Galasitɔnŋ kiri 3 - Jɔ Biibili kiSariya ki walima bilinabi ki ( Ɔrɔmutɔnŋ kiri 4 ; 8.14–17 ) 1 Ábɛɛ Galasitɔnŋ kɛrɛbibali kari, nkɛnŋ ábɛɛ jɛnceeli sa? Yesu kpinkpi-i suu ki sun ŋuŋ wɔ̀ ra, míŋ niŋ fɔɔ ji-i ábɛɛ wu dɛ! 2 Míŋ ǹʼtɛ ŋí i ka bantenŋ tɔ ábɛɛ gbɛ, ábɛɛ Ɲiniwɔlinŋ ki kila-i sariya ki rasɔɔ ki baraka ra wa, walima áwɔ bilinabi Kirinŋ wɔ Wulujii ramamaan ki baraka ra? 3 Ábɛɛ niŋ kɛrɛbibalibi ki kila ninkunŋ dɔɔkunŋ, ábɛɛ bi wɔ̀ tɔnpa-i Ɲiniwɔlinŋ ki wɔ so ki wu, ábɛɛ i ǹʼtɛ á i niŋ nafaa á yɛri ki wɔ so wu wa? 4 Kirinŋ bi mwɔɔnna wɔ̀ ma-i ábɛɛ wu, niŋ bataa ji-i ǹʼgbansanŋ i wa? Nini bataa ra so ji-i ǹʼgbansanŋ ni i kì dɛ! 5 Kirinŋ Ɲiniwɔlinŋ ki wɔri-i ábɛɛ tɛ, ŋì i kabakobi kiri ma á faninmwuŋ waarinŋ wɔ̀ ru, ŋì niŋ ma wuru ábɔɔ sariya ki rasɔɔmaan ki baraka ra wa, walima áwɔ bilinabi ki Kirinŋ wɔ Wulujii ki ramamaan ki baraka ra? Aburahamu bi ki 6 Niŋ ɲaan ki tɛ, Kirinŋ wɔ wulu ki i ǹʼbi-a Aburahamu bi sun tu : « Ntiŋ bili-i Kirinŋ na, Kirinŋ i ntiŋ ji koŋ telimaan a a ɲaanfɛ, ntiŋ wɔ bilinabi ki baraka ra. » 7 Ábɛɛ ǹʼtɔ tu nwɔ̀ri bilinabi ki ma-i Kirinŋ na, tu nini Aburahamu nupo sɛlisɛli kiri i kì wa? 8 Kirinŋ wɔ wulu ki ǹʼjɛnbi-i, tu Kirinŋ a na shiya tɔri kiri ji koŋ telimaan ni i a ɲaanfɛ kɔ́ɔ́ bilinabi ki baraka ra. Niŋ ki ra, ŋì i ka Wulujii ka bi Aburahamu tɛ tu : « Shiya kiri bataa ra na baraka kila miŋ sababu ra. » 9 Aburahamu bili-i Kirinŋ na, ntiŋ i baraka kila. Mìŋ ɲaan tenŋ ki tɛ, koŋ finŋ woo finŋ bili Kirinŋ na, niŋ i baraka kila-a sɛbɛ. 10 Koŋ finŋ woo finŋ Musa wɔ sariya ki ji-i a gbɛbilimaŋ i, ǹʼyɔ niŋ bataa danka-a, sabu ǹʼbi-i Kirinŋ wɔ wulu ki ru tu : « Koŋ finŋ woo finŋ sariya ki bataa gbɛ-a kì, nintiŋ danka-i. » 11 Ayiwa, ǹʼfɔɔmaan yɛ tu koŋ tɔri tenŋ jii kila-a Kirinŋ gbɛ sariya ki baraka ra kì, sabu ǹʼsɛbɛ-i Kirinŋ wɔ wulu ki ru tu : « Koŋ telimaan ki i awɔ ɲaninkulutɔnbi ki ma-a bilinabi ki baraka ra. » 12 Sariya ki cɛ sɔɔ bilinabi sun kì, sabu ǹʼsɛbɛ-i Kirinŋ wɔ wulu ki ru tu : « Konwɔtiŋ sariya ki wɔ cinŋ bimaan kiri bataa ma-a, nintiŋ wɔ ɲaninkulutɔnbi ki i ma-a niŋ baraka ra. » 13 Kirisa yibɛɛ ŋunsan-i, nwɔma sariya ki wɔ danka ki fa fɛɛn yi sun kì. Niŋ fɛɛn-ɛ mìntiŋ sun yibɛɛ ta ru, sabu ǹʼsɛbɛ-i Kirinŋ wɔ wulu ki ru tu : « Koŋ kpinkpimaan suu sun ki i koŋ dankamaan a. » 14 Kirisa ǹʼma-i ninkunŋ, nwɔma Aburahamu Kirinŋ wɔ shɔɔrinŋ wɔ̀ kila-i, niŋ i so shiya tɔri kiri bataa sun Yesu Kirisa baraka ra, yi i Ɲiniwɔlinŋ ki kila, Kirinŋ ninwɔ̀ tɔnŋ wɔri-i yibɛɛ tɛ bilinabi ki baraka ra. Sariya ki fa tɔnwɔri ki bi ki 15 Ńʼtindaŋ ni, ŋì i kɛɲɛ konanmini wɔ bi maka ɲaan ki wu, a konwɔtiŋ a tɔnŋ wɔri, ntiŋ i wulubi sɔɔ, ntiŋ i shɛɛri ri ji ǹʼna, ntiŋ i taanshɛ bo ǹʼna, koŋ tɔri so-a niŋ tɔnŋ wɔri ki ru wulu ki li-i walima ntiŋ i ǹʼbɛɛ bo sun kì. 16 Mìŋ ɲaan ki tɛ, Kirinŋ a tɔnŋ wɔri wuru Aburahamu fa a nupo ki tɛ. Kirinŋ nupo mwɔɔnna wulu bi-ri kì, sabu ŋì i ǹʼbi-ri tu « ntiŋ fa a nupo ri » kì. Nka tu « ntiŋ fa a nupo ki. » Niŋ i ǹʼji-a tu Kirinŋ nupo tenŋ bantenŋ wulu bi-ri. Niŋ nupo ki i Kirisa. 