Kɔlɔsitɔnŋ kiri 4 - Jɔ Biibili ki

¹ Ŋununtiŋ ni, bi wɔ̀ shɔ-i niŋ fa bi wɔ̀ fu-i, á nini ma-ni áwɔ joŋ kiri tɛ, sabu á ǹʼtɔ tu ŋununtiŋ ki bɛɛ ábɛɛ yɛrima kiri ra kirinpɔli ki ra.

Pooli wɔ nacinwulu kiri

² Á á cɛrukɔli tu Kirinŋ nafɛ ki ra, á i baraka bi-ri ǹʼtɛ kusɛbɛ.

³ Á Kirinŋ nafɛ-ri yibɛɛ yɛrima kiri tɛ sɛbɛ, nwɔma ǹʼyɛri ki i ye yibɛɛ tɛ, ŋì i ɲaan shɔɔrinŋ wɔri yi tɛ, yi i so wulubi-i, yi i Kirisa gonto ki sunjoka shɔ konaŋ kiri tɛ, ninwɔ̀ bira, míŋ i nkasu ru kwumaŋ.

⁴ Á Kirinŋ nafɛ-ri míŋ tɛ, ŋì a ji ɲaan wɔ̀ tɛ, míŋ i so niŋ gonto ki sunjoka shɔ-i, miŋ tu míŋ kakan-i ŋí i ǹʼsunjo ɲaan wɔ̀ tɛ.

⁵ Á tiri ɲakilitinbi wu taannatɔnŋ kiri kanfɛ, a Kirinŋ waaci wɔri á tɛ, á i baara shɔɔrinŋ ma.

⁶ Kirinŋ yɛrima ki ábɛɛ dariwulu ki faa awɔ shɔɔrinŋ ki fa a nɛŋ ki na waarinŋ bataa ru, nwɔma á i so koŋ bataa dariwulu lupwuluka ɲaan shɔɔrinŋ ki tɔ-i.

Pooli wɔ coolinŋ nakɔɔra ki Kɔlɔsitɔnŋ kiri tɛ

⁷ Yibɔɔ wɔshuru byii ki, ninwɔ̀ i yi tindaŋ Tisike, yibɛɛ gbɛ faa-a nwɔ̀ ru, ntiŋ i ji yi baara mashi i, Ŋuntiŋ ki tɛ, niŋ a ta míŋ bi ki bataa ɲaanbi ábɛɛ tɛ nmaŋ.

⁸ Míŋ i ntiŋ cin ta-a ábɛɛ tɛ niŋ ki ra, nwɔma ábɛɛ i so yibɛɛ ra bi tɔ-i ntiŋ gbɛ, á ɲakili ki i sɔɔ tenŋ sun.

⁹ Míŋ i Onensimu bo ta-a ntiŋ fan, yibɛɛ gbɛ faa-a ntiŋ nu, ntiŋ i ji yibɛɛ tindaŋ byii i, nwɔ̀ po-i ábɛɛ ru. Bi finŋ woo finŋ i kwumaŋ, kí a ta niŋ bataa ɲaanbi ábɛɛ tɛ.

¹⁰ Arisitariki i ábɛɛ co-a, ninwɔ̀ i míŋ fan nkasu ki ru kwumaŋ. Barinabasi wɔ jiilinŋ Maraka i á co-ri sɛbɛ. Míŋ mìntiŋ ki wulu bi wuru ábɛɛ tɛ, ńʼtu ntiŋ na so á tɛ nmaŋ, ńʼtu á i ntiŋ ŋununafuka shɔ.

¹¹ Yesu tɔ wɔ̀ i dɔri-ri tu Yusitusi, niŋ i ábɛɛ co-a sɛbɛ. Niŋ shuru kiri bantenŋ i bilinatɔnŋ ni i, wɔ̀ri po-i Yawutu kiri ru, kí i baara ki ma-ni míŋ fan Kirinŋ wɔ Masabi ki bira. Kí cunadibi sinaŋ wɔri-i míŋ tɛ.

¹² Epafirasi, ninwɔ̀ i ábɛɛ bɛɛ ɛ, niŋ i ábɛɛ co-a sɛbɛ. Yesu Kirisa tɛ baara matɔnŋ sɛlɛsɛli yɛ. Ntiŋ cɛrukɔli-i Kirinŋ nafɛ ki ra ábɛɛ tɛ waarinŋ bataa ru, nwɔma ábɛɛ i tu Kirinŋ wɔ saa ki sun, á i ta jɛŋ bilinabi ki ru, á i ji Kirinŋ dintɛ bi kiri tɛ bi bataa ra.

¹³ Míŋ a so nwɔ̀ bi-i ntiŋ bi sun ábɛɛ tɛ, niŋ i tu ábɛɛ fa Lawodisetɔnŋ kiri fa Irapolisitɔnŋ kiri bi ki i ntiŋ tɔnnabi i kusɛbɛ.

¹⁴ Luki, yibɔɔ dɔɔtɔri byii ki fa Demasi i ábɛɛ co-a sɛbɛ.

¹⁵ Á yɔɔ coolinŋ wɔri yi tindaŋ Lawodisetɔnŋ kiri tɛ, á i Nɛnfa co, niŋ fa bilinatɔnŋ wɔ̀ri i arì rakɔli-la ntiŋ wɔ kaniŋ ki sun, á i nini co sɛbɛ.

¹⁶ A ábɛɛ ta ka sɛbɛ ka kali á tɛ, á ncusun ŋì i ta kali Lawodise sɔɔta ki ru bilinatɔnŋ kiri tɛ, niŋ fa mɔ́ɔ́n sɛbɛ wɔ̀ a yiri nini gbɛ saa fan, ábɛɛ yɛrima kiri i niŋ kali á tɛ sɛbɛ.

¹⁷ Míŋ tu, ŋì i bi Arisipi tɛ, tu Ŋuntiŋ ki cinŋ wɔ̀ biye-i ntiŋ gbɛsun, tu ntiŋ a ɲakili tu niŋ na, ntiŋ i ǹʼmaka shɔ.

¹⁸ Míŋ Pooli i ábɛɛ co-a, míŋ yɛri ki gbɛ ta i ka sɛbɛdaŋ kari dɔnsaŋ. Á á ɲakili tu ǹʼna, tu míŋ kɔlimaan a nkasu ru kwumaŋ. Kirinŋ shɔɔrinŋ ma á tɛ.