Kɔlɔsitɔnŋ kiri 2 - Jɔ Biibili ki

¹ Míŋ i kari wɔ̀ tan-a, míŋ i ǹʼtan-a ábɛɛ fa Lawodisetɔnŋ kiri fa konaŋ kiri bataa bira, nwɔ̀ri ɲaniŋ tu míŋ na sun kì. Míŋ i ǹʼtɛ ábɛɛ i niŋ kari ki juuka ki tɔ.

² Míŋ i niŋ bataa ma-a, nwɔma nini i cunadibi kila, kí i fu tenŋ sun bidintɛbi ki baraka ra, Kirinŋ i shɔɔrinŋ ma kí tɛ, ŋì i ɲakilitinbi shɔɔrinŋ wɔri kí tɛ, kí i so awɔ gonto radumaan ki tɔ-i, ninwɔ̀ i Kirisa.

³ Konanmini i Kirinŋ wɔ ɲakilitinbi ki fa ǹʼwɔ bitɔbi ki bataa kila-a Kirisa ra.

⁴ Míŋ i ka bi-a ábɛɛ tɛ, nwɔma koŋ tɔri fa na ábɛɛ ɲaannafini wulu sunnɔni ni wu kì.

⁵ Hali míŋ ji ábɛɛ fan firi ki ra kì, míŋ i ábɛɛ fan ɲini ki ra, niŋ fa míŋ ciirudimaan yɛ waarinŋ bataa ru, ŋí i ǹʼja tu ábɛɛ fumaan a kusɛbɛ, niŋ fa á cɛrukɔlimaan i ji-i bilinabi ki ru Kirisa ra.

Ɲaninkulutɔnbi wɔ̀ i kila-a Kirisa ra

⁶ Ábɛɛ ji-i Ŋuntiŋ Yesu Kirisa tɛ ɲaan wɔ̀ tɛ, á tiri kɛɲɛ niŋ wu.

⁷ Á ji Kirisa ra miŋ tu jirinŋ kanaŋ, nwɔ̀ri de-i fwuniŋ nu. A ji miŋ tu fu, nwɔ̀ cɛ sɔɔ Kirisa sun, á i á cɛrukɔli bilinabi ki ru, miŋ tu ábɛɛ kini-i ǹʼna ɲaan wɔ̀ tɛ, niŋ fa áwɔ baraka bi ki i mwɔ Kirinŋ tɛ.

⁸ Á á yɛri paka tɔ, nwɔma koŋ fa na á fɔni konanmini wɔ ɲakilitinbi wulu li wu kì. Niŋ ɲakilila ki cɛ sɔɔ-ɔ konanmini wɔ ladaŋ ni, fa juniɲa nu finŋ gbɛ wɔ̀ gbansanŋ ni sun, ǹʼcɛ sɔɔ Kirisa sun kì.

⁹ Sabu Kirinŋ nafaamaan ki ji-i firi i, Kirisa ru, ŋì i sɔɔ ntiŋ nu.

¹⁰ Mìntiŋ i ŋununtinbi kiri fa faantinbi kiri bataa ŋununu, ábɛɛ i finŋ bataa kila-ri, á i pyii ǹʼna á fa mìntiŋ wɔ tenbi ki baraka ra.

¹¹ Ábɛɛ sɔɔ-ɔ peefɛ á fa mìntiŋ wɔ tenbi ki baraka ra. Konanmini gbɛ niŋ ma kì, nka Kirisa i sɔɔpeefɛrama wɔ̀ ceeli-la, niŋ yɛ, ninwɔ̀ kɔri ki i tu ábɛɛ po san á firi ki dintɛ bi jɛ kiri ru.

¹² Ábɛɛ fa Kirisa kwuu ki ye-i ámaŋ fan á wu shikaŋ ki ru, á i ŋmɛni ntiŋ fan, sabu ábɛɛ bili-i Kirinŋ wɔ sotinbi ki ra, ninwɔ̀ ntiŋ ŋmɛni-i.

