Efɛsitɔnŋ kiri 2 - Jɔ Biibili ki

Ŋi i po san beŋ ki ru, ŋi i de ɲaninkulutɔnbi ki ru

¹ Ábɛɛ beenimaan ni wuru-i Kirinŋ ɲaanfɛ sun, sabu ábɛɛ wuru telibalibi ri fa bijɛ ri ma-a.

² Ábɛɛ wuru niŋ bi kiri ma-a miŋ tu ka juniɲa nu tɔnŋ kiri i ǹʼma-a ɲaan wɔ̀ tɛ, ŋì i kɛɲɛ ɲinijɛ kiri ŋununtiŋ sinaŋ ki dintɛ bi ki wu, ninwɔ̀ i baara ki ma-a kpeeri ciiru, nwɔ̀ri arì kaan-a Kirinŋ tɛ.

³ Yibɛɛ bataa wuru miŋ tu kíbɛɛ sun. Yibɛɛ wuru yi firi ki dintɛ bi jɛ kiri ma-a, yi i yi yɛri ciiru ɲakilila bi kiri ma-ni. Yibɛɛ ɲaan ki fa koŋ pyɛ kiri bataa wɔ wuru tenŋ i, niŋ ki ra, Kirinŋ wɔ tɔnkwulu ki kakan wuru-i ŋì i so yibɛɛ bataa sun sɛbɛ.

⁴ Nka Kirinŋ wɔ bidintɛbi sinaŋ ki baraka ra, ǹʼyɔ sunmakwulupatɔnŋ sinaŋ i.

⁵ Niŋ ki ra, yibɛɛ wɔ̀ri beeni wuru Kirinŋ ɲaanfɛ yɔɔ bijɛ kiri bira, ŋì yibɛɛ ŋmɛni-i Kirisa fan. Ábɛɛ á mwu-i Kirinŋ wɔ shɔɔrinŋ ki baraka ra.

⁶ Yibɛɛ fa Kirisa wɔ tenbi ki baraka ra, Kirinŋ yibɛɛ fa ntiŋ ŋmɛni-i yimaŋ fan, ŋì i yi sɔɔ yimaŋ fan kirinpɔlila mani narimaŋ kiri ru.

⁷ Kirinŋ niŋ shɔɔrinŋ ki ma-i yibɛɛ tɛ Yesu Kirisa bira, nwɔma konaŋ kiri i awɔ shɔɔrinŋ ki tɔ waaci naanna kiri ru, niŋ shɔɔrinŋ ki wɔ̀ gbɛ-i, ŋì i mwɔ.

⁸ Ábɛɛ á mwu-i Kirinŋ wɔ shɔɔrinŋ ki baraka ra áwɔ bilinabi ki bira, niŋ po ábɛɛ yɛrima kiri ru kì, nka Kirinŋ wɔ kafinŋ yɛ.

⁹ Ábɔɔ mabi tɔri dantenŋ niŋ ma ábɛɛ tɛ kì, nwɔma koŋ tɔri tenŋ fa a yɛri gbɛ kì.

¹⁰ Yibɛɛ i finŋ woo finŋ i, ǹʼbataa i po-a Kirinŋ gbɛ. Yesu Kirisa baraka ra, Kirinŋ yibɔɔ ɲaninkulutɔnbi ki faa-a mabi shɔɔrinŋ ni na, ŋì nini wɔ̀ri gbɛbili-i kabi fɔlɔfɔlɔ, nwɔma yi i na yìrì ma.

Bilinatɔnŋ kiri bataa i koŋ tenŋ i

¹¹ Ábɛɛ wuru ɲaan wɔ̀ tɛ fɔlɔfɔlɔ, á á ɲakilila bo niŋ tɛ. Ábɛɛ wuru dɔri-ra tu shiya tɔri ri, nwɔ̀ri Yawutu ri i kì. Ŋì i kɛɲɛ konanmini wɔ gbɛɛra baara mamaan wu firi ki ru, ábɛɛ wuru dɔri-ra tu sɔɔpeefɛbali li sɔɔpeefɛmaan kiri gbɛ.

¹² Niŋ waaci ki ru, ábɛɛ maŋ nari wuru Kirisa ra, lu wuru ábɛɛ gbɛ Isirayɛlidaŋ kiri kanfɛ kì, Kirinŋ a tɔnŋ wɔri wuru shɔɔrinŋ wɔ̀ri bira, ábɔɔ lu wuru nini nu kì. Ábɛɛ wuru ninkunŋ nmaŋ juniɲa ki ru, Kirinŋ bali li, gbɛbilimaŋ wuru nwɔ̀ri ra kì.

¹³ Nka ábɛɛ wɔ̀ri maŋ nari wuru Kirinŋ na, ábɛɛ myɛ ǹʼtɛ dɔɔ Yesu Kirisa cunŋ ki kɔnkɔlimaan ki bira.

¹⁴ Yibɔɔ ɲaanfɛfili ki i kila-a mìntiŋ na. Ntiŋ i ji Yawutu kiri fa shiya tɔri kiri ji tenŋ i. Ɲabi kwɔ wɔ̀ wuru yibɛɛ san-a yimaŋ na, ntiŋ a firi ki wɔri-i, ntiŋ i niŋ gwu po san nmaŋ.

¹⁵ Ntiŋ beŋ ki i sariya ki wɔ cinŋ bimaan kiri fa ǹʼwɔ bi gbɛbilimaan kiri baraka kɔ. Shiya fuuli kari i dɛbɛ ji shiya ŋunaŋ tenŋ i, fu i de kí faninmwuŋ.

¹⁶ Ntiŋ beŋ ki kpinkpisuu ki sun, niŋ i fu de kí fa Kirinŋ faninmwuŋ, kí i ji firi tenŋ i, tɛɛ ki i kɔ san kí faninmwuŋ.

¹⁷ Niŋ ɲaan ki tɛ, ntiŋ na-i ɲaanfɛfili wulu ki sunjo ábɛɛ mani narimaŋ nu tɔnŋ kiri tɛ, ntiŋ i ǹʼsunjo kpeeri tɛ, nwɔ̀ri myɛ-ɛ.

¹⁸ Sabu Kirisa bira, yibɛɛ bataa tenŋ tenŋ a so so-i yi Tiŋ Kirinŋ tɛ, Ɲiniwɔlinŋ tenŋ baraka ra.

¹⁹ Niŋ ki ra, ábɛɛ jɛ ri fa kɛniŋ tɔri ru tiiri kili kì, nka ábɛɛ fa Kirinŋ wɔ konanbi wɔlinŋ ki ji-i, miŋ tu kɛniŋ tenŋ daŋ ni, Kirinŋ wɔ kanindaŋ ni.

²⁰ Ábɛɛ ji-i miŋ tu fu sinaŋ, nwɔ̀ cɛ sɔɔ-ɔ Yesu wɔ cindaŋ kiri fa Kirinŋ wɔ cintɔnŋ kiri sun, Yesu Kirisa yɛrima ki i niŋ fu ki kwɔ jɔnɔ ki i.

²¹ Fu ki pyɛ ki bataa i amaŋ pa-a mìntiŋ na, ŋì i tan jɔrɔkɔ ji Kirinŋ gbɛ fu wɔlinŋ i, nwɔ̀ tan-i Ŋuntiŋ ki tɛ.

²² Ŋuntiŋ ki bira, ábɛɛ fa koŋ pyɛ kiri bataa de-i ámaŋ nu, á i ji fu wɔlinŋ i, Kirinŋ i nwɔ̀ ru Ɲiniwɔlinŋ ki bira.