Luki 3 - Jɔ Biibili ki

Wutɔnŋ Yuhana wɔ waajulu ki

¹ Masa sinaŋ Tibɛri wɔ faan ki jiri bwununtaantɔnŋ ki, Pɔnsi Pilati wuru Yude kɛniŋ ki ŋununtiŋ ki i. Ɛrɔdi i ji Galile kɛniŋ ki ŋununtiŋ ki i, wú tindaŋ Filipu i ji Iture niŋ fa Tarakoniti sɔɔta kiri ŋununtiŋ ki i. Lisaniyasi wuru Abilɛni sɔɔta ki ŋununu.

² Anasi fa Kayifu wuru niŋ waarinŋ ki ru Kirinŋ tɛ sarakawɔrɔtɔnŋ kiri ŋununtiŋ kiri i. Niŋ waaci ki ru, Kirinŋ Jakaliya danshuru Yuhana cin-i awɔ wulu ki wu. Yuhana wuru Yude, jaŋ fan.

³ Niŋ ki ra, Yuhana i tiri Yurudɛn baa tonfan mani kiri bataa ra. Ntiŋ wuru ǹʼsunjo-a konaŋ kiri tɛ tu kí ntɔri bi arɔɔ bijɛ mamaan kiri ra, kí i na Kirinŋ tɛ, kí i wu, nwɔma Kirinŋ i kɔ́ɔ́ bijɛ kiri tu kí tɛ.

⁴ Niŋ ma-i, miŋ tu ǹʼsɛbɛ-i Kirinŋ wɔ cintɔnŋ Esayi wɔ sɛbɛ ki ru ɲaan wɔ̀ tɛ tu : « Koŋ bɛɛ i fali-la jaŋ ki faninmwuŋ tu : ‹ Á Ŋuntiŋ ki wɔ saa ki ramɔni, á i ǹʼwɔ saa pyaanŋ kiri teli.

⁵ Kukuta kiri bataa ra na naye, tɔnŋ kiri fa tintiŋ kiri bataa ra na gwu kɛɲɛ. Saa kɛrimaan kiri bataa ra na teli, demaŋ jɛ kiri fɔn i ramɔni.

⁶ A niŋ ma, koŋ bataa ra na Kirinŋ wɔ koŋ mwuka ɲaan ki ja. › »

⁷ Jama wɔ̀ri wuru ta-a Yuhana tɛ, tu arì wu, ntiŋ wuru ǹʼbi-a nini tɛ : « Ábɛɛ fɔnfɔniŋ daŋ kari! Nkɛnŋ ábɛɛ racin á i bili po san-ni Kirinŋ wɔ tɔnkwulu naanna ki jɛŋ sa?

⁸ Á bi shɔɔrinŋ ni ma, nwɔ̀ri ra ǹʼji tu ábɛɛ ntɔri bi áwɔ bijɛ kiri ra. Á fa ǹʼsunu tu ábɛɛ Aburahamu daŋ ni i, tu niŋ a ábɛɛ mwu kì dɛ! Míŋ a ǹʼbi ábɛɛ tɛ, tu nupobi ki ji i, ńʼtu Kirinŋ a so kwɔ kari ji-i Aburahamu daŋ ni i.

⁹ Á á yɛri paka tɔ dɛ! Pulu ki fɛshi-i jirinŋ ki fa a kanaŋ ki kwurumaanna ki tɛ kɔ. Jirinŋ finŋ woo finŋ daŋ shɔɔrinŋ pa-a kì, niŋ bataa ra kwuru bo tuu ru. »

¹⁰ Jama ki wuru Yuhana nanɔri-ra : « Niŋ na, yibɛɛ kakan yi i nfɛnŋ ma? »

¹¹ Ntiŋ wuru kí rupwulu-la tu : « Jɛrɛbi fuuli i nwɔ̀ gbɛ, niŋ tenŋ wɔri ǹʼbali tɛ. Nufinŋ i nwɔ̀tiŋ gbɛ, niŋ niŋ nukila a fa nufinŋ bali ki bɛɛ tɛ. »

