛ. Ŋì míŋ cin-i, tu ŋí i ǹʼsunjo, tu joŋ kiri wɔ jonbi ki a kɔ, ɲaanfwuu kiri i maannaja, ŋí i koŋ makwulujuumaan kiri mwu san arì yɛlitɔnŋ kiri wu, ŋí i kí bo arì yɛrɛtɛ,

¹⁹ ŋí i Ŋuntiŋ Kirinŋ wɔ shɔɔrinŋ ma jiri ki sunjo konaŋ ki tɛ. »

²⁰ Niŋ kɔɔtɛ, Yesu i sɛbɛ ki kwunu, ntiŋ i ǹʼwɔri kalinfu ki ru baara matɔnŋ ki tɛ, ntiŋ i ta sɔɔ. Koŋ finŋ woo finŋ wuru kalinfu ki ru, niŋ bataa i arì ɲaniŋ da tu ntiŋ na.

²¹ Niŋ na, ntiŋ i ǹʼbi kí tɛ : « Ábɛɛ Kirinŋ wɔ wulu wɔ̀ rama-i kaa dɔnsaŋ, niŋ cintɔnbi wulu ki rafaa-a jiŋ. »

²² Koŋ bataa wuru ntiŋ tɔ shɔɔrinŋ bi-a, niŋ fa konanbi wulu wɔ̀ wuru po-a ntiŋ tɔnŋ na, niŋ i bo-ri kí tɔnŋ sun, fɔ kí i ǹʼbi-ri : « Taa Yusufu danshuru ki i ji-i kili wa? »

²³ Ntiŋ i ǹʼbi kí tɛ : « Míŋ ǹʼtɔ-i, ábɛɛ ra wulusuntalinŋ wɔ̀ bi míŋ tɛ, niŋ i kaa : ‹ Janmatɔnŋ, nʼyɛrɛma ki kene. › Ábɛɛ ra na ǹʼbi míŋ tɛ sɛbɛ : ‹ Yibɛɛ ǹʼnama-i tu miŋ botɔnsunbi ri ma Kafarinawumu kili ki ru, nini bishi ma nʼyɛrɛma ki wɔ kili ki ra ni! › »

²⁴ Ntiŋ i ǹʼbi kí tɛ sɛbɛ : « Sɛli ki ra, Kirinŋ wɔ cintɔnŋ teennaanŋ paka shɔ-a awɔ kili la kì.

²⁵ Míŋ a ǹʼbi ábɛɛ tɛ, ńʼtu sɛli ki ra, Kirinŋ wɔ cintɔnŋ Eli wɔ sunŋ ki ra, furu ki tu-i, ŋì i jiri byaŋ fa ɲɛ taanmani ma Isirayɛli kɛniŋ ki ru, bɛɛ ki i de kɛniŋ ki bataa ru. Kanimari mwɔɔnna wuru Isirayɛli kɛniŋ ki ru.

²⁶ Niŋ fa a fɔn na, Eli cin nini tɔri tenŋ tɛ kì, nka ntiŋ cin ta-i kɛniŋ tɔri ru mari bɛɛ tɛ, nwɔ̀ wɔ shuru beeni wuru-i. Niŋ mari ki wuru po-a Sarɛpita kili ki ru, Sidɔnŋ sɔɔta ki ru.

²⁷ Tuutiŋ mwɔɔnna fani i ji wuru Isirayɛli kɛniŋ ki ru Kirinŋ wɔ cintɔnŋ Elinse wɔ sunŋ ki ra, nka ntiŋ ǹʼtɔri teennaanŋ kene kì, fɔ Naama wɔ̀ po-i Siri kɛniŋ ki ru. »

²⁸ Kalinfu ki ru konaŋ finŋ woo finŋ niŋ wulu kiri rama-i, nini bataa tɔnŋ i kwulu ntiŋ cɛfan.

²⁹ Kí i jɔrɔkɔ, kí i ntiŋ pa, kí i ntiŋ cɛɛn po kili ki kɔɔtɛ. Kili ki sɔɔ wuru tɔnŋ bɛɛ sun, kí i ta ntiŋ wu fɔ niŋ tɔnŋ ki ŋununfaninmwuŋ, tu arì ra ntiŋ curu fɛɛn niŋ kukuta ki ru.

³⁰ Nka Yesu i po kí gbɛkulu la, ntiŋ i tiri.