17 Mɔ́ɔ́n wulu ki kɔri ki i kaa tu : Kirinŋ a tɔnŋ wɔri-i, ŋì i taanshɛ bo ǹʼna miŋ tu wulubi sɔɔmaan, sariya ki i na jiri jankɔli fa jiri kɔniŋ fa byinŋ (430) niŋ tɔnwɔri ki kɔɔtɛ. Niŋ sariya ki so-a niŋ tɔnwɔri ki ru wulu ki rapwulu-i, ŋì i ǹʼli kì. 18 Sabu Kirinŋ kani wɔ̀ wɔri-i, a niŋ ji wuru kila-ri sariya ki rasɔɔ bi ki baraka ra, niŋ wuru-ra so ji-i tɔnŋ wɔri ki mwɔɔn i kili kì, nka Kirinŋ ǹʼwɔri-i Aburahamu tɛ ǹʼmaan a, ŋì i kɛɲɛ awɔ tɔnwɔri ki wu. Sariya ki sɔɔ ŋuŋ ki 19 Niŋ ki ra, sariya ki sɔɔ ŋuŋ ki wuru ǹʼdanwɔ? Ǹʼsɔɔ Kirinŋ wɔ tɔnwɔri ki kɔɔtɛ, nwɔma a i konanmini kiri wɔ Kirinŋ wulu sɔsɔ bi kiri ji kí wu. Ǹʼkakan wuru-i ŋì i tu nmaŋ, fɔ tɔnwɔri ki tan wuru Aburahamu nupo wɔ̀ bi sun, fɔ niŋ i na. Niŋ sariya ki na-i mɛlɛkɛn ni gbɛfɛ, konanmini gbɛ saa fan, ninwɔ̀ i Musa. 20 A ǹʼbi tu gbɛ saa fan, niŋ i ǹʼbi-a tu wɔrɔtɔnŋ ǹʼna, nka Kirinŋ i tenŋ i, ǹʼmaku koŋ na a fa Aburahamu faninmwuŋ awɔ tɔnwɔri ki ru kì. 21 Niŋ na, sariya ki i Kirinŋ wɔ tɔnwɔri ki sɔsɔ-a wa? Aayi! A niŋ ji-i kì, a sariya ji wuru wɔri-ri, nwɔ̀ a so konaŋ mwu-i, konaŋ wuru-ra so ji-i koŋ telimaan a sariya ki baraka ra Kirinŋ ɲaanfɛ. 22 Nka Kirinŋ wɔ wulu ki i ǹʼbi-a tu konaŋ bataa bijɛmatɔnŋ i. Niŋ ɲaan ki tɛ, Kirinŋ a tɔnŋ wɔri-i kani wɔ̀ bira, ŋì i niŋ wɔri-ra kpeeri tɛ, arɔɔ bilinabi ki baraka ra Yesu Kirisa ra. Bilinabi ki fa Kirinŋ a tɔnŋ wɔri-i finŋ wɔ̀ri bira 23 Yibɛɛ wuru sariya ki wɔ jonbi faan ki fɛ sun, waarinŋ wɔ̀ ru bilinabi ki na-ni sun kì. Yibɛɛ tu-i niŋ faan ki fɛ fɔ bilinabi ki waaci ki i na so. 24 Niŋ ki ra, sariya ki ji-i miŋ tu yibɛɛ ɲaannasuutɔnŋ, nwɔ̀ i yi bo ta-a Kirisa tɛ, nwɔma yibɛɛ i ji koŋ telimaan ni i Kirinŋ ɲaanfɛ bilinabi baraka ra. 25 Dɔnsaŋ bilinabi ki waaci ki i nmaŋ, yibɛɛ yi ɲaannasuutɔnŋ ki gbɛfɛ kili kì. 26 Sabu ábɛɛ fɔn ji-i Kirinŋ daŋ ni i, Yesu Kirisa bilinabi ki baraka ra. 27 Ábɛɛ wɔ̀ri bataa wu-i, á fa Kirisa ji-i finŋ tenŋ i, niŋ i miŋ tu ábɛɛ ntiŋ ɲaan ki shi la á sun miŋ tu jɛrɛbi. 28 Niŋ ki ra, Yawutu kiri fa shiya pyɛ kiri fɔn i tenŋ i, joŋ kiri fa jiyɛrɛtɛ kiri i ji tenŋ i, shuru kiri fa mari kiri i ji tenŋ i, sabu ábɛɛ bataa i tenŋ i Yesu Kirisa ra. 29 Ayiwa, a ábɛɛ ji Kirisa wɔ konanbi i, niŋ i ǹʼji-a tu ábɛɛ ji Aburahamu nupo ri niŋ fa ntiŋ kanishitɔnŋ ni i, ŋì i kɛɲɛ Kirinŋ wɔ tɔnwɔri ki wu ntiŋ tɛ. |
© Wycliffe Bible Translators, Inc.
Wycliffe Bible Translators, Inc.