¹² Ɲinisarakɔlɔtɔnŋ kari fɔn wuru na-a Yuhana tɛ, tu arì wu. Nini i ntiŋ nanɔri tu : « Kalimɔɔ, yibɛɛ kakan yi i nfɛnŋ ma? »

¹³ Ntiŋ i kí rupwulu tu : « A jalinŋ tɔnŋ wɔ̀ bi ábɛɛ tɛ, á fa ǹʼtɔri mwu bo niŋ sun kì. »

¹⁴ Surudashi bɛɛ ri i Yuhana nanɔri : « Yibɛɛ ji? Yibɛɛ kakan yi i ǹʼdanwɔ ma? » Ntiŋ tu kí tɛ : « Á fa koŋ wɔ jalinŋ mwu san ntiŋ wu faan sun walima puru sun kì, á tu áwɔ sali ki sun. »

¹⁵ Konaŋ kiri wuru Kirinŋ Ɲaannakonshimaan ki na ki saarashɛɛli ki wɔ̀ tan-a, niŋ na, kí wuru arì ciiru kwuru-ra Yuhana sun, tu mìntiŋ ki a ji niŋ i.

¹⁶ Niŋ ki ra, Yuhana i ǹʼbi kí bataa tɛ : « Míŋ i ábɛɛ wu-a ju ra, nka koŋ bɛɛ yirira i nmaŋ, nwɔ̀ wɔ so ki gbɛ-i mɔ́ɔ́n ki wu, míŋ ŋuniŋ kuru-i niŋ wɔ kari yaa pilitɔnŋ i. Niŋ a na ábɛɛ wu Ɲiniwɔlinŋ ki fa tuu ra.

¹⁷ Ntiŋ wɔ finŋ numyɛɛn kɛrinŋ ki i ntiŋ gbɛɛra, ntiŋ a na bilanaŋ ki fa ǹʼkɛnŋ ki po san arìmaŋ nu awɔ kiniŋ ki ra. Ntiŋ a na bilanaŋ ki bo awɔ cinŋ ki ru, ntiŋ i ǹʼkɛnŋ ki bo tuu ru, tuu wɔ̀ byi-a kì. »

¹⁸ Yuhana konaŋ ki racin-i niŋ wulu ki bishi mwɔɔnna wu. Niŋ ɲaan ki tɛ, ntiŋ i Kirinŋ wɔ Wulujii ki bi kí tɛ.

¹⁹ Nka jibi bɛɛ, Yuhana i na jɛbi Ɛrɔdi Antipasi gbɛ, niŋ i kila, ntiŋ a tindaŋ Filipu wɔ mari Ɛrɔdiyadi mwu san wuru niŋ wu. Ntiŋ i níŋ ji awɔ mari i, niŋ fa, ŋì i bo ntiŋ wɔ bi kulinŋ mamaan mwɔɔnna tɔri ri sun.

²⁰ Ntiŋ i ǹʼbɛɛ bo awɔ bi kulinŋ mamaan ki sun sɛbɛ, ntiŋ i Yuhana pa bo nkasu ru.

Yesu wu bi ki Wutɔnŋ Yuhana gbɛ

²¹ Waarinŋ wɔ̀ ru, Yuhana bo-ri nkasu ki ru sun kì, konaŋ ki bataa wuru a wu-a ntiŋ gbɛ. Yesu yɛrima ki i na a wu. Yesu wumaan ki kɔɔtɛ, ntiŋ i a bo Kirinŋ nafɛ sun. Ntiŋ tu-i niŋ na, kirinpɔli ki i nawwulu.

²² Ɲiniwɔlinŋ ki i ji miŋ tu kilaaŋ fɔ, ŋì i jɛri ntiŋ sun. Wulu bɛɛ i po kirinpɔli ki ra, ŋì i ǹʼbi : « Miŋ i míŋ dintɛ Danshuru ki i. Miŋ bi ki gbɛ-i míŋ gbɛ haali. »

Yesu cunsaa ki

²³ Yesu jiri kɔniŋ fa byinŋ bishi kila-i waarinŋ wɔ̀ ru, ntiŋ i awɔ baara ki tɔnpa. Ŋì i kɛɲɛ konaŋ kiri wɔ ɲakilila ki wu, Yesu i Yusufu daŋ i. Yusufu i ji Eli daŋ i.