Yesu shuru ɲinijɛtiŋ bɛɛ kene-i

³¹ Yesu i ta Galile sɔɔta ki ru kili tɔri ra, nwɔ̀ tɔ ki i tu Kafarinawumu. Ntiŋ i konaŋ kiri kali-li Nufaan jibi kiri sun niŋ mani nu.

³² Ntiŋ wɔ koŋ kalika ɲaan ki wuru bo-a konaŋ kiri tɔnŋ sun, sabu baraka wuru ntiŋ wɔ kalinŋ ki ru.

³³ Jibi bɛɛ, shuru ɲinijɛtiŋ bɛɛ wuru kalinfu ki ru, niŋ i yaalinpo tu :

³⁴ « Heyi! Nansarɛtitɔnŋ kiri wɔ Yesu, nfɛnŋ yibɛɛ fa miŋ faninmwuŋ? Miŋ na-i yibɛɛ tu kɔ wa? Miŋ i nwɔ̀, míŋ niŋ tɔ-i, miŋ i Kirinŋ wɔ Cintɔnŋ Wɔlinŋ ki i. »

³⁵ Yesu i fali ɲinijɛ ki sun : « Nʼtɔnŋ ki rala, ŋi i po san weŋ ki ru! » Ɲinijɛ ki i weŋ ki fɛɛn kí kanfɛ, ŋì i po san wú ru, ŋì bi tɔri ma wú wu kili kì.

³⁶ Niŋ i bo konaŋ ki bataa tɔnŋ sun, fɔ kí i arìmaŋ nanɔri-ri : « Haan! Ka a wulu kwuru danwɔ? Ntiŋ i wulubi-a ɲinijɛ kiri tɛ sotinbi wu, tu yìrì po san koŋ nu, yìrì fani i po-ri ncinŋ. »

³⁷ Niŋ i ǹʼbɛɛ bo Yesu tɔ ki sun niŋ sɔɔta ki mani ki bataa ru.

Yesu kiratɔnŋ mwɔɔnna tɔri ri kene-i

³⁸ Yesu i po Yawutu kiri wɔ kalinfu ki ru, ntiŋ i ta Simɔŋ wɔ mani nu. Ntiŋ i ta fa Simɔŋ famari ki bili wu firikwulu la, nwɔ̀ juu wuru kusɛbɛ. Kí i Yesu rafɛ tu ntiŋ nmari shɛɛli.

³⁹ Yesu i a kpari, ntiŋ i a sunsan nmari ŋununu, ntiŋ i fali, ntiŋ i a kwɔɔn firikwulu ki sun, tu ŋì po san mari ki ru. Mìŋ manaanŋ tenŋ ki ru, firikwulu ki i kɔ, mari ki i jɔrɔkɔ, nmari i nufinŋ si kí tɛ.

⁴⁰ Sunfyiri ki sun, kiratɔnŋ wuru koŋ finŋ woo finŋ gbɛ, nini wuru na-a nini wu ntiŋ tɛ. Kiratɔnŋ kwuru ki fɔn wuru kí ru. Ntiŋ i á gbɛ bili niŋ kiratɔnŋ kiri fɔn tenŋ tenŋ sun, ntiŋ i kí kene.

⁴¹ Ɲinijɛ ri wuru po-a kiratɔnŋ mwɔɔnna nu, yìrì i yaalinpo-ri tu : « Miŋ i Kirinŋ Danshuru ki i. » Sabu, ɲinijɛ kiri wuru ǹʼtɔ-a tu Yesu Kirinŋ Ɲaannakonshimaan ki i, nka ntiŋ i fali, ntiŋ i a kwɔɔn yìrì sun, tu yìrì fa wulubi kì.

Yesu a cin ŋuŋ ki bi-i konaŋ ki tɛ

⁴² Si ki sari-i, Yesu i po tiri jaŋ fan, koŋ wuru mani wɔ̀ ru kì. Konaŋ kwuru kiri i jɔrɔkɔ, kí i ta ntiŋ ceeli. Kí ta-i ntiŋ ja waarinŋ wɔ̀ ru, kí wuru ǹʼtɛ, ntiŋ i a san arì tɔntɛ kili kì.

⁴³ Nka Yesu tu kí tɛ : « Míŋ kakan-i ŋí i ta Kirinŋ wɔ Masabi ki Wulujii ki sunjo kili tɔri ri ra sɛbɛ, sabu míŋ cin ŋuŋ ki i niŋ i. »

⁴⁴ Niŋ ɲaan ki tɛ, ntiŋ wuru Kirinŋ wɔ wulu ki sunjo de-a Yawutu kiri wɔ kalinfu kiri ru Yude sɔɔta ki ru.