¹³ Ábɛɛ beenimaan wuru-i áwɔ bijɛ kiri fa á firi ki sɔɔpeefɛbali ki bira. Nka Kirinŋ ábɛɛ fa Kirisa ŋmɛni-i ámaŋ fan. Ntiŋ i yibɔɔ bijɛ kiri bataa tu yi tɛ.

¹⁴ Sɛbɛ tanmaan wɔ̀ wuru kiti ki fɛɛn-na yibɛɛ sun yɔɔ sariya ki limaan kiri bira, Kirisa niŋ ciriki san-i nmaŋ a beŋ ki wu kpinkpisuu ki sun.

¹⁵ Ntiŋ faantiŋ kiri fa ŋununtiŋ kiri wɔ sotinbi kiri li-i, ntiŋ i kí ji yɛtan bo ǹʼsun finŋ ni i, koŋ bataa ɲaanna, awɔ so kilamaan ki baraka ra kpinkpisuu ki sun.

Bilinatɔnŋ ki fa ladaŋ kiri bi ki

¹⁶ Niŋ ki ra, á fa ncusun koŋ i á ji koŋ pɔlimaan ni i, nufinŋ walima mwunufinŋ bira kì. Á dumiŋ fa ncusun koŋ i á ji koŋ pɔlimaan ni i, ɲaannabyɛ kiri fa ɲɛ ŋunaŋ kiri fa Nufaan jibi kiri gbɛbi ki bira kì.

¹⁷ Niŋ bi kiri bataa wuru bi na wɔ kiri miniŋ bantenŋ i, nka yìrì sɛlɛsɛli ki i Kirisa.

¹⁸ Koŋ wɔ̀ri i arì ji-a koŋ sunjɛrimaan ni i, kí i mɛlɛkɛn kiri gbɛ-ri, á fa ncusun nini tɔri i á firi kilɛn kì. Niŋ koŋ kwuru kiri i arì gbɛ bili-la arɔɔ finŋ jamaan kiri sun, kí i arì yɛri ragbɛ-ri niŋ konanmini ciiru ɲakilililabi gbansanŋ kiri wu.

¹⁹ Kirisa wɔ̀ i finŋ kiri bataa ŋununtiŋ ki i, finŋ ki ŋuniŋ ki, kí arì kɔli tu-a niŋ na kì. Bilinatɔnŋ kwuru kiri, nini wɔ̀ri i firi ki i, niŋ i gbɛ-a ŋì i kɛɲɛ Kirinŋ dintɛ bi ki wu, ŋì i da amaŋ na mìntiŋ baraka ra, miŋ tu wɔdamaŋ kiri fa fɛli kiri da-i arìmaŋ na ɲaan wɔ̀ tɛ.

Ɲaninkulutɔnbi wɔ̀ i kila-a Kirisa ra

²⁰ A ábɛɛ ji beeni Kirisa fan, ábɔɔ lu ka juniɲa ka ru tanfinŋ gbansanŋ kiri ra kili kì. A niŋ ji sɛli i, nfɛnŋ na ábɛɛ i ncusun-ni kí i ladaŋ kwuru kari sɔɔ-ri ábɛɛ sun? Tu :

²¹ « Fa ka shi kì dɛ! Fa ka nɛɛ kì dɛ! Fa myɛ ka ra kì dɛ! »

²² Niŋ finŋ kiri bataa i nufinŋ ni i, a yìrì nu kɔ, yìrì so-a ji-i finŋ tɔri kili kì. Niŋ bi kiri bataa cɛ sɔɔ konanmini wɔ kalinŋ fa konanmini wɔ ladaŋ ni sun.

²³ Sɛli ki ra, yìrì fa ɲakilitinbi bi ri po-i, sabu yìrì i niŋ koŋ kiri wɔ yɛri wɔri wulu fa sunjɛribi, niŋ fa kí firi ki kulu wulu bi-a. Nka, tukulu tenŋ yìrì ra kì, duu konanmini firi dintɛ bi jɛ ri.