²⁴ Eli wuru Matati daŋ i, Matati i ji Lewi daŋ i. Lewi wuru Mɛlɛki daŋ i, Mɛlɛki i ji Yanayi daŋ i. Yanayi wuru Yusufu daŋ i,

²⁵ Yusufu i ji Matatiya daŋ i. Matatiya wuru Amɔsi daŋ i, Amɔsi i ji Nawumu daŋ i. Nawumu wuru Esili daŋ i, Esili i ji Nagayi daŋ i.

²⁶ Nagayi wuru Maati daŋ i, Maati i ji Matatiya daŋ i. Matatiya wuru Semeŋ daŋ i, Semeŋ i ji Yosɛki daŋ i. Yosɛki wuru Yoda daŋ i,

²⁷ Yoda i ji Yowanaŋ daŋ i. Yowanaŋ wuru Eresa daŋ i, Eresa i ji Nsorobabɛli daŋ i. Nsorobabɛli wuru Salatiyɛli daŋ i, Salatiyɛli i ji Nɛri daŋ i.

²⁸ Nɛri wuru Mɛlɛki daŋ i, Mɛlɛki i ji Adi daŋ i. Adi wuru Kosamu daŋ i, Kosamu i ji Elimadamu daŋ i. Elimadamu wuru Ɛri daŋ i,

²⁹ Ɛri i ji Yesu daŋ i. Niŋ Yesu tɔ ki wuru Eliyɛnsɛri daŋ i, Eliyɛnsɛri i ji Yoromu daŋ i. Yoromu wuru Matati daŋ i, Matati i ji Lewi daŋ i.

³⁰ Lewi wuru Simeyɔnŋ daŋ i, Simeyɔnŋ i ji Yuda daŋ i. Yuda wuru Yusufu daŋ i, Yusufu i ji Yonamu daŋ i. Yonamu wuru Eliyakimu daŋ i,

³¹ Eliyakimu i ji Mɛlɛya daŋ i. Mɛlɛya wuru Mɛna daŋ i, Mɛna i ji Matata daŋ i. Matata wuru Natamu daŋ i, Natamu i ji Dawuda daŋ i.

³² Dawuda wuru Yesayi daŋ i, Yesayi i ji Yobɛdi daŋ i. Yobɛdi wuru Boonsi daŋ i, Boonsi i ji Sala daŋ i. Sala wuru Naasɔn daŋ i,

³³ Naasɔn i ji Aminadabu daŋ i. Aminadabu wuru Adimini daŋ i, Adimini i ji Arini daŋ i. Arini wuru Ɛsirɔmu daŋ i, Ɛsirɔmu i ji Farɛsi daŋ i. Farɛsi wuru Yuda daŋ i,

³⁴ Yuda i ji Yakuba daŋ i. Yakuba wuru Ishaka daŋ i, Ishaka i ji Aburahamu daŋ i. Aburahamu wuru Teraki daŋ i, Teraki i ji Nahɔri daŋ i. Nahɔri wuru Seruku daŋ i,

³⁵ Seruku i ji Aragawu daŋ i. Aragawu wuru Falɛki daŋ i, Falɛki i ji Ebɛri daŋ i. Ebɛri wuru Sala daŋ i,

³⁶ Sala i ji Kayinamu daŋ i. Kayinamu wuru Arifasadi daŋ i, Arifasadi i ji Sɛmu daŋ i. Sɛmu wuru Nawu daŋ i, Nawu i ji Lemɛki daŋ i.

³⁷ Lemɛki wuru Matusala daŋ i, Matusala i ji Enɔki daŋ i. Enɔki wuru Yarɛti daŋ i, Yarɛti i ji Malɛlɛyɛli daŋ i. Malɛlɛyɛli wuru Kayinamu daŋ i,

³⁸ Kayinamu i ji Enɔsi daŋ i. Enɔsi wuru Sɛti daŋ i, Sɛti i ji Adama daŋ i. Adama i ji Kirinŋ daŋ i.